Nil Ngeen-Wiy Min God.antaman Uk Thant
21Aak an-aniyangan-a, than aak Pentecost.an waa'antan, aak anan kanan wamp-a, than Christians yotam anangan yalmathwin thanttakam aak thonamanga. 2Than angman nyiin-nyiinin, a' ngul yaam ke'anaman-a, than muut pi'anan ngeeyin, anpal kenyan uk-uk, muut ke' wunt pi'anan wunp. Than ma'mangkamana angman aawuchang nyiin-nyiinin-a, than muut pi'anan ngeeyin, 3a' anpalaniy-a, than ke' thum nganth yimanangan thathin -- thum nganthan erkam paththam we'arama, pam wanch thon-thonantan wamp, kuchekan mam thanang. 4A' nil God.angan aak an-aniyangan Ngeen-Wiy Min nungantaman kuch thant pam wanch Christians al-alantan ngangk thanttamangan wun-wunow a' anpalaniya, than pam wanch anangan-a, wik thaa'nganth thon-thon kan-ngul thaw-thawinweya, puth Ngeen-Wiy Min God.antamangan work wuut pi'an paththam inaniy yumpa, nil ma'-aath thanang wik thaa'nganth thon-thonan thawayna.
5Than Jews puungk wiy anangana aak ka'athamana aak thon-thonangan wun-wunin, thananiy-a, palam kan-ngul wampin aak Jerusalem.akana, a' angman ngul wun-wunin. Than inanganiywey-a, kan-ngul paath-paathin woyan min God.antam anan wak-wakaynweya. 6Than wik wolmpan ngeey-ngeeyin thanangan-a, thananiy-a, wunthar ngul wich-wichwin thantana, ngurp Jesus.antam al-alantan a' than yotam ananganiy-a, mee'am ikin thant, puth wik thaa'nganth thanttaman thaw-thawina. 7Yaa, than pam wanch mee'am ikin, thaa'am ikin, a' thawin thanttakaman, “In wanttak aa? Than pam inanganiya, wik thaa'nganth ngamparam yotamantam thamp thaw-thawantan ngul aa? Than puth pam inangan aak Galilee.am anpalman wampin, aak nath-nathpalman ke'am wampin ey! Ya'a, than puth wik ngamparaman keenk ke'am ngeeyin. Than wanttak wik ngamparaman mamin e? 8Ngamp puth ngeey-ngeeyanamp thanang wik thaa'nganth ngamparaman thaw-thawantan, puth wik thaa'nganth thon-thonang thaw-thawantan, in wanttak aa? 9Ngamp puth aak nath-nathpalan wampamp, kuuw, kaaw, kungk, yiip -- aak namp Parthia, a' Media, a' putha Elam anpalan, a' Mesopotamia, a' Judea, a' Cappadocia anpalan; a' Pontus a' Asia, 10a' Phrygia, a' Pamphylia anpalan; a' Egypt a' Lybia anpalan -- puth Cyrene thinth; wiy Rome anpalan wampamp. Ngamp pam wanch wiy anangan Jews, ngamp wiy anangan Jews ya'a, puth ngampaniya God Jews.antaman monkan-wak-wakanampa. 11Ngamp wiy anangana aak namp Crete anpalan a' Arabia anpalan wampamp. Nungkway aak nath-nathpalan wampamp-a, wik thaa'nganth thon-thonangan thawanamp-a, ngamp puth ngeeyanamp thanang wik ngamparamangan wik waa'-waa'antan nil God.an pi'an paththama, min-minam anman yump-yumpana.” Than yot anangan wik yimanangan thaw-thawin. 12Than puth mee'am ikin, thaw-thawin thanttakamana, “In wanttak aa?” 13Puth wiyangiy-a, ngurp Jesus.antam anangan thaa'-thengkathin thanang, a' thawin, “Than pam il-ilangana ngak way yaaka' mungkina, ngak way mungkan ngul iiy-iiyantana, kuchek wayaman thant.”
Nil Peter.an Thaw Thant Pam Wanch Thaa'-Wantanamant
14Anpalaniy ngul-a, nil Peter.ana ek ngul a' angman than thanttang ngurp nungantam wiy eleven al-alantangan a' nilan wik thaw thant pam wanch thaa'-wantanam al-alantan, wik achantang thawa, “Ayyang, niiy pam wanch Jews a' puth niiy pam wanch aak Jerusalem.angan wunaniya, ngay kaangk wik min inan waa'āng niiyant. Wik ngatharam inangan niiy min-min ngeeyāna. 15Niiy thanang pam inangan ngaantam-ngeeyaniy thanang ke' than ngak way mungkan ey? An ya'a, thanwey ngak way mungkan ya'a. In aak nine o'clock ngulana aak ngaa'thiyangam yippaka. 16Pam Joel anana, nil pam God.antam thampa, nilan aak keenkanam wik kath inan waa'-waa' ngampar. 17Nil wik inan thawa:
‘Nil God.an thawa, “Ngay wik inangan waa'ang niiyant, ngay ngeen ngulan yumpāngana aakiy-a, an-aniyangan aakan kan-ngulan minchow.
Ngay Ngeen-Wiy Min ngatharaman kuchāng pam wanch yotamant,
ke' ngak yimanangan yeechāng thanttang pam wanchantangan.
A' than puk pam a' puk wanch niiyantamangan wik ngatharaman waa'-waa'ayn thant pam wanchantan.
Pam komp-kompiy niiyantam al-alangana a' puth than pam wuut manth-thayan al-alangana pithang ngulan pithayn.
18Aak an-aniyangana, ngayaniya Ngeen-Wiy Min ngatharamana kuchāng niiyant,
ke' ngak yimanangana thon-thonantangan yeechāng pam wanch yotamantangan than ngatharan workan iiy-iiyantan,
a' thanan wik ngatharaman ngul waa'ayn thant pam wanchant.
19Ngay work pi'anaman ing kenyan yuwang ngul meenathāng
a' puth aak earth ing pekan meenathāng.
Niiy ngul thathān chaaparana, a' puth thuma thathān a' puth-a, thok pi'an ek-ekow.
20Nil kinchan ngaa' weenow a' kepana wewm weenow ke' chaapar yimanangan.
Aak way inanganiy ka'atham wamp-wampayn.
A' ngul anpalaniya, aak ngench thayan pi'an paththaman wampow, nil puth Lord.an palaman wampow.
21Nil wee'an nungant Lord.antan thawow ma'-aathanakan-a,
yaa, an nil Lord.angan ngul ma'-aathowana, kaa'-piichanathowan.” ’
22“Niiy pam aak Israel punchanan-a, wik ngatharam inangan ngeeyān. Nil Jesus inan aak Nazareth.angan em-ema, nil pam anman nil God.angan ngamparan kuchana. Nil God.angan ma'-kunch yumpan a' thayanathan nil yipam work pi'-pi'anam yump-yumpowan, nilan puth work pi'-pi'anam kan yump-yump meenath niiyant. Niiy puth inangan kan thathan a' puth meenath niiyant nil God.ang kan-kanaman kuch nunang. 23Nil God.angan nathpalman ka'athamana ngaantam-ngeey nil Jesus.an kuchow nunang ma' Jews.antang ngulan iiyow. Anpalaniy-a, niiy Jews il-ilangan Jesus.an mulathan nunang ngula niiy puth thawan thant pam way al-alantan thant mulathayn nunang Jesus.an, ma'a, tha' thampan pungayn nunang yuk wuuyanangan. 24Nil puth God.angan koyam mulaman ekath nunang Jesus.an. Puth nil God.ana thayan paththama, nil Jesus.an minam pentathan aak way thaa'-ngathanam anpalan, nil Jesus.an ke' pam way yumpan yimanangan aak thaa'-ngathanam angan thenchin nunangan. Nil yaaman mul ke' wuniy awarangana, ya'a, an nil thayan paththama!
25“Nil pam David.an wik inangan thaw Jesus.an waa'-waa' nunang. Nilan thawa:
‘Ngay Lord.an thathangan nil ngatharangan ma'-yotaman iiy-iiy.
Nil ngatharang inmana, puth ngayan ke' winynyang mo'inga, ya'a.
26-27Nil ngatharang inman, puth ngangk ngatharaman min wunana.
Ngay aak pathāng ngangk minangama.
Nungkway ngay pam aak imanaman-a, ngay kan mee'miy ngay man-yethaman ngul wun-wunāng,
nint ngayangan aak awarang angman yaam ke' wantina.
A' putha nint pam ngench thayan nungkaram alantaman kempa ke' yaaman wantin angman awarangan kathamiy ya'a.
28Nint puth woyanan meenathan ngathara ngay anman wak-wakāng
ngay kan-kanam paththam yipam man-yetham anman wun-wunānga.
Nint ngangk min paththam ngul yumpān ngayang,
puth ngayaniya kan-kanam nungkarang ngul wunāng.’
Wik inangan nil David.an thawa.
29“Kuunch ngatharam niiyalang, ngay kaangk wik David.antam inangan engk-engkanang waa'āng niiyantana, wuut mangk ngamparam alantamana. Nil puth kan utham. Than kaampin nunangwey awar nungantam inman ngamparangweya. 30Puth nilan pam prophet iiy-iiy a' nil mee'miy nil God.angan kaa'ngak nunang, nil thaw nungant, ‘Aak ngul-ngulana pam kampan nungkaram thonam alantamana nil anpalan wampow pam pi'an paththaman iiyow king ke' nint yimanangana.’ 31Nil pam David alangan thiichwey nil God.angan work ngeen ngulan yumpowa. Nil ke'-paal wik inangan thaw lat ngench thayanangana:
‘Nil God.angan kemp nungantaman awarangan ke' wantiy,
puth ke' kathamiy, ya'a.’
Nil pam David anan wik inangan thaw-thaw-a, nil Jesus.an waa'-waa'an nil God.angan koyam ngulan mulaman ekathowan, pam anman nilan mi'a kuchowan ngamparaniya. 32Nil God.angana Jesus.an mulam ekathan-a, a' nil man-yetham ngula. Puth ngan yotamangan thathan nunang. 33Nil God.angan Jesus.an keny koyam maay nunang aak nungantamakana a' aak min paththamana nungant waa' nil yipam ma' malang angan nyiinowa, piip nungantamantang. Nil God.angan Ngeen-Wiy Min nungantaman ngangk Jesus.antang ngoonchath, ke' nilaman kaa'ngak nunangan. A' nil yimanang ngulana, nilan Ngeen-Wiy Min nungantaman ngangk nganttang kuchan thampa, a' niiy nganang thathaniy a' nganangan wik ngeeyaniy, nganan thaw-thawanan niiyant. 34Nil David.an ke'am yippak kenyan mata ke' nil Jesus.an mata, puth nilan wik inangan thawa:
‘Nil Lord God.ana moom ngatharamant thawa, “Mal ngatharang nyiināna. Nintaniya moom pi'an ngatharang iiy-iiyāna;
35a' ngay ngul maalathāng thanang than nintangan ngangk-wayangaman kal-kalayn.
Nintaniya moom karangk paththam iiy-iiyān thantana.” ’
36“Than pam wanch ma'mangkam aak Israel anpalan-a, mak thiichayn nil Jesus anana, niiyan mulathan nunang-a, nil pam anman nil God.angan waa'an, nil moom pi'an pam wanch ma'mangkamantana nil pam anman nil God.angan kaa'ngak kuchowan.” Nil Peter.an wik inangan thaw thantaniya.
37Than pam wanchang wik inangan ngeeyin-a, thanan ngul-nyaa' paththam wunin a' than puth Peter.antan thawin a' ngurp nungantam Jesus.antam wiy al-alantan thamp thawin, “Ngurp nganttam-ang, ngan puth wanttak e?”
38A' nil puth Peter.an thaw thanta, “Niiy ma'mangkam nanangan woyan wayan wantāna, a' ngan kootra ngakang mak kuungkān niiyang, an meenathāna niiy Christ.an ngangkangam pi'-pi'aniy nunang ngula. Nil God.angan way niiyantaman ngul kon-ngathowan a' Ngeen-Wiy Min nungantaman ngangk niiyantamak kuchowan. 39Nil puth God.angan inan kaa'ngak niiyang a' putha puk niiyantamak thama a' pam wanch thaa'-wantanam al-alantan aak nath-nathan wuntan. Nil Lord God ngamparamangan inan kaa'ngak pam wanch ma'mangkamant nilan umpan thanang wampayn nungantan.”
40Nil Peter.angan wik yot waa'-waa' thant pam wanchantan wik thaa'-thayanam thaw-thaw a' puth thaa'-mamanang thaw thant, than God.antan kan-kanang weentayna. Nilan wik inangan thaw-thaw thanta, “Niiy niiyantakaman kaa'-piichanathāna, nil puth God.angan kan-kanam ngul wayathow thanang pam wanch anangan wayan yump-yumpantan, aak wayak kuchow thanang.” 41Than puth pam wanch yot thaa'-wantanamangan-a, wik Peter alantaman ngangkangam pi'-pi'in ngul a' puth thananiya, kuchek ngakang ngul kuungk-kuungkin thanang. Than pam wanch three thousand al-alangana, piip God ngul monkan-wak-wakin nunang aak an-aniyangan a' thanttang wiyantang ngul iiy-iiyin than anangan piip God.an ngangkangan pi'-pi'in nunangana. 42A' puth than pam wanch al-alangan wik anman ngeey-ngeeyin pam ngurp min Jesus.antam al-alantaman, thanan wik min God.antaman thaa'-aath-aathin thanang. Than pam wanch ma'mangkam il-ilangan kan-ngul Piip God.an ngangkang ngul pi'-pi'in nunangan-a, thanan-a, may karpam ngul mungkin a' karpam ngul mee'-wuthanaminwey.
Than Pam Wanch Anangan Piip God Ngangkangaman Pi'-Pi'in Nunangan-a, Aniya Ngangk Minangam Ngul Wunin Karpamwey
43Than pam twelve ngurp-than al-alangan work pi'-pi'anam yump-yumpin a' than ma'mangkam anangan winynyang ngul mo'-mo'in thanttaman. 44Than pam wanch anangan piip God.an ngangkangan pi'-pi'in nunangan-a, an than karpam ngangk minangam iiy-iiyin a' may thakan karpam mungk-mungkin, thanan-a, way min thak aath-aathwin. 45Thanan kaangk aak thanttamana a' puth yuk way min thanttam thakan thee'-thee'in thant wiyantan than yipam wukalan thee'ayn thant way min anpalana than ngulan yipam wukal thakan thant wiyantan thee'-thee'ayn, wukal ke'anang, may ke'anang al-alantanwey. 46Ngaa' thon-thonana than aawuch ngench thayan Jews.antam angan um-wuthin thanttakaman piip God.an thaa'-kuumpin nunang. Ngaa' thon-thonana than aawuch thon-thonantangan may mungkin. Thanan ke'am ngaantam-ngeeywin ke' than pam wanch pi'-pi'anama, ya'a, than yotaman ngangk minangam iiy-iiyin thanttakamanwey. 47Than God.an karpam thaa'-kuumpin nunang a' than pam wanch ma'mangkam al-alangan pam wanch min waa'-waa'in thanang pam wanch God.antam anangana. Ngaa' thon-thonanganiya, nil God.angan thanang yot kaa'-piichanath a' thanan puth thant al-alantangan ngul iiy-iiyin, than God.an ngangkangaman pi'-pi'in nunang.