Ngampiya Kemp Micha, Puth Nil Christ.ana Ep Thayan Paththama
131Ngay yaam ke'anam palam ngul wampāng niiyant, inana ngay ma'-ko'alam ngul wampāng niiyanta. Ngay wampāng niiyantan-a, ngamp wik thawāmpa, ke' courtang yimanangana. Nil wee'ang nathan kaangk pamwey courtangan wunpowan-a, yaa, than pam mee'miy anangan mak nungantang thanayn, courtangan waa'ayn nunang. 2Ngay peetanan aak nangan wampang niiyantan-a, ngay wik thaa'-thayanam thawang niiyant ngay kan-kanam paththam wayathāng niiyang anangan wayan yump-yumpaniy. Inan ngula, ngay kaangk paththam putham ngul kon thayanathāng niiyang a' puth thanang wiy anangan thampanga. Ngayan yippak aak thonangan wunang-a, ngay wik inangan putham ngul thawāng niiyant. Ngay puyam ngulan wampāng niiyant-a, ngayaniya kan-kanam paththam wayathāng niiyang niiy nanangan wayan yump-yumpaniy. 3Puth anpalana niiyana kan-kanam ngul mee'miy weenāna nil Christ alangan kan-kanam kuch ngayanga, ngay wik inan nungantaman waa'-waa'ang niiyantana. Niliya thayan paththam a' putha nil kan-kanam wayathow niiyang niiy nanangan way yaaman yump-yumpaniy, niiy ke' ma' micham wakin nunang puth nilan epa thayan paththam. 4Nil utham yuk wuuyanangan-a, kemp nungantamana yaal' wunant, kemp thayanan ke'am wunant ya', puth nil piip nungantam God.ana ep-paththam thayana, nil mulaman ekathan nunang koyam man-yethamak, nilaniya thayanam ngul iiy-iiyana! Ngan pam nungantam inangan thayan ya'a, ngan ep mich iiy-iiyanan, puth ngan wampān ngulan niiyantan-a, nil God.angan ngul thayan yumpow nganang a' nganiya wak-wakān niiyang thaa'-thayanam thawān niiyant.
5Niiyiya niiyantakaman ngaantam-ngeeyāna niiy nath kan-kanam Christ.an ngangkangan pi'-pi'aniy nunang nath ya'a. Niiy kan ngeechananiy niiyantakam ey? nil ngangk niiyantamangan wun-wunan ey? Nath ya'wey-a, niiy ke' nath monkan-wakaniy nunangan ya'a. 6Puth ngayan kaangka niiyan ngaantam-ngeeyān nganangana ngan kan-kanaman monkan-wakanan nunang Christ.ana. 7Nganiya mee'-wuthanamanan God.antan niiyantakana niiy yipam wayana ke' yumpān. Niiy yaaman way yump-yumpān-a, puth niiyan ngul thathān nganang ngan thayan paththama. Ngan ep-paththam kaangk niiyana min anman yump-yumpin. Niiy minwey iiy-iiyinan-a, ngananiya wik thayan ke' thawin niiyant ya'a. Puth nanpalaniy-a, puungk wiyangan natha ngaantam-ngeeyiythana ngan ke' waythinthiy ngul weenana, an puth kana, waythinthiy mak waa'ayn nganang. 8Niiy nath kan-kanam woyan God.antaman wakān-a, nganan puth ke' wak-wakān niiyanga. Puth ngan kaangk thonakam ma'-aathān niiyang yipam min yumpāna. 9Ngan nath puy wampān ngula a' thathān niiyangwey niiy nath ngangk thayanam monkan-wak-wakaniy nunang piip God.an, ngananiy-a, ke' wayathin niiyang ya'weya. Ngantaniy-a, ngangk min paththam ngul wunow niiyantamaniya! Ngan mee'-wuthanamanan niiyant niiy yipam Christ.an minam paththam monkan-wakān nunang. 10Ngay lat inan umpang niiyant ngay puth kech wunang niiyantamana, niiy yipam ngayangan wik ngeeyāna, a' koyamana weentān ngul woyan min aakanakana. Ngay ke' yipam wak-wakāng niiyang ngay wampāngan. Nil puth Lord.ang kuch ngayang ngay yipam niiyangan ngangk thayanathānga, nil ngayang ke'am kuch ngay yipam wayathāngan niiyang ya'a.
11Niiyalang ngurp ngatharam-ang, ngay lat inan inman minchathanga. Ngay kaangk niiy ngangk minang iiy-iiyāna, way yaaman ke' yumpān weentān woyan minakana niiy wik ngatharamana kuchekangam pi'-pi'ān, ke' kon-ngathow niiyang, niiyiya ngangk minangama wik ngeeywun niiyantakaman, ke' pekwun thakana, puth ngangk minangam wunāna, kul ke'ananga. A' nil piip God.ana nangman iiy-iiyow niiyantanga. Nil inman kaangk paththam wunan ngampar putha ngangk min yump-yumpan ngampang.
12Niiy karpaman yalmathwun-a, niiy ma' thuthwuna, ngamp ma'mangkamana nungant Christ.ant. Than pam wanch God.antam il-ilangana wik kuchin niiyant than puth kaangk niiyant.
13Nil Lord Jesus Christ.an ngangk minang ngul iiy-iiyow niiyantana, putha ngay kaangk thampa niiy mee'miy iiyāna nil piip God.an kaangk paththam wunan niiyant. Ngay kaangk niiyaniy ngangk minangam karpam wunān ke' ma'-kuuncham yimanangan, nil puth Ngeen-Wiy Min God.antaman ngangk niiyantangan wun-wunan.
Anman kan,
Paul