Nil Paul.an Aak Ephesus.ak Iiy
191Nil Apollos.an angman yippak wun-wun aak Corinth.angan-a, an-aniyangana nil Paul.an woyan keny-kenyangk anman wak-wak mal kungkama, a' kuuwam ngul mel ench a' ang-ngul wamp aak Ephesus.anga. A' angana nil uw thanang pam wanch wiy anangan than ngangkangaman pi'-pi'in nunang piip God.ana. 2A' nil thaw thant, “Aak an-aniyangana niiy ngangkangaman pi'-pi'an nunang ngul God.an-a, an Ngeen-Wiy Minan wamp niiyant ey?” A' than wik inangan thawin nungant Paul.antan, “Ya'a, ngan puth ke'am wik ngeeyan Ngeen-Wiy Min alantamana.” 3Puth nil Paul.an thaw thant, “Niiy kan waa'ān ngathara, than wiyangan kootra kuungkin niiyangan-a, an aak want-wanttak niiyant wun e?” Than puth thawin, “An ke' anman nil John.angan kootran ngakangan kuungk-kuungk thanang yimanangana.” 4Paul.an thaw thant, “Nil John.angan kootra kuungk-kuungk thanangan-a, an thananiya weentin ngul way thanttam anpalana thanan yump-yumpin woyan min aakanakan weentinwey. A' John.an thaw thant pam wanchantan, ‘Niiy ngangkangam pi'-pi'ān nunang pam anan nila mangk ngatharangan wampowa, nil pam anana Jesusa.’ ”
5A' than wik inangan ngeeyin nungantam Paul.antaman-a, thanan thawin nungant kootra kuungkow thanang an yipam meenathow thant wiyantan than kan-ngul ngangkangan pi'-pi'antan nunang Jesus.ana. 6A' nil Paul.angana ma' nungantaman kootrang thanttamang wunpa a' Ngeen-Wiy Min God.antamana yaam ke'anam paththam wamp thanta than puth thaa'nganth wiy-wiyam ngul thaw-thawin Ngeen-Wiy Min alantamana a' than ngulana kan-ngul waa'-waa'in wik min God.antamana thant wiyantan. 7Ngeen-Wiy Minan yimanangan wamp thant pam twelve il-ilantana, pam twelve inanganiy-a, aak Ephesus punchana.
8A' kep ko'alamakana Paul.an iiy-iiy church Jews.antamaka aakanakan, a' waa'-waa' thant pam wanch al-alantan wik min God.antamana. Nil ngangk thayanam thaw-thaw thant. Nil ma'-yotaman thaw-thaw thantaniya than yipam ngangkangam pi'-pi'ayn nunang God.ana nil puth kan-kanam paththam moom pi'an ngampar, nil min anman iiy-iiyan ngampar umyompanamantana. 9Puth than Jews wiy anangan ya' way-wayamin, kuchek thayan weemin, puth than kaangk ke' paththam ngangkangaman pi'-pi'ayn wik Paul.antam anangana. Puth thananiya wik minana way waa'-waa'in mee' yotantangan. Puth nanpalana, Paul-a, puth Christians wiy anangan than koyam ke'-ngul iiyin church Jews.antamakan ya'-ngul. Than ngaa' thon-thonana aak thonang yalmathwin, aak wik thawanakan Tyrannus.antaman, aak angmanan-a, than wik God.antaman waa'-waa'in a' thaa'-aath-aathin. 10Nil Paul.ang thaa'-aath-aath thanang aak angmaniya kaap kuchamaka puth nanpalana than yotam anangana Jews a' puth Greeks anangan aak angan wun-wunin aak Asia.angan-a, than kan ngeeyin wik min Lord.antamana.
Puk Nhengk Sceva.antamang Ya'angam Kenthin Thanang Oony Way Anangan
11Nil God.angana thayanam paththam yump nunang Paul.an nil yipam work pi'an anangan yump-yumpow thant. 12Than pam wanchangan ngook anangan uwin nungantam Paul.antam nil ka'athaman pi'-pi' workakan, a' than ngookan kalin pam wanch alpan al-alantan. Than alpan al-alangan ngookan maminan-a, than miyal erkam paththam wunina puth oony way al-alangan thampa wantin thanang ngula. 13Than pam Jews wiy anangana than pal-puy iiy-iiyina, aak thon-thonak. Than kenth-kenthin oony way anangan ngangk thanttam anpalan. A' kinch thonamangana than ngaantam-ngeeyin namp nungantang Jesus.antang wichayn. A' than thawin oony way alantan puth wantow nunang pam thonam anana, than inangan wik thawin, “Ngan inan puth thawanan namp Jesus.antanga, pam inman nil Paul.angan waa'-waa'an nunanga, nint pam inana wantān nunang.” 14Pam than wik inangan thawinan-a, an than pam seven anangan nhengk nungantam pam namp Sceva alantamana, pam nil moom pi'an thanttam priestsantam, a' puth nil Jewa. 15A' oony wayan paththam thaw thant pam al-alantan a' wik inangan thaw, “Ngay kan mee'miy nunang Jesus.ana. A' putha ngay mee'miy nunang Paul.an thampa. Puth niiy inangan wee'-wee'anangweya?”
16Nil pam anman oony wayan ngangkangan pi'-pi'a, erkam paththam chang pey thanttang pam seven al-alantangan a' piik-piik thananga. A' nil kan-kanam piik-piik thanang a' than kamp mo'-mo'in yoon aawuchamana puth ma'lipa ngook ke'anang mo'-mo'in a' kemp thanttamana chaapar ukanang mo'-mo'in. 17Than Jews ma'mangkamanga puth Jews ya' al-alangan angan wun-wuntan aak Ephesus.angana than puth kan wik thoo' ngeeyin ngeenan wamp thantana, a' than ma'mangkam anangan pam wancha winynyang ngul mo'-mo'in. A' anpalana than pam wanchangan kan min-min ngul ngaantam-ngeeyin nil Lord Jesus.an pam wuut pi'an paththam a' thaa'-kuumpin nunang a' thawin ngul nil kan-kanam paththam pam pi'ana putha pam min paththam. 18Than pam wanch yot anangan thanan ngangkangan pi'-pi'in nunang Jesus.an-a, thanana um thanttang thanin pam wanch yot al-alantakaman a' waa'-waa'in thanttakamana than wayan aak keenkaman yump-yumpin. 19A' than wiy anangan ka'athaman wayanangan iiyin ma'-kunch thakan-a, thanana wampin a' lat wayanang ma'mangkam thanttam anangana thumang kiingkin angman mee' thanttang yotantangana. Than puth mee'miy wukal ngeen-ngeenan thee'-thee'in ka'athamana lat al-alantakana wukal pi'an puth thee'in, one hundred thousand dollarsweya. 20Than pam wanch thaa'-wantanamang ke'-ngoongkam ngul ngangkangan pi'-pi'in nunang Lord Jesus.ana puth than kan thathin thanang pam wanch anangan weentin Christ.antan puth than woyan way kan-ngul wantin ngula.
Than Yalmathwin Thanttakaman Than Yipam Wik Wolmp Pi'-Pi'ayna
21Ngul-ngulana nil Paul.angan ngaantam-ngeey nil kaangk iiyow aakanak kaaw aak Jerusalem.aka, puth ka'athangamaniya nil ngaantam-ngeey mal kuuwam iiyow Macedonia wakana a' putha aak Greece wakana. Nil Paul.an puth wik inangan thaw nungantakamana, “Ngay aak Jerusalem.akan kanan iiyāng-a, ngaya kuuwam ngul iiyāng aak Rome.ak thampanga.” 22A' nil pam kucham anangan work nungantangan iiy-iiypula, Timothy a' puth Erastusa kuch pulang kuuwam iiyowpul aakanakan Macedonia.aka. A' Paul.ana yaam wun ang kaaw aak Asia.angana.
23Aak an-aniyangan-a, pam wanch wiy al-alantana man kul aak-ya'ang wamp thant pam wanch Christians al-alantana than puth woyan minan wak-wakin Jesus.antamana. 24A' pam thonam inana namp nungantiya Demetriusa nil alangan yuk silverama yuk ngeen-wiy yump-yumpan thanang ke' aawuch ngench thayan thanttamana. Namp god ananiy waa'in nunang Artemis. Than pam yota workan iiy-iiyin nungantang Demetrius.antangan a' putha thananiy-a, wukal tha'iy uw-uwin yuk ngeen-wiy al-alantamana. 25Nil Demetrius.angan yalmath thanang pam yotam anangan workan iiy-iiyin nungantangana a' puth wiy anangan pam workan iiy-iiyin ke' nilaman iiy-iiy, a' nil wik inangan thaw thanta, “Ayyang, niiyalang, ngamp yotamangana puth wukal pi'an uw-uwanamp work ngampan iiy-iiyanamp anpalana. 26A' niiy yotamangan kan thathaniy nunang pam Paul inana a' puth niiy wik thakan kan ngeeyaniy nungantamana. Nil thaw thant, ‘Yuk ngeen-wiy inangana niiy pamangan yump-yumpaniy ma' niiyantamangan-a, an than gods ya'a.’ Than pam wanch yot ingan wun-wuntan Ephesus.angana a' than pam wanch aak Asia.angan wun-wuntan-a, than puth wik nungantaman ngangkangam pi'-pi'antan. 27An ngeen ngul wampow ngampar e? Than pam wanchangan ngul waa'-waa'in ngampang puth work ngamparaman way thak waa'-waa'iythan. A' putha than ngul ngaantam-ngeeyin aawuch pi'an ngamparaman, yuk ngeen-wiy pi'an Artemis.an than-thanana, an ke' min ya'a. Than pam wanchangan yaaka' ke'-ngul thaa'-kuumpayn nunang Artemis.ana. An nil wuut pi'an paththama, a' an than pam wanch thaa'-wantanamangan thaa'-kuumpantan nunanga a' putha yuk ngeen-wiy nungantaman thaa'-kuumpantan. Puth thanan nath kaangk ke'-ngul weenayn nungantamana too wantayn nunanganiya!”
28Than pam wanchangan puth wik inangan ngeeyin-a, thantaniya man kul paththam wamp. Than kan-ngul wik othamayan pech-pechina, “Nil Artemis.ana aak Ephesus aakanakana, nil kan-kanam wuut pi'an paththama!” 29A' yaam ke'anam paththama than ma'mangkam anangan pam wanch aak townangan wuntana wik othamayan pech-pechina. Than erkam paththam punth mamin pulang pam kucham inangan namp pulantiya Gaius a' Aristarchusa, pul aak Macedonia punchana, pul nungantang iiy-iiypul Paul.antangana. Than pam wanchangan poo-poo tha'in pulang aawuch pi'an angan, pek angan thenchin pulang. 30Paul.an kaangk iiyow a' um-menhang angan thanow thanttang pam wanch yot al-alantangana, puth than pam wanch Christians al-alangan kaangk ke' kuchayn nunang. 31Than pam pi'-pi'anam wiy anangan than ngurp nungantam Paul.antama, thananiya wik kuchin nungant thaa'-mamanang thaw-thawin nungant ke' iiyowan umputhan thanow pam wanch al-alantangan. 32A' pam wanch ma'mangkam anangan aak angan yalmathwinan-a, an thananiya wik othamayan pech-pechin, puungk wiyiya wik wiy-wiyam pech-pechin, a' puungk wiy ananganiya thaniya wik wiy-wiyam pech-pechin thampa puth than yot anangana ke' mee'miy ngeenam nathan wik thawayna. 33A' than Jews wiy al-alangan pam namp Alexander thaachin nunang iiyow aakanak um thanttangan thanow pam wanchantangana, a' than pam wanch wiyangan puth ngaantam-ngeeyin ke' nil Alexander alangan ump-ump thanang wik thawanakana. Nil puth mal yump thant popam nyiinayn wik ke'ananga nil puth kaangkweya wik waa'ow thant than Jews al-alangan ka'athangaman ke'am kulak wenkin. 34Puth than mee'miy nunang nil pam Jewa than nanpalan kaangk ke' wik ngeeyayn nungantamana. Puth than yotam anangana wik inangan pech-pechina, “Nil Artemis.an aak Ephesus aakanakan, nil kan-kanam wuut pi'an paththama!” Than pech-pechin yaamweya puth ke'am ngangkangan thee'in ya'a. Than ke'-ngoongkam pech-pechina.
35A' yaam ke'anama pam pi'an nilan aak pi'-pi'ana, nochath thanang pam wanch anangan a' nil kan-ngul wikan thaw thanta, “Ayyang, niiyalang, aak Ephesus punchan ngampa, pam wanch aak umyompanamana than kan mee'miy nunang yuk ngeen-wiy pi'an nungantam Artemis.antamana aak inpal kenyan keeka aak pi'anang ingan Ephesus.anga, puth ngamp il-ilangan thonakama mee'-pathathanamp nunang ngeen-wiyana a' puth aawuch wuut pi'an nungantamana. 36Wik ngatharaman kan-kanama, than pam wanch wiy anangan ke' thawiythana ngay ke' wik uuy-uuyamang. Puth niiy yotam inangana appap nyiināna a' ke' weenthamāna. 37Nungkway than pam il-ilangan ke'aman maayin way min aawuch Artemis.antam anpalan-a, a' nungkway than ke'aman way waa'-waa'in nunang Artemis.an-a, niiy puth pal wampathan thanang ey! aak iikanakan ey! 38Nil Demetrius a' pam nungantangan work iiy-iiyantana than nath kaangk waa'ayn thanang pam inangana. Than puth courtang wunpayn thananga! Than courtakan iiyaynwey-a, thaniya an-aniyangana iiyayna, than pam pi'-pi'anam anangan courtangan nyiinayn. Than ngul ngeey-ngeeyayn thanang wikana, a' mep-mepayn thanangana. 39A' niiy kaangk putham nath thawān wik anpalman-a, ngampan puth yotamana yalmathwumpa wikan yumpanakana. 40Than pam wanch aak nath-nathan wuntan nath wik thoo' ngeeyiythan niiyantamana niiy yotamaniy pech-pechanana, kuchek way wuninweya, thananiya aak ngamparam inana way ngul waa'-waa'iythana, niiy puth pam wanch yotaman pam wanch kulliy ngul weenaniya. Puth ngan pam pi'-pi'anam il-ilangan want-wanttak waa'-waa'ān thant pam wanch wiyantana niiy ngeenam kul pi'-pi'aniy e? An ya'a!” 41A' wika inangana nil pam pi'anan thawa. A' nil kan-ngul thaw thant pam wanch yotam al-alantan puth kan iiyayn aawuch thanttamaka.