In Wik Kath Nil Lord.angan Saul.an Kaa'-piichanatha
91Nil Saul.angan yaam anman thaa'-path-path thanang pam wanch anangan than Jesus.an monkan-wak-wakin nunangana nilan mulathow thanangana. A' nil iiy ngul pam moom pi'an priestsantam alantana. 2Nil latak engk nungant yipam kalow aak Damascus.ak puth nil kaangk mamow thanang thamp pam wanch Christians anangan aak anganiya, a' palam kalow thanang aak Jerusalem.akana. Nil latan ngul meenathow thant pam pi'an al-alantan than churches Jews.antam anangan pi'-pi'inana aak angman Damascus.anga, than yipam mee'miy nil pam pi'an paththam alangan kuch nunang than yipam ma'-aathayn nunang Christians anangan uwayn thanang.
3Lat kanan uw-a, nil Saul.an kan-ngul iiy kungkam yaramanangana. Nil aak Damascus thinth ngulan wamp-a, a' nganth wuut pi'an paththam thath inpal kenyan park um nunganta. 4A' nil Saul.ana aakang keek yaraman anpalana a' wik ngul ngeey thaw nungantana, “Saul, Saul-ang, nint ngul ngeenam way yumpangan ngatharan e?” 5Nil Saul.an engkant, “Moom-ang, nint in wee' e?” “Ngay in Jesusa, nintan way yump-yumpangan ngathara.” Wikan yimanang thawa. 6“Puth nint kan ek a! Iiyān ngul aak Damascus.akana. Nint angan wampān-a, nint ngul ngeeyān nint ngeenan yumpānana.” Jesus.an thawant.
7Than pam wiy Saul.antangan iiyina, popam ngul thanin, wik ke'ananga; than man awal ep ngeeyin nunang, puth than pam ngurpan ke'am thathin, ya'a. 8Nil Saul.an aakaman wur ngul eka, nil ke' mee'an ikiy-a, puth ya'angamweya, nilan mee' ko'anch ngul ween, aakan ke'am ngul thatha, ya'a. Anpalaniya than ma' mamanang ngul kal-kalin nunang aak Damascus.akana. 9Aak ma'-ko'alamak wun-a, nil Saul.angan aak ke'am thath ya'a, nil may-a, minh-a, putha ngak thakan ke'am mungk ya' anman.
10Pam thonam inana aak Damascus.angan wun, namp nungantiya Ananiasa, nil puth Jesus Christ.an ngangkangam pi'-pi' nunang. A' Lord.an wampant pithangana a' thaw nungant, “Ayyang, Ananias-ang.” A' nilan thawant, “Ayyang, ngay in a! Lord a!” 11A' Jesus.an thaw nungant, “Ayyang, nint kan-ngul iiyāna. A' nint iiyāna, woyan namp Straight aakanakana, a' aawuch Judas.antamak iiyān, nil pam namp Saula nan wamp Tarsus punchanweya. Nint engkān thant nint yipam thathān nunang. Nil pam inman mee'-wuthanamanang thaw-thawanweya, 12a' nil maanyang thathan pam namp Ananias.an pal wamp nungant, ma' wunp nungantang nil yipam mee' min koyam ngul iiyowa, mee' ko'anchan ya'-ngul.” Nil Jesus.an wik yimanangan thaw Ananias.antana.
13Nil Ananias.an puth thaw nungant, “Lord-ang, pam wanch yotangan waa'in ngathar pam nil inman-a, an way paththam iiy-iiy thant pam wanch nungkaram al-alantanweya aak Jerusalem.angan wuntana. 14A' nil pal ngul iiy ngant Damascus.ak, nil lat kal pam moom pi'an priestsantama alantamanwey yipam mamow nganang ma'mangkaman ngan nintangan monkan-wak-wakanana.”
15A' nil Lord.an thaw nungant, “Nint iiyān a! ngay puth nunang kan mi'angan work ngatharan iiyow, ngayangan waa'ow thant Jews al-alantana, putha Jews ya' al-alantan thamp, a' putha pam pi'an kings thanttam al-alantan thampa, nil ngayangan waa'ow yot al-alantan. 16Ngay ngul meenathāng nungant way yotan wamp-wampow nungant pam wanch wiyangan yump-yumpayn nungantana. An ngeenam puth e? Ngatharam peeyan ananganiy aak wayan wamp-wampowant Paul.antana,” Nil Lord.an wik inangan thawant pithangana.
17Anpalana, nil Ananias.an iiy ngul a' aawuchang pek ngoonch ngul a' Saul.an uw nunang. Kanan uwan-a, nil ma' wunp nungant, a' thaw nungant, “Ayyang, ngurp ngatharam Saul-ang, nil Lord Jesus.angana ngayang kuch nungkara, -- nilam Jesus.ana nintan thathan nganth pi'anan park woyan wakanangana an nungantam thathan Jesus.antama -- nil ngayang kuch aak iikanakana nint yipam mee' min ngul iiyān aak thathānweya, a' putha Ngeen-Wiy Min God.antamana ngangkang ngoonchow nungkaranga.” 18A' yaam ke'anam paththam ngeen nath keek ke' pimp minh nga'antam yimanangan mee'-ath Saul.antam anpalana, a' mee' min ngul ween aakan thath-thath ngul. Anpalaniya, nil Saul.an ek ngul, a' Ananias.ang kootra ngakang kuungk nunang ngul. 19A' nil Saul.angana may ngul mungk, a' kemp nungantamana min ngul wuna.
Nil Saul.angan Thaa'-Aath-Aath Thanang Aak Damascus.angan
Nil Saul.ana ma'-ko'alam wun angman thanttang al-alantangan than Jesus.an monkan-wak-wakin nunang aak Damascus angana. 20Nilaniya yuurpam iiy churches Jews.antamakan a' thaa'-aath-aath thanang ngul, waa'-waa' thant nil Jesus.ana puk God.antama. 21Than yotangan ngeeyin nunangan-a, than mee'am ikin a' thawin ngul, “In wanttaka? Nil pam inmana nil aak Jerusalem.angan iiy-iiy-a, nil wak-wak thanang, a' mulath thanang thaka than pam anan Jesus.an monkan-wak-wakina. Nil puth iikanakan nath wampa nil yipam mam-mamow pam wancha a' koyam kalow thanang Christians anangana pam pi'-pi'anam priests al-alantan yipam ey? In wanttak aa?” thanan thawin. 22Puth nil Saul.angana puy-puyam engkanang min-minam paththam koochanath thant wik Jesus.antamana a' nil wik thayanam thaw-thaw, “Piip God.an keenkanam thaw nil pam kuchow kaa'-piichanathow ngampangana. Nil Jesus.ana kan-kanam pam inman nil God.angan kuch nunang.” A' than Jews angan wunin aak Damascus.angan popam nyiin-nyiinin, than puth ke' koyaman thawiythan nungantana ya'a, than ngaantam-ngeeyin wik nungantamana kan-kanam yaaka'a!
23Nil Saul.an yaam wun-wun aak Damascus angmana. Anpalmaniya, than Jews al-alangan wik thenchanam yumpin mulathayn nunang, Saulaniy. 24Puth than wiyangan kanam wik waa'in nungant, than pam wayanang al-alangan wikan yump-yumpin mulathayn nunangan. Kinchang-a, ngutang-a, than thaa' gate.ang angan kuup-kuupin nungant pam wayanang al-alangan. 25Aak ngutang ngulan-a, ngurp nungantam al-alangan ma'-aathin nunang kuchayn nunang. Aak wallang angana yuutamp anpalan pentathin nunang a' basket pi'anang ukathin nunang, a' kuchin nunang ngula.
Nil Saul.an Jerusalem Aakanakan Iiy
26Nil Saul.an aak Damascus anpalan iiy, Jerusalem aakanakan. Nil kaangk thanttang angan wunow, ngurp Jesus.antam wiy al-alantangana, than aak Jerusalem.ang angan wunina. Thananiya winynyang mo'in nungantam, than puth ngaantam-ngeeyin nunang nil ngurp Jesus.antam ke' ya'ant ee! Thanan ngaantam-ngeeyin nil yaan nath wik uuyamana nil ke' kan-kanam yimanangan ngurp Jesus.antamana. 27Nil pam namp Barnabas alangan ep ngaantam-ngeey nunang a' thaw paththam, “Ee'a, nilwey kan-kanam ngurp Jesus.antam ngul weena,” a' nil kuy thee' nunang ngurp min Jesus.antam wiy al-alantan. Nil Barnabas.angan Saul.an waa' nunang ngul thant, wik inangan thaw thant, “Nil Saul.angan Jesus Christ.an woyan ompamang thath nunang a' nil Jesus Christ.an wik ngul thaw nungant, Saul alantan. Anpalana nil Saul.angan wik Christ.antam ngangk thayanam waa'-waa' thant, than aak Damascus.angan wuntan.” Nil Barnabas.angan Saul.an wik yimanangan waa' thantana. 28Anpalmaniy-a, nil Saul.an thanttang ngul wun-wun, a' pal-puy iiy-iiy aak Jerusalem.angana, wikan kuyam waa'-waa' thant pam wanchantan, ngangk thayanam waa'-waa' thant. 29A' puth nil wikan waa'-waa' thant Jews wiy al-alantan, thaa'nganth Greek.an thaw-thawin. Nil thaa' thayanam thaw-thaw thant, nilaniya ke'am thaa' thuch thanttam, than puth wik nungantam kaangk ke' ngeeyayn. Anpalaniya thantan man kul ngul wamp, ke' mulathiythan nunangana. 30Than Christians wiy al-alangan wikan ngeeyin-a, ke' wiyangan mulathiythan nunangan-a, than ngurp nungantam al-alangan kuy thee'in nunang, kungk Caesarea aakanakan, anpalan thanana kungk kuchin nunang, aak namp Tarsus aakanakan.
31Anpalmaniy-a, aak um enyanam wun thant Christians.antan, aak Judea.angan-a, putha aak Samaria.angan-a, a' putha aak Galilee.angan, ke'-ngul wakin thanang ya'a. Than Christians yotangan ngaantam-ngeeyin Christ.an moom thanttaman. Than yotangan puth Christ.an min-minam monkan-wak-wakin nunang a' puth nil Ngeen-Wiy Min God.antamangan ma'-aath-aath thanang minaman iiyayn mee' God.antangan. Than Christians yot ngul weenin pam wanchaniya.
Peter.ang Miyalath Aeneas.ana
32Peter.an pal-puy iiy-iiy aak thon-thonakana thanang pam wanchan uw-uwowa, God.antam anangan puth nil pam wanch aak thonangan wuntan uw thanang wonk kuuwan wuntan than aakan waa'antan Lydda angana. 33A' nil pam inan uwan namp nungantiya Aeneasa puth nunang weech-weechanwey, yampanga wun-wuna kaap eightakama, nil puth ke'am yuupama, ya'. 34Peter.an thaw nungant, “Ayyang, Aeneas-ang, Jesus Christ.angan miyalathow paththam nintanga. Ekāna, nintaniya aak tha'ang ngul maakāna a' puth yamp nungkaraman yalmathāna.” Nil Aeneas.ana minam paththam ngul thana. 35Than puth yotam anangan pam wancha aak angan Lydda.angan wuntana a' Sharon.angan wuntan-a, thathin nunangana a' ngangkangam pi'-pi'in nunang ngul Jesus Christ.ana.
Peter.angan Dorcas.an Ekath Nunang Mulamana
36Wancha namp nungantiya Tabitha nil aak Joppa angan wun-wun. Namp thoniya Dorcas waa'antan nunang Greeks.angan. Nil ngangkangam pi'-pi'an nunang Lord.ana. Nil min anman yump-yump a' ma'-aath-aath thanang pam wanch ma'mangkiy ya' anangana. 37An-aniyangana nil Peter.an wun aak Lydda.angan-a, a' nil wanch Dorcas.an weech-weechan nunang a' utham ngul. Than pam wanchang kempan muunchathin nunang ngakangan a' e'athin nunang ngul a' room keny ngul matathin nunang. 38Aak Joppa.an aak thinth wun aak Lydda thinth aak anman Peter.an wun. Than puth pam wanch al-alangan God.an nunang ngangkangaman pi'-pi'in-a, than kan ngeeyin nil Peter.an aak Lydda angan wun, a' than pam kucham kuchin nungant a' pul pam anangan wamppul nungant, a' thawpul nungant, “Ayyang, nint erkam pal nganttang ke' iiyin ey?” 39A' Peter.an puth iiy pulantanga. Nil wamp ngulan aawuchangana a' than nunang keny kalin room aakanakan. Than puth wukalongka yotam anangan Peter.antang thinth than-thanin. Than peey-peeyin a' meenathin nungant nil ngook Dorcas.angan wak-wak nil yippak man-yethaman iiy-iiya. 40Peter.an thaw thant yot al-alantakaman, “Niiy kan yoon pentān aak inpalana!” A' nil pungkang ngul nyiin a' mee'-wuthanama. A' nil um nungant weent wanch mul alantan a' thaw, “Tabitha-ang, nint kan ekāna.” Nil mee' paththam erkam ik a' Peter thath nunang. A' nil nyiin paththama. 41Nil Peter.angan ma' maman a' ma'-aath nunang nil yipmam thayanam thanowa. A' nil ump thanang pam wanch anangan than ngangkangaman pi'-pi'in nunang piip God.an, wukalongk anangan thama a' nil meenath thant Dorcas.an koyam mulaman eka. 42Than pam wanch nath-nathan wunin aak Joppa.angan-a, than kan wik ngeeyin nil Dorcas.an koyam mulaman eka a' puth than pam wanchangana ngangkangam ngul pi'-pi'in nunang Lord.ana. 43Anpalaniya nil Peter.an aak Joppa.ang ngul wun-wuna puth nil yaamakam wun nungantang pam namp nungantiy-a, Simona. Nil puth work iiy-iiyan pe'an yump-yumpan minhantam anangan yuk leather aakanakana.