Ngamp Pam Pi'an Anangan Wik Ngeey-Ngeeyāmp Thananga
131Ngay wik inan thawāng niiyanta: ngamp pam wanch yotamangan pam pi'an anangan wik ngeey-ngeeyāmp thananga, puth nil God.angan work inangan thee'-thee' thant moom pi'an iiy-iiyayna. Nil work inangan ke'wey thee'iy thantan-a, thanana moom pi'-pi'anam ke' iiy-iiyiythan, ya'a. 2Than pam wanchanganweya pam pi'-pi'anam anangan thaampantan thanangan-a, an ke' than God.an thaamp-thaampantan nunang, puth nilam work inangan thee'-thee' thantana, moom al-alantana. Pam wanch anangan-a, than moom al-alangana ngul way-wayathayn thanangana. 3Pam wanch minwey iiy-iiyiythan-a, an than ke' winynyang mo'-mo'iythan thanttaman pam pi'-pi'anam al-alantamana. Puth than nathwey wik thayan anangan pip-pipaynan-a, moom pi'-pi'anam al-alantaman-a, an than winynyangwey mo'-mo'ayn thanttamana. Niiywey kaangk ke'ana winynyang mo'ānana thanttaman-a, niiyana minam iiy-iiyāna, a' thananiya ngul thaa'-kuump-kuumpayn niiyanga. 4Nil puth God.angan work inangan thee'-thee' thanta than yipam ma'-aath-aathayn niiyanga. Niiy puth way nath yump-yumpinwey-a, an niiyaniy winynyang mo'ān thanttam, putha thananiya pam pi'-pi'anam paththam iiy-iiyantan a' thanana wayathayn niiyang, nil puth God.angan work inan thee' thantana.
5-6Yaa, niiy moom pi'-pi'anamana wik ngeey-ngeeyān thanang a' niiy thampa wukal tax amanamana payimpungān thananga. Ngeenam puth a? Nil God.an ke' yipam man kulan wampow niiyant nil puth work inangan nilam thee'-thee' thanta. A' inan thampa, niiy kan mee'miy an min niiyanta wikan ngeey-ngeeyān thanangana. 7Niiyan puth minam iiy-iiyān thanta. Thanwey thawayn niiyantana wukal rent anpalan-a, a' wukal tax anpalana payimpungānan-a, niiyaniya thee'ān thanta. A' niiy wik min-minam thawān thant, puth than moom pi'ana.
Ngamp Kaangk Paththam Wun-Wunāmp Thant Pam Wanchantana
8Nath wee'-wee'ananganwey loan thee'iythan niiyantan-a, niiyanganiya ke' kon-ngathow, niiy puthangkana koyamana thee'ān thant. Thon ina, ke' kon-ngathow ngampangana; ngamp kaangk wun-wunāmp thanta pam wanchant, ngampa murkanam anman kaangk wun-wunāmp thantana, ngampaniya ke' eench-eenchāmp thanttama. Than wee'-wee'anangana wiyantan kaangk wun-wuntan-a, an than kan-kanam wik thayan God.antaman ngeey-ngeeyantan. 9Wik thayan inan God.antam, “Niiy paththam kaangk wunān pam wanch puk wiyantan. Ke' niiyan min-minam pi'-pi'wuniy niiyantakaman-a, yaa, niiyiya yimanangan pam wanch wiy al-alantan ngangk minangam iiy-iiyān thant.” Niiy wik thayan inan kan-kanaman pi'-pi'ānan-a, yaa, an ke' niiy wik thayan ma'mangkam God.antaman pi'-pi'aniy -- wik inangana, “Niiy maarichana ke' kee'āna, niiy pam wanch wiy anangana ke' mul-mulathān thananga; niiy yuk way min wiyantamana ke' ma'-kuchathāna; niiy wiyantana ke' mee'-wun-wunān thantweya,” a' wiy thamp wik thayan God.antamana umpina. 10Niiy thant wiyantan kaangkan wun-wuninwey-a, puth niiyana wayan ke' yump-yumpān thantana, ya'a. Niiy thant wiyant kan-kanamwey kaangk wuninwey-a, an niiy kan-kanama wik thayan God.antaman ngeey-ngeeyaniya.
11Niiy minam iiy-iiyān puth niiy mee'miy aakan thinth kan-ngul wamp-wampana nil Lord ngamparaman palaman wampow aak iikanakana. Ngamp ka'athaman ngangkan thee'amp nungant Jesus Christ.antan-a, aakan yippak chil kech wun-wun nungantan nil palaman wampowana. A' aakan kan wamp niiyant niiy work pi'-pi'anam anangan iiy-iiyān nungant God.antana, niiy ma'minaman ke' iiy-iiyāna, work ke'anangan a! 12Aakan kanan pachamow-a, ngampana mee'miy ngula ngaa'an ya'-ngul wunow, kinch ngulan pentowa. Aak inana ngamp in wunanamp-a, an ke' aak ngaa' wunan ngampar puth pam wanchangan way anman yump-yumpantan. In yaam ke'anama nil palam putham ngul wampow Christ.ana. Ngamp puth way anangan kan wantāmpa! A' ngamp God.an ngangk thayanam ngangkangam pi'-pi'āmp nunang, a' minam iiy-iiyāmp, oony wayana um thaamp-thaampāmp nunanga ke' soldiers yimanangana. 13Than pam wanch wiyangan aak ngutangan way yump-yumpantan than wiyangan ke' yipam thath-thathayn thanang. Niiyiya ma'-yotama min anman iiy-iiyāna, niiyana ke' aak kinchang iiy-iiyāna, mee' yotantangana. Niiy ngak way mungkanan-a, ke' iiy-iiyāna; a' putha kulliy ke' weenāna, niiy maarich ke' kee'-kee'ān; niiy wik thayanang ke' wak-wakwun niiyantakamana a' puth niiy ke' mee'-wun-wunān wiyantana. 14Niiyiya ke' Jesus anman iiy-iiyān. Niiy way anangan ke'a ngaantam-ngeey-ngeeyān yumpanakana. Niiy yimanangan iiy-iiyān ke' nil anman Jesus.an iiy-iiy.