Ngamp Way Anman Ke' Iiy-Iiyāmp, Ya'a!
61Ngamp kan mee'miy nil God.an min paththam iiy-iiyan ngampara, ke'-paal ngampan ke' thawimpa, “Ngamp way anman iiy-iiyāmp nil yipam God.angan ngangk mam-mamow ngampanga, way ngamparaman ke'-ngul ngaantam-ngeey-ngeeyow.” 2Appang, an ya'a! Ngamp wik yimanangan ke' thawimpa. Ngamp puth ngangk kanam thee'amp nungant Christ.antan, puth amanaman-a, ngamp woyan wayan ke'-ngul wak-wakāmpa, ngamp way anman ke' iiy-iiyāmp, ya'a! 3-5Ngampiya an-aniyangan ngangk Jesus.antan thee'amp-a, thanana ngampang kootra ngakang kuungkin. Inan puth meenathan thant pam wanch wiyantan ngamp pam wanch nungantam Jesus.antaman ngul iiy-iiyanampa. Nil God.angan ke' ngampang kuchiy-a, puth ya'a, nil Jesus Christ.an ngul kee'-ench ngamparana, ke'-paal ngampana mee'miya nil Jesus.an uthaman-a, an ke' ngamp thamp angman uthamamp nungantang. Than aak awar kunttowang angan thenchin nunang-a, an ke' ngampang thamp karpam awarangan thenchin angman Jesus.antanga. Nil piip God.angan ma'-thayanang mulaman ekath nunang Jesus.an-a, an ke' nil God.angana karpam ngampang thampa mulaman ekatha, ngamp yipam woyan wayan yaam ke'-ngul wak-wakāmpa, ngamp woyan min God.antamana ep wak-wakāmp.
6-7Nil paman uthaman-a, ma' thakan yuup ke'anang ngul wun-wunana, wayan puth-puthaman ke'-ngul yumpiy, ya'a. Inan puth yimanangan wunana: ngamp ka'athaman way iiy-iiyampa, way-wayam paththam iiy-iiyamp, puth ngangk ngulan thee'amp nungant Jesus Christ.antan-a, an ke' ngampang thamp yuk wuuyanangan waanchin nungantangan, ke' nungantang angman karpam uthamampa, amanamana ngampaniya ma' oony wayantang ke'-ngul iiy-iiyāmpa, wayana kaangk ke'-ngul yump-yumpāmpa. 8A' ngampaniya mee'miy ngul ngamp Jesus Christ.antang angman iiy-iiyāmp, puth ngampan ke' nungantang angman karpam uthamampa. 9Ngamp puth inan thamp mee'miy: nil Christ.an mulam eka, a' nil puthaman ke'-ngul mul wunowa, ya'a. 10Anpalmana, nil oony way pi'an alangan Jesus.an ke'am ngul thaachan nunang wayan iiy-iiyow, ya'a. Nil Jesus.an man-yetham ngulakam iiy-iiyowa, nil piip-kunch God.ana ngangk min anman yump-yumpowana. 11Niiyiya niiyantakaman ngaantam-ngeey-ngeeyāna, “Ngamp pam wanch God.antama, ngampan ke'-ngul wik oony way pi'an alantaman ngeey-ngeeyāmpa, ngampana way ke'-ngul iiy-iiyāmp, ya'a, puth ngamp pam wanch Jesus Christ.antam ngul iiy-iiyāmpa, ngamp yipam God.an ngangk min anman yump-yumpāmpan.”
12Niiy ma' oony way alantangan ke' iiy-iiyāna, niiy wayan ke' ngaantam-ngeey-ngeeyāna, niiy woyan wayana too wantān. 13Niiy ke' wayamāna. Ma' niiyantamangana wayan ke' yump-yumpān; tha' niiyantamangana aak wayakan ke' iiy-iiyān; kuchek niiyantamangana ke' wayan ngaantam-ngeey-ngeeyāna; thaa'nganth niiyantamangana wik wayanang anangan ke' thaw-thawāna; yimanamana way ke' iiy-iiyina, ya'a: niiy piip God.an wik ngeey-ngeeyāna, an ke' niiy nungantang Jesus.antang karpam uthamana, niiy woyan God.antam kan-ngul wak-wakaniy, min anman iiy-iiyaniya! Niiy puth ma' niiyantamangana min yump-yumpāna; tha' niiyantamangana aak minakan iiy-iiyāna; kuchek niiyantamangana niiy minam ngaantam-ngeey-ngeeyāna; thaa'nganth niiyantamangana wik minam thaw-thawāna; yimanaman minam iiy-iiyāna, wik God.antaman ngeey-ngeeyāna! 14Aak imanamana niiyan ma' nungantang oony way alantangan ke'-ngul iiy-iiyāna, ya'a, nil piip God.angan way niiyantamana kan kon-ngath nunanga. Niiy mee'miy niiyamana wik thayanan minaman ke'am pi'-pi'aniy, puth nil piip God.angan ngangk minangam iiy-iiyan niiyanta a' puth nil ngula ma'-aath-aathow niiyanga niiy yipam min anman iiy-iiyāna.
Ngamp Min Anman Iiy-Iiyāmpa!
15Niiy wiyangan natha yimanangan ngaantam-ngeey-ngeeyaniya, “Ngay ngeenak min iiy-iiyāng a? Ngay wik thayanan ke' ngeey-ngeeyinga! Ngay way anman iiy-iiyānga, nil puth piip God.ana min iiy-iiyan ngathara, ke'-ngul ngaantam-ngeey-ngeeyow way ngayan yump-yumpanga.” An ya'a! Niiy yimanangan ke' ngaantam-ngeey-ngeeyāna! 16Puth in ngeeyāna: niiy ngul wee' ngeey-ngeeyaniy nunang ma'-yotaman e? Nil ke' moom niiyantam yimanangan iiy-iiyane? Niiywey oony wayan wik ngeey-ngeeyin nunangan-a, an ke' nil moom niiyantam iiy-iiyana. Puth niiywey God anman wik ngeey-ngeeyinan-a, an nilana moom niiyantam ep iiy-iiyana, a' nilana way niiyantam ke'-ngul ngaantam-ngeey-ngeeyowa; puth niiy ke'wey God.an ngeey-ngeeyān nunangan-a, a' way anman yump-yumpānan-a, nil God.angana aak way aakanakan kuchow niiyang. 17Niiy ka'athamana way anman ke'-ngoongkam iiy-iiyan, puth ngayan thankyou thawang nungant piip God.antan niiyan puth yimanangana ep ngul wik nungantaman kan-ngul ngangkangam pi'-pi'aniy wiyangan waa'-waa'antan niiyantana. 18Nil Christ.angan woyan wayamana kecham kal-kalan niiyanga, nil ngul moom niiyantam iiy-iiyan, a' putha niiyan kaangk ngul min anman iiy-iiyāna. 19Ngay wik inaniy engkanang thaw-thawang niiyanta, niiy yipam min-minam ngul ngaantam-ngeey-ngeeyāna. Niiy ka'athamana ma' nungantang oony way alantangan iiy-iiyana, aniy-a, way-wayam paththam iiy-iiyana, puth yimanangana, niiy min anman ngul iiy-iiyāna, niiyan yipam woyan min God.antamana wak-wakāna, niiyan yipam piip God.ana ngangk min yump-yumpān nunanga.
20Niiy ka'athamana min ke'am ngaantam-ngeey-ngeeyan, iiy-iiyan thakana, ya'a, niiyan puth ma' nungantang oony way alantangan iiy-iiyan. 21An-ngul min niiyant ey? An ya'a! Puth niiyana nyaa'-nyaa' ngul iiy-iiyan way niiyan yump-yumpana, amanamana. Than pam wanchang wayan ma'-yotam yump-yumpantanan-a, than uthamaynan-a, than God.antangana ke'-ngul wun-wunayna, nil kuchow thanang aak way aakanakana. 22Puth nil Christ.angan kan-ngul kal niiyang woyan way anpalan woyan minak ngula, a' niiy wik God.antaman kan-ngul ngeey-ngeeyaniy nil puth moom niiyantam. A' puth inana, nil ma'-aath-aathan niiyang woyan min nungantaman wak-wakāna. Niiyaniya nungantang ngul wun-wunān aak umpuyama. 23Ngay inan thawang niiyant: than wee'-wee'anangan way anman yump-yumpayn-a, an ke' than work iiy-iiyantan oony way alantana, nil ke' moom thant -- amanamana, thanan uthamaynan-a, than aak wayangan wun-wunayn. Ngamp wee'-wee'anangan ngangkan thee'-thee'anamp nungant Jesus Christ.antan-a, an nil God.angan kalow ngampang aak nungantang wun-wunāmpa, wukalan ke' thee'impanta, nil yimanangman kalow ngampang aak nungantamakana.