Paul.an Thaw Thant Pam Pi'an Paththam Alantan Kuchayn Ngayangana
251Nil Festus.ana aak nyiingk-nyiingk wamp thant Judea.angana moom pi'an yipam iiyow thant, puth amanamaniy-a, nil aak yiip iiy aak Caesarea anpalan Jerusalem.akanweya. 2Than aak anman wuntan-a, pam pi'-pi'anam anangan a' wiy anangan pam manth-thayan Jews.antamana than Paul.an waa'-waa'in nunangweya pam pi'an Festus alantan. 3Than thaa'-mamanang thaw-thawin nungant Festus.antan Paul.an kuchow nunang aak Jerusalem.akan puth thana kanam wik yumpin nungant, wik ma'-mupam, than ngoonchayn woyan ompamanga, nil Paul.an woyanangan iiy-iiyow-a, than purpam mamayn nunang a' mulathayn nunang. 4A' Festus.an thaw, “Ngay pi'-pi'ang nunang Paul.an jailang Caesarea.angana. Ngayiya yaam ke'anama koyam ngul iiyānga Caesarea.akan. 5Pam manth-thayan wiy anangan inpalana kuchān thanang ngatharang iiyayna than yipam aak angan kalayn nunang Paul.an courtak a' waa'ayn ngathar way nath ngeenan yump-yumpa. Nil nath way yumpa, nath ya'a.”
6Nil Festus.an yaan wun-wun thanttang Jews.antangan aak Jerusalem.angana puth anpalaniya nil kungkam ngul iiy Caesarea.aka. A' ngaa' thonangana nil aawuch courtakan angan ngoonch a' nyiin-nyiin a' puth thaw thant soldiers al-alantan, “Niiya pal pek ngoonchathān nunang Paul.ana!” 7A' than pek kanan ngoonchathin nunangan-a, than Jewsa aak Jerusalem anpalan wampinan-a, angman than-thanin nungantang thintha a' waa'-waa'in nunangana, puth than yotam anangana ya' wik uuy-uuyamina. Nil puth Festus.angan kanam thiich thanang wik thanam uwin ke' wik min waa'-waa'in nungant, puth ya'a. 8A' Paul wik inangan thaw, waa' nungantakaman, “Ngay puth ke'am way wiy-wiy anangan thakan yumpangan ya'a. A' ngay ke'am waa'-waa'ang wik ngench thayan thanttam Jews.antamana, ya'a. Ngay aawuch ngench thayan thakan-a, ke'am thak waa'ang ya'a, a' ngay puth ke'am thaampanga moom pi'an thanttam Romans al-alantamana.”
9Puth nil Festus.angan kaangk Jews anangan thanang kaangk wunayn nungantan, a' nil puth thaw nungant Paul.antan, “Nint ke' iiyin ey? aak yiipama Jerusalem.akan ey? Ngay angana um ngatharang thanathāng nintang courtakana, a' ngayaniy-a, ngaantam-ngeeyāng ngul than Jews al-alangan nath wik way-way waa'in nintang wik uuyamina, nath ya'a, kan-kanam natha.” 10A' Paul.an thaw, “Ya'a, ngay inan thawang nungkara. Nil pam moom pi'an Romans al-alantamangan-a, ngayanganiya um nungantang thanathow courtakana, nilam thonakama, wiy-wiyang ya'a. Nint inan thamp kan mee'miy ngay ke'am wayan yump-yumpang Jews al-alantan. 11Ngay nathwey kan-kanaman way paththaman yump-yumping-a, an nint kuchin ngayang mulan wuninga -- yaa, an ngay iiying mul wuning. An puth ya'a, than yaan wik uuy-uuyamina waa'-waa'in ngayangan nungkara, puth nint ke' ma'am thee'in ngayang thant ngulana. Ngay kaangk thonakam pam moom pi'an alangan ngayang um nungantangan thanathow courtakana!”
12A' Festus.angan wik ngeey nungantam ep-paththam Paul.antamana, a' nil iiy pam al-alantan than nunangan ma'-aath-aathin aak courtangana, a' engka thantweya nil wanttakan yumpowa. A' nilana palam ngul wamp Paul.antan, a' thawant ngul, “Nint puth nintam thawan pam moom pi'an alangan um nungantang thanathow nintang courtakana, ngan puth nungant kuchān nintanganiya.”
Nil Moom Agrippa.an Puth Wanch Namp Bernice.ana Pul Aak Caesarea.ak Iiypul
13A' ngul-ngulana moom pi'an Agrippa.an a' wanchana namp nungantiya Bernice aak-aakanak wamppul Caesarea.aka yipam uwowpul nunang Festus.an. 14Kinch ma'-ko'alamangan kanan want-a, nil Festus.angana waa' King Agrippa.antan wik Paul alantamana. Nil thaw, “Nil pam thonam nana nil Felix.angan want aak jailanga. 15Ngay ka'athaman iiyang aak Jerusalem.akan-a, than pam pi'-pi'anam priests anangana a' pam manth-thayan Jews al-alangana waa'-waa'in nunang ngathar puth thanan thawin ngathar ngay kuchāng nunang mul yipam wunowa. 16Puth ngay thawangan thant than pam wanch Rome punchanangana aak-ya'ang ke'am ma'am thee'antan pam than wiyangan waa'-waa'antan nunanga wayan yump. Ka'athamana than wik thawayn courtangana, a' nil puth wik ngeeyowa wik way anangan thanan waa'-waa'in nunangana. A' nil paththam yipam thawow thant wik thanttam anangan nath kan-kanama nath ya'a. Ngay wik anangan kanam waa'angan thanta. 17A' than Jews yotam anangana pal ing-ngul wampin puth ngaa' thonang ngulana ngayana kan-ngul nyiinangan courtangan. A' ngay thawangan thant soldiers al-alantan pal kalayn nunang a' ang pekan ngoonchathayn nunang courtaka a' amanamana ngay Paul.ana umang thanathangan nunanga. 18A' than Jews anangan thaamp-thaampinan nunanganwey-a, thananiy-a, thanin ngul a' wikana waa'-waa'ina, puth thananiy ngula ke'am wik way anangan waa'-waa'in nunanganiya ya'a. Ngayan ngaantam-ngeeyang than ke' way waa'-waa'iythan nunanga, puth ya'a. 19Thananiya thaa'-thay-thayanamin ngul Paul wee'anangana wik thayan Jews.antam anpalana, a' puth thananiya pam mul Jesus.antaman wik thaw-thawin ngula -- puth nil Paul.angan waa' thant nil yippak man-yethamaniya. 20Ngay ke' mee'miy thantana ya'a Jews al-alantana than want-wanttakan aak wuna, puth ngaya nanpalan thawangan nungantan Paul.antana nil kaangk nath aakanak iiyow courtak angan Jerusalem.angana. 21Puth nil Paul.an thawa nil kaangk aak-aakanakan iiyow pam moom pi'an alantan aak Rome.angan wunana, a' nilam thonakam pam moom pi'an alangan um nungantangan thanathow nunanga. A' nil thaw nil kaangk soldiers al-alangan mee'-pathathayn nunang aak-aakanakaman pam pi'anan thathow nunang ngulana. A' ngay thawangan thant soldiers al-alantan puth mee'-pathathayn nunang aak-aakanakaman ngay kuchāng nunang ngulana pam wuut pi'anantana.” 22Nil Agrippa.an thaw, “Ngay kaangk wik ngeeyāng nunangweya pam inana.” A' Festus.an paththam thaw, “Puth ngaa'thamana nint kan-kanam wik ngeeyān nunangana.”
23A' ngaa' thonang ngulan-a, than yotam anangan pam pi'-pi'anamana puth moom soldiers anangana aak townangan wunin-a, angman karpam wampin pulantang Agrippa.ang a' Bernice.angana a' aak pek ngoonchathwin aawuch wuut pi'anangana. A' Festus.an kan-ngul thaw thant soldiers al-alantan pek ngul aawuch pi'anangana kalayn nunang Paul.an. 24Nil Paul.an ngoonch-a, Festus.an thaw, “Moom pi'an-ang! Agrippa-ang! a' niiy pam wanch yotam inangana, niiy thathān nunang pam inaniya! Than Jews yotamangana aak inman-a, a' putha, Jerusalem.angana an than thaampantan nunangweya. Than yotam anangan pech-pechina, ‘Mulathān nunanga! Nil man-yethaman ke' wun-wuniya!’ 25Puth ngay thathanga nunang nil way ke'am yump-yumpa, ke' puth mulathanak nunang aak-ya'ang ya'a. A' puth nil kaangk pam moom pi'an alangan um nungantangan thanathow nunang puth ngay nanpalan ngaantam-ngeeyang ngula aak-aakanakan kuchāng nunang kuuw Rome.ak pam moom pi'an alantana. 26Ngay kan lat umpāng nungant pam moom pi'an alantan a' waa'āng nunangana way ngeen nath pam ilangan yumpa, puth ngay wanttak ngul wik thawāng e? Nil ke'am wayan yump. Ngay puth nanpalan pal kalang nunang Paul.ana ingan thanow um niiyantang yotam il-ilantangan pam wanch pi'-pi'anam a' putha nungkaranga, pam pi'an Agrippa, niiy yipam wik nungantaman ngeeyāna, a' amanaman-a, niiy wanttakan ngaantam-ngeeyaniy wik nungantam anpalana, niiy waa'ān ngathar ngula, ngay yipam lat umpāng nungant pam moom pi'an alantana. 27Ngaywey pam inman jailmanana ke' yippak kuchāng nunang moom pi'an alantan, ngay puth ke'aman yippak latangan waa'ang moom pi'an alantan than wiy al-alangan ngeenam waa'antan nunangana. Ngay ka'athamana mee'miy yumpāng nunang-a, an ep kuchāng nunang ngula.”