31Puth niiy niiyantakaman ngul nath thawina, “An-ngul ngamp ngeenak Jews.an iiyanamp e? An-ngul min ngampar ey? ngeen-wiy pe'anan umpayn ngamparaniy ey?” 2Ee'a, an min ngampar Jews.an iiy-iiyanampweya. Nil God.angan wik ka'athaman ngampar Jews il-ilantan want. 3Wik God.antaman kan-kanama, nil wik nungantam ke'am pip, ngampangan kaa'ngak. Nungkway than pam wanch wiy al-alangan wik ke'an ngeeyiythan nunang-a, nilan puth wik nungantaman ke'am kon-ngath nunang, God.an. 4Puth piip God.an ke'am wik uuy-uuyamana, pam wanch ngampiya epa wik uuy-uuyamanampa, nil God.an-a, ya'a, an puth lat ngench thayanang kan waa'an ngampar nil David aak keenkan thaw nungant God.antan:
“Wik nungkaramana an kan-kanama.
Pam wanch wiyangan nathwey waa'iythan nintang-a, a' man-ngeeyiythan nintang wik nungkaram amanaman-a,
an nint meenathān wik nungkaram anangana nintan thaw-thawangan-a, an kan-kanam paththama.”
5Niiy nath wik way anman ngaantam-ngeeyaniy niiyantakaman, “In min ngampar ngamp wayan yump-yumpanampana, yipam than pam wanch wiyangan thathayn nil God.an thonakam minana, pam wanch ngampaniya, an ya'a.” An ya'a, niiy way anman ke' iiy-iiyin a! Nath niiy yimanang thamp wik wayan ngaantam-ngeeyaniy niiyantakaman, “Nil God.angan aak wayakan ke' kuchiy ngampanga, ya'a! Puth ngamp nathwey way ke'an yump-yumpimpan-a, an puth thanan want-wanttak ngaantam-ngeeyiythan nil God.an thonakaman minan e?” 6An ya'aniya, kaangk nil nath kuchiy ngampang aak wayakan-a, an nila kuchow ngampang. Nil puth God.an nil-nil, nil ke' ngamp yimanangan ya'a. An puth kan-kanam pam wanch ananganiya umangam ngul thanayn nungant, nilana thawow thant, aak minak nathwey kalow thanang, nath ya'wey, aak wayakan natha kuchow thanang than wayan yump-yumpantana.
7Niiy nath way-way ngaantam-ngeeyaniy niiyaman ey? an ke' min niiyant ey? wikan uuy-uuyamān ey? An ya'a! Niiy nath wik inan tham ngaantam-ngeeyaniy niiyamana, “Nil puth God.angan ngeenak waa'iy ngampang way yot anangan yump-yumpanamp e? Puth ngampwey ke'an wik uuy-uuyamimpwey-a, an than wiyangan puth want-wanttak ngaantam-ngeeyiythan thanttakaman nil piip God.ana mina, nilaman thonakam wik kan-kanaman waa'-waa'an ngampara?” An ya'aniya, wik yimanangan ke' ngaantam-ngeeyāmp a! 8A' niiy nath ngaantam-ngeeyaniy niiyantakamana an ke' min niiyant wayan yump-yumpāna yipam pam wanch wiyangan ngaantam-ngeeyayn nil God.an mina. An ya'a! Ngamp way ke' yump-yumpāmp a! Than pam wanch wiyangan thanttakaman waa'-waa'antan ngayang, than thaw-thawantan ke' ngay pam wanch wik way inangan thaa'-aath-aathang thanang. An ya'a, than wik kan-kanaman ke'am waa'-waa'antan, an puth kan-kanamaniya nil God.angan ngul waa'ow thanang pam wanch wayanangana.
Pam Wanch Ma'mangkaman Way-Wayam Ma'-Yotaman Iiy-Iiyantan
9Yaa, ngay kan thawāng niiyant pam wanch ngamp Jews il-ilantana. Niiy ngaantam-ngeeyaniy ke' nil God.angan pam wanch Jews anangan min thath-thathan thanangan ey? pam wanch wiy anangan min ya' ey? An ya' paththam a! Ngay puth ka'athaman kan thawangan than pam wanch ma'mangkaman wayan ma'-yotaman iiy-iiyantan, thanan puth kaangk way anman iiy-iiyayn, than Jews a' puth Jews ya' anangan thamp. 10Wik inan kan-kanama, puth lat ngench thayanangan waa'-waa'an:
“Pam wanch yotaman way paththam iiy-iiyantan,
than mee' God.antangan pam wanch min ke'am iiy-iiyantan, ya' paththam.
11Than pam wanch yotamangana God.an minam ke'am thiichantan nunang, ya'a,
a' than puth kaangk ke' wik God.antaman ngeey-ngeeyayn.
12Than pam wanch yotamangan man-mangkam thee'in nungant God.antan,
than yotamangana wayathwin thanttakamana,
than puth ma'mangkaman min ke'am iiy-iiyin nungant, ya'a.
13Than wik way paththam aak-ya'angan waa'-waa'antan thanttakamana
a' puth pam wanch wiy anangan man-monkan thenchantan thanangana.
Than wik wayan thaw-thawantan thanttakaman-a,
an ke' thaa' theek way-wayaman thuukangan pi'-pi'ana, pam mulathanakana.
14Thananiya pam wanch wiy anangan nench-nenchantan thanang, a' ak-akantan thanang,
15a' man kulan wampan thant-a, an paththam piik-piikwuntan thanttakaman mulakama,
16a' putha wiy anangana way-wayathantan thananga,
a' ngangk way-wayam yump-yumpantan thanang.
17Than kulakan ma'-yotam wenk-wenkantan thanttakamana,
than puth ke'am ngaantam-ngeeyantan want-wanttakan ngangk minangaman wun-wunaynana.
18Than puth God.ana ke'am ngaantam-ngeey-ngeeyantan nunanga nil wuut pi'an ngampar paththama.”
19Ngay wik inangana lat ngench thayan ka'atham anpalan waa'-waa'ang niiyant yotamantana, Jews il-ilantan thampa. Niiy Jews.an puth ke' thawina, “Wik nanangan ngampar ngul ey? An ya'a.” Pam wanch yotaman ngamp ngul than-thanāmp um God.antang, a' thawāmp nungant ngan puth way iiy-iiyana. 20Ngampaniya puth ke' thawimp ke' ngampan wik thayan God.antaman minam pi'-pi'anampa, puth amanamaniya nil God.angan ke' minan waa'iy ngampanga, ya'a! Ngamp ke' thawimp yimananganiya, puth ngamp ke'am wik ngench thayan nungantaman ngeey-ngeeyanampa, ya' anmana, ngamp way yippak iiy-iiyanamp. Nil puth piip God.angan kan waa' ngampar wik thayan yotam nungantam anangana, ngamp yipam ngaantam-ngeeyāmp ngamparakamana ngamp wayan yump-yumpanampweya.
Nil God.angan Nhengk Nungantaman Kuch Nunang Kaa'-Piichanathow Ngampang
21Ee'a, pam wanch yotamangana wik ngench thayan God.antaman pip-pipina. Puth in yimanang ngulana, nil piip God.angan kan-ngul meenath ngampar, wik anangan than Moses a' prophetsangan keenkanaman waa'in ngampar, wik engkanang ngul wun-wunan ngampar. Nil puth nhengk nungantaman Jesus Christ.an kuch nunang kaa'-piichanathow ngampang. 22Ngamp puth wee'-wee'anangan kan-kanaman ngangkangaman pi'-pi'āmp nunang Jesus Christ.an-a, nil God.angan way ngamparaman ke'-ngul ngaantam-ngeey-ngeeyow. Wik inangan God.antaman pam wanch yotamant Jews al-alantana a' puth-a, pam wanch wiyant thamp than Jews ya'ana, 23puth pam wanch yotaman way iiy-iiyantan, puth nanpalan nil God.angan pam wanch min ke'am waa'-waa'an ngampanga. 24-26Puth nil God.ana min iiy-iiyan ngampar, ngamp wukal ke'am thee'amp nungant nil yipam nhengk-kunchan kuchow ngamparana, an ya'a, nil ngangk minangam kuch nunang, an yimanaman kuch nunang ngamparaniya. Nil Christ.angan nungamang theetath way ngamparamakaniy uthamow, chaapar nungantam theetath ngamparana, nil God.angan yipam ke'-ngul ngaantam-ngeey-ngeeyow way pam wanch al-alantaman than Christ.an ngangkangaman pi'-pi'antan nunanga. Than pam wanch wiyangan nath ngaantam-ngeeyantan nil God.angan erkaman wayathow thananga pam wanch anangan aak keenkanaman wun-wunina, puth ya'a, nil ngampar meenath nilam thonakaman minana, puth nil erkam ke'am wayath thanang, ya'a, nil ngangk mam thanang, amanaman-a, an mee' engkanang ngul wun-wunan ngamparana, nil God.an min paththama. Than puth wee'-wee'anangana God.an ngangkangan pi'-pi'ayn nunang-a, nilan puth way thanttamana kon-ngathow nunang ngul.
27-28Amanamaniy-a, ngamp ulp-ulpanangana ke' iiy-iiyāmpa, a' ke' waa'wump ngamparakam minaniya, ya'a! Ngamp ngul min-minam iiy-iiyimp ey? wik thayan God.antam yotaman minam pi'-pi'imp ey? Ya' ey! Ngamp wik nungantam ke' min-minaniy pi'-pi'impa, ya' anman. Puth than wee'-wee'anangan Christ.antan ngangkan thee'ayn-a, a' ngangkangaman pi'-pi'ayn nunangan-a, nil God.ana kon ngul ngathowana way thanttam al-alantamana. 29Niiy inan ngeeyāna, nil pam moom pi'an thonam thonakama, an nilam God anmana. Nil God thonam pam wanch yotamantana, Jews al-alantakam thonakam ya'a, puth thant wiy al-alantan thamp Jews ya' al-alantan thampa. 30Nil God.an pam wanch yotamantan thawa Jews.antan-a, puth-a, Jews ya' al-alantana, “Than wee'-wee'anangan ngayang ngangkangan pi'-pi'antan-a, ngayan way thanttaman ngul kon-ngathow ngayang.” 31Puth ngampwey Jesus.an ngangkang pi'-pi'imp-a, ngampan puth wik thayan God.antamana ke' wantimpa, ya'a. Ngamp wikan konangam pi'-pi'āmp a' ngaantam-ngeey-ngeeyāmp thampa. Wik inangan God.antaman-a, an min-minam paththam ngamparana.