Ngamp Ngangk Minangam Iiy-Iiyāmp Thant Pam Wanchantan a!
131Ngampaniya nath wik ma'mangkaman thaw-thawimp, thaa'nganth thon-thon al-alangana, a' putha wik thaa'nganth ngaantiyongkantamangana thaw-thawimp thampa. Puth ngamp ke' nath kaangk wun-wunimp pam wanchantan-a, yaa, an ngamp yaan thaw-thawanampa, wikathiy weenāmp ke' yuk bell yimanangan, natha ke' yuk pi'an anangan muutathiy piik-piikantana. Yaa, ngamp kan-kanam paththam kaangk wun-wunāmp thanta! 2Ngampwey nath wik God.antam minaman waa'-waa'imp pam wanchantana. Ngamp nath kuchek min wun-wunimpa, a' yot-yotam anangana thiichimpweya aak earth imanamana, a' puth-a, ma'mangkam nath thiich-thiichimp wik God.antaman. Ngamp nath kan-kanam ngaantam-ngeey-ngeeyimp nil God.angan ngul ma'-aath-aathow ngampang work pi'-pi'anam anangan meen-meenathāmp thanta; wiyiya ngampa yoyk wuut pi'an alantan nath thawimpa puy kech-kech iiyān aak thonaka. Puth ngamp nath kaangk ke'an wun-wunimp pam wanchantan-a, yaa, nil God.angan mina ke' waa'-waa'iy ngampang, ya'a. Yaa, ngamp kan-kanam paththam kaangk wun-wunāmp thanta! 3Ngamp natha way min ma'mangkam ngamparaman thee'imp pam wanch wiyantana, a' ngampiya nath theetathimp ngamparakaman thumang yipam pench-penchimp. Puth ngampwey kaangk ke'an wun-wunimp pam wanchantan-a, yaa, an puth nil God.angan min ke' waa'-waa'iy ngampang, ya'a.
4Ngamp kaangkan wun-wunāmp pam wanchantan-a, yaa, man kul ngampar erkaman ke' wamp-wampow, ngamp ngangk minangam iiy-iiyāmp thant. Ngampaniya ke' mee' wun-wunāmp thant pam wanch wiyantan ya'a. Ngamp ulp-ulpanangan ke' iiy-iiyāmp thant, putha wik pi'anang ulp-ulpanang ke' thaw-thawāmp ngamparakaman ya'a, 5a' putha ngamp ke' wayamāmp thant, kaa'-thayanan ke' iiy-iiyāmp thantweya. Ngamp ngamparakaman thonakaman ke' ngaantam-ngeey-ngeeyāmpa, pam wanch wiy anangan thamp ngaantam-ngeey-ngeeyāmp thanang. A' putha, ngampiya thaa' poch-pochaman ke' thaw-thawāmp thantweya, a' putha ngampiya kul kath keenkanaman-a, an ke'-ngul ngaantam-ngeey-ngeeyāmpa. 6Than pam wanchangan wayan yump-yumpayn-a, an ngampaniya ngangk way iiy-iiyāmp thanttamana, ngangk minangaman ya'a. Puth than wik min God.antaman ngeey-ngeeyayn-a, an ngampiy putha ngangk min wun-wunāmp thanttamana. 7Nungkway than-ngampar wayan yump-yumpayn-a, an puth ngampiya kaangk wun-wunāmp paththam thantana, ngamp ke' wantimp thanang anpalan way thanan yump-yumpin. A' ngamp ke' ngaantam-ngeey-ngeeyimp ke' than way anman iiy-iiyiythana, ya'a. An ngamp kuup-kuupāmp thant, than nath min ngul iiyayna. Than min nath yumpiythanwey-a, nath ya'a, way nath yumpiythanwey-a, an ngampaniya ke'-ngoongkam anman ngangk minangam iiy-iiyāmp thantana.
8Ngampaniya murkanim anman ngangk minangam iiy-iiyāmp pam wanchantan. Aak ingana, Ngeen-Wiy Min God.antam alangan ngampang wiy anangan ma'-aath-aathan wik min God.antaman minam waa'-waa'āmp pam wanchantan, a' wiy anangan nil ma'-aath-aathan wik thaa'nganth wiy-wiyam nungantaman thaw-thawāmpa, a' wiy anangan ma'-aath-aathan thanang kuchek waap minan iiy-iiyayna. Puth aak ngul-ngulana, work ngamparamana minchow ngula, ngampa wik min God.antaman ke'-ngul waa'-waa'āmp thant, ya'a; a' wik thaa'nganth wiy-wiyaman Ngeen-Wiy Min God.antam alantaman ke'-ngul thaw-thawāmp thakana, an ya'-ngula. 9Aak inan yimanangan wun-wunana: ngamp pam wanchangan manyam thonakam thiich-thiichanampa, a' ngamp wik min God.antaman min-minaman ke'am waa'-waa'anampa, ya' yippaka. 10Puth aak ngul-ngulana, nil Jesus.an palaman wampowan-a, nil God.angan yotaman waa'-waa'ow ngampar, a' aak an-aniyangan ngula ngamp wik ma'mangkam thiichāmp ngul, ngamp ke'-ngul wikan thaa'an-aath-aathwumpa.
11Ngamp puk manyaman iiy-iiyampan-a, ngampaniya ke' puk manyiy yimanangan wikan thaw-thawampa, a' putha ke' puk manyiyang yimanangan ngaantam-ngeey-ngeeyampa. Ngamp yimanang ngulana ke' puk manyiy yimanangan ke'-ngul ngaantam-ngeey-ngeeyanampa, a' thaw-thawanamp thakana, ananiya ya'-ngul. Puth ngamp pam wanch ngul ween-weenampa. 12In aak yimanangan wun-wunana: nil piip God.angan yotam inangan mee'miy ngampang, ngangk ngamparaman thakana nil ep thath-thathan ngampang. Puth ngampaniya manyam anman mee'miya. An wuthanang yippak wun-wunan ngampar, an ke' ngamp yuk mirror way alangan thath-thathwunamp kaa'wal ngamparaman, ke'-paal ngampaniya ke' thath-thathimp min-minana. Ngul-ngulana, an ngamp epa engkanang ngul thath-thathāmpa, a' putha wik ma'mangkaman mee'miy ngul ween-weenanamp.
13Yaa, ngamp puth wik inangan ngaantam-ngeey-ngeeyāmpa: piip God anman ngangkangam pi'-pi'āmp nunang; a' ngangk minangam paththam kuup-kuupāmp nungant, nil ngulan kalow ngampang aak nungantamakan a' puth-a, ngamp puy-puyam anman kaangk wun-wunāmp ngamparakaman a' putha piip God.antan. Wik inangan an min paththam ngampar. Puth wik thonam inan pi'an paththamana: ngamp kaangk wun-wunāmp ngamparakamana.