Niiy Kulangamana Ke' Kalwun Courtakana!
61A' wik inangan thamp ngeeyāna: nil Christian thon alangana way nath yumpiy niiyant-a, yaa, niiy ke' charge.impungin nunangweya a' courtak thakan ke' kalin nunanga, an ya'a! In way paththam niiyanta! Puth pam moom courtakana than ngoongk-ngoongkam nunang God.ana! Niiy pam wanch Christians wiy al-alantan iiyāna, a' waa'ān thant, than yipam ma'-aathayn niiyang kulan ya'-ngul minchow. 2Puth ngul-ngulan-a, aak ing kenyan-a, ngampiya pam wanch God.antam al-alangana pam wanch yotam anangan um ngamparangan ngul than-thanathāmp thanang pam wanch yotam anangan aak ingman earthangan wun-wuntanana. Niiy inan ep mee'miya! Yaa, niiy ngul wanttaka kul niiyantaman ke'am wantaniya? An-ngul kul pi'anan aka, an kul manya! 3Niiy ngul ke' mee'miy ey? Ya' ey? Ngul-ngulana aak in kenyana ngamp ngaantiyongk anangan thamp umangan than-thanathāmp thananga. Puth niiy kul pek-pekwina aak earthang ingan-a, niiyana kulan minchathāna, a' niiy ngangk minangam iiy-iiyān niiyantakamana. 4Yaa, ngul niiya Christians nath kul uw-uwin niiyantakamanwey-a, niiy ngul wanttak kal-kalwuniya courtakaniya? puth than moom anangan courtakan-a, than ke' mee'miy nunang God.ana! 5Niiy ngul-nyaa' iiyin a! Ngul pam thonam puy ya' ey? niiyantang ey? kuchek waap min thamp ey? nil yipam ma'-aathow niiyang, niiyan yipam kulan minchathān niiyantakamana. 6Niiy ngul ngeenak kulangam kal-kalwuniy courtakan e? Niiy ngul ngeenak kal-kalwuniy Christians ya' al-alantan a? A' niiy ngeenak waa'-waa'wuniy um thanttangana?
7Ngay mee'miy niiyantamana niiy puth woyan God.antaman minaman ke'-ngul wak-wakaniy, ya'a. Niiy courtakan kulangam ke' kal-kalwin a! In way paththam niiyant a! Niiy yaaman ke' ngaantam-ngeey-ngeeyān way thanan yump-yumpantan niiyantana. An mak way thakan yumpayn niiyantanwey a! A' way min niiyantaman mak ma'-kuchathayn a! Yaa, an kan a! Niiy courtakana ke' kalwina, in way niiyanta. 8Puth niiy thamp way iiy-iiyaniy a! Niiy way yumpaniy niiyantakamanweya! A' putha niiy yuk way min Christians wiy al-alantaman ma'-kuchathaniya! 9Puth niiy ke' mee'miy ey? ya' ey? Pam wanch way paththaman iiy-iiyantan-a, an nil God.angan ke' kaliy thanang aak nungantamakana, a' nil puk nungantam ke'-ngul waa'-waa'iy thanangana! ya'a! In wik kan-kanama! Niiy ke' man-ngeeyān ngayang a! Pam wanch wiy anangana, way paththam iiy-iiyantan; wiyangiy-a, yuk ngeen-wiy thaa'-kuump-kuumpantan; wiy ananganiya maarich kee'-kee'antan; wiyiy-a, pul-pamam pi'-pi'wunpul ke' wanch pam yimanangan maarich kee'-kee'athwunpul, wiyiy nath-a, pul-wancham pi'-pi'wunpul ke' wanch pam yimanangan maarich kee'-kee'athwunpul. 10Wiyangan-a, yuk way min wiyantam ma'-kuchathantan; wiy ananganiy-a, yuk way min min-minam anangan mee'-wak-wakantan, wiy ananganiy-a, ngak way mungkan iiy-iiyantan; wiyangiy-a, aak-ya'ang way waa'-waa'antan thanang, pam wanch wiy anangan; wiyangiy-a, piik-piikantan thanang wiy anangan a' yuk way min ngul mo'athantan thanttam. Than pam wanch wee'-wee'anangan way yimanangan yump-yumpantan-a, nil God.angan ke' kalow thanang, aak angan ke' wun-wunayna nungantamangana, ya'a. 11Ka'athaman-a, niiy wiy anangan way yimanangan iiy-iiyan, yumpan thaka, puth niiy yimanangana ya'-ngula, nil puth God.angana ngangk niiyantamana kanam pachath; a' puk nungantam ngul waa' niiyang, puth anpalmana nil Jesus Christ.an utham way niiyantamakan, a' nil God.angana ke'-ngul ngaantam-ngeey-ngeeyan way niiyan yump-yumpana a' Ngeen-Wiy Min nungantaman ngangk niiyantamang nana ngul wun-wunan.
Ngamp Ke' Kemp Thonam Iiy-Iiyanamp Christ.antang Ngul, Ngamp Ke'-Paal Maarich Ke' Kee'-Kee'āmp Wiyantana
12Niiy nath ngaantam-ngeeyaniy niiyantakamanweya, “Ngay ngeen nathwey kaangk yumpāngan-a, an ngay yumpinga, an min ngatha.” Yaa, ngamp ngeen nathan ngaantam-ngeeyimp min yumpanakan-a, an ngamp yumpimpa. Puth kan in ngeeyāna: ngamp nath ke'-ngoongkam anman iiy-iiyimp ngamp want-wanttakan kaangk iiyāmpan-a, an min ya'a! Ngamp nath ngamparakam thonakam ngaantam-ngeeyimpwey-a, an ngampar min ya'a. Ngamp woyan anman ngamparakamana iiy-iiyimpan-a, an puth ngamp God.ana ke'am kuchekangan pi'-pi'anamp nunang, ya'a, puth ngangk ngamparamana woyan ngamparamakan kaangk paththam wun-wunan woyan aakanakaman thonakama. 13An min ngampar may mungkanakan ey? Ee' kan-kanam a! Niiy nath ngaantam-ngeeyaniya, “Nil God.angan may minh yump ngampar, thip aakanakan mungkāmpa, a' nil thip yump ngampar may yipam mungkāmpa.” Puth may minh thakana, a' thip ngamparam anangan yaam wuniy ey? An ya'a, ngul minchowa, nil puth God.angan ngul wayathow may-a, minh-a, thip thampa. A' thon inan ngeeyāna: nil God.angan ngeenak yump ngampang a? Ngamp way yipam iiy-iiyāmp ey? maarich thak kee'-kee'āmp ey? An ya'a! Nil aakanakan ke' yump ngampanga, ya'a! Nilan yump ngampanga ngampan yipam wik ngeey-ngeeyāmp nunang, a' thaa'-kuump-kuumpāmp nunang, a' nilaniy yipam min-minam pi'-pi'ow ngampang. 14Nil God.angan mulaman ekath nunang, Jesus.an, Lord ngamparaman, a' nilana ngampang thamp mulaman ngul ekathow, nilana puth thayan paththama, mich pongam ya'a.
15Niiy mee'miy ngula niiy puth pam wanch Christ.antam ngula, an nil moom niiyantam a! Nil ngangk niiyantang ngul wun-wunana! Kemp inangan kal-kalanamp-a, kemp ngamparakam ya'a! An kemp nungant thampa! An puth min ey? nil pam Christian alangana wanch maarich kee'athow nunang ey? wanch way anan ey? nil ma'-yotaman pam wiyantangan maarich kee'-kee'ana. An ya'a, in way paththama nunganta! An nil pamanganiy yimanangan ke' yumpowa, puth nil ngangk kanam thee' Christ.anta, nil ke' kemp thonam yimanang ngul iiy-iiyan Christ.antangan. 16Niiy ngul ke' mee'miy ey? Nil pam wee'angan wanch way alantangan maarich kee'-kee'owwey-a, pul ke' thonam ngul iiy-iiyanpula. Than lat ngench thayanangan engkanang waa'-waa'ina, “Pulan ke' thonam yimanangan weenowpul ngul.” 17Than puth wee'-wee'anangan Lord Jesus.an monkan-wak-wakantan-a, ngangkangan pi'-pi'antan nunang-a, an than karpam iiy-iiyantan nungantang, ke' thonam anman.
18Niiy maarich ke' kee'-kee'āna wanch thonantangana, puth niiy wanch inangana maarich ke' kee'-kee'āna pam thonantanga. Niiy ke' paththam yumpān yimanangana. Wiy way iiy-iiyanamp-a, ma'-kuchathanamp-a, wik way waa'-waa'anamp thakan-a, an kan-kanam way iiy-iiyanamp, puth ngamp nath maarich kee'-kee'imp thon-thonantangan-a, an nil-nil, way paththam yump-yumpanamp, kemp yam pekan wayathan ngampang. 19Niiy puth ke' mee'miy ey? nil Ngeen-Wiy Min God.antamana, ngangk ngamparangan wun-wunan, kemp ngamparamweya ke' aawuch nungantam Ngeen-Wiy Min God.antam alantan nilan wun-wunan. Nil God.angan kuch nunang ngangk ngamparangan wun-wunow. 20Niiyaniya moom niiyantakaman ya'a, niiyiya pam wanch nungantam God.antama, nil moom ngamparam thonam anman, nil puth Jesus.an utham ngampar. Yaa, niiyana puth minam iiy-iiyāna, pam wanchangan yipam God.an pam pi'an ngaantam-ngeey-ngeeyayn nunang.