Ngamp Wee'-Wee'anangan Jesus.an Ngangkangan Pi'-Pi'imp Nunangan-a, Nil God.angan Way Ngamparaman Ke'-Ngul Ngaantam-Ngeeyow
51A' ngampaniy-a, Jesus.antan ngangk kan thee'amp nungantana, anpalmana nil God.angan way ngamparaman ke'-ngul ngaantam-ngeey-ngeeyow. Ngampana kuchek-thayanan ke'-ngul iiy-iiyāmp God.antana, puth yimanang ngulana ngamp ngangk minangam iiy-iiyāmp nungantana, puth nil Lord Jesus Christ.aniya way ngamparamakan utham. 2Nil God.an kan-ngul ngangk minangam iiy-iiyan ngampar, a' ngamp yimanangana ngangk minangam ngul iiy-iiyanampa, puth ngampan mee'miy nil God.angan ngulan kalow ngampang aak nungantangan wun-wunāmpa. 3Inan thampa, nungkway aak wayan nath wampow ngampar-a, ngampan puth ngangk minangam iiy-iiyāmpa, nil puth God.angan ngangk ngul thay-thayanathow ngampang. 4Ngamp kan-ngulan ngangk thayanaman iiy-iiyanampan-a, an ngampa min-minam ngul iiy-iiyanampa. Puth thon ina, ngampa mee'miy ngula nil God.angan ngulan ngampang kalow aak nungantamakana. 5Nilan ngampang ke' monkan-thenchiy ngampang, ya'a, nil ngampangan kan-kanam ngul kalow aak nungantamakana. Ngampan mee'miy nilan kan-kanam kaangk paththam wunan ngampar, nil puth Ngeen-Wiy Min nungantamana kuchan ngangk ngamparamangan wun-wunow.
6Ngamp ke'aman yippak God.an ngangkangaman pi'-pi'ampan-a, ngampiya way anman yump-yumpampa, ke' minan iiy-iiyimp-a, an puth ya'angama. Aak anan kan-ngul wampant-a, nil God.angan mi'a, nil Christ an-aniyangan utham pam wanch way il-ilantan ngampara. 7Nil puth wee' kaangk uthamowan e? pam min alantamaniy e? aak nungantamangan e? An ya' natha! Nath pam thonam puya nil kaangkan uthamowana pam min paththam alantamana, ya' natha. 8Puth nungkway ngampana way anman iiy-iiyamp-a, nil Jesus Christ.an utham ngampara, anpalana God.angan meenath ngampar nil kaangk paththam wun-wunan ngampar. 9Nil puth Christ.angan chaapar nungantaman theetath ngampar, amanam ngulana nil God.angan way ngamparaman ke'-ngul ngaantam-ngeey-ngeeyow, inan thampa nil kan-kanaman ngampang ke' kuchiy aak nungantam anpalana. 10Ngamp ka'athaman wayan yump-yumpamp-a, an ngamp God.an ngangk kul yump-yumpamp nunangana. Puth nungkway ngamp wayan yump-yumpamp-a, nil God.angan nhengk nungantaman kuch nunang uthamowan ngampar, nil yipam way ngamparaman ke'-ngul ngaantam-ngeey-ngeeyow. A' nil Jesus Christ.an mulaman eka, anpalmana, ngamp kan-kanam ngul ngaantam-ngeey-ngeeyanamp nunang God.an nil ngulana an min-minam pi'-pi'ow ngampang a' aak nungantang ngulan wun-wunāmp. 11A' putha inan thampa, ngampan piip God anman thaa'-kuump-kuumpanampa, puth nil Jesus.an utham way ngamparamakan a' nil God.ana kan-ngul kon-ngath nunang way ngamparam anangan, nil ngurp min nungantam ngul yump ngampangana.
Nil Jesus.an Ke' Adam Yimanangan Ya'a, An Nil-Nila
12Aak keenkanamana nil Adam.angan way yumpa, amanamana pam wanch yotaman way ngul weenampa, way anman yump-yumpanamp, anpalmaniya, pam wanch yotam ngulana uth-uthamanamp, puth ngamp yotaman way iiy-iiyanamp. 13Aak keenkanamana, than pam wanchangana way yump-yumpin, puth nil God.an ke'am thaw thanta, “Niiy wik thayan ngatharamana pipana,” puth nil wik thayan Moses.antan ke'am yippak thee'a. 14Aak anpalmana nil Adam.an wun-wuna aak-aakanakaman nil Moses.angan wik thayanan thee' thant ngul-a, than pam wanch anangana uth-uthamina, puth than yotaman way anman iiy-iiyin. Nil God.an thaw nungant Adam.antan mayan ke' mungkowa, puth nil Adam.ana kuchek-thayan iiy a' mayana mungk. Nil God.an Adam.ant thonakam wik inan thaw. Than pam wanch wiyangan ke'am ngeeyin nil God.an wikan thaw-thaw thantana, nil Adam.antan ep thaw, puth than thamp way iiy-iiyin.
Nil Adam.an-a, ka'atham wun-wuna, nil Jesus Christ.aniya ngul-ngulan uka aak iikanakan. 15-18Nil Jesus.an ke' Adam yimanangan ya'a, an nil-nila. Adam.aniya, wik God.antamana ke'am ngeey, nil kuchek-thayan iiy-iiya, nil way yump a' puth than yotamangan woyan nungantamana wak-wakin, way iiy-iiyin. Nanpalaniya, nil God.an ngaantam-ngeey nungantakam, “Than pam wanch yotam way iiy-iiyantan ey? Mak uthamayna! Ngayana aak way aakanakan kuchāng thananga.” Ka'athamana, nil pam thonamang Adam.angan way yump a' nil utham ngul. Amanamaniya than pam wanch yotam ngul way iiy-iiyantana, a' than ngul uth-uthamina, nil yimanamana. Puth nil Christ.angana, ep wik God.antaman ngeeya, nil ke'am way thakan yumpa, ya' paththama. Nilan uthama, nil yipam pam wanch kaa'-piichanathow thanang. Nil God.angan Christ.an kuch ngamparana, nilan puth ngangk min iiy-iiy ngampar. Nungkway ngamp ma'-yotaman wayan iiy-iiyanamp-a, nil God.an thawa, “Nil Jesus.an ngangk minangam iiy-iiy niiyantana, nil puth utham way niiyantamakana. Ngay thampana ngangk minangam iiy-iiyāng niiyantana, ngay way niiyantaman thampa yaaman ke'-ngul ngaantam-ngeey-ngeeyānga, a' ngay niiyangana kan-ngul kalāng aak ngatharamakana.” Puth than wee'-wee'anangan ngaantam-ngeey-ngeeyayn nil Christ.an way thanttamakan utham-a, a' putha ngangkan thee'ayn nungant-a, nil God.angan kan-kanaman way thanttaman ke'-ngul ngaantam-ngeey-ngeeyowa, a' pam wanch wayana ke'-ngul waa'ow thananga, ya'-ngul. 19Ina aak yimanangan wunana: nil pam thonamang Adam.angan wik God.antaman ke'am ngeeya, nil kuchek-thayan iiy, wik pip God.antaman, anpalmana than puth pam wanch yotaman way ngul iiy-iiyin. Puth nil pam thonamang Jesus.angana, ep wik God.antamana ngeey, a' utham yuk wuuyanangana, anpalana nil God.angan pam wanch yotamantam wayana ke'-ngul ngaantam-ngeey-ngeeyow, pam wanch al-alantamana than ngangkan thee'in God.antana.
20-21Aak keenkana, nil God.an Moses.ant thaw wik thayan nungantaman waa'ow thant pam wanchantan than yipam ngaantam-ngeeyayn thanttakamana than wayan yump-yumpantan, wik thayan God.antaman pip-pipantan. Puth ngampan puy-puyam way yump-yumpanamp, ke'-paal ngamp uth-uthamanampa. Nil God.angan kuchiy ngampanga! Puth nungkway ngamp way anman iiy-iiyanamp-a, nil God.an ngangk minangam iiy-iiyow ngampar, nilan kaangk ke' way ngamparaman yaaman ngaantam-ngeey-ngeeyow. Nilaniya puth Jesus Christ.an kucha nilam puth pam min paththamana, nil paal utham way ngamparamakana. Nil puth God.an thaw ngampar, “Niiy Jesus.antan ngangk thee'ān-a, niiyana ngatharang ngul wun-wunān aak umpuyangama.”