Ngamp Thawāmp Nungant Ngeen-Wiy Min God.antam Alantan, Nil Yipam Ngampang Ma'-Aath-Aathow Work Iiyāmp God.antan
141Ee'a, an ngamp kan-kanam paththam kaangk wunāmp ngamparakamana, pam wanch yotamant, ke'-ngoongkam anman kaangk wun-wunāmp thanta, ke' eench-eenchāmpweya. A' putha ngamp thaw-thawāmp nungant Ngeen-Wiy Min God.antam alantan, nil yipam ma'-aath-aathow ngampang anmana, ngampiy puth wik God.antaman waa'-waa'āmp thant wiyantana, a' work wiy thampan iiy-iiyāmp nungant. 2Puth than pam wanch wiy anangan wik thaa'nganth wiy-wiyaman Ngeen-Wiy Min God.antam alantaman thaw-thawantanan-a, aniy than God.antan thaw-thawantan, pam wanchantan ya'a, than puth pam wanchangan wik anana ke' mee'miya, ya'a, nilam thonakam God.an epa wik anan mee'miya. Than puth wik anan ma'-mupaman wun-wunana waa'-waa'antan wik nungantam God.antamana, an puth nila Ngeen-Wiy Min God.antam alangan ma'-aath-aathan thanang wik ananganiya thaw-thawayna. 3Puth nil wee'angana wik God.antaman engkanangan waa'-waa'anan-a, an nil pam wanchantan ep waa'-waa'an. Nil waa'-waa'an thant nil yipam ma'-aath-aathow thanang woyan minan wak-wakayna, a' puth ngangk thay-thayanathow thanang, a' nil yipam ngangk min yump-yumpow thanang thamp. 4A' putha nil wee'an wik thaa'nganth wiy-wiyam Ngeen-Wiy Min God.antam alantaman thaw-thawiywey-a, an nil nungantakam thonakam ma'-aath-aathanweya, puth than wiy al-alangan ke'am thiich-thiichantan, puth nil wee'anganweya wik God.antaman engk-engkanangan waa'-waa'iywey-a, an nil ep-paththam pam wanch Christians yotam anangan ma'-aath-aathan thananga.
5Ngay kaangk niiyang yotaman wik thaa'nganth wiy-wiyam Ngeen-Wiy God.antam alantaman thaw-thawāna, an min niiyant. A' putha ngay kaangk paththam niiy yotamangana wik God.antaman engkanang waa'-waa'āna, inana ep min paththam niiyant. Nil wee'angan wik God.antaman engkanangan waa'-waa'an pam wanchantan-a, an nil pam pi'an mee' God.antangan. Puth nil wee'an wik thaa'nganth wiy-wiyam Ngeen-Wiy God.antam alantaman thaw-thawanan-a, an nil pi'an ya'a. Nil nath wik anangan min-minan koochanathiy pam wanchanta aak churchangan-a, an nil epa pam pi'ana, nil puth ma'-aath-aathan thanangweya than yipam woyan God.antamana minam wak-wakayna. 6Ngurp ngatharam niiyalang, ngay nath wamping niiyantwey-a, wik thaa'nganth wiy-wiyam Ngeen-Wiy God.antam alantaman thonakaman thaw-thawing niiyantanwey-a, an min niiyant ey? An ya'a, niiyan ke' ngeey-ngeeyina! an niiy kum-kumina! Puth ngay nath wik God.antaman engkanang waa'-waa'ing niiyantanwey-a, a' minam thaa'-aath-aathing niiyangwey-a, an epa min niiyanta, niiy yipam wik God.antaman mee'miy wun-wunān a' minam ngaantam-ngeey-ngeeyān nunang thamp.
7In aak yimanangan wun-wunana; nil pamangan nath yuk guitar way-way kee'-kee'athiywey-a, ngampaniya want-wanttak mee'miy wun-wunimpa ngampa aak want-wanttinan path-pathāmpa? Nil min-minan engkanangan kee'athiywey-a, an epa ngampan thiichimpa. 8A' inan thamp: keenkanamana, nil pam moom soldier alangana yuk trumpet othamayanan wuu'-wuu'iya, yipam soldiers yotangan yalmathwiythana kul pekwunakana. Nil nath way-way itangam wuu'-wuu'iy-a, than soldiersangan ke' yalmathwiythan, ya'a! 9An aak yimanangan wun-wunan ngampara: ngamp nath wik thaa'nganth wiy-wiyam thaw-thawimpwey-a, than pam wanch wiy al-alangan wik want-wanttak ngeey-ngeeyiythana? An ya'a! Ke' ngeey-ngeeyiythan, wik ngamparamana wony-wonyam yam kenyan weent-weentiya. 10Aak umyompanaman-a, pam wanch yot anangan aak nath-nathan wun-wuntan aak world ingana, a' wik thaa'nganth yot-yotam thanttakaman thaw-thawantan! Than aakan punchanangana an ep wik ngeey-ngeeywuntana. 11Ngay nath kech iiy-iiyingwey-a, aak thon-thonakan-a, ngay wik thanttam aak an punchanantamana, ngay ke' ngeey-ngeeyingweya ya'a, ngay puth mal-waa'ama, ngan aak-kunch ya'a. Thananiya than-than; ngayaniya ngay-ngaya thaa'nganth thona, ngan ke' mee'miy nganttakam, ya'a. 12Niiy nath kaangk nil Ngeen-Wiy Min God.antam alangan ma'-aath-aathow niiyang, work min thee'-thee'ow niiyant. Yaa, niiy thawān nungant ma'-aath-aathow niiyang niiyan yipam pam wanch Christians anangan minam ma'-aath-aathān thananga, niiy yipam karpam minam monkan-wak-wakān nunang God.an.
13Nil wee'-nath wik thaa'nganth wiy-wiyam Ngeen-Wiy Min God.antam alantaman thawiywey-a, an nil mee'-wuth-wuthanamow God.antan ma'-aath-aathow nunang wikan kooch-koochanathow pam wanch wiyantan. 14Ngay puth wik thaa'nganth wiy-wiyam mee'-wuthanamanang thawing God.antan-a, an ke' nil Ngeen-Wiy Min God.antam alangan wikan thaa'ang wunpan ngatharang puth ngay ke' mee'miy ya'a wik anangan ngay want-wanttakana thaw-thawangan. 15Yaa, ngay want-wanttakan mee'-wuthanamānga a' aak thakan path-pathāng a? Wiyiya ngay wik thaa'nganth wiy-wiyam Ngeen-Wiy God.antam alantaman thaw-thawang, a' aak-path-pathang thakan. Wiyiya, ngay wik engkanang aak-path-pathang, a' mee'-wuth-wuthanamāng thakan, puth kuchekangan ngaantam-ngeey-ngeeyanga ngayan ep-paththam mee'miyaniya wik want-wanttakan ngay thaw-thawangana. 16Niiy nath wik thaa'nganth wiy-wiyam Ngeen-Wiy Min God.antam alantaman waa'-waa'in churchangana, God.an yipam thaa'-kuump-kuumpān nunanga. Puth than pam wanch wiyangan nath wikan kum-kumiythanwey-a, an puth than want-wanttake “Ee'an” thawiythan e? An ya'a, “Ee'an” ke' thaw-thawiythan than puth wik anana ke' mee'miyweya. 17Niiy nath wik alangan God.an minam thaa'-kuump-kuumpin nunang, thankyou thakan thaw-thawin nungant, puth niiy pam wanch wiy anangan ke' ma'-aath-aathin thanang, ya'a, than puth wik niiyantaman ke' ngeey-ngeeyiythan, ya'a.
18Ngay thankyou thawang God.anta, puth anpalan ngayan wik thaa'nganth wiy-wiyam Ngeen-Wiy Min God.antam alantaman ma'-yotaman thaw-thawanga, niiy ep chil-chil thaw-thawaniya. 19Puth ngay aak churchangan-a, wik thaa'nganth wiy-wiyam Ngeen-Wiy Min God.antam alantaman kaangk ke' thaw-thawānga. Ngay nath wik yaam thaw-thawing niiyant wik thaa'nganth wiy-wiyaman-a, Ngeen-Wiy Min God.antam alantaman-a, an puth min niiyant ya'a! Ngay nath wik engk-engkanang waa'-waa'ing niiyantwey-a, nungkway wik otangam-a, an epa min niiyantweya, niiy yipam ngaantam-ngeey-ngeeyāna ngay want-wanttakan thaw-thawānga.
20Ngurp ngatharam-ang, niiy ke' ngaantam-ngeey-ngeeyāna ke' puk manyiyang yimanangan ngaantam-ngeey-ngeeyantan. Niiyiya kuchek waap minangam ngaantam-ngeey-ngeeyāna. A' putha, an niiyant min paththama niiy yipam ngoongk-ngoongkam iiy-iiyān way yumpanakana, putha inan ep niiyan minam thiich-thiichāna woyan God.antamana, a' minam ngaantam-ngeey-ngeeyāna. 21Than keenkanaman wik God.antam inangan umpin lat ngench thayanangan:
“Ngaya Goda, moom niiyantamana, ngay wik inan thaw-thawanga.
Ngay pam wanch aak thon anpalan ngul kuchāng thant pam wanch ngatharam al-alantan.
Than wik ngatharam ngul waa'-waa'ayn thant, puth thananiya thaa'nganth wiy-wiyam waa'-waa'ayna.
A' than pam wanch ngatharam al-alangana ke' thamp ngeey-ngeeyayn thananga, ya'a,
than puth kaangk ke'a wik ngatharaman ngeey-ngeeyayn.”
Nil God.an wik yimanangan thaw. 22Puth nil Ngeen-Wiy Min God.antam alangan ngeenak ma'-aath-aathan thanang wiy anangan wik thaa'nganth wiy-wiyam nungantaman thawayna? Nil ma'-aath-aathan thanang than yipam pam wanch anangan than God.an ke'aman ngaantam-ngeey-ngeeyantan nunangan-a, than God.an yipam pam pi'an ngaantam-ngeey-ngeeyayn nunang. Puth nil Ngeen-Wiy Min alangan wiy anangan ep ma'-aath-aathan thanang wik God.antaman engk-engkanang waa'-waa'ayn thant Christians al-alantan.
23Puth niiy nathwey yotam yal-yalmathwin aak churchangan-a, a' wik thaa'nganth wiy-wiyam Ngeen-Wiy Min God.antam alantaman karpaman thaw-thawinwey-a, an wanttaka? Nil pam thon nath ngoonchiyweya Christian ya'wey-a, pam nil nath ngoongk-ngoongkam wik Christ.antamanwey-a, an nil ngaantam-ngeey-ngeeyow ke' niiy weenth paththam a! 24Puth niiy yotam nath wik God.antaman engk-engkanangan waa'-waa'inwey-a, an nil pam alangan ep ngeey-ngeeyow niiyanga. Nil ngul ngaantam-ngeey-ngeeyow nungantakaman nilan pam way iiy-iiyana, a' ngul-nyaa' wun-wunow. 25A' putha, nil ngul ngaantam-ngeey-ngeeyow nungantakamana nil kuchekangan wik wayanang anangan pi'-pi'an; a' anpalaniya, nil pungkang ngul nyiinow a' kaa'walana pek aakakam thuchow; a' nil God.an thaa'-kuump-kuumpow nunang, a' thawow ngul niiyantana, “An kan-kanama! Nil God.an ngangk niiyantangan wun-wunana!”
Niiy Minam Yalmathwun Aak Churchangan
26Ngurp ngatharam niiyalang, ngay inan thaw-thawang niiyanta. Niiy yalmathwuniy aak churchangan-a, niiy ma'-aath-aathwun woyan God.antaman minam wak-wakāna. Nil-niiyant thonamangan-a, nath aak-path-pathow; nil thon alangan natha wik God.antaman waa'-waa'ow; nil thon alangana nath waa'ow niiyant wik nil God.angan waa' nungant ngangkangana; nil thonang natha wik thaa'nganth wiy-wiyam thaw-thawow Ngeen-Wiy Min God.antam alantaman a' puth nil thon alangan wik anangan nath kooch-koochanathow niiyantanweya. 27Niiy yotamangan-a, wik thaa'nganth wiy-wiyam Ngeen-Wiy Min God.antam alantaman ke' thaw-thawāna, pam kuchamang ep nath thaw-thawiypul, nath ko'alamangweya ep-paththam, puth niiy yotamangana ya'a. Niiy ma'-ma'ang thaw-thawānweya, a' niiy wiy al-alangana wikan koochanathāna. 28Puth nil pam thonam nan ya' natha nil wikan koochanathiy-a, yaa, an niiy wik thaa'nganth wiy-wiyam Ngeen-Wiy Min God.antam alantaman ke' thaw-thawāna aak churchangan, niiy popam nyiin-nyiinān, a' God.antan ngangkangam thonakam thaw-thawān nungant. 29Than pam kuchamanga, nath ko'alamangweya, wik God.antaman engk-engkanang waa'-waa'ayn niiyantana, a' niiy wiyangan-a, wik ngeey-ngeeyān thanang, a' ngaantam-ngeey-ngeeyān thanang than nath wik minan thaw-thawantan, nath ya'a. 30Nil God.angan nath wik waa'-waa'ow pam thonam alantan nil niiyant yipam waa'-waa'owwey-a, nil mak waa'-waa'ow niiyanta. Nil wee'ang nathan ka'athaman wik waa'-waa'an-a, an nil popam ngul nyiinow, nil pam thon alangan yipam wikan waa'ow niiyant nil God.angan want-wanttakan waa' nungant. 31An min niiyant niiy ma'-ma'angan wik God.antaman waa'-waa'ān, niiy yotamangan yipam wik min anangan kuchekangan pi'-pi'āna, a' ngangk thayanam iiy-iiyāna. 32-33Nil God.angan kaangk ke' niiy wik thaa' karpaman thaw-thawāna aak churchangana, ya'a. Pam thonam anman thaw-thawow a' nil wik minchathowan-a, pam alangana, yaa, an ep thon ngul thawowa, an yimanangan ep mina. Nil pam wee'angan kaangk waa'ow wik God.antaman niiyantan-a, nil ngaantam-ngeey-ngeeyow nungamang aak nungant ngulan wampow wik thawanakan-a, an ep nil thawowa a' nil ngaantam-ngeey-ngeeyow thampa nil wikan ngul-ngulan wantowana.
34A' ngay inan thawang niiyant: aak ngampar yimanangan wunan aak churchesangan aak nath-nathana: wanch anangan-a, popam nyiin-nyiinayna. Than wik ke' thaw-thawayna, ya'a. Than puth moom ke' iiy-iiyayn, puth wik lat ngench thayanangan yimanangan waa'-waa'ana. 35Than nath kaangk wikakan engkaynwey-a, yaa, than pam thum thanttam al-alantan engkayn thanta, aawuch thanttamang, aak churchangana an ya'a. Puth than aak churchangan wik ke' thaw-thawayna, inana way-wayam paththama!
36Niiy nath kaangk ke'a wik ngatharam nanangan ngeey-ngeeyāna. Ngul an wik min God.antamana ka'athaman niiyant wamp ey? An nath niiyantakam thonakam wamp ey? An ya'a! 37Yaa, nil wee'ang nath ngaantam-ngeey-ngeeyow nungamang ke' nil God.angan kuch nunang wik nungantaman waa'-waa'ow-a, work thakan iiy-iiyow nungantan-a, an nil wik ngatharam anangan ngayan ump-umpang niiyantan-a, ngaantam-ngeey-ngeeyow thanang an kan-kanam wik God.antam thampa. 38Nil ya'wey-a, yaa, an ngamp ke' ngaantam-ngeey-ngeeyāmp nunang ke' nil God.angan kuch nunang, an ya'a.
39Ngurp ngatharam niiyalang, niiy ngangk minangam wik God.antaman puy-puyam waa'-waa'ān wiyantan, wik engk-engkanang waa'-waa'ān thantana. A' than wiy anangan nath kaangk wik thaa'nganth wiy-wiyam Ngeen-Wiy Min God.antam alantaman thaw-thawayn-a, niiy ke' wayathān thananga, mak thaw-thawayna, 40puth niiy ma'-ma'angana thaw-thawāna, minam anman ma'-aath-aathwuna.