21Yaa, ngay ngaantam-ngeeyang ngay putham ngulan wampāng niiyantwey-a, ngay ke' waking niiyang, ya'a, ngangk wayan ke' yumping niiyangweya. 2Puth ngaywey ngangk way yumping niiyangan-a, ngul nil wee'ang ngayanganiy ngangk minan yumpowa? Ya'-ya'ama! Niiy thamp ngayang ke' ngangk min yumpin, ya'a, puth niiy thampana nath ngangk way thamp iiy-iiyān. 3Ngay ke' wamping niiyant-a, puth ya'a, ngay puth lat anan ep umpang niiyant. Ngaywey wampingan-a, an ngay waking niiyang, a' niiyana ngul-nyaa' wunin. A' putha ngayaniy ngangk way-wayam paththam ngul wuning niiyantam. Puth niiyam pam wanch yotam aak nanman wun-wunaniya ep ngangk min yumpin ngayangwey! An ngay mee'miya paththam ngay ngangk minangaman iiy-iiyang-a, yaa, niiy ma'mangkamana ngangk minangam anman thamp iiy-iiyaniya. 4Puth lat amanaman ngayan niiyant kuchangan-a, ngathan ngangk min ke'am wunar ya'a. Ngay lat anan umpangan niiyantan-a, ngangk way paththam wunar, a' putha ngayana peey-peeyang amanamwey. Ngay kaangk ke'a niiyangan ngul-nyaa'an yumpāng, puth niiyan ngangk way wunin, an ngay lat anan kuchangan niiyant niiyan yipam mee'miy weenān ngay kaangk paththam wunang niiyantanwey.
Niiy Wik Min Thawān Nungant Pam Alantan Nil Wayan Yump
5Pam thonam nana niiyantang puyamana nil way yump, nil ngampang yotam ngul-nyaa' yump ngampang, ngayang thonakam ya'a, ma'mangkam ngul-nyaa' yump ngampang. 6Puth kanweya, yaam ke'an waa'-waa'āmpana nil puth wayan kan want. Niiy puth yotangaman kan wakan nunang, puth niiy kan wantān nunang, an kana, yaam ke' wakān nunang. 7Yaa, niiyana thawān nungant way nintan yumpan-a, an ya'-ngul, ngan ke'-ngul ngaantam-ngeeyān, ya'a, a' niiy wik min thawān nungantwey a' ngangk thayanathān nunang thamp. Niiy ke'wey thawin nungantan-a, nilana ngangk way paththam wunow nungant, a' nil nath woyan Jesus.antamana too ngul wantiy. 8Yaa, ngay puth inan thaw-thawang niiyantwey; niiyiya minam iiyān nungantwey nil yipam ngaantam-ngeeyow niiyang niiy kan-kanam paththaman kaangk wunaniy nungant. 9Ngay nanpalan lat ka'athaman kuchangan niiyant ngay yipmam wik ngeeyāng niiyantama niiy nath ngayangan wik ngeeyina, nath ya'a. 10Niiy nath wee'antwey nath thawin, “Way nintan yumpan-a, an ya'-ngul, kan kon-ngath nganang”, yaa, ngayang thamp kon-ngathowanya way nilan yump. Nil Christ.angan ngayang mee'miy ngayan way pam alantaman kan kon-ngathanya, ngamp yipmam ma'mangkamana ngangk minangam karpam wunāmp. 11Ngampang ke'wey way pam alantaman kon-ngathiwan-a, an oony way alangan thaach-thaachan ngampang. Ngamp puth kan mee'miy nil kaangka ngampangan muukamathow ngamp yipam way yumpāmpa. Ngampiy paththama wik min thawāmp nungant pam alantana!
Ngath Ngangk Way Wunar Aak Troas.ang Angan
12Ngay kan anan waa'ang niiyant ngay aak Troas aakanakan iiyangan. Ngay aakanakan iiyangan pam wanchantan wik waa'āng Christ.antam wik min nungantam anangan. Nil puth Christ anman nila ngangkang kanam thaw thant pam wanchantangan an puth than yotangan kaangk paththam wik minan ngeeyayn. 13Puth ngathaniya ngangk way-wayam paththam wunar ngay puth Titus.an kuunch ngatharaman ke'am uwangan aak angan ya'a. Yaa, puth ngayana appow thawangan thantwey pam wanchantan a' kan-ngul iiyangan aak Macedonia.akana.
Ngamp Ke' Awal Min Yimanangan Unchanamp Thant Pam Wanch Wiy Al-Alantan
14Puth ngampiya thankyou thawāmp nungant piip God.antan. Ngamp anman ngangk minangamana iiy-iiyanampwey nil puth Christ.angan min-minakam pi'-pi'an ngampang ngamp pal-puyan iiy-iiyanamp, a' putha ngampan ke'am winynyang mo'anamp thanttam al-alantaman than piip God.antaman kaangk ke'ana. Ngampaniya wik min God.antamana waa'-waa'anamp thant we'arathanamp aak thon-thonangana, than yipmam yotangana min-min ngeeyayn a' ngaantam-ngeeyayn nunang God.an. Ngampana ke' yuk awal min paththam anangan unchan yimanangan iiy-iiyanamp thant aak thon-thonangana, wik min anangan wampathanamp thant. 15Nil Christ.angan kuch ngampang yipam wik min nungantaman waa'āmp, a' nil God.an ngangk min paththam wun ngamparam. Pam wanch puungk wiyangana ep wik ngeeyin a' ngangkangan pi'antan, a' nil God.angan putha kaa'-piichanathow thanang way thanttam amanaman; pam wanch puungk wiyiya kaangk ke' wik minan ngeeyayn ya'a, thaniya woyan wayan wak-wakantan mulakan. 16Puth ngampan thant pam wanch al-alantan ke' awal min yimanangan ke'am unchanamp ya'a, ngampaniya ke' awal way-wayam paththam yimanangan unchanamp thant, ke' thanangan mul-mulathan awal way ngamparamanganiy. Puth pam wanch wiy anangan thana wik min God.antaman kanaman ngeeyin-a, aniy ke' ngan awal min unchan thant, ke'-paal than wik ngeeyin nganang, than mee'miy nil God.angan kaa'-piichanathan thananga, a' putha aak nungantamangan wunayn ngangk aak umpuyangam. Puth work nganttam inan thayan paththama. Puth nil wee'a nil-nilamaniy work iiyiya? 17Ya'a! Nilam thonamangan Christ.angan ep ma'-aath-aathan nganang! Nil God.angan kuch nganang wik min nungantam anangan waa'-waa'ān wiy-wiyantan, an puth nil kanam thiich ngangk nganttaman. Nil mee'miy thamp ngan kan-kanam paththam kaangka niiy thamp thiichān nunang. Puth ngananiya ke' pam wanch wiy yimanangan ya'a, yaan thonakaman muukamathantan thanang, wik min God.antaman waa'antan than yipmam wukal thanttakaman uwayna.