Nil Ngeen-Wiy Min God.antam Alangan Thay-Thayanathan Ngampang Work Minam Yipam Iiy-Iiyāmp Nungant
121Ngurp ngatharam niiyalang, ngay kaangk workan waa'āng niiyant, nil Ngeen-Wiy Min God.antam alangan work thee'-thee'an ngampar, a' thay-thayanathan ngampang thampa work minam yipam iiy-iiyāmp nungant. Ngay kaangk niiy mee'miy iiy-iiyāna work ananweya. 2Niiy puth kan mee'miya, an niiy ka'athamana God.ana ngoongk-ngoongkama. Aak an-aniyangana niiy yuk ngeen-wiy anangana ke'-ngoongkam anman thaa'-kuump-kuumpan thanang, yuk anangan wik ke'aman thaw-thawantan. A' than yuk ngeen-wiy al-alangan ngangk mungk-mungkin niiyang. 3Ngay ke'-paal kaangk niiy wik inangan kan-kanam ngaantam-ngeey-ngeeyāna: than wee'-wee'anangan Jesus.an way-wayam paththam waa'-waa'antan nunangan-a, an than Ngeen-Wiy Min God.antaman ngangkangan ke'am pi'-pi'antan nunang, ya'a. A' putha, than wee'-wee'anangan Jesus.an moom thanttam waa'-waa'antan nunang-a, an than ep Ngeen-Wiy Min God.antaman ngangkangan pi'-pi'antan nunang.
4Puth nil Ngeen-Wiy Min God.antam thonam alangaman work yot wiy-wiyam thakan thee'-thee'an ngampar thon-thonantana. 5-6Ngamp work wiy-wiyaman iiy-iiyanamp yipam ma'-aath-aathwumpa, puth ngamp God thonamantan work iiy-iiyanamp, a' putha nil thonam alangaman ma'-aath-aathan ngampang, a' ngangk thay-thayanathan ngampang.
7Nil Ngeen-Wiy Min God.antam alangan ma'-aath-aathan ngampang yotamana, nil thayanathan ngampang thon-thonana, ngamp yipam ma'-aath-aathwumpa. 8Ngamp pam wanch wiy anangan-a, nil ma'-aath-aathan ngampang ngamp yipam wik God.antaman minam ngaantam-ngeey-ngeeyāmp, a' kuchek minangam koochanathāmp pam wanch wiy al-alantan; ngamp pam wanch wiy anangan-a, nil ma'-aath-aathan ngampang wik nungantaman kuchekangam pi'-pi'āmp a' waa'āmp thakan. 9Ngamp wiy anangan-a, nil ma'-aath-aathan ngampang minaman ngangkangan pi'-pi'āmp nunang: ngamp wiy anangan-a, nil ma'-aath-aathan ngampang miyalathāmp thanang, pam wanch weechanan thanang. 10Ngamp wiy anangan-a, nil ma'-aath-aathan ngampang work pi'anan meen-meenathāmp thant; ngamp wiy anangan-a, nil ma'-aath-aathan ngampang wik God.antaman waa'-waa'āmp; ngamp wiy anangan-a, nil ma'-aath-aathan ngampang mee'miy yipam iiy-iiyāmp pam al-alantamana than nath wik God.antaman kan-kanam nath waa'-waa'antana, nath ya'a, nath wik oony way alantaman waa'-waa'antan. Ngamp wiy anangan-a, nil ma'-aath-aathan ngampang ngamp yipam thaw-thawāmpa wik thaa'nganth wiy-wiyam alangan nungantam Ngeen-Wiy Min God.antam alantaman wika; ngamp wiy anangan-a, nil ma'-aath-aathan ngampang wik thaa'nganth wiy-wiyam Ngeen-Wiy Min alantaman koochanathāmp thantana. 11Work yotam inanganiy-a, nil Ngeen-Wiy Min God.antam alangan thee'-thee'an ngampar, nilam thonam alangaman. Nil ngampar thon-thonamantan work wiy-wiyam thee'-thee'an, an nilam mi'-mi'an ngampar.
Ngamp Ke' Kemp Thonam Nungantang Jesus.antang Anman
12Nil God.angan mee'-a, kon-a, tha'-a, kemp umyompanam thakana kung-mak ngampang, kemp ngamparamang. Inaniya aak yimanangan wun-wunana: nungkway ngamp pam wanch Christians yot anangan-a, an ngamp ke' kemp thonam nungantang Jesus.antang anman. 13Ngamp wiyaniy-a, Jews; a' ngamp wiyiy-a, Greeks: ngamp wiy anangan-a, slaves; ngamp wiy anangan-a, slaves ya'a. Puth than kootran ngakang kuungkin ngampangan-a, an ngamp ke' kemp thonam ngul weenamp nungantang Jesus.antangana. A' nil God.angan Ngeen-Wiy Min nungantaman kuchan ngampar, Ngeen-Wiy thonam anman nungantaman, nil yipam ngangkangan wun-wunow ngamparang yotamantangan.
14Nil pamangan mee' thonakam ke'am kalana, an ya'a, a' puth kon thonakam ke'am kalana, an ya'a; nil mee'-a, kon-a, ma'-a, tha' thakan kemp umyompanam kal-kalan kemp nungantamangan. 15Nil tha'ana nath thawiywey nungantakamana, “Ngaywey inan waya, ngay puth ma' ya'a, nil pam alangan ngayang kaangk ke' natha.” An ya'a! Tha' alangan way-way ngaantam-ngeey-ngeeyan. Nil pam ananiya kaangkwey tha' thamp iiy-iiyowa! 16A' putha, nil konan nath thawiy nungantakamana, “Ngaywey inan waya, ngay puth mee' ya'a, nil pam alangan ngayang kaangk ke' natha.” An ya'a! Nil pam ananiya kaangkwey kon thamp iiy-iiyowa! 17Nil pam nath ma'-a, tha'-a, kon ke'anang iiy-iiyiywey-a, mee' thonakaman kal-kaliywey-a, an nil puth want-wanttak wikaniy ngeey-ngeeyowa? An ya'a! A' putha, nil pam nath ma'-a, tha'-a, kaa' ke'anang iiy-iiyiywey-a, kon thonakaman kal-kaliywey-a, an nil puth want-wanttakan awal nguuth-nguuthowan a? An ya'a! 18Nil piip God.angan yump ngampang kemp umyompanam ngamparamana, ma'mangkama ngampan kal-kalanampa, mee'-a, tha'-a, ma'-a, kon thakan kal-kalanamp, a' nil God.angana work thee'-thee' thant il-ilantana. 19Nil pamangan nath mee' thonakaman kal-kaliywey-a, nath kon thonakaman kal-kaliywey-a, an nil pam paththaman ke' iiy-iiyiya, an ya'a! 20Nil puth pam thonamangana kemp nungantamang yot ep kal-kalan, mee'-a, kon-a, ma'-a, tha' thakan, yot anangan kemp nungantang anman, puth niliy-a, pam thonam anman iiy-iiyan, kucham, ko'alam ya'a, pam thonam anman.
21Nil mee'an nath thawiy ma' alantan, “In nint waya! Ngay kaangk ke' nintang ngula.” An ya'a! Nil ke' thawiy yimanangan. A' putha nil kuchekana ke' thawiy tha' alantan, “In nint waya! Ngay kaangk ke' nintang!” An ya'a! 22Ngamp nathwey ngaantam-ngeey-ngeeyimp kemp wiy ngamparamana way thampa, ke' thayan ya'a; an ya'a, than ananganiy-a, an minwey ngampar. 23Ngamp nath ngaantam-ngeey-ngeeyanamp ke' kemp wiy anangan ngamparamana ke'am nath ach-umpan ngampanga, ngamp ke'-paal minam pi'-pi'anamp, ngook thakan ngoonch-ngoonchanamp, kemp wiy anangan yipam mupam wun-wunow, puth ngencha, ke' thathwimpa, ngampan ke'-paal kemp ngamparaman kang-kanganamp, ngookangana. 24-25Puth ngamp kaa'wal ma' thakan ke' kang-kanganamp, ya'a, ngampan puth ngaantam-ngeeyanamp thanang an ach-umpan thampa ngampanganiya. Puth nil God.angana kemp ngamparam anangan minam yumpa! Kemp wiy anangan ngampar nath ngaantam-ngeeyanamp ke'am nath ach-umpan ngampang, nath way natha, many thakan-a, an puth nil God.angan ngaantam-ngeey-ngeeyan thanang ke' mina, nil nanpalan thawan ngampar minam pi'-pi'āmp thanang. In aak yimanangan wunan ngampar, ngamp ke' kemp thonam nungantang anman, Jesus.antang ngamp ke'-paal ngangk minangam iiy-iiyāmp ngamparakamana. Ngamp wiy anangan-a, pam wanch pi'an; wiy anangan-a, ya'a, manya; puth nil God.angan pam wanch manya kaangk-ke'anang anangan minam ngaantam-ngeey-ngeeyan thanang. Puth ngampa minam anman pi'-pi'wumpa, ke' yaarkathwumpweya, kulang thakana. 26Nil thonam ngamparamweya nath ngangk way wun-wuniywey-a, yaa, ngamp yotaman ngangk way wun-wunimpa nungantang thampa. A' putha, than wiy al-alangan nath pam thonam ngamparamwey thaa'-kuump-kuumpiythan nunang-a, an ngamp yotaman karpam anman ngangk min-minam paththam wun-wunimpweya.
27Yaa, ngampaniy-a, thon-thonamana karpam iiy-iiyanamp Christ.antang, ke' kemp thonam nungantang anman. 28Nil God.angan work thee'-thee'an ngampar thon-thonantan. Wiy al-alantan-a, nil work pi'an thee'-thee'an; wiy al-alantan-a, nil work chil pi'an thee'-thee'an thant; wiy al-alantan-a, work many thee'-thee'an thant. Wiy anangan-a, nil Jesus.angan kuchan thanang wik nungantaman waa'-waa'ayn, inana work wuut pi'an paththam; wiy al-alangan-a, wik God.antaman koochanathantan, wiy al-alangan-a, thaa'-aath-aathantan thanang -- inan, work chil pi'an; a' putha, wiy al-alangan work wiy-wiyam yump-yumpantan; than nath work pi'an meen-meenathantan ngampar, nath miyal-miyalathantan thanang thakana; nath wiy anangan ma'-aath-aathantan thanang; nath moom iiy-iiyantan, wiy anangan pi'-pi'antan thanang; nath wik thaa'nganth wiy-wiyam Ngeen-Wiy Min God.antam alantaman thaw-thawantan. 29Ngamp ngul yotamang work thonam anman iiy-iiyanamp ey? An ya'a! Ngamp work wiy-wiyam thak iiy-iiyanampa. Nil God.angan ngampang yotam anangan ke'am kuch wik Jesus.antaman waa'-waa'āmpana, an ya'a, nil puungk wiy anangan ep kuch thanang. A' putha, nil God.angan ngampar yotam al-alantan work ke'am thee' wikan koochanathāmp, an ya'a, puungk wiy al-alantan epa. Nil yotam al-alantan work ke'am thee' teachersan iiy-iiyayn, an ya'a, puungk wiy al-alantan epa. A' putha, ngamp yotamangana ke' work pi'an meen-meenathimp thant, ya'a, 30ngamp yotamangana ke' miyal-miyalathimp thanang pam wanch weechanan thanang, ya'a, puungk wiy al-alangan an epa. A' putha, ngamp yotamana wik thaa'nganth wiy-wiyam alangan Ngeen-Wiy Min God.antam alantaman wika ke' thaw-thawimp, ya'a, a' putha ngamp yotamangan wik thaa'nganth nungantaman ke' koochanathimp, ya'a, puungk wiyangan epa. 31Yaa, puth niiyaniya, work pi'anakan ngaantam-ngeeyāna, niiy yipam wiy anangan minam ma'-aath-aathān thanang.
Puth ngay kan inan waa'-waa'āng niiyant niiy want-wanttakan min-minam paththam iiy-iiyāna: niiyiya ngangk minangam iiy-iiyān thant pam wanchantan, niiy kaangk paththam wun-wunān thanta.