61Ngan work karpam iiy-iiyanan God.antan, yaa, puth ngan ke'-paal thawanan niiyant; nil God.an-a, ngangk minangam iiy-iiyan niiyant, niiy puth yaan thonakaman ke' ngaantam-ngeeyān nunang. Niiyiya kan-kanam ngangkangan pi'-pi'ān nunang God.an. 2Nil God.an thawa:
“Aak keenkanamana, ngay aakan kan mi'angan ngayan kaa'-piichanathāng niiyangana.
Aak anan wamp ngulan-a, ngay niiyang ngeeyangan niiy ngatharakan thaw-thawana.
Puth ngayiya kan ma'-aathangan niiyang, a' kaa'-piichanathangan niiyang.”
Nil God.an yimanangan thaw. A' niiy puth inan ngeeyān ngayan thawāng ngul niiyanta: aak yimanang ngulan-a, nil God.angan min-min ma'-aathow niiyang niiy wee'-wee'anangan thawān nungant ma'-aathanakan niiyang. Nil God.an inman kuup-kuupan niiyanta kaa'-piichanathanakan niiyanga!
3Ngan anman paath-paathan ke' minam anman iiy-iiyāna, ngan puth kaangk ke' wiyangan thathayn work nganttam ke' way yimanangan. Puth amanamana than God.an waa'iythan nunang aak-ya'anga. 4A' ngeen nathwey wampow ngant-a, puth nganiya kaangk meenathān thant ngan kan-kanaman monkan-wak-wakanan nunang God.an a' work thampan iiy-iiyanan nunganta. Aak way wampan ngant-a, puth ngananiya aak thaampanan a' ke'-ngoongkam God.an monkan-wak-wakanan nunang. 5Than pam wanchangan-a, piik-piikin nganangwey, a' puth-a, jailang wunpin nganangwey, a' pam wanch yota wunthar wichwin ngant ngangk kul thampanwey. A' puth ngananiya work yot iiy-iiyanan, a' wiyiya ngan ke'am weepan wunanan ya'a, work nganttam puth yota iiy-iiyananwey, a' putha ngan wiyiya may ke'anang wunananwey. 6Niiy kan thathaniy ngananga ngan kan-kanam work iiy-iiyanan God.antan, puth anpalan ngananiya minam paththam iiy-iiyananwey, ngan inangan-a, kan-kanam paththam wik God.antaman minam ngaantam-ngeeyanana. Ngant aak wayan wampan-a, nganan aak thaampanan, a' ngan ke'am eenchanan woyan min God.antam anpalan, ya', a' nganiya ngangk minang iiy-iiyanan pam wanch wiyantan. Ngeen-Wiy Min God.antamana ngangk nganttamang in pi'-pi'anan nunang a' ngan kan-kanam kaangk paththam wunan pam wanch wiyantan. 7Ngan pam wanch wiyantan wik God.antam anman waa'-waa'anan a' nil God.angan ngangk thayanathan nganang work nungantan iiyān. A' nganiya God.an minam monkan-wakanan nunang, a' niliya ngangk thayanathan nganang wiyangan ke' yipam thaachayn nganang way yumpanak, oony wayan ke' wik ngeeyān nunang. 8Wiyiya pam wanch wiyangan min waa'antan nganang, puth wiyanganiya ep ak-akantan thak nganangwey, a' wiyiy thana wik way anangan paththam thawantan waa'antan ngananganwey, puth wiyiya wiyangan thaa'-kuumpantan nganang. Than wiyiy thawantana ke' ngan wik uuyamanana, an ya'a, an kan-kanam paththam wik nganan waa'-waa'anan God.antaman. 9Puungk wiyiy pam wanchang waa'antan nganang than ke' nganang ngoongk-ngoongkam yimanangan, an puth ya'a, than wiyangan ep minam thiichantan nganang. Puth ma'-yotamweya wiyangan way yump-yumpin nganta, piik-piikin thak ngananga, ngan war'am uth-uthaman; puth ngan inman yippak man-yethamanwey. Puth wiyiya nil God.angana aak way kuchan ngantwey yaan, ngan yipam ngaantam-ngeeyān nunang, puth ngananiya ke'am uthaman ya'a. Nil kaangk thayan yumpow nganang God.angan ke'-paal nil aak way anangan kuch-kuchan ngant. 10Wiyiya ngan ngangk way iiy-iiyanan, puth an-aniyangan thamp ngan ngangk minangam iiy-iiyanan. Nganiya wukal many thonakam pi'-pi'ananwey, a' puth-a, yuk way min ko'alam anman pi'-pi'ananwey, nganwey ma'mangkiy ya'a, puth nil Ngeen-Wiy Min God.antam alangan ep ke' ma'mangkiy yumpan nganang yimanangan, yuk way min ya'a, in nil-nil iniya. A' nganiya ma'-yotam ngangk min yump-yumpanan thanang pam wanch wiy anangan puth ngan wik God.antaman waa'-waa'anan thant.
11Ngurp ngatharam niiyalang aak Corinth.angan wunaniya, ngan wik kan-kanam paththam thaw-thawanan niiyanta, ngan ke'am wik thenchanan niiyantam ya'a. Ngan kan-kanam paththam ngangk pal pekkuwaman kaangk wunanan niiyantwey. 12Ngan ngangk wonyam ke'am kaangk wunanan niiyant, ya', puth niiyiya ep-paththam ngangk wonyam kaangk wunaniy ngantwey. 13Ngay wik inan thawang niiyant ke' puk ngatharamakanwey: niiyan kaangk paththam wunān ngant ke' ngan yimanangan kaangk wunanan niiyant.
Niiyiya Ke' Ngotan Ngoonchān Thanttangan Wayan Yumpantan
14Niiy ke' waa'-enchān thanttang al-alantang than ke'aman God.an ngangkangaman pi'-pi'antan nunang. Puth pam wanch min anangan want-wanttak karpam work iiy-iiyiythan pam wanch way al-alantangana? An ya'a, karpam ke' work iiyiythan, ya'a. Than pam wanch God.an ngangkangam pi'-pi'antan-a, a' puth than pam wanch anangan wayan yumpantan-a, than karpam ke' ngaantam-ngeeyiythan kuchek thanttamangan ya'a. Aak woyan minana an ke' aak kinch yimananganwey, puth woyan way anana an ke' aak ngaa' yimananganweya, an puth ngamp kan mee'miy inana pul kincha putha ngaa'ana pul karpam ke' wuniypul ya'a. 15An ngul pul Christ.ang a' oony way alangana ngangk minangam ngul iiy-iiyowpul pulantakaman ey? An ya'a. Kan niiy in ngeeyāna, nil wee'ang nathan God anman ngangkangaman pi'-pi'an nunanga a' putha nil pam thonana woyan wayan wak-wakan oony way alantamana, ngul pul kuchekangan karpam ngaantam-ngeeyiypul ey? An ya'a! 16Aawuch ngench thayan piip God.antamangana ngamp God anman thaa'-kuumpāmpana, yuk wayanang anangan ya'a. Puth ngamp pam wanch God.antamana ngampiy ke' aawuch God.antamana, a' niliya man-yetham anman aak umpuyam wun-wunana! A' nil wik inangan thaw:
“Ngay ngangkang pam wanch ngatharamantang wun-wunang,
putha ngay thanttang angman iiy-iiyang.
Ngay God thanttama, a' thananiya pam wanch ngatharam.”
17A' nil pam wanch nungantamakan thawan,
“Niiyiya ke' iiy-iiyān pam wanch al-alantangan than ke'aman ngangkangan pi'-pi'antan ngayang,
niiy yaarkathwun niiyantakaman thanttam al-alantamanwey.
Puth niiyiya ke' ngotan ngoonchān thanttangan wayan yumpantan.
A' amanamaniya ngay ngangk minangam umang iiyāng niiyant
a' aak ngatharamakan ngoonchathāng niiyang.
18A' ngayiya piip niiyantam iiy-iiyānga,
puth niiyiya puk ngatharam iiy-iiyān.
Nil piip God.an wik yimanangan thaw, nil thayan paththamana.”