Nil Christ.angan Kuch Nganang Wik Nungantaman Waa'ān Niiyant Pam Wanchantan
41Niiy ngaantam-ngeeyān ngananga Apollos.angan ngan pam inangana work iiy-iiyanan nungant Christ.antana a' putha nil God.angan wik nungantamana ma' nganttangan wanta, ngan yipam waa'-waa'ān niiyant -- wik anangana, nil ka'athaman wik thenchanaman pi'-pi'a, a' nilana kan-ngul wik engkanang waa'. 2Nil pam wee'an workan iiy-iiyan God.antan-a, nil work minam ke'-ngoongkam anman iiy-iiyow nungant, man thayanam anman iiy-iiyow. 3-4Niiy nath ngaantam-ngeey-ngeeyin ngay ke' work minam ke'am iiy-iiyang, nath pam wanch wiyangan nath yimanangan thampa ngaantam-ngeey-ngeeyiythan ngayang -- an kana, niiy puth moom ngatharam ya'a. A' ngay ke'am ngaantam-ngeey-ngeeyang ngatharakam ngay wanttak natha workan iiy-iiyanga, nath minama, nath ya', waya, puth nilaman ep-paththam God.angan thath-thathan ngayanga. Ngay ngaantam-ngeeyang ngathamang ngay work way-way ke'am iiy-iiyang, puth nil God.ana wanttak nath thawow ngath a? Nilam thonakam ep ngangk thath-thathan ngayang, nilam ep ngul thawow ngathara ngay nath work minam iiy-iiyang, nath ya'a. 5Niiyaniya erkaman ke' ngaantam-ngeeyān, a' putha thawān thakana work nganttamana ke' waya, niiyiya kuup-kuupān aak-aakanakaman nil moom Christ.an palaman wampowa. Nil epa pam wanchantan ngangk thath-thathan ngamparaman, a' nil ngul waa'ow ngampar yotamantana ngamp want-wanttakan ngangk pal pekkuwaman ngaantam-ngeey-ngeeyanamp, ngangkangam thakan pi'-pi'anampana. An ke' nil nganth pi'an yumpow ngul, nil yipam ngangk ngamparamangan park-parkow pekangkana, an meenathow yotantan. An-aniyangan-a, nil God.angan ngul thaa'-kuumpow thanang pam wanch anangan than minaman ngangkangaman pi'-pi'in nunangan.
6Ngay nganttakam Apollos.ang yaan waa'anga, niiy yipam wik God.antaman ngaantam-ngeey-ngeeyāna, a' woyan min wak-wakāna. Niiy wik inan thamp ngeeyāna: niiy ke'a kaangkiyathān thanang pam wanch wiyiya, puth ke' ulpathān thananga. Puth wiy anangan-a, kaangk-ke'anangana ke' waa'ān thananga! An min niiyant ya'a -- niiy pam manth-thayan niiyantam yotam anangan minam anman ngaantam-ngeeyān thanangweya! 7Ngul nil wee'ang thath-thathan niiyangana pam pi'-pi'anam iiy-iiyaniy a? An ya'a! Nilam God.anga yotam yump-yump. Ngul niiy yuk way min thakan niiyam yump-yumpan ey? An ya'a! Nilam God.angan yumpa! Niiy ngul kuchek waap min niiyangam yumpwun ey? a' ma'-kunch thakan yumpwun ey? An ya' paththama! An nil God.anga yimanangan ma'-kunch yump niiyang! Yaa, niiy kuchek min waa'win ey? a' putha ma'-kunch waa'win ey? An ya'a!
8A' niiy ngul ngaantam-ngeeyaniy niiy ke' wik yotam anangan thiichaniy God.antaman ey? ke' nil God.angan wik yotam anangan kan waa'-waa' niiyant ey? An ya'a! Niiy ngaantam-ngeeywuniy niiyantakamana niiy ke' pam wuut pi'an ey? puth nganan ke' pam pi'an ya' ey? An ya'a! Niiy nathwey kan-kanam pam pi'an iiy-iiyinwey-a, yaa, an puth kana, mina, ngamp karpam yipam pam pi'an iiy-iiyimpa, puth ya'a! 9Puth ngayan ngaantam-ngeey-ngeeyang ngatharakama nil God.angan pam pi'an ke'am yump nganang Apollos.angan ya' thampa, ngan pam manya, kaangk-ke'anangweya, ngan pam inangan nilan kuch nganang wik nungantaman waa'-waa'ān niiyant pam wanchantana. Ngan puth pam kaangkiy ya'a, ngan inanganweya ke' pam anangan keenkan mulathin thanang, mee' yotantangan a' putha mee' ngaantiyongkantang thampa. 10Ngan wik Christ.antaman waa'-waa'anan pam wanchantana puth wiyangan waa'-waa'antan nganang ke' pam kuchek waap ke'anang yimanangana; puth niiyaniya ngaantam-ngeey-ngeeyaniy niiyantakamana ke' kuchek waap min ey? ke' niiy woyan Christ.antaman minam thiichaniy ey? Than wiyangan waa'-waa'antan nganang ke' pam manya, puth niiyiya ngaantam-ngeey-ngeeyaniy niiyantakamana ke' pam pi'-pi'anam a' thayan paththam iiy-iiyaniy ey? Than wiyangana thaa'-thengkathantan nganang, puth niiy ngaantam-ngeeyaniy niiyantakama ke' than wiyangan min paththam waa'-waa'antan niiyangan ey? -- an ya'a! 11Ngan nathpalmana a' in-inman meech iiy-iiyanan, a' ngakam uth-uthamanan, a' ngook way kal-kalanan a' puth-a, than wiyangan piik-piikantan nganang; putha ngan thaa'-weep-weepanan palam-puyama. 12Ngan ma' nganttang work tha'iy iiy-iiyanan, ngan yipam may thakan piiy-piiyānwey. Than wiyangan aak-ya'angan wayan waa'-waa'antan ngananga, puth ngananiya thawanan God.antanana minam iiy-iiyow thantanweya; than piik-piikantan ngananganweya a' thaa'-thengk-thengkathantan nganang thakana, puth ngananiya aak thaamp-thaampanan. 13Than wik uuy-uuyamantan thak wik aak-ya'angan waa'-waa'antan nganang puth ngananiya thaa' itangam thaw-thawanan thant, thaa' poch-pochaman ya'a. Than puth pam wanchangan in-inman ngaantam-ngeey-ngeeyantan ngananganweya ke' wook way paththam aakangan wun-wuntana than pam wanchangan tha'angan maak-maakantan.
14Niiyalang, in ngeeyāna, ngay niiyang ngul-nyaa' yumpanakan lat ke'am umpangan niiyanta, ya'a, ngay kaangk niiy niiyantakaman ngaantam-ngeey-ngeeyāna niiy want-wanttakan iiy-iiyaniya, puth niiyaniya ke' puk ngatharam yimanangan iiy-iiyaniya, ngay kaangk wun-wunang niiyantana, ngay kaangk paththam niiy minam iiy-iiyāna. 15Pam yotangan thaa'-wantanamangan nath wik Christ.antaman waa'iythan niiyanta, puth ngay thonakam ke' piip niiyantam yimanangan iiy-iiyang ngula. Ngay puth ka'athama wik Christ.antaman waa'-waa'angan niiyantana, a' anpalmana, niiy ngangk thee'-thee'an nungant ngul, a' pam wanch nungantam ngul iiy-iiyaniya. 16Yaa, puth ngayiya thaa'-thayanam thawang niiyant: niiy woyan ngatharaman maakān a! 17Ngay ke'-paala Timothy.an kuchāng niiyantana. Niliya ke' nhengk ngatharam yimanangan iiy-iiyana, puth nil ngurp-ngana, a' nilana Jesus Christ.ana ke'-ngoongkam anman monkan-wak-wakan nunang. Niliya putham ngul waa'-waa'ow niiyant woyan Christ.antaman ngayan wak-wakanga a' aak nath-nathana waa'-waa'angan pam wanch Christians al-alantan, churches thanttamangana.
18Pam wanch wiy anangana niiyantangan-a, pi'an yump-yumpwuniy niiyantakamana, niiy puth ngaantam-ngeeyan ke' ngayaniya ke' wampāng niiyantan aak nanganiya. 19Nil nath moom ngamparam alangan Christ.angan kuchow ngayang-a, yaa, ngay erkam ngul wampāng niiyant aak nanganiy. Ngay wampāngan-a, ngay ngul thathāng niiyang niiy wee'-wee'anangan pam wanch pi'-pi'anam yump-yumpwuniy niiyantakamana, niiy nath ngangk thayanam Christ.an monkanan-wak-wakaniy nunang, nath ya'a, yaan nath thaw-thawaniya. 20Puth ngamp wee'-wee'anangan ma' God.antangan iiy-iiyanamp-a, ngamp wik thonakam ke' thaw-thawāmp, ya'a, puth nil ma'-aath-aathan ngampang ngangk thayanam monkan-wak-wakāmp nunanga. 21Yaa, niiy kan-ngul mi'āna. Ngay wampāngan-a, ngul ngay wak-wakāng niiyang ey? nath ya'a, ngay nath ngangk minangam wampāng niiyantweya, thaa' itangam thaw-thawāng niiyant -- yaa, kan niiy ngaantam-ngeeyāna, a' mi'ān ngula niiy want-wanttakan iiyāna.