Ngamp Yuk Ngeen-Wiy Anangan Ke' Thaa'-Kuump-Kuumpāmp Thananga!
101Niiyalang, ngay kaangk niiy wuut mangk ngamparam yotam anangan ngaantam-ngeey-ngeeyān thananga aak keenkanaman wun-wunina. Nil God.angan yuwana eep-eep wunp thantana yipam woyan anan meen-meenathow thanta. Nil yuwana umputh iiy-iiy thantanweya um wo'uwakan Red Sea aakanakan. A' than yotam wo'uwayn minam matin nil puth God.angan woyan e' yump thant wo'uw um-menhangana. 2Nil Moses.angan woyan wakan thakan kal-kal thanang, nil moom thanta. In ke' yimanangana, than wiyangan kootra kuungkantan ngampangan-a, anpalana nil Christ.an moom ngamparam iiy-iiyan ngul, ngamp wik nungantaman ngeey-ngeeyāmp. Inan puth yimanangana: than keenkanaman monkan-wak-wakin nunang Moses.ana, nil moom thanttaman iiy-iiya, a' than wik nungantaman ngeey-ngeeyin. 3Than yotamang may manna anan mungk-mungkin nil God.angan aak inpal kenyan kuch thant. 4A' than ngakam ngul uth-uthamin-a, than ngakan mungkin kunttow anpalan ngak mee' pich thanta, kunttow anan nil God.angan meenath thant. Nil Christ.an ke' kunttow thayan anana puth nilana ngak thakan kuch-kuch thant. A' putha nil thanttangan iiy-iiy, minaman pi'-pi' thanang. 5Puth nil God.antan ngangk min ke'am wunanta pam wanch al-alantamana, ya'a; than puth wik nungantaman minam ke'am ngeey-ngeeyin, ya'a; a' pam wanch chil yot anangan uthamin aak pintalang angman. Pam wanch mul anangan-a, aak pintalang angman pal-puy wun-wunina.
6Ngamp ngaantam-ngeeyāmpa nil God.angan way-wayath thanang, ngampan-a, yimanangan ke' iiy-iiyāmp ke' thanan yimanangan iiy-iiyin way-wayamana, ngamp ke' ngaantam-ngeey-ngeeyāmp wayan yump-yumpāmp thaka ke' thanan ngaantam-ngeeyina. 7Than wiy al-alangan yuk ngeen-wiy thaa'-kuump-kuumpin. Lat ngench thayanangan waa' thanang than minh calf many yumpin yuk goldama, a' thanana thaa'-kuump-kuumpin nunang ngul, may pi'an mungkin, a' ekin ngul a' kee'-kee'in. Puth ngampan ke'a yuk ngeen-wiyan thaa'-kuump-kuumpāmp a! 8Than wiy anangan maarich kee'-kee'in wanch thon-thonanta a' anpalaniya kinch thonamangan-a, than yot anangan mul keek-keekin, pam wanch thaa'-wantanam, twenty-three thousand. Ngamp ke' wayan iiy-iiyāmpa pam wanch wiy al-alantangan, ke' than yimanangan wayan iiy-iiyina. 9Than wiy anangan way iiy-iiyin, thanan ngaantam-ngeey-ngeeyin, “Nil God.an nath man kul ke' wampowanta!”, puth an-aniyangan-a, God.antan man kul paththam wampanta a' thuukangan path-pathin thanang, a' thanana uth-uthamin ngul. Yaa, ngamp ke' iiyāmp ke' than yimanangan iiy-iiyin. 10Than wiy anangan aak-pik-waa'in, a' nil God.angan ngaantiyongk nungantam kuch thant mul-mulathow thanang. Ngampan ke' aak-pik-waa'āmpa, ya'a!
11Than aak keenkanaman lat ngench thayanangan waa'-waa'in nil God.angan yotam wayath thanang, ngamp yipam ngaantam-ngeey-ngeeyāmp thanang a' putha ngampana ke' wayan iiy-iiyāmp ke' thanan way-wayam paththaman iiyin. Puth aakan thinth kan-ngul wamp-wampan ngampar aak inan minchowana.
12Niiy wee'-wee'anangan nath ngaantam-ngeeyaniy niiyantakamana niiy minam anman woyan God.antaman wak-wakaniy-a, niiy thath-thathān niiyantakamana. Puth niiy thampang ngul way iiy-iiyan. 13Niiy wiyiya nath ngaantam-ngeey-ngeeyān way yumpanakan. Puth niiy thonakam ya'a. Nathpalmana, in-inman pam wanch puk yotamangan ngaantam-ngeey-ngeeyantan way yumpanakan, way wiy-wiyam thakan yumpanakan. Puth inan thamp ngaantam-ngeeyāna: nil piip God.an pi'an paththam, a' nil kan-kanam minam ngul ma'-aath-aathow niiyangan ke' nil keenkanaman thaw. Niiywey nath ngaantam-ngeey-ngeeyin way yumpanakan-a, nil God.anganiya ngangk thayanathow niiyang, niiy yipam way anangan thaamp-thaampān thanang. Nil ngul ma'-aath-aathow niiyang niiy ke' yipam wayamān.
14Niiyalang, ngurp ngatharam-ang, ngay puth thawang niiyant niiy yuk ngeen-wiy anangana ke' thaa'-kuump-kuumpān thanang. Niiy thintham ke' wampān thant thanan thaa'-kuump-kuumpantan yuk ngeen-wiy anangan. 15Niiy pam wanch kuchek waap mina, yaa, kan niiy ngaantam-ngeey-ngeeyān wik inangan ngayan thawāng niiyant. 16Ngamp may ngak a' may bread mungk-mungkanamp churchangan-a, ngamp God.an thaa'-kuump-kuumpanamp a' thankyou thaw-thawanamp nungant. Ngamp may ngakan mungk-mungkanamp-a, nil Christ.an ngamparangan karpam wun-wunan, nil puth chaapar nungantaman theetath ngampar. Ngamp may breadan thuth-thuthanamp a' mungk-mungkanamp ngulan-a, ngamp ke' thonam yimanangan iiy-iiyanamp nungantang nil puth kemp nungantam thamp theetath ngampar. 17Ngamp may bread thonam anpalan may thuth-thuthanamp. In aak yimanangan wunan: nungkway ngamp pam wanch yot anangan-a, ngamp ke' thonam yimanangan iiy-iiyanamp ngul Jesus Christ.antang.
18Niiy pam wanch Jews anangan ngaantam-ngeey-ngeeyān thanang. Than minh thakan wamp-wampathantan aak altar aakanakan a' thanan-a, minh many mungkantan, than puth piip God.an thaa'-kuump-kuumpantan, a' ngaantam-ngeey-ngeeyantan nunang. 19Ngay puth nanpalan thaw-thawang niiyantana yuk ngeen-wiy thakan ke' thaa'-kuump-kuumpāna! Than yuk ngeen-wiy anangan man-yetham iiy-iiyantan ey? An ya'a! Niiy nath may minh thakan kalān yuk ngeen-wiy al-alantan-a, an min niiyant ey? An ya'a! 20Puth ngay inan thawang niiyant: than pam wanch Christians ya' al-alangan may minh thakan kal-kalantan yuk ngeen-wiy al-alantan-a, an than oony way al-alantan may thakan thee'-thee'antan, a' thaa'-kuump-kuumpantan thanang, God.an ya'a. Ngay kaangk ke' niiy oony way anangan thaa'-kuump-kuumpān thanang a' monkan-wak-wakān thanang thampa. 21Ngamp oony way anangana a' puth God.ana ke' karpaman thaa'-kuump-kuumpimp thananga. Ngamp kan ka'athamana mi'āmpa ngamp wee'an kaangka thaa'-kuump-kuumpāmp nunanga. Ngampweya pam wanch piip God.antaman iiy-iiyimpwey-a, yaa, an ep-paththam may breada putha may wine.an mungk-mungkāmpa, a' ngaantam-ngeey-ngeeyāmp nunang a' putha thaa'-kuump-kuumpāmp nunang thamp, wiy anangan ya'a. Ngamp thonam anman mi'āmpa. 22Ngampan puth ke' man kulan yump-yumpāmp nunang, God.ana. Ngamp ngaantam-ngeey-ngeeyanamp ngamparakaman ke' ngamp thayan paththam iiy-iiyanamp ke' nil yimanangan ey? An ya'a!
23Niiywey nath ngaantam-ngeeyaniy niiyantakamana, “Ngay ngeen nathwey kaangk yumpingan-a, an ngay-ngaya, yumpinga.” Yaa, niiy nath wik yimanangan thaw-thawaniya, puth niiy kan in ngeeyāna: ngamp nath ke'-ngoongkam iiy-iiyimp want-wanttakan ngampan kaangk iiyāmp-a, an min ya' ngampar. Ngampwey woyan ngamparakam anman iiy-iiyimpanwey-a, an nath ngamp ke'-ngul ngaantam-ngeey-ngeeyimp nunang God.ana, ya'a, a' putha pam wanch wiy anangan thampa minam ke' ma'-aath-aathimp thananga. 24Ngamp puth ngamparakam thonakam ke' ngaantam-ngeey-ngeeyāmp, ngamp pam wanch wiy anangan thampa minam pi'-pi'āmp thanang puth-a, ma'-aath-aathāmp thanangweya.
25Niiy in thampan ngeeyāna: niiy nath kaangk minh piiyān store.am anpalan-a, niiy ep piiyān. Niiy ke' ngaantam-ngeeyān than wiyangan nath minh ka'athaman thee'in yuk ngeen-wiy thanttamakana, nath ya'a, a' niiy ke' engkān thant, wik ke'anang piiyāna. 26Puth aak inan God.antama, a' nilaniya ma'mangkam yump, may-a, minh-a, yuk way min ma'mangkam anangan thampa.
27A' putha inan thampan ngeeyāna: than pam wanch Christians ya' anangan nath thawiythan niiyant may mungkān thanttangan-a, niiy nath kaangkwey-a, yaa, niiy iiyāna, a' mungkān may minh thanan thee'ayn niiyant. Niiyan ke' engkān wik yimanangana, “Minh inangan than ka'athaman kanam thee'in yuk ngeen-wiy al-alantan ey?” 28-29Puth nil wee'-nathan thawiy niiyant, “Than wiyangan minh inangan ka'athaman yuk ngeen-wiy thanttamakan kanam thee'ina,” yaa, puth niiyana minh anangan ke' mungkāna, too wantāna. Puth nil ngul ngaantam-ngeey niiyang niiyan way yump-yumpaniya, puth niiy minh ngenchan mungkana, a' ngangk way ngul wunowanta. Puth niiyan natha wik yimanangan ngaantam-ngeeyina, “In ya' natha! Ngay puth ngeenam ke'an mungking e? Kanaka nil nath ngaantam-ngeeyiy ke' ngay way yump-yumpanga, puth an kana, ngay mak mungkānga! 30Ngay nath thankyou thawāng God.antan may minh aakanakan-a, pam wanch wiyangana ke' waa'-waa'iythan ngayanga, ya'a! -- ngay puth thankyou kan thawang nungant God.antana.” Niiy nath yimanangan thaw-thawaniya.
31Ngay putha inan thaw-thawang niiyant: niiy want-wanttin mi'ān-a, niiy nath mungkāna, nath ya', a' puth niiy ngeen nathan yumpān-a, niiy God.ana ngaantam-ngeey-ngeeyān nunang, a' thaa'-kuump-kuumpān nunang. 32Niiy minam iiy-iiyāna, niiy way ke' iiy-iiyān mee' wiyantangana, nath Jews al-alantangan, nath Greeks al-alantangan, nath Christians wiy al-alantangana. Puth niiy nath wayan iiy-iiyinwey-a, thanan putha Christ thampan pam way ngaantam-ngeey-ngeeyiythan nunanga. 33Niiy woyan ngatharam maakāna. Ngayaniy-a, kaangk minam iiy-iiyāng mee' yotantang, ngay ngatharakaman ke'am ngaantam-ngeey-ngeeyang, ya'a, ngay pam wanch wiy anangan ngaantam-ngeey-ngeeyang thanang, minam ma'-aath-aathāng thanang than yipam wik God.antaman ngeeyayna, ngay puth kaangk nil God.angan yot anangan kaa'-piichanathow thanang.