Than Pam Seven Mi'in Thanang
61A' ngul-ngulan-a, than pam wanch ngangkangan pi'-pi'in nunang Jesus.an-a, yot ngul weemin. Puth than Jews wiy anangan aak Greece.aman wamp-wampin-a, than kul thaw-thawin thant Jews wiy al-alantan aak Israel punchanant al-alantanwey. Thanana thawin thant, “Thaniya ngaa' thon-thonana may thee'-thee'antan thant pam wanch wiyantan mungkanakana, puth thaniya wukalongk nganttam al-alantan ke'am thee'-thee'antan thant, ya'weya.” 2A' than ngurp min Jesus.antam twelve al-alangana yalmathin thanang Christians yotam anangan a' thawin thant, “Ngan nath work iiy-iiyin may thakan thee'-thee'in niiyantan-a, ngan puth wik min want-wanttakan waa'-waa'ān thanta! An min ngant ya'a! Ngan wik God.antamana ke' wantina! 3Ngurp nganttam niiyalang, niiy pam seven mi'ān thanang than yipmam work iiy-iiyayn mayan thee'-thee'ayn niiyant, a' wukal thamp thee'-thee'ayn niiyant. Pam kuchek waap min anangan mi'ān thanang, pam than wikan ngeey-ngeeyantan Ngeen-Wiy Min God.antamana. Than pam anangan work ngul iiy-iiyayn, may a' wukal ngul thee'-thee'ayn niiyant, 4a' ngananiya ngul mee'-wuth-wuthanamān a' thaa'-aath-aathān wik min God.antamana, work ngantaniy-a, anman thonakama.”
5Than pam wanch yotam anangana ee' thawin paththam pam twelve al-alantan, wik minan ngeeyin thananga. A' than mi'in nunang Stephen.ana. Nil puth pam min kan-kanam paththam ngangkangam wik min Jesus.antamana pi'-pi' a' nil wik ngeey-ngeey Ngeen-Wiy Min God.antaman. A' than wiy thamp mi'in thanang, Philipa, a' Prochorus, putha Nicanor a' puth Timona, a' Parmenas a' Nicholaus, nilan wamp aak anpalan town Antioch.ama. Nil puth pam Jew ya'a, puth nil ka'atham anman weent woyan thanttaman nil wakowa Jews al-alantamana. 6Than pam wanchangan wampathin thanang pam seven anangan pam twelve al-alantana. A' than pam twelve anangana mee'-wuthanamin thant a' ma' wunpin thant kootranga.
7A' pam wanch yotamang ngeeyin wik min God.antamana a' pam wanch yot aak pi'an Jerusalem.angan wunin-a, than ngangkang ngul paththam pi'-pi'in wik min God.antamana. Than ke'-ngoongkam wamp-wampin, than ngangk thee'-thee'in nungant Jesus.antana, thanan Christians yot ngul iiy-iiyina. Than pam priests yot al-alangan ngangkangam pi'-pi'in wik minan thampa.
Than Stephen.an Mamin Nunang
8Nil God.an min anman iiy-iiy Stephen.antan a' thayanath nunang nil puth work pi'an iiyowa, pam wanch yot alpan anangan miyalathow thanang. A' than pam wanch yotam al-alangan thathin nunang nilan work pi'anan yump-yumpa. 9Puth than pam wiy al-alangan thaampin nunang Stephen.ana. Than pam inangan aak church namp “Freedmen” anpalan, than aak anpalan wampin Cyrene amanamana, a' Alexandris.ama, puth Cilicia.ama a' puth Asia.ama. Than kul ngul thaw-thawin nungant Stephen.antana. 10Puth nil Ngeen-Wiy Min God.antam alangana thayanath nunang Stephen.aniya, a' nil wik min-minam thaw-thawa. Thanan ke'am ngul thawin nungant ya'a. 11A' than wik yump-yumpin thenchanam Stephan.antanwey, a' thanan thaachin thanang pam wiy anangan yipam iiyayn a' yaan waa'ayn nunanganweya wik uuyamayna pam wiyantana, “Ngan kan ngeeyan Stephen.ana wik wayan thawa, waa' pulangan Moses-a, a' God.angana.” 12Than pam wanch anangan putha pam wuut manth-thayan anangana a' pam pi'an anangan wik thayanan thaa'-aathin thanangan-a, thant man kul paththam wampa. A' than mamin nunang Stephen.an a' kalin nunang pam pi'-pi'anam al-alantanweya. 13A' than pam wiy anangan wampathin thanang thanan yipam wik uuyamayn, yaan waa'ayn nunangan Stephen.anweya. Than pam anangan thawin pam pi'-pi'anam al-alantan, “Nil pam ilangana anman thaw-thawan, way waa'-waa'an wik ngench thayan Moses.antamana a' putha aawuch ngench thayan ngamparamana. 14Ngan kan ngeeyan nunang waa'-waa'an nil Jesus aak Nazareth.amana nil aawuch ngench thayan inan keekathow a' nil ngul epankathow wik thayan anangan nil Moses.angan thaa'-aath-aath ngampangana!” 15Than yotam anangan pam pi'-pi'anamana than oth mee' yenchang thath-thathin nunang Stephen.aniya. Than kaa'walan nunangan thathin ke' ngaantiyongkantam yimanangan kaa'wal nungantamana.