Nganiya Ke'a Ngangk Wayan Wunāna Putha Ke' Wantān Nunang God.ana
41Nil God.an ngangk min paththam iiy-iiy ngant a' niliya work inan thee' ngant, wik min nungantaman waa'-waa'ān thant wiyantan. Puth nganan ke' ngangk way iiyin, workan too ke' wantinwey. 2Ngan way anangan ke' yumpān ke' than pam wanch way al-alangan thenchanam thakan yump-yumpantan, thanan puth way paththam yumpantan. Puth nganiya ke'am muukamathanan thanang pam wanch anangan ya'a, a' putha ngan ke'am way-way thampan thaa'-aath-aathanan thanang ya'a. Mee' God.antangana ngan wik min-min waa'anan thant, wik anman kan-kanam lat ngench thayanangan waa'an God.antaman, anman thonakam, wik thon-thonan ya'a. Nil wee'ang nathanwey wik ngeeyow nganangan-a, an paththam nil thiichowa wik anangan nganan wik waa'-waa'anan God.antaman kan-kanama. 3Puth than wiyanganiya ke'am min-minan ngaantam-ngeeyantan kuchek thanttamangan ya'a, wik nganan waa'-waa'anan thant. Than pam wanch il-ilangan thana ngangkangan ke'am God.an pi'-pi'antan nunang a' puth thaniya woyan wayan wak-wakantan mulakanwey. 4Nil anan oony wayan moom thanttam pam wanch way al-alantamana, an ke' nilam kuchek waap thanttaman ma'ang maakan, ke' yipam minam ngaantam-ngeeyayn wik min Christ.antamana, a' putha ke' thiichantan nil Christ.an min-minam paththam nilaniya. Puth nil Christ.ana, an ke' God anmana. An ke' nil oony way alangan ma'ang maakan nganthan ke' yipmam parkow ngangk thanttamangan. 5Ngan wik God.antam waa'-waa'anan niiyant. Nganan ke' thawanan niiyant niiy nganangan monkan-wakān ya'a, puth anan niiy Jesus Christ.an ep monkan-wakān nunang, nil an ep moom niiyantam iiyow. An ke' ngan work iiy-iiyanan niiyant niiy yipmam thiichān nunang Jesusa. 6Aak keenkanamana, aak inan ke'aman yippak wun-a, nil God.an thaw, “Ayyang, nganth parkowa aak ngaa'angana!” Nil God inman ngangk ngamparangan ngoonchan, an ke' nil nganth parkan ngangk ngamparamangana meenathow ngampar nil Jesus.an want-wanttakan nila. A' ngamp Jesus ngulan thathanamp-a, yaa, ngamp thiichanamp nil God.an min-minam paththam a' putha wuut pi'an paththam nilaniy thamp.
7Ngan ke' paath way yimanangana, puth nil yuk min-minam paththamana in pek ngangk nganttang wun-wuna, puth nungkway ngan pam wanch min ya'-a, nil God.an ngangk nganttamang wun-wunan. Nganan mee'miy ngul nil God.an wuut pi'an paththam a' putha mina. Nilam thonamang thayan yumpan nganang, nganan nganttakam ke' thayan yumpwin ya'a. 8Aak wayan thaa'-thaa'an wampan ngant, puth ngananiya epa ngangk way-wayamana ke' wunin; wiyiya ngan ke' mee'miy ngan want-wanttak ngulan iiyin, ya'a, puth nganan epa woyan min God.antaman ke' wantin. 9Than pam wanch yotangan thaampantan nganang, puth nil God.angan ke' wantan nganang, ya'a. Wiyiya than piikantan nganang a' ngan aakang keekanan, an puth thanana ke' mulathiythan nganang ya'a. 10-11Than ma'-yotaman ke' way-wayathiythan ngananga, amanaman ngan puth Jesus.an monkan-wakanan nunang. Than ma'-yotam anman ngaantam-ngeeyantan ke' mulathanak nganang ke' Jesus anman than nunang ngangk-wayangam kal-kalin nunang aak-aakanakaman than mulathin nunang ngulana. Puth nil Christ.angana ngangk thayanathan nganang ngan ke'-paal aak thaampanan, yaa, puth wiyangan thathantan nganang a' ngaantam-ngeeyantan ngul nil Christ.an man-yetham ngul wun-wunan a' putha puy-puyam anman ma'-aath-aathan ngananga! 12Ee'a, than pam wanchangan kaangkwey mulathayn ngananga, puth ngan wik min God.antam anangan waa'-waa'anana, puth kanwey, niiy kanam wik minan ngeeyana puth niiyiya ngangkangam ngul pi'aniy nunang a' niiyiya aak umpuyam wunān ngul piip God.antang.
13Aak keenkanamana, nil David.angan wik inangan ump lat ngench thayanangan, “Ngay God.an kan-kanam ngangkangam pi'-pi'ang nunang, yaa, puth ngay ngul wik nungantam waa'-waa'ang pam wanchantan.” Puth nganan kan-kanam paththam God.an ngangkang pi'-pi'anan nunang thampa ke' nil David.angana ngangkangam pi'-pi' nunangana, yaa, puth ngan thampana wik God.antaman waa'anan pam wanch wiyantan. 14Nil God.angan mulaman ekath nunang Lord Jesus.ana a' niliya man-yetham ngul iiy-iiyan, nganan puth kan mee'miy nil mulaman ekathow nganang thampwey. Nil God.angan wampathow nganang a' putha niiyang thama a' thanathow ngampang nungantang angman. 15Ngan puth work tha'iy iiy-iiyanan, a' than wiyanganiya way yump-yumpin nganta, an puth kana, than makam way yumpin ngant, puth nganan kaangk niiyan monkan-wakān nunang Christ.ana. Than yotangaman monkan-wakiythan nunang Christ.an-a, an puth yotamana thankyou thawiythan nungant God.antan, a' putha thaa'-kuumpiythan nunang nil puth wuut pi'an paththam a' putha min-minam paththam iiy-iiyan thanta.
Ngamp Ke'-Ngoongkam God.an Ngangkang Pi'-Pi'āmpana
16Yaa, puth ngananiya ke'a ngangk wayan wunān putha ke' wantān nunang God.ana. Kemp nganttamana way ngul wunan thinhan way-wayama, puth ngangk nganttaman ya'a! Nil piip God.an ma'-yotam nganttang anman iiy-iiyan ma'-aath-aathan nganang ngangk thayanam yipam iiy-iiyān. 17Aak wayan ma'-yotam wampan nganta aak inganwey puth yaan thonakam aak way anangan wampan ngant aak otangakam anmana, puth puy-puyaman ya'a. Ngul-ngulana ngananiya ngangk aak umpuyam God.antang wun-wunānwey! Aak God.antam inaniy-a, min-minam paththam ngul wunow ngampara! An min paththam ke' aak wiy yimanangan ya'a! 18Puth ngan piip God.an ngaantam-ngeey-ngeeyanan nunang putha aak nungantaman thama, puth yuk way min aak imanaman yaam ke' ngaantam-ngeeyān thanang, ya'a. Ngan yuk way min inangan kan thath-thathanana, puth ngulana wayamantan, min anman yaam ke' wuniythan ya'a. Ngamp God.an ke' thathimp nunang putha aak nungantam thampan, puth an ep-paththam ke' wayamiy ya'a aak umpuyangam wun-wunow.