Ngamp Ngamparakamana Thonakama Ke' Ngaantam-Ngeeyāmp Ya'a
151Ngamp wee'-wee'anangan kan-kanaman woyan God.antaman min-minaman wak-wakanamp-a, ngampiya, ma'-aath-aathāmp thanang Christians wiy anangan than anangan koyaman mel ench-enchantan, than ke' mich yippak iiy-iiyantanweya. Ngamp ngamparakaman thonakam ke' ngaantam-ngeeywumpa ya'a. 2Puth ngampaniy wiy anangan ngaantam-ngeey-ngeeyāmp thanang thampa, than yipam ngangk thay-thayanam monkan-wak-wakayn nunang Jesus Christ.ana, a' putha woyan min God.antaman puy-puyam ngul wak-wakayn. 3Puth nil Jesus Christ.angana ke'am ngaantam-ngeey-ngeey nungantakamana, ya'a. Nilan puth thawa lat ngench thayanangan, “Piip God-ang! Pam wanch wiy anangana kaangk ke' nungkarama, anpalana than ngayang aak-ya'angan waa'-waa'ina, wayan yumpin ngathar.” 4Wik ma'mangkamana, than lat ngench thayanangan umpin keenkanaman-a, aniy-a, min ngampara. Ngamp wik inangana ngeey-ngeeyāmpana, ngampan yipam ngangk thayanam ngul woyan anman wak-wakāmp God.antamana, puth amanamana ngampan mee'miy ngula nil piip God.angana ma'angam ngul pi'-pi'ow ngampang ngulakamana. 5Ngampar way nathwey wampowwey-a, nil God alangaman ma'-aath-aathow ngampang Jesus Christ anman monkan-wak-wakāmp nunang, a' putha ngangk minangam iiy-iiyāmpa. Ngay kaangk nil Jesus Christ.angana ma'-aath-aathow niiyang niiy yipam minam anman iiy-iiyān niiyantakamana, ke' nil Jesus anman ngangk minangam iiy-iiy thon-thonantan, 6niiyan yipam ke' thonam anman iiy-iiyāna, a' thaa'-kuump-kuumpān nunang God.an piip nungantamana, Jesus Christ.antaman, Lord ngamparam alantamana.
Nil God.angan Ngangk Mam-Mam Thanang Jews Ya' Anangan, Than Yipam Thaa'-Kuumpayn Nunang God.an
7Niiy ke' wayathān thanang Christians wiy anangan, niiyiy paththama ngangk minangam iiy-iiyān thantan ke' nil Jesus.an ngangk minangam iiy-iiyan ngamparana. Amanamana, than pam wanch yotamangana ngaantam-ngeey-ngeeyayn ngula nil God.an min-minam paththama. 8-9Nil puth Jesus Christ.ana wamp ngampar yipam woyan min meenathow ngampar yotamantana. Nil Jews al-alantan wampa than yipam ngaantam-ngeey-ngeeyayn wik nil God.an keenkanaman thaw wuut mangk thanttamakan-a, an kan-kanam ngul wamp. A' nilaniya, ngangk mam-mam thanang wiy anangana, than Jews ya' ananganweya, than yipam thaa'-kuump-kuumpayn nunang God.an. An puth lat ngench thayanangan waa'-waa'ana, wik inanganiya, nil Jesus Christ.an thaw piip-kunch God.antan:
“Ngay-a, putha pam wanch Jews ya' anangana, ngan karp anmana ngul thaa'-kuump-kuumpān nintang,
aak-path-pathān nungkar puth nint min-minam paththama.”
10Lat ngench thayanangan thamp waa'-waa'an:
“Niiy Jews ya' anangana, niiy ngangk minangam iiy-iiyān thanttang karpam Jews al-alantangan pam wanch God.antam anangana!”
11A' putha wik thonangan inana:
“Niiy ma'mangkam Jews ya' anangana,
niiy aak-path-pathān nungant God.antan a! Thaa'-kuump-kuumpān nunanga!
Ngamp ma'mangkamangana thaa'-kuump-kuumpāmpana!”
12Inan Isaiah thamp keenkanaman thawa:
“Nil pam ngulan wampowa, wuut mangk amanamana Jesse.antamana.
Nilaniya moom pi'an iiy-iiyow thant Jews ya' al-alantan,
an puth thanana kan-kanam ngul ngaantam-ngeey-ngeeyayn nunang nilana kaa'-piichanathow thanangana.”
13Nil God.angana ma'-aath-aathan ngampang ngamp yipam kan-kanam ngaantam-ngeey-ngeeyāmp nunangana Jesus.ana nilan kaa'-piichanathow ngampanga. Ngay kaangk nil God.angan ngangk min yumpow niiyang, ngangk winy-winynyangan ya'a, niiywey nunang anman ngangkangan pi'-pi'āna. Amanamana, nil Ngeen-Wiy Min God.antam alangan ngul ma'-aath-aathow niiyang, mee'miy yump-yumpow niiyanga, niiy ngulana aak God.antang ngul wun-wunāna aak umpuyangamana.
Ngay Wik Thayan Kanam Umpang Niiyant Niiy Yipam Wik Anangana Kuchekangan Pi'-Pi'ān Thanang
14Niiyalang, ngay ngaantam-ngeeyang niiyang niiy min iiy-iiyaniy, niiyana mee'miy ngul woyan min God.antamana wak-wakaniy, a' putha niiy mee'miy thaa'-aath-aathān thanang wiy anangan wik min God.antamana. 15-16Puth ngay wik thayan kanam umpang niiyantana, niiy yipam wik anangana kuchekangam pi'-pi'ān thanang, nil God.angan puth work inangan thee'ar Jesus.antaman waa'-waa'ānga. Ngay wik waa'-waa'ang pam wanch Jews ya' al-alantan thanta, than yipam ngangk thee'ayn nunganta. An ke' ngayana ma'angam wamp-wampathang thanang God.antan than yipam ma' nungantang iiy-iiyayn. Nilana ngangk min wun-wunow thanttam, puth nil Ngeen-Wiy Min God.antamana ngangk thanttamangan wun-wunan, ma'-aath-aathan thanang than yipam puk God.antam ngul iiy-iiyayn.
17Ngay inan thawang niiyanta, ngay work minam iiy-iiyang nungant God.antan, ngay puth ngay-ngayamana ke' work iiy-iiyang pokkapangana, ya'a, ngan Jesus Christ.angan-a, karpam work iiy-iiyanan. 18-19Nil Jesus Christ alangan ma'-aath-aathan ngayang yipam than Jews ya' anangan ngangk thee'-thee'ayn nungant, Jesus.antan. Ngay kaangk wik anman waa'-waa'āng nungantam Jesus Christ.antamana, nilan putha Ngeen-Wiy Min nungantaman kuch nil yipam ma'-aath-aathow ngayangana minam yipam waa'-waa'āng thant, a' minam iiy-iiyāng a' putha work pi'-pi'anam anangan meen-meenathāng thanta. Ngayana wik min God.antaman waa'-waa'ang aak thon-thonangana, aak kecham puth iiy-iiyanga Jerusalem anpalana aak-aakanakaman Illyricum aakanakan. 20Ngay ke'am iiy-iiyang aak-aakanakana than pam wiyangan ka'athaman wik God.antaman kanaman waa'-waa'in thantana, ya'a. Ngay puth kaangk wik minan waa'-waa'āng pam wanchantan than ke'am yippakan wik God.antaman ngeey-ngeeyina al-alantanweya. 21Puth than keenkanamana lat ngench thayanangan umpin:
“Pam wanch wiyanganiya ke'am yippak wik God.antaman ngeeyina,
puth ngul-ngulana an ep than ngul ngeey-ngeeyayn wik min nungantamana,
a' min-minam ngul ngaantam-ngeey-ngeeyayn nunang.”
Ngay Kaangk Wampāng Niiyant Aak Rome.akana
22-23Puth ngay nathpalman kaangka thathāng niiyang, puth ngayiy-a, work ngatharaman iiy-iiyang, wik God.antaman yippak waa'-waa'ang thant aak thon-thonanganwey wun-wuntana. Ngay puth kanam iiy-iiyangan thantanweya, workana angman minchathangan. 24Ngayaniya aak Spain.akan ngul iiyānga, puth ngay kaangk woyan iiyananganweya ngul thathāng niiyang. A' ngay yaan wunāng niiyantanga, ngampaniya ngangk minangam karpam ngul wun-wunāmpa, a' anpalan-a, niiyana ma'-aath-aathān ngayang ngay yipam aak Spain.akan ngul iiyānga. 25Puth ya' yippakweya, ngay inana kan-ngul iiyāng aak Jerusalem.akana, ngay yipam wukal kalāng thantwey pam wanch Jews Christians al-alantana. 26Puth than Christians aak Macedonia.angan wun-wuntan-a, puth aak Greece.angan wun-wuntana, than wukalwey thee'in ngathar ngay yipam kalāng wukal anangan thantweya pam wanch Christians wukal ke'anang al-alantan aak Jerusalem.angana. 27Than ngangk minangam wik yump-yumpin wukalan kuchayn thantana. An puth min thantana, thanan ma'-aath-aathayn thanang, puth wik min Jesus Christ.antamana ka'athamana Jews al-alantaman wampa, puth amanamana than waa'-waa'in pam wanch Jews ya' al-alantan ngula. Yaa, puth yimanang ngulana, pam wanch Jews ya' il-ilangana koyaman ma'-aath-aathayn thanang Jews anangan a' putha wukal-a, may thakan kuchayn thantweya. 28Ngay kanan wampāng thant Jerusalem.angan-a, ngayaniya wukal anangan thee'āng thant, amanamaniya ngay kan-ngul iiyāng aak niiyantamak, anpalanwey-a, ngay kan-ngul iiyāng aak Spain.aka. 29Ngay nang ngulan wampāng niiyant-a, ngay mee'miy paththama nil Christ alangan ngangk min paththam yump-yumpow ngampanga.
30Niiyalang, ngurp ngatharam-ang, ngay inan thawang niiyant: niiywey ngatharana murkanam mee'-wuth-wuthanamān God.antan, ngangkaman thawāna, niiyiy putha kaangk wun-wunaniy Lord ngamparamant Jesus Christ.antana, a' ngampiy putha kaangk wun-wunanamp ngamparakamana puth nil Ngeen-Wiy Min God.antamana ngangk ngamparamangan wun-wunan. 31Niiy God.antan thawāna ngayan yipama minam wun-wunāng aak Judea.angan, than pam wanch Christians ya' al-alangana ke' yipmam mulathayn ngayanga. A' putha, niiy God.antan thawān thamp than pam wanch Christians aak Jerusalam.angan wun-wuntan-a, wukalan ngangk minangam uwayna. 32Nil God.angan nath kaangkwey kuchow ngayang niiyantan-a, ngay ngangk minangam ngul wampāng niiyanta, niiyiy putha, ngangk min ngul yumpān ngayangweya, putha ngangk thay-thayanathān ngayang thampa. 33Ngay kaangka nil God.ana min iiy-iiyow niiyanta -- nilam thonamang ngangk min yump-yumpan ngampanga -- an kan-kanam paththam a!