ROMANS
Lat Inan Paul.angan Ump Pam Wanch Aak Rome.angan Wun-Wuntan Al-Alantan
11Niiyalang, ngurp ngatharam aak Rome.angan wun-wunaniya, ngay Paul.ang lat inan umpang niiyanta. Nil Jesus.ang ngayang mi' work nungantan iiyāng, ngay yipam wik min God.antaman waa'āng niiyant. 2Aak keenkana nil God.angan prophetsantan waa'-waa' thant wik min Christ.antamana. Than prophetsangana lat ngench thayanang ngul umpin. 3Nil God.angan nhengk nungantam Jesus Christ anman waa'-waa' thant, a' ngul-ngulana nil aak iikanakan wamp ngul, nil puk many aak-ngeey. Pam wuut mangk nungantamana King David anana. 4Ngul-ngulana nil Jesus Christ.an mul wun, a' koyam mulaman eka -- amanamana nil God.angan kan-kanaman meenath ngampar nil Jesus.an nhengk nungantama, a' niliya pam pi'an paththam ke' piip nungantam yimanangana.
5Ngay puth ngangk kuupamang nungant God.ant, nil puth ngangk minangam iiy-iiyanara. Nil God.an Jesus Christ.ant thaw work inan thee'ow ngathar. Ngay wik min Christ.antamana pam wanch yotamantana waa'-waa'āng, than yipam kan-kanam ngaantam-ngeeyayn nil Jesus.an pam nhengk God.antama, a' than yipam monkan-wak-wakayn nunang, pam wanch aak nath-nathan wun-wuntan, 6a' niiyan thamp aak Rome.angan wun-wunaniya, nil God.angan niiyang ump pam wanch Jesus Christ.antam iiy-iiyāna.
7Ngay puth inan lat niiyant umpanga. Nil piip God.angan kaangk niiyang a' nil puth ump niiyang pam wanch nungantam iiy-iiyāna. Ngay kaangk piip God.ang pul Lord Jesus Christ.angan ngangk minangam pi'-pi'owpul niiyang.
Ngay Nungant Piip God.ant Thankyou Thawang Niiyantam Yotamantamana
8Ngay ka'athamana wik inan thawāng niiyanta: ngay aak wanttinakan iiy-iiyang-a, than pam wanchangan wik min anman waa'-waa'antan niiyanganiy, than waa'-waa'antan ngathar niiy Christ.an minaman monkan-wak-wakaniy nunang. Ngay puth nungant piip God.ant thankyou thawang niiyantam yotamantama, ngay puth nungantang Jesus Christ.antang anman nenchananga. 9Nil God.an mee'miya ngay mee'-wuth-wuthanamang niiyantan ma'-yotamana, a' puth ngayaniya ngangk minangam work iiy-iiyang piip God.antana, wik min thant pam wanchantan waa'-waa'ang Lord Jesus Christ.antaman. 10-11Ngay nungantan mee'-wuth-wuthanamanga nganyang kuchow niiyant puth ngay iingkamang niiyantana, ngay kaangk niiyang thathānga, ngay yipam niiyangan wik min God.antaman min-min ma'-aath-aathāng niiy yipam thayanam iiy-iiyān God.antan. 12A' puth amanamana ngamp yipam ngangk thay-thayanathwump, an puth niiy wik God.antam ngangkangam pi'-pi'aniy, a' ngay yimanangana wik God.antaman ngangkangam inman pi'-pi'anga.
13Niiyalang, ngurp ngatharam-ang, ngay ke' anman wamping niiyantana, puth ya'a. Ngay kaangk ma'-aathāng niiyang Jesus.an monkan-wak-wakān nunanga ke' ngay pam wanch wiy anangan ma'-aath-aathangan thanang aak thon-thonangan wun-wuntana. 14Ngay mak ma'-aathāng thanang, pam wanch aak nath-nathan wun-wuntana, pam wanch townsangan wun-wuntana, a' pam wanch kangkangan wun-wuntan; pam wanch wik thon-thonan thaw-thawantana, a' pam wanch kuchek waap min anangana, a' putha pam wancha wiy anangan kuchek waap min ya' anangan. 15Ngayan puth kaangk wampāng niiyant aak Rome.angana, wik min God.antaman waa'-waa'āng niiyant thampa.
Nil Piip God.an Wuut Pi'an A' Thayan Paththama!
16Ngay kan-kanam kaangk wik God.antaman thaa'-aath-aathāng thanang. Ngay puth ngul-nyaa' ke' wuning wik God.antaman waa'-waa'ang thant pam wanch wiyantana, ya'a! Nil puth piip God.an wuut pi'an a' thayan paththam a! Nil puth ngul kaa'-piichanathow thanang pam wanch anangan wik nungantaman ngangkangaman pi'-pi'antan. Than puth Jews al-alangan wik inangan ka'atham kanam ngeeyin, in yimanang ngulana than Jews ya' al-alangan ngul ngeey-ngeeyantana. 17Puth lat ngench thayanangan waa'ana, “Than wee'-wee'anangana Christ.an ngangkangaman pi'-pi'ayn nunang-a, nil God.angan kan-kanam ngul kaa'-piichanathow thanang, a' than God.antang ngul wun-wunayn.” Nil God.ana kaangk ke' thathow way ngampan yumpanampa, nil kaangk ke'-ke'ama, niliy puth min-minam paththama. An puth ngampwey kaangka nil God.angan way ngamparaman kon-ngathowanan-a, ngamp puth kan-kanam ngaantam-ngeeyāmpan nil Christ.an pam pi'ana, nil ngampang ngul kaa'-piichanathow.
Than Pam Wanch Yotam Anangan Way-Wayam Paththam Iiy-Iiyantan
18Than pam wanch wiy anangana way-wayam paththam iiy-iiyantan, than wik God.antaman kaangk ke'a, than thaampantan, kaangk ke' ngeeyayn thakan. Nil piip God.angan ngul meenathow ngampar nil kaangk ke'-ke'am thathow thanan wayan iiy-iiyayna, nilan ke'-paal man kul wampan nungant. 19-20Puth nathpalman-a, pam wanchangan kan thathin yuk way min nil God.angan yump, puth inpalana, than kan thathantan nil God.an pam pi'an paththama, a' nilana kan-kanam God thonam anmana, wiy ya'a. Nungkway than ke'an thathiythan nunang-a, nilan mee'-engkanang iiy-iiyan thant nil want-wanttakan God.ana. Thanan puth ke' thawiythan, “Ngan puth ngoongk-ngoongkam nunang God.ana.” 21Ya'a! Than puth God.an kan mee'miy nunang, thanan puth ke'am ngaantam-ngeey-ngeeyantan nunang nil wuut pi'an paththama. Than thankyou ke'am thaw-thawantan nungant ya'a, puth thanan way thakan ngaantam-ngeey-ngeeyantan, puth than God.an min-minam ke'am yippak thiichin nunang. 22Than ke' kuchek waap min waa'-waa'wuntan thanttakamana, puth ya'a, than kuchek wayang anman iiy-iiyantan. 23Nil God.an min-minam paththama, nil ke' uthamiy, ya'a, ke' pam wanchan uthamanamp yimanangan ya'a, nil God.an nil-nila, ke' uthamiy, puth than pam wanchangana God.ana wantin nunang, ke'-ngul nunang. Than yuk ngeen-wiy thak yumpantan ke' pam yimanangan -- wiyiya, ke' minh panch a' ke' thuuk yimanangan thampa. Thananiya yuk anangan ngul ngaantam-ngeeyantan thanang, God.ana ke'-ngul ngaantam-ngeeyantan nunang, ya'a.
24Anpalaniya, nil God.angan nungantakaman ngaantam-ngeey, “Yaa, mak way iiy-iiyayna.” Nil puth God.angana too want thanang ngula, anpalana than way-wayam paththam ngul iiy-iiyin, maarich thak ngul kee'-kee'in. 25Than yuk way min God.angan yump-a, anangan ngul thaa'-kuump-kuumpin thanang a' anman ngul monkan-wak-wakin thanang, yuk ngeen-wiy wayanang anangana, than puth gods kan-kanam ya'a. Nil God thonam anman, nilam ngampang yotam inangan yump, puth than pam wanchangan ke'am ngul ngaantam-ngeeyin nunang, ya'a, man-mangkam thee'in nungant. Ngamp puth yotamang thaa'-kuumpāmp nunang ngulakama! Yey, in kan-kanama!
26Yaa, anpalaniy God.angan ya' want thanang ngul, thanan puth way-wayam paththam iiy-iiyin, maarich thakan kee'-kee'in wanch wiyant ngul. Than wanch wiy anangan ke'-ngul pamantanganiy wunin, ya'a, an thana than-wancham maarich kee'-kee'athwin, 27a' putha than pam anangana yimanangwey than-pamaman maarich kee'-kee'athwin, puth nanpalan ya' wayathwin thanttakaman, than way-wayam paththam ngul iiy-iiyin mee' God.antangan.
28Than piip God.an kaangk ke' paththam ngaantam-ngeeyayn nunang nil kan-kanaman wuut pi'an paththama, puth namanamana God.angan ya' want thanang ngul, amanamana kuchek waap thanttamana kanam wayama, thanana way anman iiy-iiyin. 29Than puth maarich thak kee'-kee'in a' putha yangk mo'-mo'in may minhak thakana, than kaangk pam wanch wiy anangan wayathayn thanang. A' than ma'-yotam pam wanch wiy anangan ngangk-wayangam kalin thanang, putha wiy anangan mulathin thanang a' kul thakan pekwin, a' putha than mee'-thenchwin thanttakaman thaka, than pam wanch wiy anangan wik way thakan aak-ya'ang waa'-waa'in thanang. 30Than puth God.an nunang kaangk ke'-ke'am paththama, a' puth wiy anangan ngangk-wayangam kal-kalin thanang, a' ulp-ulpanang thak iiy-iiyin, thanan puth way anangan puth-putham ngul ngaantam-ngeeyin way yumpanakan, a' than kuchek-thayan ngul iiy-iiyin kaath piip thanttamakana. 31Than-thanam ngul puy-puyam way-wayamin ngula, a' than ke'am wik thanttaman pi'-pi'in wik thanaman thawin pam wanch wiyantan, an ya'a, a' thanan puth kul yaam pi'-pi'in thant wiyantana, than ke'am ngangk mamin thanang, ya'a. 32Nil God.an wik thayan thaw than pam wanchang way inangan yump-yumpaynwey-a, nil an ep aak umpuyangam aak wayak kuchow thanang. Than wik nungantam inangan mee'miy, puth ya'angam, than way-wayam paththam iiy-iiyin a' puth thawin thanttakaman thamp than pam wanchangan wayan yump-yumpantan-a, an ke' min iiy-iiyantana, an ya'a, an than pam wanch way-wayam paththam iiy-iiyantan.