Ngamp Ngamparakaman Ke' Weekāmp God.antaman, An Ngampaniya Ma' Nungantang Anman Iiy-Iiyāmpa
121Niiyalang, ngurp ngatharam-ang, nil piip God.ana ngangk minangam iiy-iiyan ngampara, a' puth way ngamparamana ke'-ngul ngaantam-ngeey-ngeeyan ya'-ngula. Puth nanpalana, niiy in ngeeyiya! Ngamp ngamparakaman ke' weekāmp God.antamana puth ma' nungantang anman iiy-iiyāmpa, niliya ke' moom ngamparam iiy-iiyow, ngamp yipam min anman iiy-iiyāmp a' God.ana ngangk min yump-yumpāmp nunang ngamp man-yethaman yippak iiy-iiyāmpana. Aak woyan yimanangan wunan ngamparana God.an monkan-wak-wakāmp nunang. 2Than pam wanch way al-alangan woyan wak-wakantanan-a, niiy anana ke' wak-wakāna, puth ma' God.antang iiy-iiyān nil yipam epankathow niiyang wayamana woyan minaka, min anman yipam ngaantam-ngeey-ngeeyāna, niiy yipam mee'miy ngul iiy-iiyān nil God.ana want-wanttakan kaangk niiyan iiy-iiyāna mee' nungantangan, a' putha niiy min want-wanttakan iiy-iiyāna, putha niiy want-wanttakan God.an ngangk minan yump-yumpān nunang, a' putha niiy want-wanttakan woyan God.antaman min-minan wak-wakāna.
3Nil God.angan work inan thee'ar ngay wik min nungantam inangan waa'-waa'ang niiyantana, puth nanpalan ngay niiyant ma'mangkamantan thaw-thawanga: niiy-niiyaman ngaantam-ngeey-ngeeyāna. Nil puth God.angan pam wanch yot inangan kemp pok-pokkapang yump-yump ngampangana, ngamp puth kemp karpam ke' maka, ya'a -- than pam wanch wiyiya, ma'-kunch iiy-iiyantan, wiyiya thaa'-ay thaw-thawantan, than wiyangan kuchek waap min kal-kalantan, nil yimanamana. Niiy ngaantam-ngeey-ngeeyān work nil God.angan thee'-thee' niiyantana. Niiy ulp-ulpanangan ke' ngaantam-ngeey-ngeeyān niiyantakamana. 4In ke' yimanangan wunana: nil pamangan mee'-a, kon-a, tha' thakan kalan kemp nungantamangana. Than inangan workan iiy-iiyantan -- nil mee' nungantamangana yipam aak thath-thathow, nil kon nungantamangana yipama wik ngeey-ngeeyow, an tha' nungantamangana yipam iiy-iiyow pal-puya. Thanana ma'-aath-aathwuntana. 5Yaa, inaniya aak yimanangan wunana: ngamp puth pam wanch Christians anangan-a, ke' kemp thonam nungantang anman iiy-iiyanamp, Jesus.antangana. Ngampiya work iiy-iiyanamp nungant, ma'-aath-aathwunampa. 6Ngampaniy work minam iiy-iiyāmpa, nil puth Ngeen-Wiy Min God.antamangan ngangk minangam work inangan thee'-thee' ngamparana. Than wiyanganiya wik min God.antaman waa'-waa'antan ngamparana -- yaa, thanan wik nungantaman waa'ayn ke' nilam God.angan want ngamparana. 7Than wiyangana wiy anangan ma'-aath-aathantan thanang aak churchangan, pam wanch alpan thakan -- yaa, thanana minam ma'-aath-aathayn thanangana; than wiyangana wik God.antaman koochanathantan thant, thanan min-minam thaa'-aath-aathayn thanangana! 8Than pam wanch wiyangana ngangk thay-thayanathantan thanang wiy anangan Christ.an yipam monkan-wak-wakayn nunangana -- thanana min-minam ngangk thay-thayanathayn thanangana. Than pam wanch wiyangan wukal thakan thee'-thee'antan wiyantana -- an than ngangk minangam thee'-thee'ayn thantana! Than wiyiya ministers iiy-iiyantan a' putha than wiyiya manth-thayan churchakan iiy-iiyantana -- puth thanana work minam anman iiy-iiyayn a! Than pam wanch wiyiya ngangk minangam iiy-iiyantan thant ngangk way anangan iiy-iiyantanana -- thanana ngangk min anman yump-yumpayn thanangan a!
9Niiy kan-kanam paththam kaangk wun-wunān thanta pam wanch wiyantan, ngangk pal pekkuwamana. Niiy woyan wayakana man-mangkam thee'-thee'āna; niiy ke'-ngoongkam anman woyan min anman wak-wakān a! 10Niiy kaangk wun-wunān niiyantakamana ke' niiy kuuncha kaath piip thonamam yimanangana; minam iiy-iiyān niiyantakamana, minam ngeey-ngeeywuna. 11Niiy moom ngamparamana Lord.an ngangk minangam ngeey-ngeeyān nunangana nil want-wanttakan thaw-thawow niiyantana a' niiy work ke'-ngoongkam iiy-iiyāna, ke' way-wayamāna. 12Ngangk minangam iiy-iiyāna, puth niiy kan mee'miy nil God.angan ngulana kalow niiyang aak umpuyangam nungantang wun-wunāna. Aak waywey wampow niiyantan-a, niiyaniya ngangk thayanam iiy-iiyāna; puth inan thampa, niiy mee'-wuth-wuthanamān nungant God.antana. 13Than Christians wiy anangan wukal ke'anangan wun-wunaynan-a, puth may ke'ananganwey-a, niiyiy-a, may-a, putha wukal thakana thee'-thee'ān thanta; than pam wanch Christians aak nathpalan wampaynwey-a, yaa, niiyana min-minam pi'-pi'ān thananga.
14Than pam wanch anangan wayan iiy-iiyayn niiyantan-a, niiyana nungant God.antan mee'-wuthanamāna minam yipam pi'-pi'ow thananga, niiy ke' thawān nungantana wayathow thanangana, ya'a. 15Than pam wanch ngangk minangamwey iiy-iiyaynan-a, niiyana ngangk minangam thamp iiy-iiyān thanttangana; puth than nath ngangk wayan wun-wunayn-a, peey-peeyaynwey-a, niiyan thaa'-wakān thanang niiy thampana peeyān. 16Ngangk minangam iiy-iiyān niiyantakamana, minam thak pi'-pi'wun, wik ulp-ulpanangan ke' thaw-thawāna, puth niiyan-a, ngurp min yumpwuna thanang anangan pam wanch yuk way min ke'anangana. Niiy work pi'anakan ke' wenk-wenkāna pam wanch pi'an yipam waa'-waa'ayn niiyang, an ya'a, niiy ke' ngaantam-ngeey-ngeeyān niiyantakamana niiy ke' pam pi'an yimanangana, an ya'a.
17Nil wee'ang wayan yump-yumpow niiyantanwey-a, niiy puthangkan way nungantan ke' yumpāna; puth min anman iiy-iiyān than wiyangan yipam min waa'-waa'ayn niiyanga. 18Niiy ngangk minangam paththam iiy-iiyān pam wanch wiyantana, niiy ke' kul uw-uwān thant aak-ya'angana. 19Than wiyangan way yumpayn niiyantanwey-a, niiy puthangkan way ke' yumpān thant, puth in ngeeyān a! An nilaman ep God.angana ngul wayathow thanang, aak nung-nungant wunana, an ngampar ya'a. Puth wik inangan lat ngench thayanangan waa'-waa'an nil God.an thawa, “An ngath-ngatha ngay wayathāng thanang pam wanch anangan wayan yump-yumpantana, ngay aak wayakan ngul kuchāng thanang.” 20Wik inangan lat ngench thayanangan waa'an thampa; “Nil pam thonaman nath ngangk kulangam iiy-iiyiy niiyantana -- nil nathwey meech iiy-iiyiywey-a, niiyiya putha may aath-aathān nunang; nil ngakamwey uth-uthamiywey-a, niiyaniya ngak thee'ān nungantweya; amanaman-a, nilan putha ngul-nyaa' ngul wun-wunowweya nil puth ka'athamana way-wayam yump niiyantana.” 21Than pam wanch wiyangan natha way yumpiythan niiyantanwey-a, niiyana way ke' yump-yumpān thanta; min anman iiy-iiyān thantana.