Nil Saul.ang Kul Uw Thant Than Jesus.an Monkan-Wakin
81Aak an-aniyangan-a, thanan mulathin nunang Stephen.an-a, than pam wiy al-alangan kul karkan uwin thant, pam wanch al-alantan than Christ.an monkan-wakin nunangan, aak Jerusalem.angan wun-wunin. Than wak-wakin thanang, piik-piikin thanang thaka. Kul karkan paththam uwin thantweya, amanaman-a, than Christians al-alangan aak Jerusalem.an wantin ngul a' yaarkamin ngul, aak nath-nathan wunin, aak Judea.angan-a, a' aak Samaria.angan angman wunin ngul. Puth than ngurp min Jesus.antam al-alangan aak Jerusalem.an ke'am wantin, than angman wunin. 2Puth ka'athangaman-a, than pam ko'alam al-alangan Stephen.an kaampin nunang, than pam anangaman God.an min-minan monkan-wak-wakin nunang. Than peey-peeyin, a' ngangk way wun thant Stephen alantamana. 3Puth nil pam Saul alangana, nil kaangk ke'-ke'am thanttam, pam wanch Christians.antaman, a' nil kul karkan uw thant, a' wak-wak thanang, a' aawuch thon-thonangan ngoonch-ngooncha, a' ma' punth mamanang wich-wich thanang, pam wanch anangan, a' jailang ngul thench-thench thanang.
Nil Philip.angan Wik Minan Waa'-Waa' Thant, Aak Samaria.angan
4Puth than pam wanch al-alangan aak Jerusalem.an kanaman wantin-a, than aak pal-puy ngul iiy-iiyin, wik minan waa'-waa'in thant pam wanch wiyantan. 5Nil pam Philip.ana, kungkam iiy, aak Samaria aakanakana, a' wik min Christ.antaman waa'-waa' thant pam wanch al-alantana aak Samaria.angan wunin. 6Than pam wanch yot al-alangamana wik minam ngeeyina, a' work pi'an anangan thathin, nil Philip.angan yump-yumpa, 7nil puth oony way thakan kenth thanang pam wanch wiy al-alantam, ngangk thanttam anpalana. Than oony way anangan pam al-alantaman pent-pentinan-a, than wik othamayan pech-pechina. A' nil pam wanch wiy anangan miyalath thanang, pam wanch makaran thayanamina a' than kunp anangan thakan minam ngul iiy-iiyin. 8Anpalman than pam wanch aak Samaria.angan wunin-a, than ngangk minangam paththam ngul iiy-iiyin.
Wik Kath Simon Alantamana Pam Nil Ma'-Kuncha
9Aak Samaria.ang angmaniya pam thonam wun-wun, namp nungantiya Simon, nil nathpalman ma'-kunch iiy-iiy, nil work pi'an yot yump-yump. Than pam wanchangan thath-thathin, than mee'am ikin pam ilantaman. Nil nungantakam waa' ke' pam pi'an. 10A' than pam wanch ma'mangkamangana aak Samaria.angan wunin-a, ngeey-ngeeyin nunang Simon.an, pam wanch ma'mangkam al-alangan, than ma'mangkiy al-alangan-a, a' puth pam pi'an al-alangan, a' pam wanch kaangk-ke'anang al-alangan, a' puth pam wanch wukal ke'anang al-alangan ngeey-ngeeyin nunang. Than ngaantam-ngeeyin nunang ke' God yimanangan, a' thawin thanttakaman, “Pam inmana, nil pi'an paththam, God.angan pi'an yump nunang, a' ma'-kunch yump nunang ke' nilam anman.” 11Than puth wik nungantaman ngeey-ngeeyina nil puth Simon.angana aak keenkam anpalman work pi'an yump-yump, thanan ke'-paal mee'am ikin. 12Ngul-ngulaniy nil Philip.an wampa thant wik min Christ.antaman waa'-waa' thant ngul, a' nil waa' thant aakan ngul wampow nil God.angan pam wanch ma'mangkam anangan ma' nungantangan pi'ow thanangan. Yaa, thanan puth wik nungantaman kan-kanam ngangkangam pi'-pi'in ngul a' nil Philip.angana kootra ngakang ngul kuungk thanang, pam wanch anangana. 13Puth nil pam Simon alangamana, nil thampang wik God.antaman kan-kanam ngangkangam pi'-pi'a, a' Philip.angan nunang thamp kootra ngakang ngul kuungkana a' nilana Philip.antang ngul iiy-iiya. Nil Simon.an puth mee'am ik, work pi'an thakan thath-thath, work pi'an piip God.angan ma'-aath-aath nunang yumpow Philip.anganiya.
14Than ngurp min Jesus.antam ananganiya, aak Jerusalem.angan wunin yippak-a, than wik thoo' ngeeyin, aak anpal kungk, Samaria anpalana, puth wik inan ngeeyin -- than pam wanch ma'mangkam al-alangan, aak Samaria.angan wuntana, than wik God.antaman kanam ngangkangam pi'-pi'antan ngul. Yaa, than puth ngurp min Jesus.antam al-alanganiy Peter.ang pulang John.ang kuchin aak Samaria.akana. 15Pul kanan wamppul aak Samaria.angan-a, pulan mee'-wuthanampul piip God.ant, thantan yipam Ngeen-Wiy Min nungantaman ngangkang ngoonchow thanttangweya, 16puth ke'am yippak uk thant. Nil Philip.angan kootra kuungk-kuungk thanang pam wanch anangan-a, aniya namp Lord Jesus.antaman thonakam wich, nil Ngeen-Wiy Min God.antaman ke'am yippak ngangkangan ngoonch thanttangana, ya' yippaka. 17A' pul Peter.ang pul John.ang ma'an wunppul thant, kootrangana a' nil Ngeen-Wiy Min God.antaman uk thant ngul, a' ngangkangan ngoonch thanttanga.
18Nil pam Simon alangaman thath thanang Ngeen-Wiy Min God.antaman ngoonch ngangk thanttamangana. Nil ngaantam-ngeey ngul nungantakaman nil yimanangan kaangk ma' wunpow wiyantangan. Yaa, nilana wukalan ma'ang mam, an ke' thee'iy pulantana 19a' thaw pulantan, “Nip ngayang yimanangan ke' ey? ma'-kunchan yumpiw ngayang thamp ey? Ngay yipam yimanangan ma' wunpāng thant wiyantangana a' Ngeen-Wiy Minan yipam ngoonchow thanttang wiy al-alantanganweya.”
20Puth nil Peter.angana wukal nungantamana ke'am ma'amaniy mama, ya'a. Nil thawant, “An way paththama, nintan thawana, ngamp ngul wukal thee'āmp nungant God.antan ey? nil yipam Ngeen-Wiy nungantaman kuchow ngampar ey? An ya'a! Puth ninta a' wukal nungkaram thampana, aak way aakanakan iiyow hellaka! Puth nint anan ngaantam-ngeeyan ke' nint Ngeen-Wiy Min God.antaman wukalang piiyina nunangana, an ya'a. 21Nint puth nganttang ke'am work iiy-iiyangana ya'a, puth ngangk nungkaraman way, min ya'a, mee' God.antangana. 22Nint ke'-ngul ngaantam-ngeeyān yimanangana, way anangana kan kon-ngathow nintang -- an puth way-wayam paththam mee' God.antangana. A' nint mee'-wuthanamān nungant Lord.anta, ngangk mamanang thawān nungant, mee'an-wuthanamān nungant nil yipam way nungkaraman kon-ngathow nunang wik way anan nintan thawan ngantana amanamana. 23Ngay puth kan thathang nintang pam way-wayam paththam iiy-iiyangan, mee'-wun-wunangana, way alangan ke' kuuyang kath-kathan nintanga.”
24A' nil Simon.an thawa, “Yaa, nint mee'-wuthanamān ngathar Lord.antana, wik anangan nintan thawan ke' yipam wampow ngatharana.” 25Yaa, Peter.ang pul John.ang wik min God.antaman angman waa'-waa'pul. Yaa, kanan wik waa'pul-a, pul koyam ngul iiypul, aak Jerusalem.akana. Pulan aak Samaria angman-a, aak woyan ompamang thon-thonangan wamppul, pul wik min God.antaman waa'-waa'pul thant, aak Samaria angan villages thon-thonangan iiy-iiypul, wik waa'-waa'pul pam wanch al-alantan.
Nil Philip.ang Wik Min Koochanath Nungant, Pam Aak Ethiopia.am Alantan
26-28Nil pam ngotan aak Ethiopia punchan aak Jerusalem.ak iiy aak nungantam anpalan, nil yipam mee'-wuthanamow God.antan thaa'-kuumpow nunang aawuch ngench thayanang angana. Pam inan pam pi'an puth nil wukal thakan pi'-pi' wanch pi'an Queen alantaman aak Ethiopia.angan. Nil kanan mee'-wuthanam-a, nil koyam kan-ngul iiy aak nungantamak. An-aniyangana, nil Philip.an aak Samaria angan wun-wun. A' nil ngaantiyongk God.antam uk nungant, Philip alantan, a' thaw nungant, “Nint kan-ngul iiyān yiip aak Jerusalem.ak, a' Jerusalem anpalana, woyan anan wakān Gaza aakanakan, woyan anan iiyāna.” (Woyan inpalaniy-a, ke'am ngul iiy-iiyantan, an ya'-ngul.) Nil Philip.angan wik inan kanan ngeey-a, nil kan-ngul iiy. Ngul-ngulana, nil pam ngotanan thath nunang aak Ethiopia.amana. Nil paman puth tha'angan ke'am iiy-iiya, ya'a, an pam alangan workan iiy-iiy nungant-a, alangan mo'ath nunang wagon min alangana. Nil pam ngotan anana, nyiin, lat ngench thayan thath-thath, lat anana nil pam prophet alangan ump Isaiah.angana.
29A' nil Ngeen-Wiy Min God.antaman thaw nungant ngul Philip.antan, “Nint kan wagon thinth iiyāna angman nungantang thinth iiyān.” 30Yaa, nil Philip.an kamp mo' nungant a' ngeey nunang lataman readimpung Isaiah.angan umpa. A' nil engk nungant, “Ayyang, latan engkanang wun nungkar ey? nintan readimpungan ey?” 31A' pam ngotanan thaw nungant, “Ya'a, wik wuthanang wun ngathara. Ngay puth want-wanttakan thiichāng e? Nil wee'ang nath koochanathiw ngathar? Nint kan pal matān ow! wagonang ingan nyiinān ngatharang a!” A' Philip.ana mat, wagonangan mo' nungantang. 32Pulan wik inangan thathpul wik nil pam Isaiah.angan umpa:
“Nil pam inan ke' minh sheep thonam yimanang than pam al-alangan kalin nunang than yipam mulathayn nunang.
A' nil ke' minh lamb many yimanangan wik ke'anang than pamangan thuu'an umpin nungantamana,
puth nilan popam wun, wik ke'am pi', ya'a.
33Pam inman-a, an than thaa'-thengkathin nunangweya,
a' than pam yotangan thanathin nunang, puth aak-ya'ang waa'-waa'in nunang,
puth nilana koyaman ke'am thaw, popam than.
Puth nil wee'angam waa'iya nila puy-puyam nath nungantaman puk thaa' nyiingkanaman wamp-wampiythanana,
puth ya'a, nilan puk ke'anang anman mul wunow.”
Nil Isaiah.angan yimanangan ump.
34Anpalana, nil pam Ethiopia.aman engkant Philip.ant, “Nil Isaiah.angan wee' waa'an e? nil nath nungantakaman waa' ey? nath ya'a, nath pam thonangan waa'. Kan koochanathān ngathara.” 35Nil Philip.angan kan-ngul koochanath nungant, pam anman Jesus.an, wik inangan anpalana, a' wik wiy anangan wik min Jesus.antaman waa'-waa' nungant lat ngench thayan anpalan. 36Pul mo'-mo'pul-aa, a' ngakak wamppul ngak punth manyang a' pam aak Ethiopia.am ngul thawant Philip.ant, “Ayyang, ngak in a! Nint ngayang kootra ke' kuungkin ey?” 37Philip.an thaw nungant, “Nint nath Christ.antan ngangk nungkaram kan-kanam thee'ān-a, ngay puth nintangan kootra kuungkāng.” Nil paman ngul thaw Philip.ant, “Ee'a, ngay kan-kanam ngaantam-ngeeyang nil Christ.an puk nhengk God.antamana.”
38A' nilana thaw pam alantan wagonan kal-kala, “Ayyang, wagonan kan popam pi'a!” A' pul Philip.angan ukpul wagon anpalana a' pek ukpul ngakak, aak punth um aakanakan, a' Philip.anganiya kootra ngakang kuungk nunang. 39A' kan-ngul keny matpul ngakamana, a' Ngeen-Wiy Min God.antamangan Philip.an kan-ngul kal nunang aak thonaka, aak ya' maayana. Pam ngotanangan ke'am ngul thath nunang, ngurpan ke' aak ya'a, ya'amantam. Puth nil pam Ethiopia punchanana an ngangk minangam ngul mo'-mo' yuk wagonangan koyam aak nungantamakan. 40Puth nil Philip.aniy-a, aak angan Ashdod.ang ngul wamp, a' puyam ngul iiy kungk aak Caesarea aakanakan. Nil aak ompam thon-thonangan wamp-a, nil wik min God.antaman waa'-waa' thanta.