Wik Thayan God.antam Anangana Nil Moses.angan Want Ngamparan-a, An Moom Ngamparam Ya'-Ngula
71Niiy ngurp ngatharam-ang, ngay niiyant il-ilantan thawānga niiyan wik thayanan God.antamana mee'miy nil Moses.angan want niiyantana. Niiy puth kan mee'miy wik thayan inan ngampar ngula pam wanch al-alantan man-yethaman yippak iiy-iiyanamp; ngamp uthamāmpan-a, ngamp ke'-ngul wik Moses.antaman ngeey-ngeeyāmpa, an ya'-ngula. 2-3Aakan yimanangan wunana: nil pamaniya, moom iiy-iiyan wanch thum nungantamakana. Wik thayan anan thawana nil wanchana angman wun-wunow pam-kunchantanga. Nil pam thonantanganwey wun-wuniyan-a, an nil wik thayanan pipana, puth nilan maarich pam thonantang ngul kee'ana. Puth pam thum nungantaman uthamiywey-a, nil wanch alangan wik thayanan ke'-ngul ngaantam-ngeeyow, ya'a. Nilwey wanch alangaman pam thonwey maayiyan-a, an nil ke'ama maarichan kee'-kee'ana, ya'a, nil pam ka'athaman maaya an puth kanam uthama. Nil pam thon inana moom ngul iiy-iiyow nunganta. 4Inana aak yimanangan wun-wunana: niiy ka'athaman ngaantam-ngeey-ngeeyan ke' nil wik thayan Moses.angan thee' ngamparana, ke' moom ngamparam yimanangana. Puth wik thayanan-a, moomana ke'-ngul iiy-iiyow ngamparana, puth nil Christ.an uthaman-a, an ke' ngamp thamp angman uthamamp nungantang, ke'-paal wik thayanana moom ke'-ngul iiy-iiyow ngampar. Nil Christ.ana ep-paththam moom ngamparam ngula. Nil mulaman ek-a, nil yipama ngangk ngamparangan wun-wunow, ngampan yipam min iiy-iiyāmpa. 5Ngamp pam wanch Jesus.antam ke'aman yippak iiy-iiyampan-a, ngampan way anman yump-yumpampweya. Wik thayan piip God.antaman kuchekangan wampan ngampar-a, an ngampa ngaantam-ngeey-ngeeyampa way anman yump-yumpāmpana. Ngamp nathwey way yimanang anman iiy-iiyimpan-a, nil God.angan aak way aakanakan kuchow ngampang. 6Ngamp ka'athaman-a, wik thayan God.antaman pip-pipampa, puth nil Christ.an uthama way ngamparamakana, ke'-paal wik thayan God.antam anangana nil Moses.angan want ngamparana, an nil moom ngamparamana an ya'-ngula, ngamp pam wanch Jesus.antam ngul iiy-iiyanamp a' nil Ngeen-Wiy Min nungantam God.antaman ngangk ngamparangan wun-wunana, ma'-aath-aathan ngampang ngamp yipam God.ana ngeey-ngeeyāmp nunang.
Nil God.angan Wik Thayanan Thee' Ngamparana Ngampan Yipam Mee'miy Wunāmp Ngampan Wayan Yump-Yumpanamp
7Ngul wik thayan God.antam anangana nil Moses.angan want ngamparan-a, an way ey? Ya'a! Nil Moses.anganwey wik thayan ke'an thee'iy ngamparan-a, ngay puth wanttak ngaantam-ngeeying ngatharakaman ngay wayan iiy-iiyang a? Nil puth wik thayan God.antamangana waa'-waa'an ngampar, “Niiy ke' mee'-wunān yuk way min pam wanch wiyantamakan.” Ngay nathwey wik thayan inangan ke'an mee'miy weening-a, ngayan puth ke' ngaantam-ngeey-ngeeying ngatharakamana ngay wayan iiy-iiyangan yuk way min wiyantamak thakan mee'-wun-wunanganana. 8Ngay puth wik anangana kan mee'miya, ngay puth wanttaka way anman iiy-iiyanga mee'-wun-wunangan yuk way min pam wanch wiyantamakana. Ka'athaman ngay ke'am ngaantam-ngeey-ngeeyangan ngatharakam ngay way paththaman iiy-iiyangana, puth ngulana ngay wik thayanan kan-ngul thiichangan, a' ngay kan-ngul thiichang ngatharakaman thampa ngay pam wayan iiy-iiyanga.
9Ngay puk manyaman iiy-iiyangan-a, ngay wik thayan God.antamana min-minam ke'am thiichangana, ngay ngatharakaman ngaantam-ngeeyang ke' ngay minan iiy-iiyangane, puth ya'a, ngayan puth min ke'am iiy-iiyangana. Puth ngul-ngulana an epa ngay wik thayanan thiichangan ngula a' anpalana ngay mee'miy ngul weenang ngay wayan iiy-iiyanga, a' ngayan ngangk way paththam ngul iiy-iiyangana, ngay puth ngaantam-ngeey-ngeeyanga nil God.angan aak wayakan nath kuchow ngayanga. 10-11Wik thayan God.antam alangan woyan minana waa'an ngathara. Ngay ke' wik thayanan pi'inga, puth ya'a. Wik thayan piip God.antaman kuchekangan wampanar-a, an ngay ngaantam-ngeey-ngeeyang way anman yump-yumpānga. Ngayan puth-putham ngul wayan yump-yumpangan. A' ngay ngangk way ngul iiy-iiyang, ngay puth mee'miy nil God.angan aak wayakan kuchow ngayang.
12-13Niiy nath ngaantam-ngeey-ngeeyaniy wik thayan inangan ke' way ey? An ya'a, wik thayan inangan min paththama. Ngayaniy ep-paththama way yump-yumpang. Puth nil God.angan wik thayanan thee' ngampar ngampan yipam mee'miy wun-wunāmpa ngamp wayan yump-yumpanamp-a, an way paththam mee' nungantang God.antangana.
Ngay Kaangk Pam Min Ngul Iiyānga, Puth Ya'angam, Ngay Minam Ke'am Iiy-Iiyang
14Ngamp puth kan mee'miy wik thayan inangan nil Ngeen-Wiy Min God.antam alangan thee' ngampar an wik min paththama; puth ngayan min ya'a, ngayang ke' kon-ngathiy way yumpanakana, ngayan puth woyan wayang angan wipangan. 15Ngay puth way anman ngeenak iiy-iiyang e? Ngay kaangk pam min ngul iiy-iiyānga, puth ya'angam, ngay minam ke'am iiy-iiyang. Ngay way kaangk ke' iiy-iiyānga, puth ngayana way anman iiy-iiyang. 16Ngay wayan yump-yumpangan-a, ngay ngangk way paththam iiy-iiyang, puth nanpalan ngay kan-ngul mee'miy wik thayan God.antamana an mina. 17Ngay kaangk wik thayan God.antaman ngeey-ngeeyānga, puth ya'angam, ngangk ngatharam yam pekan-a, ngay way anman ngaantam-ngeey-ngeeyanga. 18Ngay puth mee'miy ngatharakaman ngay min ya'a, nungkway ngay kaangk min kan-kanam ngul iiy-iiyāng-a, puth ya'a, ngay min ke' iiyinga, ya'a. 19Ngay kaangk min iiyānga, puth ya'angam. Ngay wayan ke' kaangk yump-yumpānga, puth ngayana way anman yump-yumpang. 20Ngay way-wayaman kan-kanam kaangk ke' iiy-iiyānga, puth ya'angam, puth ngangk ngatharaman yam pekan-a, ngay way anman ngaantam-ngeey-ngeeyang, ngayan ke'-paal woyan wayan wak-wakang. 21Inan ke' aak yimanangan wunan ngathar: ngay ke' minan iiyingan-a, puth ya'angama, ngay ma'-yotam way ngaantam-ngeey-ngeeyanga way yumpanakana.
22Ngay kaangk kan-kanam paththam wik God.antaman ngeey-ngeeyānga, an puth ya'a, 23puth in ke' wayan ngangk ngatharangana ke' kulak yimanangan wenkan nungant min alantana, pul pekwunpul min alangana, a' putha way alangana -- puth amanamana, nil way alangana thaachan ngayang wayan yump-yumpānga, ngayana anman way ngul iiy-iiyang. 24-25Ngay puth wik God.antamana ngaantam-ngeey-ngeeyang a' puth kaangk min iiy-iiyānga, puth ya'a, ngay way anman yump-yumpang. Nanpalan-a, ngayan putha pam ngangk way anman iiy-iiyang a! Nil puth God.angan nathwey kuchow ngayang aak thonakana. Ngayangan nil wee'ang ma'-aath-aathowany minan iiy-iiyāng a? An nil thonamang epa nil Jesus Christ.anga, Lord ngamparamangana! An puth ngay thankyou thaw-thawang nungant piip God.antana.