Ngay Wik Inan Waa'āng Niiyant Minh Alantaman
81Ngay kan wik thon in waa'āng niiyant, niiy wikakanweya ka'athaman engkan ngathar, an nath min niiyantweya, nath ya'a, minhan mungkān than wiyangan kanaman thee'in yuk ngeen-wiy thanttamakana. Niiy thawaniy ngamp Christians mee'miy iiy-iiyanamp minh anangan mina mungkanakana. Ee', an kan-kanama, puth nil wee'ang nath ngaantam-ngeey-ngeeyiy nungantakaman nil kuchek waap pi'an thamp-a, an nil ulp-ulpanang iiy-iiyiy, nil pam wanch wiy anangan ke' ma'-aath-aathiy thanang, ya'a. Puth nil wee'-nath ngangk minangam iiy-iiyow wiy al-alantan-a, an nil ep ma'-aath-aathan thanangana. 2Nil wee'ang nath ngaantam-ngeey-ngeeyiy nungantakaman nil yotan mee'miy-a, an ya'a, nil pam anana ngoongk-ngoongkam iiy-iiyiy, nil ke' mee'miya, ya'a. 3Puth nil wee'-nath piip God.antan kan-kanaman kaangk wun-wunow nungantan-a, an nil God.angan puk nungantam ngul waa'-waa'ow nunang.
4Yaa, ngamp kan wik inan putham ngul ngaantam-ngeey-ngeeyāmp minh anangan than wiyangan kanaman thee'in yuk ngeen-wiy thanttamakana. Ngamp mee'miy wunanamp yuk ngeen-wiy thanaman yump-yumpantan thakana, an than man-yetham ke'am iiy-iiyantan, ya'a; nil God thonam anman thonakama, wiy ya'a. 5Pam wanch wiyangan ngaantam-ngeey-ngeeyantan ke' gods yot anangan man-yetham wun-wuntan, in kenyana, a' putha in pekana, 6puth ngampaniya mee'miy nil God thonam anman thonakam, piip ngamparamana. Nilaniya pam wancha a' putha yuk way min ma'mangkam nilam yump-yump. Nil pam wanch yumpa ngamp yipam thaa'-kuump-kuumpāmp nunang a! A' putha nil Jesus Christ.ana moom thonam anman ngampar yotamantana. Nil Jesus alangana yuk way min ma'mangkam yump, puth nil piip nungantam God.an thaw nungant yimanangan yumpowa. Nilam thampana kaa'-piichanath ngampang, ngamp yipam pam wanch nungantam iiy-iiyāmp ngula.
7Puth pam wanch Christians wiyangan ke'am yippak min-minam paththaman ngaantam-ngeey-ngeeyantan. Than nathpalmana yuk ngeen-wiy ngaantam-ngeey-ngeeyantan thanang ke' man-yetham iiy-iiyantan. Ngul than al-alangaman nath minhan mungkiythan-a, than wiyangan kanaman thee'in yuk ngeen-wiy thanttamakan-a, an than ngaantam-ngeey-ngeeyiythan ke' than yuk ngeen-wiy anangan thaa'-kuumpantan thanang, an thananiy-a, ngaantam-ngeey-ngeeyantan thanttakaman ke' than way-wayam paththam iiy-iiyantan. 8Nil minh alangan-a, thinthaman ke' wampathow ngampang piip God.antana, ya'a. Nungkway ngamp minhan mungkimpwey-a, nath ya'wey-a, nath ke'wey mungkimp-a, puth minh alangan thinthaman ke' wampathiy ngampang piip God.antan, ya'a.
9-10Niiy nath ngaantam-ngeey-ngeeyaniy ngul an min niiyant minh mungkanakan than wiyangan kanaman thee'in yuk ngeen-wiy thanttamakanweya. Puth ngampanweya kana ngaantam-ngeeyāmp thanangweya pam wanch Christians wiy anangan ke'am yippakan min-minan ngaantam-ngeey-ngeeyantana. Than nath thathiythan niiyangweya minhan mungkin-a, yaa, than woyan niiyantaman anman wakiythana, than thampana mungkiythan ngula. A' puth anpalana than ngangk way ngul wun-wuniythan, puth thanan ngaantam-ngeey-ngeeyiythan thanttakaman ke' way-wayam paththam iiy-iiyantana. 11Niiy nath ulp-ulpanang ngaantam-ngeeyin niiyantakaman ke' mee'miy niiy iiy-iiyaniy-a, a' minh anangan mungk-mungkin-a, niiy nath wayathin thanang wiy anangan, puth thananiy natha woyan Christ.antaman ke'-ngul wak-wakiythana, ya'a. Ngamp ke' wayathāmp thanangweya, puth nil Christ.ana thant thamp uthama. 12Niiy nath yimanangan wayathin thanang-a, an niiy Christ.antan way yumpaniy thampa. 13Ngay inan ngaantam-ngeeyang ngatharakama: ngay ke'-ngul minh mungkāng than wiyangan kanaman thee'in yuk ngeen-wiy thanttamakana. Ngay nath mungkingwey-a, ngay nath Christians wiy anangana wayathing thanang, thananiya natha woyan Christ.antaman ke'-ngul wak-wakiythan, ya'a. Ngay ke'-paal ke'-ngul mungking, puth ngay kaangk ke' wayathāng thanang.