Ngay Wik Inan Abraham.antaman Ngul Waa'āng Niiyanta
41Ngay wik inan ngul waa'āng Abraham.antam niiyanta, nil wuut mangk ngamparam Jews il-ilantamana. 2Nil God.angan pam min waa' nunanga. Ngeenam ngula? Ngul nilan wik thayan ma'mangkaman minam pi'-pi' ey? Ya'a! Nil puth Abraham.angan God.antan ke' waa'iy nungantakamaniya ke' nil minana! An ya'a! Nil puth kan mee'miy nil God.angan way nungantaman kan kon-ngath nunanga puth nilan God.an ngangkang pi'-pi' nunanga, amanaman thonakama. 3Puth lat ngench thayanangan waa'an, “Nil Abraham.angan wik God.antaman ngeey-ngeeya, a' God.an ngangkangam ngul pi'-pi'ana. Anpalan-a, nil God.angana way nungantamana kanam kon-ngathana.”
4-5Nil pam moomangan wukal thee'-thee'an pam al-alantan thant work minaman iiy-iiyantan nungantana, nil wukal thant aak-ya'angan ke'am thee'-thee'an, ya'a. Puth piip God.antan aaka nil-nil wun-wunana. Pam wanch wiyangan natha ngaantam-ngeeyiythana than wik thayan nathwey minaman pi'-pi'iythanan-a, yaa, nil God.angan puthangkana way thanttam anpalana ngul kon-ngathowana. Puth aak God.antan yimanangan ke'am wunana, ya'a. Nilan wik inangana ep thawa, “Niiy pam wanch way iiy-iiyaniya, puth niiy nathwey ngangkangaman pi'-pi'in ngayangan-a, yaa, puth ngayiy-a, way niiyantam anangan-a, ke'-ngul ngaantam-ngeey-ngeeyānga.” 6-8Nil King David.angana lat ngench thayanang wik inan ump:
“Pam wanch wiy ananganiya ngangk minangam iiy-iiyantan.
Than puth kan mee'miy than pam wanch min ya'a,
puth nil God.angan way thanttaman kanam kon-ngath nunang.
Nilan puth thaw thant, ‘Niiy way-wayam paththam iiy-iiyana, puth kana,
ngay way niiyantaman ke'-ngul ngaantam-ngeeyānga.’
Anpalana, than pam wanch anangana ngangk minangam ngul iiy-iiyin.”
9Nil David.angan thanang Jews anangan thonakam ke'am waa'-waa'an, ya'a, nil pam wanch wiy anangan thamp waa'-waa'ana. Ngamp kan mee'miy, lat ngench thayanangan waa'-waa'an ngampar, “Nil Abraham.angan ngaantam-ngeey paththam nil God.an kan-kanaman thaw-thawana. Anpalana, nil God.angan way nungantaman ke'-ngul ngaantam-ngeeyow.” 10Nil God.an wik inangan thaw nungant-a, nil Abraham.an kompan thamp ke'aman yippak iiy-iiya, ke'am yippak ngeen-wiyan umpin nunanga. Nil puth Jew yippakan ke'aman iiy-iiy puth aak an-aniyangan than pam wanch Jews ke'anangan yippak iiy-iiyinana. 11Ngul-ngulana, nil God.an thaw nungant Abraham.antan, a' putha pam kampan nungantam al-alantan thanan kompan thamp iiy-iiyayna, ngeen-wiy thanttaman ump-umpwayna. Ngul anpalaniy-a, nil God.angan way Abraham.antam ke'-ngul ngaantam-ngeeyiy ey? Ya'a! Nil ka'athangaman ep pam min waa' nunanga, a' way nungantam anpalana kanam kon-ngathana, nil puth Abraham.angan wik God.antaman kan-kanaman ngangkangam pi'-pi', anpalana. Nil puth God.an thaw thant kompan thamp iiy-iiyayna than yipam wiyangan ngaantam-ngeeyayn nil way thanttaman ke'-ngul ngaantam-ngeeyow. Aak anpalman-a, thanan puth Jews ngul waa'-waa'in thanang. 12Nanpalana nil Abraham.an ke' wuut mangk pam wanch al-alantaman weena than God.an ngangkangaman pi'-pi'in nunang -- thanttam Jews al-alantaman-a, a' putha thanttam wiyantam thampang than kompan ke'anangan iiy-iiyantana. Than inangana, nil God.angan way thanttaman ke'-ngul ngaantam-ngeey-ngeeyana.
Nil Abraham.angana Ngangkangam Pi'-Pi' Nil God.an Kan-Kanaman Thaw Nungant
13Aak keenkanamana nil God.angana kaa'ngak nunang Abraham.ana, nilan thaw nunganta, “Ngay ngula aak pi'an thee'āng niiyanta, puk niiyantamak a' putha puk thanttamak thamp thee'ānga. A' thanan pam pi'an ngul iiy-iiyayn.” Nil piip God.an wik yimanang ngeenak ngul thaw e? Ngul nil Abraham.angan wik thayan God.antaman minam anman pi'-pi' ey? Ya'a! Nil puth Abraham.angana wik God.antamana ngangkangam kan-kanaman pi'-pi'a nil piip God.angan anpalan kaa'ngak nunangana. Amanamana, nil God.angana way nungantamana ke'-ngul ngaantam-ngeey-ngeeya. 14Ngamp nathwey wik thayan ma'mangkaman pi'-pi'impan-a, an ngamp min iiy-iiyimp mee' God.antangana -- ngamp ngeenak ngul ngangkan thee'amp nungant Jesus Christ.antane? A' nil puth ngeenak God.angan kaa'ngak Abraham.ana? Puth ya'a, ngamp ya'angam wik thayan ma'mangkam anangan pi'-pi'impana. Nil puth piip God.angan aak-ya'angana ke'am kaa'ngak nunangana a' puth nanpalan nil God.an thawa, “Niiy kan-kanam ngaantam-ngeey-ngeeyān ngayang ngay way niiyantamana ke'-ngul ngaantam-ngeey-ngeeyānga.” 15An ngamp wik thayan ke'ananganwey wunimp-a, an ngamp wik thayanan ke' pipimp aa? Puth ngamp wik thayanan ep mee'miy ngula, an ngamp ke' wik thayanan pi'imp-a, puth ya'angam, an puth ngamp ma'-yotam wik thayanan pip-pipanampa. Puth nanpalana nil piip God.antan man kul ngul wampant a' nil ngul wayathow ngampang.
16Puth ngamp ngangk ngamparaman ep thee'āmp nungant God.antana. Anpalan nil God.an ngul ngangk minangaman iiy-iiyow ngampar ke' nil nungant Abraham.antan ngangk minangaman iiy-iiya. Nil God.angana wik min kaa'ngak nunang Abraham.ana a' putha wikan kan-kanam ngampar thampang want pam wanch yotamantana ngangkangam pi'-pi'anamp nunanga, puth ngampweya mangk nungantang Abraham.antangan wampamp nungant God.antan. Nil Abraham.an pam wuut mangk thanttam Jews al-alantaman a' puth pam wanch wiyantam thamp, pam wanch aak umyompanam wik God.antaman ngangkangaman pi'-pi'antana ke' nilan wik God.antaman ngangkangaman pi'-pi', Abraham.angan. 17Wik inan kan-kanama, puth lat ngench thayanangan waa'an thampa nil God.an thawant Abraham.antan, “Ngay nintang wuut mangk pam wanch yot al-alantaman waa'ang nintang, pam wanch thaa'nganth thon-thonan thaw-thawantana putha aak nath-nathan wun-wuntan.” Wik inangan nilam God.an thaw-thawan Abraham.antan, kan-kanaman thawana, nil Abraham.angana kan-ngul ngaantam-ngeey nil God.an kan-kanam thaw-thawana. Nil God.angan puth yuk way min ma' nungantang pi'-pi'an. Nilaman pam mulaman koyaman ekathan. Nilam mee'miy ngeen ngulan wampow. Nungkwaya than pam wanch ke'aman yippak aak-ngeeyin-a, nil ep God.aniy puth mee'miy thanang nathpalman. Thantaniy-a, an nilam God.angan ngangk thee'an, aak-ngeeyanakana. 18God.an Abraham.ant thaw, “Pam wanch puk nungkaram anangana a' putha puk thanttaman, thananiy thaa'-wantanam ke' thunp inang kenyan ngul weenayna.” Nungkway nil Abraham.an wuut kath ngulan weem-a, nil kan-kanam ngaantam-ngeey nil puk many ngulan wampow nungantweya. Nungkway nil puk ke'anangan yippak-a, nilana ngangkangam pi'-pi' nil God.ana kan-kanamaniy thaw nungant, nil wuut mangk ngulan iiyow thanttaman pam wanch yotantaman aak nath-nathan wun-wuntan. 19Nunanganiya kaap one hundredang wantana, nil pam wuut kath ngul weem; a' puth wanch thum nungantaman Sarah.ana, wanchinth kath thamp iiy-iiya. Nilan kan ngaantam-ngeey wanchinth way-wayam ngul, puk ke'am kal, puth nilan kan ngangkangam pi'-pi' nil God.an kan-kanaman thaw nungant. 20-21Nil Abraham.angana God.an ke'am man-ngeeya, ya'a, nil anman ngangkangam pi'-pi' nil God.an wik thaw nungantana, puth nil God.an thaa'-kuumpan, nilan puth kan ngaantam-ngeey nunang God.an pi'an paththama, nil puk manyan ngul thee'ow pulant. 22Puth nanpalan nil God.angan way nungantaman ke'-ngul ngaantam-ngeeya, ya'a.
23-25Thanan wik inangan lat ngench thayanangana ngampar ngul wantin. An nungantakam Abraham.antan thonakam ya'a, an wik inangan ngampar thampa, ngampar al-alantan wik God.antaman ngangkangaman pi'-pi'anamp. Nil God.ana way ngamparam thamp ngul kon-ngathowan, puth thanan Jesus.an theetathin nunang mulan wunow, anpalana nil God.an thaw, “Yaa.wey, puk nhengk ngatharaman kan uthama way thanttamakana pam wanchantamana.” A' anpalana nil God.angan mulaman ekath nunang ngul, a' thaw ngula, “Yaa.wey, way pam wanchantamana kon-ngathowany ngula a' ke'-ngul kuchāng thananga aak way aakanakana.” Than puth wee'-wee'anangana kan-kanaman nunang God.an ngangkangaman pi'-pi'antan-a, nil puth God.angan way thanttaman ke'-ngul ngaantam-ngeey-ngeeyow, ya'a.