Nil Timothy.an Iiy Pulantang Paul.ang A' Silas.anga
161A' Paul.an ke'-ngoongkam anman um kuuw iiy-iiy aakanak Derbe.ak puth anpalana ang-ngulan wamp aak Lystra.anga. Pam namp Timothy.an angman wun-wuna, nil ngangkangam pi'-pi'an Christ.ana. Kaath nungantaman aak Jews.ama, a' nil thampang ngangkangam pi'-pi'an Christ.ana. Puth piip nungantamana aak Greece.ama. 2Than pam wanch Christians aak Lystra.angana a' putha Iconium.angana than yotam al-alangan ngaantam-ngeeyin nil Timothy.an pam min paththama. 3Nil Paul.angan kaangk paththam Timothy.an kal-kalow nunang. Than yotam anangan Jews aak angman wun-wuntanan-a, than mee'miy nunang piip Timothy.antaman aak anpal Greece.ama a' puth piip-kunchangan ke'am umpan puk manyamana ngeen-wiyan pe'anan puk nhengk nungantamana ke' anman wik thayan thanttam Jews.antaman thawana than anman yump-yumpayna. Anpalana Paul.angan ngeen-wiy pe'anan umpan Timothy.ana pul aakan yipam kan-ngul wantowpula puth aak thon-thonak ngulan iiy-iiyowpul. 4A' pulan iiy-iiypul aak town thon-thonakan a' wik waa'-waa'pul thant pam wanchantan churches thon-thonangana. Pulan waa'pul thant wik anan thanan kuchin anpalana ngeen-wiy umpwaynweya, ngurp min Jesus.antam al-alangan a' puth-a, pam al-alangan than churchan pi'-pi'antan aak Jerusalem.angana, than wik kuchin than yipam wik ngeeyaynweya. 5Than pam wanch al-alangan wik inangan ngeeyin Jerusalem anpalan-a, than paththam ngangk thay-thayanam ngul iiy-iiyin a' ke'-ngoongkam God.an ngangkangam ngul pi'-pi'in nunanga. Puth anpalan-a, thananiy-a, Christians yot thaa'-wantanam ngul weenina.
Paul.angan Maanyang Pam Thonam Aak Macedonia.amana Thath Nunang
6Than Paul wee'anangana kungk iiy-iiyin aakanakan Phrygia.ak a' puth Galatia.aka. Than ngaantam-ngeeyin ke' yiipam iiyiythan aak-aakanak Asia.aka, puth Ngeen-Wiy Min God.antaman thaw thant, “Niiy wik min God.antaman aak angana ke' thaa'-aath-aathān thanang.” 7A' than thinth ngul wampin aak thanan waa'antan Mysia a' paathin ke' kaawam iiyiythan Bithynia.aka, puth nil Ngeen-Wiy Min Jesus.antam alangana wayath thanang, kaangk ke' paththam kuchow thanang iiyaynan kaawana. 8A' thanana kuuwam ngul iiyin Mysia wakan a' ang-ngul wampin aak Troas.anga. 9A' ngutang ngulana nil Paul.ang pitha pam wamp anman aak Macedonia.amana. Nil paman than-than a' thaa'-mamanang thaw-thaw nungant Paul.antan, wik inangan thaw nungantan, “Ayyang, nint pal kuuw ngul iiyān ngant Macedonia.aka a' ma'-aathān ngananga.” 10Kanan pith-a, nganiy-a, ma'min yumpwun nganttakam a' kan-ngul iiyan kuuw aakanak Macedonia.ak, puth ngan ngaantam-ngeeyan nil God.an thaw ngant wik minan waa'-waa'ān thaa'-aath-aathān thanang anangan pam wanch anan wuntana.
Paul A' Ngurp Nungantam Anangan Iiyin Aak Pi'an Aakanakan Philippi.aka
11Ngan kan-ngul wantan Troas.ana a' chukkunang ngul mo'-mo'an a' puth koochanam um kuuw mo'an aakanak Samothrace.aka. A' ngaa' thonang ngulana ngan chukkunang putham mo'an kaaw aak-aakanakan Neapolis.aka. 12Puth anpalaniya ngan tha'angam ngul iiy-iiyan kuuw aakanakan aak Philippi.ak. Aak inan aak pi'an paththama aak Macedonia angmana. Than pam wanch yot anangan ka'athaman Rome.angan wun-wunin-a, aak-aakanak ngul iiy-iiyin, aak Philippi.ak, ang-ngulan wun-wuninweya. Ngan angman Philippi.ang wunan puth ma'-ko'alamaka. 13Aak Saturday.an wun-a, ngan yoon pentan aak pi'an anpalan a' ngan iiyan aak-aakanakan than pam wanch Jews punchanan aak anganan yalmathwin mee'-wuthanamanakana aak wo'uw wonk angman. A' ngan angman nyiin-nyiinan a' wik thaw-thawan thant wanch al-alantan than kaangk angan yal-yalmathwayna. 14A' wanch namp Lydia alangana nil wik ngeey-ngeey nganttamanweya. Nil aak anpal wamp Thyatira.ama nil ngook purple anangan yump-yump thanang a' sellimpung-pungan thant pam wanch yot al-alantana than wukal tha'iyangana. Nil thaa'-kuump-kuump nunang God.an a' nil Lord.angan ma'-aath-aath nunang wanchan minam yipam wik ngeey-ngeeyow nungantamana nil Paul.angan waa'-waa'a. 15Ngan kootra kuungkan nunang a' putha pam wanch yotam anangan aawuch nungantangan wun-wunin. A' nil thaw ngant ngan aakanak iiyān aawuch nungantamaka. Nil thaw, “Niiywey nath ngaantam-ngeeyaniy ngay kan-kanaman Lord.an ngangkangaman pi'-pi'ang nunangan-a, yaa, niiy pal wampān a' aawuch ngatharang ing wunāna.” Yaa, ngan puth iiyan ngul aawuch nungantamakana.
Inan Paul.ang Pul Silas.angan Jail.angan Wunpul
16Anpalana, ngan aakanakan kan-ngul iiyan aak thanan pam wanchan yal-yalmathwin thanttakam than yipam mee'-wuthanamayn God.antan. Ngan iiy-iiyan-a, a' nganan wanch koman umang uwan nunang. Nil koman inmana, oony way ngangkang pi'-pi', a' oony way alangan ma'-aath-aath nunang waa'-waa'ow pam wanch al-alantan aak wanttakan ngulan wunow thant. Anpalana, than pam wanchangan wukal thee'in nungant. Puth wukal ananganiy-a, nungantakam ke'am pi'-pi', ya'a. Puth keenkana than pam wiy al-alangan wukalangan piiyin nunang nil yipam workan iiyow thantan. Thanan wukal yotan yal-yalmathin thanttakaman nungantam wanch koman alantaman. 17Nil koman ilangana monkan-wak-wak nganang Paul.anga, a' othamayan pech-pech thant yotantana, “Pam inanganiya than God wuut pi'anan monkan-wak-wakantan nunang, a' work nungantan iiy-iiyantan, puth thanan waa'-waa'antan niiyant nil God.angan want-wanttakan kaa'-piichanathow niiyang way niiyantam anpalana,” nil wanch komanana wik yimanangan pech. 18Ngaa' thon-thonangana nil yimanangman pech-pech. Anpalana, Paul.antan man kul ngul wamp nungant, a' nil weentant a' thawant ngul oony way alantan, “Ngay Jesus Christ.an monkan-wak-wakang nunanga, ngay puth nanpalana namp nungantaman wichāng a' thawāng nungk, ‘Nint pentān wanch koman ilantaman.’ ” A' anpalaniya, nil oony wayan pent ngul nungantam anpalan a' too want nunang ngul.
19Anpalaniya, than moom nungantam ananganiy-a, man kul wamp-wampin nungant, puth thanan ngaantam-ngeeyin than ke'-ngul wukalan yal-yalmathayn wanch koman alantaman, ya'-ngula, puth oony wayan kanam pentantam. Anpalana, thanan mamin pulang Paul-a, putha Silas, 20a' kalin pulang Roman magistrates al-alantan, aawuch court aakanakan. A' than thawin magistrates al-alantan, “Pam kucham inanganiy pul Jewsa, pul aak way-wayathanpul ngampar. 21Pulan aak woyan thanttam Jews.antama waa'anpul ngant, puth ngamp inanganiya Romans, ngampiy putha aak thanttaman ke' wakimp ya'a an putha min ngampar ya'a.” 22Than pam wanch yot angan thaninan-a, than thampana kul uwin pulantweya, ya' thekanin pulant Paul.ang pulant Silas.ang. Anpalana, than magistrates anangan thawin soldiersantan ngook pulantaman thapathayn, a' piikayn pulang yukanga. 23Than ma'-yotam piik-piikin pulang, a' amanamana than jailang ngul thenchin pulang, a' thawin nungant pam jailan pi'-pi'an, “Nint min-minakam pi'ān pulang, yipam jailaman ke' pentowpul.” 24Pam nil jailan pi'-pi'an-a, nil wik inan kanam ngeeya, ke'-paal nilana ang pek kech thench pulangana jailang angan, a' tha' kont pulantangan yuk anhan paththam thenchin wuuyan pulantangan, pul ke' yipam appenchowpul.
25Aak ngaa'-menhang ngulaniya Paul.ang pul Silas.ang mee'-wuthanampul a' aak path-pathpul God.antan. Than prisoners wiy al-alangan ngeey-ngeeyin pulang. 26An-aniyangana, earthquake alangan aakan ya' wunyath, a' aak jail thampan wunyath a' thaa' ma'mangkam anangan jailangana ya' tha', a' putha chains anangan pam yotamantamana ya' keekin. 27Anpalana, pam nil jailan pi'-pi'-a, nil weepam ek, a' thaa' anangan thaa' pa'ant thath a' nil ngaantam-ngeey nungantakamana than pam ma'mangkam anangan kan yaaka' jailaman pentina. Anpalana, nil nhengk-peempan ongk nungantaman wich ke' mulathiy nungantakama, puth ya'a, 28nil Paul.an othamayan pech nungant, “Nint ke' mulathān nungkamangana! Ngan yotaman inam yippaka!”
29Anpalana pam jailan pi'-pi'-a, nil pam thon alantan pech workan iiy-iiy, nganthakweya. Nil nganthan kanan wampath nungant-a, nil erkam aakanak pek ngoonch pulantan a' ngangk winy-winynyangan iiy pulant Paul.ang a' Silas.ang a' pungkang thuch pulant. 30Anpalana, nil pentath pulang ngul a' thaw pulant, “Nipalang, ngay wanttak yumpāng yipam God.angan ngayang kaa'-piichanathow e?” 31A' pulan thawpul nungant, “Nint ngangk nungkaraman thee'ān nungant Lord Jesus.ant, a' nil Lord.angana ngul kaa'-piichanathow nintang way yot anpalan nintan yump-yumpan, a' than aawuch nungkaramangan wun-wuntana, thanang thampa nil Lord.angan kaa'-piichanathowa.” 32A' Paul.ang pul Silas.ang wik God.antam koochanathpul nungant, a' wiy al-alantan than nungantangan wun-wunin. 33A' yaam ke'anam-a, nil pam jailan pi'-pi'a, wench anangan pung-pung pulantan. A' Paul.ang pul Silas.ang kootra ngul kuungkpul nunang a' kampan nungantam anangan aawuch nungantamangan wun-wunin-a, thanang thamp kootrana kuungk-kuungkpula. 34Anpalaniya, nil pam jailan pi'-pi'a, ngoonchath pulang aawuch nungantamang, a' may aath pulang. Nil pam anman ngangkam nyiin-nyiin ngul a' kampan nungantam thampang ngangk min ngul iiy-iiyin puth than ngangk kan thee'in Jesus.ant.
35Ngaa' thonangana, than Roman magistrates al-alangan thapangumpan anangan kuchin thanang pam alantan jailan pi'-pi'a, a' than thawin nungant, “Nint kan pentathān pulang a!” 36Anpalana, nil paman iiy Paul.ant a' thawant, “Than magistrates al-alangan wik kuchin ngathara ngay kan kuchāng nipang. Nip kan iiyow, than ke'-ngul way yumpayn nipara.” 37Puth Paul.an thaw thapangumpan al-alantan, “Ngan way ke'am iiyana, than aak-ya'ang piik-piikin nganang, mee' yotantang a' ngoonchathin nganang jailangana. Puth than kaangk mee' thenchanaman pentathayn nganangan ngul ey? jailamaniy ey? An min ya'a! Ngan Jewsa, puth than Romans.angan aak Rome-punchan ngul waa'antan nganang thampang, than ke' mee' thenchanam kuchiythan nganang. Niiy thawān magistrates al-alantan pal iiyayn ngant, thanan yipam kuchayn nganang mee' yotantangan.” Paul.an wik yimanangan thaw thantana.
38Amanamaniya, than thapangumpan al-alangan wikana waa'in thant magistrates al-alantan. Than wik inangan ngeeyinan-a, than winynyang paththam mo'ina 39a' wampin pulant Paul.ang a' Silas.angan a' wik minam ngul thawin pulant, “Ayyang, ngan way iiyan nipara.” Anpalana, than magistratesangan pentathin pulang ngul, a' engkin pulant aak Philippi.an wantowpul. 40Pul kanan jailam anpalan pentpul ngul-a, pul iiypul aawuch Lydia.antamak a' pul ngangk thayanathpul thanang than Christians angman aawuch Lydia.antamangan yalmathwinana, a' pul kan-ngul wantpul thanang a' yiip iiypul aak thonaka.