Niiy Wik Waa'ān Thanta Ngay Pam Wanch Nanangan Ngaantam-Ngeey-Ngeeyang Thanang
161Nil Phoebe.ana nan wampow niiyant, nil wanch kuunch ngamparama Jesus Christ.antanga. Nil wanch ilangamana, ma'-aath-aathan thanang Christians anangan aak Cenchrea.angan wun-wuntan, an puth work nunganta. 2Niiyiya ngangk minangam umang wakān nunangweya puth niiya pam wanch God.antama, niiy kaangk paththam wunaniya Jesus Christ.antana. Nil Phoebe.an wanttakan thawow niiyantan-a, niiyiya putha ma'-aath-aathān nunang minamwey, puth nilana ka'athamana ma'-aath-aatha ngampangan yotam inangamana.
3Nint waa'ān ngayang pam wanch il-ilantan ngay kaangk paththam wun-wunang thanta, puth in-inman ngay ngaantam-ngeey-ngeeyang thananga:
-- Priscilla a' putha Aquila, pul karpan work iiy-iiypul ngatharangana, ngana wik Jesus.antaman waa'-waa'an. 4Pulana minam pi'-pi'pul ngayangana, pam wayanang al-alantamana. Nungkway than ke' mulathiythan pulangan thamp-a, an kana, pul ngayangiyweya minam pi'-pi'pula. Yaa, an ngayiy putha thankyou thawang pulanta, puth ngayam thonakam ya'a, puth wiy anangan thamp, pam wanch Christiansa, Jews ya' anangana, than yotaman thamp thankyou thaw-thawantan pulantana.
5Nint ngayangan waa'āna pam wanch wiy al-alantan thampa:
-- than pam wanch Christians anangana aawuch pulantamangana yal-yalmathwuntan God.antan mee'an-wuth-wuthanamantana
-- puth ngurp min ngatharam Epaenetus.ana, nil pam inmana pam Christian ka'atham iiy-iiya aak anganiy Asia.angana,
6-putha, Mary.anweya, work pi'anan iiy-iiy ke'-ngoongkamana niiyantana,
7-putha Andronicus-a, a' putha Janias, puliya Jewsa ke' ngay inmana, pul aak jailangan wun-wunpul ngatharang angmana. Pam wanch wiy Christians al-alangana wik min anman waa'-waa'antan pulantamaniya. Pulaniya, ngangk ka'athangaman thee'pul God.antana, ngay ke'aman yippak ngangk ngatharaman thee'ang God.antana,
8-putha, Ampliatus.ana, ngurp min ngatharam thampa nilan ngangkangan pi'-pi'an nunang Jesus Christ.ana ke' ngay anmana,
9-putha Urbanus.ana, nilana work anman iiy-iiy ngamparangana nungant Jesus Christ.antan a' putha ngurp ngatharaman Stachys.ana,
10-putha Apellesa, wiyiy aak way kuyam wamp nunganta, puth nilana Jesus.an ngangk thayanam ngul monkan-wak-wakan nunang,
-- putha, than pam wanch anangan aawuch Aristobulus.antangan wun-wuntana,
11-putha Herodian.ana, pam ngan aak-kunchana,
-- putha than Christians anangan aawuch Narcissus.antangan wun-wuntan thampa,
12-putha Tryphaena a' Tryphosa, pulana work iiy-iiyanpul thamp Lord Jesus.antana,
-- putha ngurp ngatharam Persis.ana, nil thampana work pi'anan iiy-iiy nungant Lord.antana,
13-a' puth Rufus.ana, nilana min-minam monkan-wak-wakan nunang Christ.ana, putha, kaath nungantaman thampa. Nilan ngayang minam pi'-pi'a ngay ke' puk nungantam yimanangana,
14-putha, Assyncritus a' Phlegon a' Hermes a' Patrobus a' Hermas a' putha pam Christians wiy anangan thamp thanan yalmathwuntan thanttangana,
15-putha Philologus, a' Julia a' Nereus a' puth kuunch nungantama a' Olympas a' putha Christians wiy anangan thamp than yalmathwuntan aak thanttangan.
16Niiy karpan yalmathwuniy-a, niiy ma' thuthwuna. Than pam wanch Christians aak nath-nathan wun-wuntan-a, than wik kuchin niiyantanweya than ngaantam-ngeey-ngeeyantan niiyanga.
Ngay Inan Wik Thayanam Thawāng Niiyanta
17Niiyalang, ngay wik inan thaa'-thayanam thawāng niiyanta: niiy aak thathāna than pam wanch nananga than puth kaangka kulan uw-uwayna wik min Christ.antam anpalana, thanan puth kaangk thaachayn niiyang niiy yipam wik min Jesus.antamana too wantāna, wik nganan thaa'-aath-aathan niiyanga. Niiyan putha ke' iiy-iiyān thanttangan ya'a, 18puth thananiya ke' wik ngeey-ngeeyantan nunang, Christ.an, Lord ngamparamana, ya'a, thananiya kaangka moom thanttakam iiy-iiyayna, way thakan kaangk yump-yumpayn. Puth than kaangk muukamathayn pam wanch wiy anangan than yippak woyan min God.antaman ke'am min-minan thiichina, puth thananiya ke' wik min yimanang thaw-thawantana, an ya'a, an yaan muukamantana. 19Puth niiyanganiya, pam wanch yotangan waa'-waa'antan niiyanga niiy wik God.antaman min-minam ngeey-ngeeyaniyweya. Ngangk ngatharaman-a, min paththam wun-wunan niiyantamana. Ngay kaangk niiyana kuchek minang iiy-iiyāna, niiy yipam minam anman iiy-iiyān. Puth pam wanch wiy al-alangan ke' thaachayn niiyang way yumpanakana, niiy ke'-ngoongkam anman minam iiy-iiyāna. 20An nil God.angan ep-paththam ma'-aath-aathan ngampangana ke'-paal ngangk minangam iiy-iiyāmp ngamparakamana. Nil paththam ma'-aath-aathow niiyang niiy yipam oony way pi'anana um thaamp-thaampān nunanga, ke' niiy tha'ang yimanangan maak-maakaniy nunangana. Ngay kaangk nil Lord Jesus Christ.ana minam iiy-iiyow niiyanta putha ma'-aath-aathow niiyang thampa.
21Nil Timothy inana, nil work ngatharangan iiy-iiyana, nil wik kuch niiyanta nil ngaantam-ngeey-ngeeyan niiyang thampa, a' putha Luciusa, a' Jason a' putha Sosipatera than ngaantam-ngeey-ngeeyantan niiyang thampa -- thaniya pam Jews ke' ngay inman. 22Ngay thampa Tertius, ngay ngaantam-ngeey-ngeeyang niiyang. Ngay lat inan umpang Paul.anta. Ngay thampa kanam ngangkan thee'angant Jesus Christ.antana. 23Nil in thamp Gaius.ang ngaantam-ngeey-ngeeyan niiyanga. Ngayiya aawuch in wun-wunang nungantanga. Than Christians inangan karpam yalmathwuntan aawuch ingana than yipam ngaantam-ngeey-ngeeyayn nunang God.ana putha karpam mee'-wuth-wuthanamayna. Putha, nil Erastusa, nilan wukal pi'-pi'an aak town ingana, nil thampa ngaantam-ngeey-ngeeyan niiyangweya. Putha pam Quartus ilangan ngaantam-ngeey-ngeeyan niiyangweya, nilaniya ke' kuunch ngamparweya Jesus Christ.antangana. 24Ngay kaangk nil Lord Jesus Christ.ana minam iiy-iiyow niiyanta putha ma'-aath-aathow niiyang thampa.
Ngamp God.an Ke'-Ngoongkam Anman Thaa'-Kuump-Kuumpāmp Nunanga!
25Ngamp piip God.ana thaa'-kuump-kuumpāmp nunang a! Nil ilangaman God.angana ep-paththam ngangk thay-thayanathan ngampang ngamp yipam Jesus Christ.an ngangkangam pi'-pi'āmp nunang -- nil Christ inmana ngayan waa'-waa'ang niiyanta, niiy puth wik nungantamana mee'miy ngula. Pam wanch keenkan wun-wunin-a, than ke' mee'miy nunang Jesus Christ.ana, ya'a, nil puth piip God.angana wik inana ma'-mupam pi'-pi' nungantakama. 26Pam prophetsangan keenkana, wikan kan-ngul many-many waa'-waa'in pam wanchantana, wik Jesus.antamana, puth Jesus.ana ngul-ngul wampa, a' nil God.angana mee' engkanang ngul meenath ngamparana yipam than pam wanch aak umyompanaman wun-wuntana min-minam thiichayn nunanga. Nil God inmana nil ke' uthamiya, nilan thawa ngamp wik Jesus.antaman waa'-waa'āmp thant pam wanch yotamantan than yipam ngangk thee'-thee'ayn nunganta, a' putha woyan nungantam anman yipam wak-wakayn ngula.
27Nil anman God thonama, nilam thonakam ma'mangkaman mee'miya! Niliya Jesus.an kuch ngampara, puth ngampaniya ke'-ngoongkam anman thaa'-kuump-kuumpāmp nunang, yey, kan-kanamaniya!
Yaa, lat inan kan-ngul mincha, appow,
Paul.