Niiyan Wukal Christians Wiy Al-Alantan Thee'ān
161Ngay in-ngulan waa'āng niiyantana wukal anpalan niiyan yalmathaniya Christians wiy al-alantan aak Jerusalem.angan wun-wuntan wukal ke'ananganweya. Ngay kan waa'ang thant pam wanch al-alantan aak Galatia.angan wun-wuntan, wukal anangan want-wanttakan yal-yalmathayna, puth wik inman ngay niiyant ngul waa'-waa'ānga. 2Aak Sunday thon-thonangana, niiy thon-thonamangana wukal wiy wunp-wunpān pokkapanga. Niiy al-alangan wukal pi'-pi'anan uw-uwaniy-a, wukal pi'-pi'anam wunp-wunpāna. Niiy al-alangan wukal manyan uw-uwaniy-a, wukal many-many wunp-wunpānweya. Niiy wukalan nangman pi'-pi'ān, keenk mak wun-wunow, ma'meym yipam wun-wunowa ngay ngulan wampāng niiyantana. 3Niiy pam min-miniy ma'-thayanan mi'ān thananga, yipam wukalan aak Jerusalem.akan kal-kalayna. Ngay wampāngan-a, ngay ngul lat umpāng thant pam al-alantan kalayn ngul aak Jerusalem.akana, than yipam pam wanch aak angan wun-wuntanan-a, than yipam mee'miy ngul iiy-iiyayn than wee'-wee'anangan kal-kalaynana. 4An nath minwey ngathar-a, ngay thampan iiy-iiyāng thanttangana.
Ngay Puy Ngul Iiyāng Niiyang Yipam Thathānga
5Ngay aak Macedonia wakan iiy-iiyānga. Ngay aak Macedonia anpalan iiy-iiyāngan-a, ngay wampāng ngul niiyant nangana, 6a' ngay nath yaan nangman wun-wunāng niiyantangana, nath aak kucharangan nangman wun-wunānga. A' ngul anpalaniya, niiy ngayangan ngul ma'-aath-aathān, ngay yipam aak thonak ngul iiyāng aak wanttin nathanweya. 7Ngayan kaangk ke'a niiyangan erkaman want-wantānga, ngay kaangk yaam wun-wunāng niiyantanganweya. Puth nil nath Lord.angana kaangkwey ngay niiyantangan yaaman wun-wunāng-a, yaa, an ep-paththam ngayan yaaman wun-wunāng niiyantangana. 8Puth ngayan aak Ephesus.angan yippak wunāng aak-aakanakamana may pi'an Pentecost.an wampowa. 9Puth than pam wanch il-ilangan aak inan wun-wuntan kaangk wik min God.antaman ngeey-ngeeyayna. An min paththam ngathara, ngay yipam wik minan waa'-waa'āng thanta than pam wanch yotamang kan-ngul yipam wikan ngangkangam pi'-pi'ayna. Puth than pam wanch yot wiy anangan thampa kaangk ke'an wik minan ngeey-ngeeyayn nganttamanweya, than thaamp-thaampantan ngananga.
10Nil Timothy.an wampow niiyantanwey-a, niiyana ngangk minangam pi'-pi'ān nunangweya, a' ma'-aath-aathān nunangweya, nil yipam ngangk min ngeechanowa, nil ke' aak nungantamang yimanangan wun-wunowa, nilan yipam ke' winynyang mo'-mo'owa puth nilan work Lord ngamparamant iiy-iiyana, ke' ngayam yimanangan. 11Niiywey ke' ngaantam-ngeey-ngeeyān nunangana ke' nil pam waya, work minaman ke'am iiy-iiyana, ya'a, niiyiya minam iiy-iiyān nungant a' ma'-aath-aathān nunang nilan yipam ngangk minangam palaman wampowa ngatharana. Puth ngay aak thath-thathāng nunganta a' puth-a, wiy al-alantan thamp.
12A' putha, ngay ngurp ngamparam Apollos.an waa'āng niiyant. Ngay ya'angam thaw-thawang nungant, nil thanttang wiy al-alantangan iiyow yipam thathow niiyang aak Corinth.angan wun-wunaniya, puth nilan kaangk ke' iiyowa, nil ngul iiyow niiyant aak minan wunow nungantanweya.
Niiy Wik Min Inangan Ngeey-Ngeeyāna
13Niiy in ngeeyāna: wiyangan ke' thaach-thaachayn niiyang way yumpanakana. Niiy Christ anman monkan-wak-wakān nunang, niiy ke' eench-eenchān nungantama, niiyiya ngangk thayanam monkan-wak-wakān nunang. 14Niiy ngeen nathwey yump-yumpinwey-a, yaa, niiyan puth anman ngangk minangam kaangk wun-wunān thant wiyantanweya.
15Niiy puth mee'miya, than Stephanasa a' puth-a, kampan nungantam wee'anangana Christ.an monkan-wak-wakin nunang ka'athamana aak Greece.angan, a' thanan work pi'an iiy-iiyin, Christians wiy anangan minam paththam ma'-aath-aathin thanang. 16Ngay kaangk niiy wik thanttamana ngeey-ngeeyāna puth pam wanch wiy al-alantaman than thamp workan iiy-iiyantan God.antana. Minaman ngaantam-ngeeyān thanang a' than wik ngeenanwey thaw-thawayn niiyantan-a, niiyan wik ngeey-ngeeyān thanttamana.
17Than inangana, Stephanas-a, a' Fortunatus-a, a' putha Achaicus in wampina, a' ngangk min paththam ngul wun-wun ngathar. Ngay iingk wun-wunang niiyantam, puth than inangan wampin-a, ngayan ngangk min paththam ngul wunanga. 18Thanan ngayang kan-ngul ngangk thayanathin, ke' than niiyang yimanangan ngangk thay-thayanathinweya. Ngampiya pam wanch il-ilantan ngangk minangam thaa'-kuump-kuumpāmp thanangweya puth than min iiy-iiyantan ngampar.
19Than pam wanch Christians aak Asia.angan wun-wuntana, thanan thawin ngathar ngay wik inan waa'āng niiyantanweya thanan niiyang ngaantam-ngeey-ngeeyantan. A' than Priscilla-a, puth Aquila-a, a' putha than Christians wiy anangan than aak thanttamangan karpam yalmathwuntanan-a, thanwey thawin than kaangk paththam wun-wuntan niiyantana, puth than ngaantam-ngeey-ngeeyantan niiyang thampa. 20Than ngurp ngamparam yotam inangan thaw-thawina, ngay niiyantan waa'āng thanang niiyangan ngaantam-ngeey-ngeeyantan, a' niiy puth Christians nanangan yal-yalmathwuniyan-a, niiy ompam kath-kathwun a' wal-mant piint-piintwuna. 21A' ma' ngatharanga ngay wik inangan umpang niiyant: ngay thamp kaangk paththam wun-wunang niiyantana.
22Nil wee'ana God.antaman kaangk ke'an-a, nil God.angan way paththam waa'owan a' aak wayak ngul kuchowan. Ayyang! Moom nganttamang, pal oth-oth wampāna!
23Ngay kaangk nil Lord.ana ngangk minangam anman iiy-iiyow niiyantana, 24a' ngay kaangk paththam wun-wunang niiyantana, ngampan puth ke' thonam yimanangan iiy-iiyanamp Jesus.antanga ngula.
In Paul.antam,
Anman kan.