Ngay Wik Inan Thawang Niiyant Pam Wanch Ma'-Ampanam Al-Alantan-a, A' Puth Ma' Pam Wanch Al-Alantan Niiyanta
71Ngay kan wik thonan waa'āng niiyant, niiy puth lat kuchan ngathara, wikakanweya engkan ngathara. Nil pam nath ma'-ampanam iiyiywey-a, wanch ke'anang anman wun-wuniywey-a, an min nunganta. 2Puth in thampan ngeeyān ngula: aak town niiyantam nanan waya, Corinth nanana, puth pam wanch yot anangan Christians ya' anangan way-wayam paththam iiy-iiyantan, maarich thak kee'-kee'antan. Yaa, an puth min pam al-alantan wanchan maayayna, a' putha an min wanch al-alantan paman maayayna. Puth niiy ngul way iiy-iiyan thampa. 3Nil pam-kunchana mak karpam wunow nungantanga wanch-kunchantangana, a' wanch-kunchana mak karpam wunow nungantanga pam-kunchantangana; pul karpaman mak wunowpul, an ya'an ke' thawiypul pulantakamana. 4Nil wanch alangana kemp nungantamana ke' weekiy, nil moom nungantakama ke'am iiy-iiyan kemp nungantamakan nilan kal-kalan, ya'a, nil pam-kunchan moom ep iiy-iiyan kemp wanch thumantamakana. A' putha pam alangana kemp nungantamana ke' weekiy, nil moom nungantakaman ke'am iiy-iiyan, kemp nungantamakan nilan kal-kalan, ya'a, nil wanch-kunchana ep moom iiy-iiyan kemp pam nungantamakan. 5Niiy ma' pam wanch karpam wun-wunāna, ya'ana ke' thaw-thawān niiyantakamana. Niiy wiyiy nath wik yumpina, niiy nath manyam pokkapang wun-wunān, yaanweya, niiy yipam nathweya mee'-wuth-wuthanamin piip God.antana. Kanan-a, niiy putham ngul karpaman wunāna. Nath ya'wey-a, nil oony way alangan ngul thaach-thaach niiyang maarich kee'anakan wiyantangana.
6Ngay ke' thawing niiyantweya wanchan maayāna, ya'a, niiy kaangk nathwey wanch thum maayānan-a, an epa min niiyantwey. Niiy nathwey kaangk ke'an wanch thum maayān-a, yaa, an kana, niiy ma'-ampanam anman iiy-iiyāna. 7Ngay kaangk niiyang yotam ma'-ampanam iiy-iiyān ke' ngay yimanangan. Puth nil God.angan wiy-wiyam yot ma'-aath-aathan ngampangwey; wiy anangan-a, nil ma'-aath-aathan thanang ma'-ampanaman iiy-iiyayn; wiy anangan-a, nil ma'-aath-aathan thanangwey ma' wanch paman iiy-iiyayn.
8Ngay inan thawang niiyant pam wanch ma'-ampanam al-alantana, a' puth wukalongk al-alantana, an min niiyant niiy anman pam thum ke'anangan iiy-iiyāna, nath wanch thum ke'anang iiy-iiyān ke' ngay yimanangan iiy-iiyang. 9Puth niiy nathwey ke'-ngoongkam anman ngaantam-ngeey-ngeeyin niiy kaangk wanchan pi'-pi'ān thanangwey-a, yaa, kana, wanch thuman maayān niiyant. Ya' nathwey-a, puth wanch al-alangan ngul ngangk mungkin niiyanga karpam wun-wunanakama.
10Ngay kan ma' wanch thum al-alantan thawāng ngul, puth wik inan Christ.antam, wik ngatharam ya'a. Nil wanch thum alangana ke' wantiy nunang, pam thum nungantamana, ya'a. 11Nil nath wantiy nunangwey-a, yaa, nil pam thonangan ke'-ngul maayow, ya'a, nil nath koyam yipam iiyow pam nungantamakana, ngul kul anpalana pul ngul nath michathuwpul pulantakaman; nath ya'wey-a, nil ma'-ampanam anman iiyow. A' nil pam thum alangana wanch thum nungantaman ke' too wantiy nunangwey aak umpuyamwey, ya'a.
12Ngay niiyant wiy al-alantan thawāng thampa: puth nil Christ.angan ke'am waa' ngathar ngay wik want-wanttakan thawāng niiyant, puth ngay kan ngaantam-ngeeyang ngatharakaman, a' wik inangan thawāng ngula: nil wanch thum pam Christian alantaman nath Christian ya' natha, nil wanchan nath kaangkwey karpam anman wun-wunow pam-kunchantangan-a, yaa, mak karpam wunowpul, nil pam alangan ke' too wantow nunangweya. 13Nil pam thum wanch Christian alantamana nath Christian ya' natha, yaa, nil paman nath kaangkwey karpam anman wun-wunow wanch-kunchantang-a, yaa, mak karpam wunowpula, nil wanch alangan ke' too wantow nunang. 14Nil pam thum wanch Christian alantamana nath Christian ya'a, nil piip God.angan ngul thathow pulang ma' pam wanch anangan pul ke' thonam yimanangan iiy-iiyanpul ngul a' paman thathow ke' nil minam ngul iiy-iiyana. A' puth wanch thum pam Christian alantamana nath Christian ya'a, nil God.angan ngul thathow pulang pulan ke' thonam iiy-iiyanpul, a' nil wanchan thathowa ke' nil minam ngul iiy-iiyana. Nil God.angana yimanangan thathow pulangana, nil puth Christian alantanganwey wun-wunan. Nil God.angan ke'anwey thathiy pulang ke' kemp thonam anman iiy-iiyanpul-a, nil puk pulantam anangan ke' ngaantam-ngeey-ngeeyiy thanangwey than ke' puk nungantam yimanangan, ya'a. Puth ya'a, than kan-kanamwey puk God.antam ngula. 15Puth nil-nungant thonam anan Christian ya'ana nil nath kaangk wantow nunangana nil-nungant Christian anan-a, an mak wantow nunang. Nil Christian alangan mak kuchow nunangweya, ke' ak-wichow nunang. Nil puth God.angan kaangk ngamp ngangk minangam wun-wunāmp. 16Ngampan puth ke' mee'miy ngeen nathan wampiy thant Christian ya' al-alantanweya. Nil wanch Christian alangan nath ma'-aath-aathow nunang pam thum Christian ya'anweya ngangkan thee'ow nungant God.antana, nath ya'a, a' nil pam Christian alangan nath ma'-aath-aathow nunang wanch thum Christian ya'ana ngangkan thee'ow nungant God.antana, nath ya'weya.
Niiy Ngeen Nathan Ka'athaman Iiyan-a, An-Aniyangan Nil God.angan Ump Niiyang Ngangkan Thee'an Nungant-a, Niiy Anman Iiy-Iiyān
17Nil God.angan mi' ngampang work thon-thon aakanakan, a' nil wiy-wiyam yot ma'-aath-aathan ngampangwey, wiy anangan-a, nil ma'-aath-aathan ngampang ma'-ampanam iiy-iiyanamp; wiy anangan-a, nil ma'-aath-aathan ngampangwey ma' wanch thum iiy-iiyanampa; wiy anangan-a, Jews iiy-iiyanamp; wiy anangan-a, Jews ya' anangan iiy-iiyanamp; wiy anangan-a, slaves iiy-iiyanamp; a' putha wiy anangana, slaves ya'a. Nil God.angan want-wanttak nathan yumpiy niiyangan-a, niiyana anman iiy-iiyāna. Ngay wik inangan thaw-thawang niiyant yotamant churches nath-nathan wun-wuntan. 18Nil God.angan ka'athaman ump niiyang ngangkan thee'-thee'ān nungantan-a, niiy wiy anangana, Jews iiy-iiyan, kompan thampa, puth ngeen-wiy niiyantamana ump-umpin niiyang; a' putha niiy wiy anangan-a, Jews ya' iiy-iiyan. Yaa, niiy nath Jews ka'athaman iiy-iiyan-a, niiy anman Jews iiy-iiyān, kompan thamp. Niiy nath Jews ya' ka'athaman iiy-iiyan-a, niiy Jews ya' anman iiy-iiyān, kompan ke'anang. 19Nungkway ngamp Jew nathwey kompan thampwey-a, Jew ya'wey nathwey-a, kompan ke'anangwey-a, an ngamp yotamaniya wik min God.antaman ngeey-ngeeyāmp, a' mee' nungantang God.antangana min-minam iiy-iiyāmp. 20Niiy ngeen nathan ka'athaman iiy-iiyan-a, an-aniyangan nil God.angan ump niiyang ngangkan thee'an nungant-a, nath Jew natha, nath Jew ya'a, niiy anman iiy-iiyān. 21Nil God.angan ka'athaman ump niiyang ngangkan thee'ān nungant-a, niiy wiy anangana, slaves iiy-iiyan, puth moom niiyantamang wukalang kanam piiyin niiyang workak. Yaa, kana, puth nil moom niiyantamangwey kaangk nath kuchow niiyangan-a, yaa, niiy mak iiyān . 22Niiy wee'-wee'anangan slave iiy-iiyaniy-a, nil God.angan ke'am ngaantam-ngeey-ngeeyan niiyang ke' slave yimananganiya, ya'a, nil puth ngangk kanam pachath niiyang, way niiyan yumpana, niiy ngangk minam ngul iiy-iiyaniy puth way kan wantana. Niiy wee'-wee'anangan slaves ya'an iiy-iiyaniy-a, yaa, niiyana ke' slaves Christ.antam iiy-iiyaniy ngul, nilan puth moom niiyantam, puth niiy mak wik ngeey-ngeeyān nunang, putha work iiy-iiyān nungant thamp. 23Nil Christ.an utham ngamparwey-a, an ke' nil piiy ngampang pam wanch nungantakama, puth wukalangana ya'a, puth chaapar nungantam alangan koyam piiy ngampang oony way alantaman -- yaa, nil Christ.an moom ngamparam ngula, ngamp nanpalan wik pam way al-alantaman ke' ngeey-ngeeyāmpa! 24Yaa, niiy ngeen nathan ka'athaman iiy-iiyan-a, an-aniyangan nil God.angan ump niiyang ngangkan thee'an nungant-a, niiy nath Jew iiy-iiyan-a, nath Jew ya'a, niiy nath slave iiy-iiyan-a, nath slave ya'a, niiy anman ngul iiy-iiyāna. Nil God.an ngangk niiyantamang ngul wun-wunow a' ma'-aath-aathow niiyang.
Ngay Wik Inan Thawang Niiyant Pam Wanch Ma'-Ampanam Al-Alantan, A' Wanch Wukalongk Al-Alantana
25Yaa, ngay kan thon inan waa'āng niiyanta, niiy wikakanwey engkan ngathar pam wanch ma'-ampanam al-alantamana. An nil Christ.angan ke'am waa' ngathar ngay wik want-wanttakan thawāng niiyanta, puth ngay kan ngaantam-ngeey-ngeeyang ngatharakamana, a' ngay waa'āng niiyant ngul. Niiy wik ngatharam ngeey-ngeeyāna, nil puth God.an min iiy-iiy ngathara, a' putha workan ma' ngatharang thee' ngul. 26Aak yimanangana way ngul wun-wunan ngampar, puth pam wanch wiyangana way yump-yumpantan niiyant, ngay ke'-paal ngaantam-ngeey-ngeeyang ngatharakaman an min niiyantweya niiy ma'-ampanam anman iiy-iiyānana. 27Niiy puth pam wiy al-alangan nath wanch thum ka'athaman maayana, yaa, an kana, niiy wanch thum niiyantaman ke' want-wantān thanang. Puth niiy nath wanch ke'anangwey iiy-iiyin-a, yaa, niiy puth wanchakana ke' wenk-wenkān, niiy yipam wanchan maayān thanang. 28Puth niiy nath wanch thuman maayin thanangan-a, yaa, an kan, an puth way ya'a, an min niiyanta, a' puth niiy wanch ma'-ampanam al-alangan nath pam thuman maayinwey-a, an kana, an way ya'a, an min niiyanta. Puth niiy wee'-wee'anangan ma' wanch thuman iiy-iiyaniy-a, wiyiya aak way wampow niiyant. A' niiyana ngangk way ngul iiy-iiyānwey, puth ngay yimanangan kaangk ke' thathāng niiyang ngangk wayan iiy-iiyān niiyantakamana.
29Ngurp ngatharam niiyalang, ngay puth wik inan waa'āng niiyanta: aakan thinth ngul nil Christ.an palaman wampowa. Yaa, niiy kan ke'-ngoongkam monkan-wak-wakān nunang, ngangkangam pi'-pi'ān nunang putha ngaantam-ngeey-ngeeyān nunang. Niiy nath wanch thum thamp-a, niiy wanch thum niiyantaman thonakam ke' ngaantam-ngeey-ngeeyān thananga, niiy Christ thampan ngaantam-ngeey-ngeeyān nunang, a' work iiy-iiyān nungant thampa ke' pam ma'-ampanam yimanangana work iiy-iiyāna. 30Niiy nath ngangk way-wayam paththam wuninwey-a, peey-peeyin thakan-a, ngangk way yaaman ke' wun-wunow niiyant. Ke' ngaantam-ngeey-ngeeyān yaaman ya'a, kon-ngathow ngul niiyang. Nath ngangk min ngul wun-wunow niiyant-a, yaam ke'a ngaantam-ngeey-ngeeyān niiyantakamana, ya'a, Christ thampan ngaantam-ngeey-ngeeyān nunanga. Niiy nath yuk way min min-miniy kan piiy-piiyaniy niiyantakaman-a, yaa, niiyiya yuk way min yaaman ke' ngaantam-ngeey-ngeeyāna, ya'a, niiy Christ.an ngaantam-ngeey-ngeeyān nunang thampa. 31Niiy nath pam ma'mangkiya, nath wukal yot pi'-pi'aniya, putha yuk way min yot ngul thamp pi'-pi'aniya, niiy yaaman ke'a wukal thakan ngaantam-ngeey-ngeeyāna. Puth aak inman ngampan wun-wunanampa yaam ke'-ngul wunowa, ya'a, aak inan ngul minchowa a' wiy-wiyam ngul weenow aak inana.
32Ngay kaangk ke' niiy ngangk wayan iiy-iiyāna. Nil pam ma'-ampanamana ke'-ngoongkam work Christ.antan iiy-iiyan, nil puth kaangk ngangk min yumpow nunang, Christ.an. 33Puth nil pam wee'an wanch thum thampan iiy-iiyan-a, nil wukala a' yuk way mina aak imanaman ngaantam-ngeey-ngeeyan thampa, nil puth kaangk wanch nungantaman ngangk min yumpow nunang, 34ke'-paal nil thon-thonan ngaantam-ngeey-ngeeyan, nilaniya Christ.an ngaantam-ngeey-ngeeyan, a' nil anana wanch thum thamp ngaantam-ngeey-ngeeyan, kucham al-alangana ak-wichanpul nunang pal-puy. Puth nil wanch pik-ke'anangan-a, ke'-ngoongkam work Christ.antan iiy-iiyan, nil puth kaangk ngangk punch-aakaman thee'ow nungant a' monkan-wak-wakow nunang thamp, nil ngaantam-ngeey-ngeeyan Christ.an moom nungantam kemp nungantamakan, a' putha ngangk nungantamakan thampa. Puth nil wancha pam thum thampan iiy-iiyan-a, nil wukal-a, a' yuk way min thakan ngaantam-ngeey-ngeeyan thampa, nil puth kaangk ngangk min yumpow nunang, pam thum nungantamana.
35Ngay puth wik inangan thawang niiyantana ngay puth kaangka ma'-aath-aathāng niiyangweya, ngay ke' wik thayan yimanangana ke'am yump-yumpang niiyantana, ya'a. Ngay wik waa'ang niiyant niiy yipam mi'ān woyan minan want-wanttinan uwān niiyantakamanweya. Ngay kaangk niiy ke'-ngoongkam work minam iiy-iiyān nungant Christ.antan, ngangk punch-aakaman thee'ān nungant, a' ke' eenchān nungantam.
36Ngay thon inan waa'āng niiyant. Pul pam wanch kan nath wik yumpiypul pulantakaman ngentwunakana. A' nil pam nath thawiy ngul, “Ngay ke'a, ngay anman ma'-ampanam ngul iiy-iiyānga.” Puth nil pam ilangan nathwey ke'-ngoongkam anman ngaantam-ngeey-ngeeyiy nil kaangk wanchan pi'ow nunangwey-a, wanch alangan nath ngangk mungkiy nunang karpam wun-wunanakaman-a, yaa, kana, wanchan maayow nungantakam. An way ya'a, an ep min nunganta. 37Puth nil pam alangaman nathwey ngaantam-ngeeyiy nungantakamana nil kan-kanam kaangk ma'-ampanaman iiyow-a, wanch ke'anangan-a, nil ke'an ngaantam-ngeeyow pi'ow nunangwey-a, yaa, an mak ma'-ampanam anman iiyowa, an min nunganta. 38Nil pam wee'ang nath wanchan maayow nunangwey-a, an mina. Puth nil wee'-nathan ma'-ampanam iiyow-a, wanch ke'anangan-a, an min paththama.
39Nil wanch pam thum thampana, pul ke' thonam anman iiy-iiyanpul, nil wanch alangan pam thonangan ke' maayowa. Nil pam-kunchan uthamowanwey-a, an epa, nil kaangkweya pam thon ngulan maayowwey-a, an mak maayow nunang, puth nil pam Christian.an maayowa, wiy ya'a, nil pam nath Christian ya'anwey-a, ke' maayow nunang, ya'a. 40Puth ngayan ngaantam-ngeeyang ngatharakamana an nath min nunganta wukalongk anman iiy-iiyow, pam ke'ananga, nil yimanangana an ngangk min anman wun-wunow nungantweya. Ngay puth ngaantam-ngeeyang ngatharakamana ke' nil Ngeen-Wiy Min God.antamana nath wik yimanangan thawa ke' ngay wik inman thaw-thawang niiyantana.