Woyan Nyiingkanam God.antamana An Min-Minam Paththama
31Niiy nath ngaantam-ngeeyaniy ngan ke' ulp-ulpanang waa'-waa'anan niiyantan work nganttamana. An ya'a, niiy yimanangan ke' ngaantam-ngeeyān ngananganweya. Than pam teachers wiy anangan ep letter tham wampantan niiyant, thanttam pam pi'an al-alantaman. Than letterangan waa'antan thanang thanan work minam iiy-iiyantan. Puth ngananiy-a, thant wiyantan ke'am thawanan letterangan umpayn nganangan waa'ayn, ya'a, nganan letter tham ke'am wampan, ya'. 2Niiyaman ep-paththam ke' letter yimanangan iiy-iiyaniy nganangan wik waa'-waa'aniy, puth than pam wanch wiyangan kan thathantan niiyang niiyan ngangk piip ngamparamant ngulan thee'an puth wik al-alantaman nganan waa'-waa'an niiyant. A' ngan puth kan mee'miy an kan-kanaman. 3Niiyaman ke' letter yimanangan iiy-iiyaniy nil Christ.angan ump, ngan puth niiyant wik minan kan waa'an. Nilan puth Christ.angan yuk penangan ke'am umpan, a' puth nilan kunttow pampang ke'am umpan ke' aak keenkan ump-umpina, ya'a. Inaniya, ke' yimananga, nilan ke' pam wanchantang ngangkang letter umpana, puth nilan Ngeen-Wiy Min God.antaman kuch ngangk ngamparamangan wunow, a' thaa'-aath-aathow ngampang. Piip God ngamparaman nil aak umpuyaman wun-wunan.
4Ngan wik inangan waa'an puth ngan kan-kanam God.an thiichan nunang nil kuch nganang work iiyān nungant. Wik inaniya, nilam Christ.angan waa' ngant. 5Puth ngan-nganamana work minam ke' iiyin God.antan, an nil ma'-aathan nganang a' putha thayanathan nganang. 6Nilan ma'-aathan ngananga, nganan yipam wik niiyant ngul waa'ān wik inangan: nil kaangk kaa'-piichanathow niiyangwey, putha nil kaangk thampanga Ngeen-Wiy Min nungantamana kuchow ngangk niiyantamangan wunow. Wik inan nyiingkanam nilan kaa'ngak ngampang, Moses alantaman nil-nil wik thayan nilan umpa. Aak keenkanama wik thayan Moses.antamana ke'am minam pi'-pi'in ya'wey, than kan mee'miy than pam wanch wayanangan iiy-iiyin-a, an than uth-uthamayn ngulan anpalan than wayan yump-yumpin. Puth yimanang ngulana nil God.angan kaa'ngaka nil Ngeen-Wiy Min nungantaman kuchow ngampar ngangk ngamparamangan wun-wunow, ngamp yipam ngangk aak umpuyam wunāmp nungantang.
7Aak keenkanamana nil God.angana wik thayan nungantam anangana kunttowang ump thanang, a' amanamaniya nil pam Moses alantan thee' ngul. Nil Moses.angan kanan uw wik thayan God.antaman-a, kaa'wal nungantamana park-parka, puth nilan wik thaw-thaw God.antana. Than pam wanch Israel.amana ke' kaangk yaaman thath-thathayn nunang Moses.an kaa'wal nungantamana an yaam park-park, mee' mungk-mungk thanang, puth anpalaniy-a, ya'-ngul ween. In yimanangan nil God.angan meenath wik thayan nungantaman min paththam. Puth pam wanchangan wik thayan anangan ngeeyin-a, puth than mee'miy than uthamayn ngulana puth thanan pam wanch way-wayam paththam iiy-iiyin. 8-9Puth nil God.angan Ngeen-Wiy Min nungantaman kuch ngangk ngamparamangan yipam wunow, nil ke' yipam kuchow ngampang aak way aakanakan, puth nilana kaa'-piichanathow ngampang a' putha min waa'ow ngampang. Puth amanamana ngamp kan-kanam ngul mee'miy paththam nil God.an kan-kanam paththam wuut pi'an a' putha kan-kanam thayan paththam niliya, ke' pam wiy yimanangan ya'a, an nil-nil min anman! Ngamp mee'miy tham wik thayan nil Moses.angan ump-a, an min paththama. Puth than pam wanchangan wik thayanan minam ke'am pi'-pi'in, puth nanpalan uth-uthamantan. Puth woyan nyiingkanaman-a, wik Christ.antaman-a, an min-minam paththam. Nil God.angan ma'-aathan ngampang wik nungantam nyiingkanaman ngeey-ngeeyāmp a' puth nilan kalow ngampang nungantang wunāmp aak umpuyaman. 10Aak keenkanamana, pam wanchangan ngaantam-ngeeyin wik thayan anangan God.antaman nilan thee' Moses alantana, an min thama a' pi'an thampa. Puth ngamp inan thathanamp woyan nyiingkanama God.antamana inan min-minam paththama a' putha wuut pi'an thampa, puth wik thayan keenkanamana an ke' ya'-ngul ween. 11Nil God.angan wik thayan keenkanaman yaan thee' thant pam wanchantan, aak umpuyamakan ya'a. Wik thayan anan min paththam thant al-alantan keenkan wunin. Puth nil God.angan wik nyiingkanam Christ.antaman thee' thant pam wanchantan aak umpuyamakan. Than pam wanchangan wik nyiingkanamwey konangam pi'-pi'iythanwey-a, yaa, thananiya aak umpuyam God.antang wunayn. Than yaanan ke' nyiiniythan nungantangana, ya'a, aak umpuyam wunayn nungantanga. Puth wik nyiingkanaman min paththama, an wik thayan keenkanaman chil-chila.
12Yaa, ngan kan mee'miy wik anangan min-minam paththam, a' putha ngan ke' ngul-nyaa'an wunān, ngan ngangk thayanam waa'-waa'anan. 13Ngan ke' Moses yimanangan ya'a. Nilan kaa'wal nungamang ngookangan kang, nganthan ya'-ngulan ween than pam wanch Israel.amana ke' yipam thathayn nunangana. 14-15Puth pam wanch Israel.amana an than kuchek thayan iiy-iiyin, wayamin thak, Moses.an ke'am wik ngeeyin nunang a' putha than ke'am min-minan ngaantam-ngeeyin wik thayan God.antaman ya'a. Aak inan yimanang thampa wunan thanan wik ngench thayana lataman wichantan, wik nil God.angan waa' Moses.antan, a' wik wiy anangan God.antama keenkan umpin, puth than ke'am min-minan ngaantam-ngeeyantan. An than ke' ngookang kangwuntan kuchek waap thanttamana. Puth thanweya min-minan ngangkangam pi'iythan nunang Jesus Christ.anwey-a, putha ngangk punch-aakaman thee'iythan nungantan-a, an ep-paththam wik min God.antaman min-min ngul ngaantam-ngeeyiythana. 16Ngampweya koyaman weentimp nungant Lord.antan woyan way ngamparam amanaman-a, yaa, nilaniya ma'-aathiy ngampang wik God.antaman min-minam ngul ngaantam-ngeeyimp thanang. 17Ngay anan waa'-waa'anga Ngeen-Wiy Min God.antaman. Nil Ngeen-Wiy anan nathwey ngangk ngamparangan wun-wuniywey-a, nil anan ngangk ngamparamana pachathow way ngampan yumpamp amanamana, ngamp yipam ngangk minam ngul iiyāmpa, ke'-ngul yipam moom way alantangan iiyāmp. 18Ngamp ke' pam wanch anangan aak keenkanaman wunin yimanangan ya'a kuchek waap thanttaman ke' ngookang yimanangan kang-kanginwey puth than ke'am min-minan ngaantam-ngeeyin paththam, ya'a, ngamp Christ.an ep-paththam minam engkanang ngaantam-ngeeyanamp paththam, nanpalan nil Ngeen-Wiy Min God.antamana ngangk ngamparangan wunan, nilaniya puy-puyam thaa'-aathan ngampang God.antama, yaa, ngampaniya putha puy-puyam ngul weenanamp ke' nil anman Goda.