Niiy Aak-Ya'ang Ke' Waa'-Waa'ān Thanang Christians Wiy Anangan
141-3Christians wiy anangana thawantan thanttakamana may-a, minha ma'mangkam anangan min mungkanakana; puth Christians puungk wiy anangan thawantan thanttakamana ngamp may anman mungkāmpa, puth minhana ke' mungkāmpa, thanan puth kan ngaantam-ngeeyin thanttakaman nil God.angan kaangk ke' pam wanch nungantam al-alangan minhan mungkayn minh than wiy al-alangan kanaman thee'-thee'in gods thanttamakan. Puth niiy Christians yotamangana karpam ngangk min anman iiy-iiyān, ke' waa'-waa'wunweya. Niiy wiyangan nath ngaantam-ngeey-ngeeyaniy niiyantakam minh anangan min mungkanakan-a, yaa, niiyiy puth aak-ya'ang ke' waa'-waa'ān thanang Christians wiy anangan than minhan ke'an mungkantan. Puth niiy wiyangan minhan ke'an mungkaniy-a, niiy puth ke' waa'-waa'ān thanang aak-ya'ang Christians wiy anangan minhan mungkantan. An ya'a, puth nil God.an thawa niiy Christians ma'mangkam anangan-a, puk nungantama. Than Christians wiy al-alangan minam ke'am ngaantam-ngeey-ngeeyantan thanttakaman woyan God.antaman want-wanttakan wun-wunan thantana -- niiy ke'wey wakān thanang a' putha ke' kenthān thanang, puth niiyiya karpam ngangk minangam iiy-iiyāna. 4Puth than ananganiya, pam wanch God.antaman iiy-iiyantan, nilan ep moom thanttama, niiyiya ya'a. Niiyiy putha ke' waa'ān thanang, aak-ya'angan thaka, nil puth God.angan ngangk thath-thathan thanttamana than nath way iiy-iiyantan, nath min iiy-iiyantan, nilam thiichan. Nilam ma' minangam ngul pi'-pi'ow thananga, thanan yipam woyan God.antaman min-minam wak-wakayn.
5Christians wiy anangan thawantana, “Aak kinch wiyiya ke' ngench thayan wunan ngampar, ngamp yipama ngaantam-ngeeyāmp nunang God.ana, a' putha work iiy-iiyāmpanta.” Puth puungk wiy thaw-thawantana, “An yimanangan ya'a. Aak ngaa' thon-thonangan, an min paththam wunan ngampar mee' God.antangana.” Puth ngamp pok-pokkapanga ngaantam-ngeeyāmp kuchek ngamparamanga ngamp woyan want-wanttinan wak-wakāmpa. 6Pam wanch Christians wiy al-alangan ngaantam-ngeeyantan thanttakaman aak kinch wiy anangan ke' ngench thayan God.antana, thanana ke' God.an ngangk min yumpiythan nunanga. Pam wanch wiyangiy ngaantam-ngeeyantana nil God.angan may minh anangan yot thee'-thee'an mungkanakan, amanamana than mungkantan, a' thankyou thawantan nungant God.antan. Puth pam wanch puungk wiyanganiya minhan ke' mungkantan puth thananiya ngaantam-ngeey-ngeeyantana nil God.ana kaangk ke' thathow ngampang minhan mungk-mungkāmp, thanan thampa thankyou thaw-thawantan God.antana. 7-8Ngamp Christians yotam anangana, ngamp moom ngamparakamana ya'a, nil God.ana moom pi'an ngamparamana. Ngampwey nath man-yetham iiy-iiyimpwey-a, nath mulwey wunimpa, ngampaniya ma' nungantang anman iiy-iiyāmp, a' putha ngampiya God anman wik ngeey-ngeeyāmp nunang, puth ngampaniya pam wanch nungantama. 9Nil puth Jesus.an uthama, a' mulamana koyam eka, nil yipam ma' nungantang pi'-pi'ow ngampanga. Nungkway ngamp man-yethama iiy-iiyimp-a, nath mul wunimp-a, an ngampaniya ma' nungantang Jesus.antang iiy-iiyāmpa.
10Niiy wiy il-ilangan ngeenak waa'aniy thanang Christians wiy anangan wayan yump-yumpantan a? A' putha niiy ngeenak waa'-waa'aniy thanang ke' pam wanch wayanang iiy-iiyantan e? Nil thonam anman Goda ep thawow ngampar ngamp nath way yump-yumpanamp mee' nungantangan, nath ya'a, nath min yumpanamp, puth aakan ngul wampow ngampar ngamp pam wanch yotamana um nungantangan God.antang than-thanāmpa. 11Nil piip God.an thaw lat ngench thayanangana:
“Ngay God inman kan-kanam waa'-waa'ang niiyanta:
Aak ngulan wampowa pam wanch yot thaa'-wantanamana pungkang thuchayna um ngatharang
a' thawayn ngathar ngay kan-kanam paththam Goda, moom wuut pi'anana,
a' than ma'mangkamangana thaa'-kuump-kuumpayn ngayang.”
12Ngampaniy putha pam wanch ma'mangkamana wik waa'-waa'āmp nungant God.antan ngamp ngeen thakan yump-yumpampa a' puth ngeen thakan ngaantam-ngeey-ngeeyamp kuchek ngamparamangan thampa.
Niiy Christians Wiy Anangan Ke' Wayathān Thanang, Thananiy Putha, Woyan Christ.antam Ke'-Ngul Wakiythan
13Ngampaniya, ke' waa'-waa'wump aak-ya'angan thaka. Ngampaniya ma'-aath-aathāmp thanang Christians wiy anangan than yipam minam iiy-iiyayna. Than pam wanch wiyangana nath ngaantam-ngeeyiythan thanttakamana ke' ngampan way yump-yumpanamp-a, than woyan ngamparamana nath wak-wakiythana. Ngamp ke' thaach-thaachāmp thananga wayan yump-yumpayna. 14Ngay Jesus.an ngaantam-ngeey-ngeeyang nunanga, yaa, ngay puth mee'miy ngula kuchek ngatharamangana, maya minh ma'mangkamana, an kan-kanam min ngampar mungkanakana, way ya'a. Puth pam wanch wiyangan nath ngaantam-ngeeyiythan minhan ke' ngench thayan wun-wun thantana, ke'-paal thanan ke' mungkiythan, an puth way thant than mungkiythanana. 15Niiywey minh anangan mungkinwey-a, than Christians wiy anangan nath ngangk way iiyiythana thanan putha ngaantam-ngeeyiythan thanttakamana an minhan ngencha, an ke' niiyan way yump-yumpaniya. Niiywey natha ngangk way yump-yumpaniy thanang-a, niiy min ke'am iiy-iiyaniy thantana. Niiy nathwey minh anman mungk-mungkinan-a, niiy nath wayathin thanang, wiy anangan, thananiy putha, woyan Christ.antam ke'-ngul wak-wakiythana. Niiy ke' wayathān thanang, an puth nil Christ.ana an thant thamp uthama. 16Nungkway niiy kan mee'miy minh anangana an minwey ngampar mungkanakan-a, than wiy nathwey thawiythan ke' niiy wayan iiy-iiyaniy-a, yaa, niiyiy putha, ke' mungkān minhana. 17Nil God.ana moom pi'an ngamparama, ngampiya ma' nungantang iiy-iiyanamp, ngampiya ma'-yotam ke' ngaantam-ngeey-ngeeyāmp may minh anangan mungkanampa. Ngamp inan ep ngaantam-ngeey-ngeeyāmpa: ngamp minam iiy-iiyāmp mee' God.antangana, a' putha ngangk minangam wun-wunāmp ngamparakamana, a' ngangk minangam iiy-iiyāmp puth Ngeen-Wiy Min God.antamana ngangk ngamparangan wun-wunan. 18Nil wee'an nathweya min yimanangan iiy-iiyow-a, Jesus.an minam monkan-wak-wakow nunang-a, nil God.ana ngangk min yump-yumpan nunang a' putha pam wanch wiyangana thath-thathantan nunang nil pam mina.
19Yaa, ngamp kan-ngul min anman iiy-iiyāmpa, murkanama, ngamp yipam man um enyanam wun-wunāmp ngamparakamana a' putha ma'-aath-aathwump ngamparakamana monkan-wakāmp nunangana Jesus Christ.ana. 20An kan-kanama may minh ma'mangkamana an min ngampar mungkanakana. Puth than Christians wiy al-alangana thath-thathayn niiyangan minhan mungkānan-a, an thananiya ngangk way nath iiy-iiyiythana, a' amanamaniya, thananiya nath way ngul yump-yumpiythan. Niiy puth ke' wayathān thanang. An way paththama, puth niiyaniy minam ke'am ma'-aath-aathaniy thanang monkan-wak-wakayn nunang Jesus.ana. 21Yaa, an puth min ngampar minhan wantāmpa, ke'-ngul mungkāmp, a' putha ngak way thampana ke' mungkāmpa, than pam wanch Christians wiy anangan ke' yipam ngangk wayan iiy-iiyayn ngamparamana, a' ke' yipam wayan yumpayna. 22Niiy ngeen nathan ngaantam-ngeeyaniya minh nathan ngampar min mungkanakan-a, nath ya'wey-a, niiyiya God.ant thonakam waa'ān, a' ngangk niiyantamang nangman pi'-pi'āna. Niiy nathwey kan-kanaman mee'miya niiy minaman ngaantam-ngeey-ngeeyaniy-a, ke'aman muukamaniy-a, niiyiya ngangk minangam ngul iiy-iiyān. 23Puth pam wanch wiy anangan kuchekangan wik pal-puy ngaantam-ngeeyantan, than thawantan, “An nathwey min ngampar minhan mungkāmpana, nath ya'a, minh nath ke' mungkimpa.” Than mungkiythanan-a, yaa, an than way yumpantan, an puth thanan kan-kanamana ke'am ngaantam-ngeeyantan minh anangana an min mungkanakan ngampara. Ngamp ke' nath mee'miy ngamp minh nath mungkāmp-a, nath ya'wey-a, yaa, ngampana putha minhaniya ke' mungkāmpa, an way ngampar.