Ngamp Wik Ngeen-Wiy Min God.antam Alantaman Ngeey-Ngeeyāmpa!
81Ngamp pam wanch nungantam Jesus Christ.antaman-a, nil God.angan ngampang ke'-ngul kuchow aak wayakana, ya'-ngula. 2Puth nil God.angan Ngeen-Wiy Min nungantaman kuch ngampara, a' puth nil Jesus Christ.an ngangk ngamparang ngul wun-wunana, ngampaniya yipam wayan ke'-ngul iiy-iiyāmp ma'-yotamana, a' puth nil God.angan yipam ngampang ke' kuchow aak way aakanakana. 3Nil God.angan wik thayan nungantaman ka'athaman waa' ngampara, ngamp ke' minan iiy-iiyimp-a, puth ya' anman. A' nil piip God.angan nhengk nungantaman Jesus Christ.an kuch nunang ngul ngamparana. Nil pam ngul ween ke' ngamp yimanangan, nil pam wayan ke'am iiy-iiy, ya'a, pam min anman iiy-iiya. Nil mulaman koyam ngul eka. Puth nilama thonamang epa ma'-aath-aathiy ngampang ngampan yipam woyan wayan ke' wak-wakāmpa, 4a' ngamp yipam wik Ngeen-Wiy Min God.antamana ngeey-ngeeyāmp nunang. Nil ngampang ngul ma'-aath-aathow wik thayan God.antaman ngeey-ngeeyāmpana, ngamp kuchek-thayanan ke' yipam iiy-iiyāmpa, way thakan ke' yipam yump-yumpāmpa, ya'a.
5-6Puth than wee'-wee'anangan kaangk woyan thanttakaman wak-wakayn-a, ke'an kaangk wik God.antaman ngeey-ngeeyayn-a, yaa, thananiy putha way ma'-yotam ngaantam-ngeey-ngeeyantana; a' puth nanpalan nil God.angan aak wayak ngul kuchow thanang aak umpuyangama; puth than wee'-wee'anangan wik Ngeen-Wiy Min God.antaman kaangk ngeey-ngeeyayn-a, yaa, thananiya woyan min nungantam anman ngaantam-ngeey-ngeeyantan, a' puth nanpalana nil God.angan ngangk min yumpow thananga a' thanan aak umpuyangam ngul wun-wunayn nungantanga. 7Puth than wee'-wee'anangan way anman ngaantam-ngeey-ngeeyantan ma'-yotaman-a, than al-alangan God.an ngangk-wayangam kal-kalantan nunang, a' than wik nungantam ke' ngeey-ngeeyantan, ya'a, than ke' ngeey-ngeeyiythan than puth pam wanch wayananga. 8Than wee'-wee'anangan woyan way thanttam anman wak-wakantan-a, than piip God.ana ngangk min ke' yumpiythan nunanga, ya'a.
9Puth niiyaniy-a, niiy ke'-ngul wayan iiy-iiyaniy. Niiy wik God.antaman ngeey-ngeeyaniy, nil puth Ngeen-Wiy Min God.antam anana ngangk niiyantamang wun-wunana. Puth than pam wanch al-alangan Ngeen-Wiy Min God.antam anana ke'aman ngangkangan pi'-pi'antan-a, than pam wanch anangana Jesus Christ.antam ya'a. 10Kemp ngamparam inangan-a, mul ngul wun-wunayna, ngeenam puth e? way yotan yump-yumpanampana, anpalana. Puth nil Jesus Christ.ana ngangk ngamparang ing pekan wun-wuniywey-a, yaa, ngangk ngamparamaniya an nungant epa God.anta, a' ngulana ngamp anman aak nungantang wun-wunāmp, puth nil God.angana way ngamparam anangana kan kon-ngath nunanga. 11Nil Ngeen-Wiy Min God.antamana ngangk ngamparang ngul wun-wunana, niliya Jesus Christ.an mulaman ekathana. Puth nanpalana, nungkway kemp ngamparam inangana mul wun-wunayn-a, nil God.angan kemp ngamparaman mulaman ngul ekathow thamp.
12Niiyalang, ngurp ngatharam-ang, niiy wik inangan ngeeyān a! Ngamp way anman ke' iiy-iiyāmpa, ya'a, ngamp Ngeen-Wiy Min God.antaman wik ngeey-ngeeyāmp a! 13Puth ngamp way anman yump-yumpimpan-a, nil God.angan ngampang aak umpuyangam kuchow ngul; puth ngamp Ngeen-Wiy Min God.antaman wik ngeey-ngeeyimpwey nunangan-a, ngampana wayana ke'-ngul iiy-iiyimp, ya'a, a' ngampana God.antang ngul wun-wunāmp aak umpuyangam. 14Ngamp wee'-wee'anangan Ngeen-Wiy Min God.antaman wik ngeey-ngeeyanamp nunangan-a, an ngamp kan-kanam paththam pam wanch God.antama. 15Ka'athaman ngampan winynyang mo'-mo'amp nungantam God.antamana, amanamaniya nil Ngeen-Wiy Min God.antaman ngangkang ngoonch ngamparangan. Nilana ke'am winyathan ngampang, ya'a, nilan thawan ngampar, “Niiy nhengk God.antam ngul iiy-iiyaniya” -- amanaman-a, ngampan puth ngangk minangam thawanamp nungant God.antana, “Piip nganttam-ang!” 16Ngamp puth kan-kanam mee'miy ngula ngampana puk God.antama puth nil Ngeen-Wiy Min God.antam alangana ngangk ngamparamangan wun-wunana, an nil waa'-waa'an ngampar. 17Ee'a, ngamp puk nungantam ngul iiy-iiyanampa, an ngampiya ngul uwāmp way min min-miniy anangan nil God.angan thee'ow Jesus Christ.antan a' ngampar thamp puk nungantamakana. Than pam wanch anangan way-wayam paththam iiy-iiyin nungant Jesus Christ.antan aak ingana. Than ngampar thamp way iiy-iiyantan puth ngamp Christians iiy-iiyanampa. Amanamana, ngamp aak minang God.antamang wun-wunāmp karpam nungantang Jesus.antanga.
Ngamp Mee'miyweya Ngamp Ngulana Aak God.antangan Wun-Wunāmp Ngula
18Ngamp aak min God.antangan ngulan wun-wunāmp-a, aniy ngampa min-min ngul thiichāmpana an kan-kanam paththam nil God.an wuut pi'an a' min-minam paththama. Puth amanamaniya, kuchekangan ke'-ngul wampow ngamparana than wayan iiy-iiyin ngamparana, aak way thakan wamp ngamparana.
19-21Aak ka'athaman-a, nil God.angan aak inan min yump. Puth pam wanchangan ke'am wik ngeey-ngeeyin nunang, God.an ya'a, than way anman iiy-iiyina. Amanamana nil God.an thaw, “Aakan kan-ngul wayaman.” Nilan puth ngaantam-ngeey nungantakamana ngul-ngulana aakan koyam min ngul wun-wunowa. Aak an-aniyangana nil God.angan ngul meenathow thanang pam wanch anangan than wee'-wee'anangan pam wanch nhengk nungantamana. An aak umyompanamana kuup-kuupantan nungant. Amanaman-a, aak inan ke'-ngul wayamow, kathamow thakana, ya'a, minam anman ngulakam wun-wunow ngula, ke' nil God.angan pam wanch nungantam anangan thamp min ngul yump-yumpow thanang aak umpuyangama.
22Aak nathpalman-a, puth in-inmana an ke' way min ma'mangkaman aak ingana wik thamp wun-wuntana, thaa'-eench-eenchantan ke' wancha puk kalanakana, puth kuup-kuupantan nungant God.antan nil yipam koyam aak inan min paththam ngul yumpowa. 23A' puth ngamp Christians inangan thampa, an ke' ngamp thamp thaa'-eench-eenchanamp, ngamp puth kuup-kuupanamp thampa. Puth nil God.angan Ngeen-Wiy Min nungantaman kuch ngampar ngamp yipam mee'miy ngamp ngulana aak God.antangan wun-wunāmp ngampaniy putha puk nungantam ngula. Aak an-aniyangana nilaniya kemp thonangan ngul thee'ow ngampar min paththam, ke'-ngulan weech-weechow a' putha ke'-ngulan uth-uthamāmpa. Puth ngampaniy yippaka kuup-kuupanamp. 24-25Ngamp ngangkan ka'athaman thee'amp nungant Christ.antan-a, an ngamp yotaman ke'am yippak uwamp nil ngulan epa thee'ow ngampara, kemp nyiingkanam thakana. Ngamp mee'miya aak ngulan uwāmpana, puth ngampan kuupāmp yippaka, ngangk minangam ke' yippak eenchāmpa! Ngamp kemp nyiingkanaman uwāmpan-a, ngampan ke'-ngul kuup-kuupāmpa, ya'a.
26Putha inan thampa, nil Ngeen-Wiy Min God.antamangana ngangk thay-thayanathan ngampang. Puth wiyiy ngamp-a, ngangk way wun-wunanampa, a' wiyiya ngampa ke'am ngaantam-ngeey-ngeeyanamp ngamp want-wanttakan thawāmp God.antana, puth ngeenakan thak engkāmp nungantana -- puth nil Ngeen-Wiy Min God.antaman nil ngangkangan wun-wunan ngamparangan-a, nila mee'-wuth-wuthanaman ngampar God.antan thaw-thawan, ma'-mupam, nilan wik paththaman ke'am thaw-thawan, nil ngangkam anman thaw-thawan nungant God.antan. 27Puth nil God.angan ngangk ngamparaman kan mee'miy nila, a' nil thiichan nil Ngeen-Wiy Min nungantamana ngeenakan kaangk thawow nungant ngamparakana, pul puth karp anman ngaantam-ngeey-ngeeyanpul, ke'-paal nil Ngeen-Wiy Min nungantaman ngeenakan thawan nungant God.antan-a, an nil God.angan anman thampa ngaantam-ngeeyana.
28Ngamp wee'-wee'anangan kaangk nungant God.antan-a, nil puth ngangk minangam anman iiy-iiyan ngamparana. Ngamp puth pam wanch nungantam, nil ka'athaman mi' ngampang woyan nungantaman wak-wakāmp. Yaa, puth ina, ngeen nathwey wampow ngampar-a, nath mina, nath ya', way nath wampow ngampar-a, nil God.angan ma'-aath-aathan ngampangana, a' an puth min ngamparana yimananganiy wamp-wampayn ngamparana, ngamp puth God.antan kaangk wun-wunanampa. 29Aak keenkan-a, ngamp ke'an yippak aak-ngeey-ngeeyamp-a, nil God.angan ngampang ep mee'miy, a' nilan puth thaw ngul ngamp inangan puk nungantaman iiy-iiyanamp. Pam nhengk nungantaman Jesusa an nil puk pam kaa'-ngeecham puth ngampiya mangk nungantang ngul aak ngeey-ngeeyampa. 30Nil anman ka'athamana ngaantam-ngeeya ngamp puk nungantaman iiy-iiyāmpa, a' nil ngampangana umpan wampāmp nungantana, a' ngampana wampamp nungant ngula. Nilana way ngamparaman ke'-ngul ngaantam-ngeey-ngeeyow, a' anpalaniya nilan ngul kalow ngampang aak min nungantamaka angan wun-wunāmp nungantangana.
Nil God.angan Nhengk-Kunchan Ngangk Minangam Kuch Ngampar
31Ngamp kan-kanam ngul thiichampana nil God.an kan-kanam paththaman ngamparang iiy-iiyana: an puth wee'angam way-wayathiy ngampangan a? An ya'a! 32Puth nil God.angan puk nhengk nungantaman ke'am week ngampar, ya'a, nilan kuch nunang ngamparaniya pam wanch yotamantan nil yipam uthamowa. Nil nhengk-kunchan ngangk minangam kuchan ngamparana -- yaa, nil yimananganiy way min thakan ngangk minangam thee'-thee'ow ngamparana, ma'-aath-aathow ngampang thakan. 33Nil God.an puth ka'athaman ngampangan kan mi' pam wanch nungantaman iiy-iiyāmpana, a' nilaniya way ngamparaman ke'-ngul ngaantam-ngeey-ngeeyow -- puth nil wee'wey iiyiy nungant a' way waa'-waa'iy ngampangan a? An ya'a! 34Ngul wee' thawiy nil God.angan ngampang kuchow aak wayakan a? An ya'a! Nil Christ.an utham ngampar -- anpalmana, nil God.angan koyam mulaman ekathan ngul anpalmana pul karp ngul ma'angam pi'-pi'anpul ngampanga. Nil Christ.ana thaa'-pant thaw-thawan ngamparaman nungant God.antana.
35Nil wee'angam yaarkathiy ngampang ma' Jesus.antam anpalana? An ya'a! Nil puth kaangk paththam wun-wunan ngampar. Wiyiy natha aak way nath wampiy ngampara; wiyiy natha weechiy ngampang; wiyiy natha ngangk way-wayam paththam wun-wunimpa; pam wanch wiyangan nath way waa'iythan ngampang; than nath kulak wenkiythan ngampar aak-ya'angweya; ngamp nath meech iiy-iiyimp, than wiyangan nath piikiythan ngampang a' puth mulathiythan ngampangwey -- puth nungkway way inangan wampiythan ngamparan-a, nil puth Christ.an anman kaangk paththam wun-wunan ngampara, an than ke' yaarkathiythan ngampang ma' nungantam anpalan, ya'a. 36Way inangan wamp-wampayn ngamparan-a, in ke' wik inangana lat ngench thayanangan ump-umpin aak keenkan:
“Than pam wiyangan kaangk piikayn ngampang, a' mul-mulathayn ngampanga, puth ngamp inangan pam wanch God.antam iiy-iiyanamp;
thanan ngaantam-ngeey-ngeeyantan ngampang ke' minh sheep yimanangan mul-mulathayn ngampanga.”
37Puth nungkway way inangan wamp-wampantan ngamparan-a, ngampan puth woyan God.antaman ke' wantāmpa, ngangk thayanam iiy-iiyāmp woyan min God.antam anman wak-wakāmp, puth nil Christ.angan ma'-aath-aathan ngampang a' nilan putha kaangk wunan ngampar. 38-39Ngay puth kan-kanam mee'miy nil God.angan ke' wantiy ngampang, nil kaangk anman wun-wunan ngampar, ngamp inangana, pam wanch nungantam Jesus Christ.antama. Ngamp nath uthamimpwey-a, nath ya'a, man-yetham nath iiy-iiyimpan-a, an nil kaangk paththam wun-wunan ngamparana, Christ.aniya. Nungkway oony way thakan wamp-wampiythan ngamparan-a, an ya'angam, an than ke' yaarkathiythan ngampang ma' God.antam anpalana, ya'a. Nil puth kaangk paththam wun-wunan ngampar. Nungkway ngeen nathan wampiy ngampar inmanwey-a, a' putha ngeen nathan wampiy ngampar aak ngul-ngulan-a, an ngamp mee'miya nil Christ.an kaangk paththam wun-wunan ngampara. Aak wanttinakan iiy-iiyimpan-a, aak achantangakwey-a, nathwey pekam-a, nathwey kaaw-a, nathwey kuuw-a, nathwey kungk-a, nathwey yiip iiy-iiyimp-a, ngamp kan-kanam mee'miy ngul nil Christ.an kaangk paththam wun-wunan ngampar. Puth pam wanch yotama aak ingan wun-wunāmp-a, puth way min ma'mangkam God.angan yump thanang-a, than yot il-ilangana ke' yaarkathiythan ngampang ma' God.antam anpalana, ya'a, nil puth kan-kanama kaangk paththam wun-wunan ngamparana.