Nil Jesus.angan Wanch Samaria Punchan Uw Nunang
41Than pam Pharisees al-alangan-a, wik thoo' ngeeyin pulantam, Jesus-a, John pulantamana, than pam wanch yotang ngul monkan-wakin nunang, Jesus.an, a' nil ngakang kuchek kuungk-kuungk thanang, puth John.an-a, ko'alamang thonakam monkan-wakin nunang, a' nil ko'alam anangaman kuchek ngakangan kuungk-kuungk thanang. 2Puth nil Jesus.angan ya'a, ke'am ngakangan kuchek kuungk-kuungk thanang. Ngurp nungantam al-alangan ep kuungk-kuungkin thananga. 3A' nil Jesus.angan wik ngeey thanang nunangan waa'-waa'in-a, aak Judea.an want ngul a' aak Galilee.ak ngul iiy, 4Samaria wakanang iiy-iiy.
5Nil aak Samaria.ang ngulan wamp-a, nil town manyang wamp, aak namp Sychar, aak paddock thinth. Paddock inan-a, nil Jacob.angan keenkanaman want, nhengk nungantamak, Joseph.antan. 6Aak paddockangan-a, ngak pantam angman, nil Jacob.angan keenkanaman ngak pantam thee'. Ngak pantam pek-pekaman ngak mee' pich-pich. Nil Jesus.an-a, kinch keny ngak pantam aakanakan iiy. Nil kan-ngul kemp wir peey, puth aak kecham iiy-iiy. A' angman nyiin, ngak pantam thintha. 7-8Nil-nilam nyiin, puth ngurp nungantam anangan townak kan iiyin, may yipam piiyayn thanttakam.
Anpalana, wanch thonam ngul wamp ngakak, nil aak Samaria punchana. A' nil Jesus.an thaw ngul nungant, “Ayyang, nint ngak ngath thee'āna!” 9Nil puth wanch ngulan thawant, “In nint pam Jew inan ngakak thaw-thawangan ngath ey? Ngay puth aak Samaria punchana!” (Puth than Jews al-alangan-a, yuk way min cups thakan thanttakam anman pi'-pi'in, ngakak thakaniy; than Samaria punchan ananganiya than-than, way min thanttakam pi'-pi'in. Than puth thaa' karp ke' mungk-mungkin ya'a.)
10Nil Jesus.an thawant wanch alantan, “Nint ke'am thiichangan yuk way minan nil ngeen nathan God.angan kaangk thee'ow nungk, ya'a! A' nint ngayang ke'am thiichangan nil God.angan kuch ngayang, ya'a. Nint mee'miywey-a, nint ngathar ngakakwey thawina, a' ngayan nungk ngak anan thee'ing, ngak murkanim anmanan mee' pich-pichan.” 11Nil wanchan ngul thawant, “Ayyang, nint puth bucket ke'anang a! Ngak pantam inana, pek kech a! Nint ngak wanttinpal uwān a? ngak murkanim anman mee' pich-pichana? 12Keenkanaman-a, nil wuut mangk ngamparam alangan-a, Jacob.angan-a, ngak inman mungk-mungk, ngak pantam inpalman, nil-a, nhengk nungantam al-alangan a' minh bullocks nungantam al-alangan. Ngul-a, nil ngak pantam inaniy ngant ngul want, Jacob.angan. Nint ngaantam-ngeeyangan nungkarakam ke' pam pi'an iiy-iiyangan ey? Nil Jacob.an ya'a, pam many ey?”
13Nil Jesus.an thawant, “Than wee'-wee'anangan ngak inan mungkayn-a, ngak pantam inpalman-a, ngul-ngulan-a, than putham ngul ngakam uthamayn. 14Puth than wee'-wee'anangan ngak ngatharaman mungkayn ngayan thee'āng thant-a, than puth ngakam ke' uthamayn ya'a. Ngak ngayan thee'āng thant-a, ke' ngak bul-bul yimanangan pich-pichan, ngak mee' murkanim anman, than yipam ngangk aak umpuyam wunayn God.antang.” 15Nil wanchan thawant, Jesus.antan, “Ayyang, nint puth ngak nanan thee'ānar, ngay yipam ngakaman ke'-ngul uthamāng, a' ke'-ngul yipmam wampāng iikanakan ngakakaniya.”
16Nil Jesus.an thaw ngul wanch alantan, “Nint kan iiyān pam thum nungkaramant thawān pal wampowa. A' nip ingan wampow ngathara.” 17Nil wanchan thawant, “Ngay pam thum ke'anang a!” Nil Jesus.an puth thaw wanch alantan, “Ee', kan-kanama. 18Nint puth ka'athaman pam ko'alam maayana, anpalan-a, nint pam thonantang wun-wunangan, nint puth ke'am maayan nunang, nil pam nungk ya', nint yaan wun-wunangan nungantang. Nint puth kan-kanam thaw-thawangan ngath nint pam thum ke'anangana.” 19Nil wanchan thawant, Jesus.antan, “Ngay kan ngaantam-ngeeyang nintang pam pi'an God.antama, propheta, nint puth kan thiichan ngayang. 20Than wuut mangk ngatharaman aak in punchana, Samaria.aman aak yoyk ingman matin, yipam God.antan mee'-wuthanamayn. Puth niiy Jews il-ilangana aak Jerusalem.an waa'aniy aak min paththaman mee'-wuthanamanak God.antana.”
21Nil Jesus.an thawant, wanch alantan, “Ayyang, kan in ngeeya! Ngay kan-kanam thawāng nungka. Aakan kan-kanang ngul wampana, pam wanch anangan aak yoyk ingman ke'-ngul mee'-wuth-wuthanamayn, piip God.antan, ya'-ngula, a' puth than ke'-ngul mee'-wuth-wuthanamayn nungant, aak angan Jerusalem.angan, an ya'-ngul. 22Niiy pam wanch aak Samaria.aman-a, niiy ep mee'-wuth-wuthanamaniy God.ant, puth niiy ke'am thiichan nunang, God.an, ya'a; puth ngan Jews il-ilangan ep thiichan nunang, nganan mee'-wuth-wuthanamanan nungant. Puth pam nilan wamp pam wanch kaa'-piichanathanakan thanang-a, nil aak Jews.am anpalan wamp. 23Aak inan kan-kanang wampana, than wee'-wee'anangan kaangk minam mee'-wuthanamayn nungant piip God.antan-a, than ngangkam mee'-wuthanamayn nungant, thaa'aman ya'a. Nil piip God.angan kaangk thanang pam wanch anangan yimanangan mee'-wuthanamayn nungant. Than in-inanganiy-a, nil piip God.angan kaangk thanang. 24Nil God.an nil-nil; nil puth man-yetham anman iiy-iiyan, nil puth kemp ke' pam wanchang yimanangan ke'am kal-kalan, ya'a. Than wee'-wee'anangan kaangk minam mee'-wuthanamayn nungant piip God.antan-a, than ngangkam mee'-wuthanamayn nungant, thaa'aman ya'a.” 25Nil wanchan thawant, Jesus.antan, “Ngay kan thiichang nil God.angan keenkanaman kaa'ngak ngampang pam pi'anan kuchow ngampar, than Christ.an waa'antan nunang. Nil wampowan ngampar-a, wik yot-yotam waa'ow ngampar, ma'mangkamana!” 26Nil Jesus.an puth thawant, wanch alantan, “Ngay pam inman nintan waa'-waa'angana, ngay inman wik thaw-thawang nungkar.”
27A' than ngurp nungantam anangana kan-ngul wampin. Than thathin pulang-a, thaniy-a, thaa'am ikin, puth Jesus.an wanch alantan thaw-thaw. Than ke'am thawin nungant wanch alantan, “Nint ngeenak wampan a?” A' Jesus.antan ke'am thawin nungant, “Nint ngeenak thaw-thawangan wanch ilantana?”
28A' nil wanch alanganiy-a, jaran angam want, a' kan-ngul iiy townak a' pam wanch al-alantan pech thant, 29“Niiyalang! Niiy kan ngatharang pal iiyān a! Niiy kan pam anan thathān nunang a! Nil nyiingk ngath waa'a yot ngayan way yump-yumpangan. Nil nath pam anan nil God.angan kaa'ngakan kuchowan ngampara!” 30A' yotaniy pam wanch townaman-a, tul-thuth-thuthwin, aak-aakanakaman iiyin nungant, Jesus.ant.
31Than pam wanch anangan kan-kanangan wamp-wampin Jesus.ant-a, ngurp nungantam anangan thawin nungant Jesus.ant, “Ayyang, Teacher-ang, nint kan may mungk ee!” 32Puth nil Jesus.an thaw thant, “Ngay may thampa, may niiy ke'an mee'miy ngatharam.” 33Ngurp nungantam al-alangan wik inangan ngeeyin-a, than thanttakam thaw-thawin, “May nungant yam wee'ang wampath ee?” 34Nil puth Jesus.an thaw thant, ngurp nungantam al-alantan, “Ngay mak wik ngeeyāng nunang piip God.an, nilam puth kuchanya. Ngay mak minchathāng work nilan waa'ar. Work inan-a, ke' ngay mayan mungk-mungkang yimanangan. Wik inan waa'-waa'ang thant-a, an ngay othamanga, ke' mayan mungk-mungkang.
35-38“Niiy thathān a! Pam wanch anangan nanpalan iiyantan a! Niiy nath ngaantam-ngeeyin thanang than wik God.antaman kaangk ke' ngeeyayn. Puth ya'a! Than wik God.antaman kaangk ngeeyayn, than puth ngul ngangk thee'ayn God.ant.
“Niiyalang, kan niiy in ngeeyiy a! Ngay puth kan niiyant wik kath inan waa'āng may cornama. Niiy may cornan kan thathāna! May cornan kan-ngulan menchan weeman thuthanakana. Ka'athaman-a, pam wampin, may corn kaampanakan. Puth yimanang ngulan-a, pam wiy wampayn may corn thuthanakan. Than may corn kanan yal-yalmathayn-a, than al-alangan wukalan uw-uwayn, wagesan, a' ngangk min ngul iiyayn. Wik kath inan may cornaman yimanangan wun. Pam wanch wiyang wik God.antam kanam waa'in thant, pam wanch al-alantan, puth thanan many-manyim ngaantam-ngeeyin nunang God.an. Ngul yimanangan-a, than kaangk putham wik minan ngeeyayn. Ngay puth niiyang kuchāng, niiy yipam waa'ān thant wik God.antaman. Than wik ngeeyaynan-a, than ngul ngangk thee'ayn God.ant. Anpalan-a, than ngangk aak umpuyam ngul wunayn, God.antang. Niiyan puth ngangk min ngul iiyān, pam wanch al-alantaman. Niiyan puth karpam ngul ngangk min iiy-iiyān, niiy-a, puth pam wanch anangan ka'athaman wik God.antaman waa'in thant. Niiy karpam ngangk min ngul iiy-iiyān. Niiy puth ka'athaman ke'am waa'an thant, ya'a; than wiyang waa'in thant. Niiy work thanttaman minchathāna.” Nil Jesus.an yimanangan thaw thant.
39Nil wanchan ka'athaman koyam iiy townakan-a, than pam wanch wiyangan kan-kanam ngul ngaantam-ngeeyin nunang Jesus.aniy wik nunangan wanchan ngeeyina,“Nil ngath waa'ar way yot ngayan yump-yumpang.” 40A' than kanan wampin nungant Jesus.antan-a, than thawin nungant, “Ayyang, nint nganttang ingam ke' wunin ey?” Puth nil Jesus.an-a, “Ee'” thaw thant, a' nil ma'-kucham angman wun thanttang.
41A' pam wanch yotangan kan-kanam ngul ngangk thee'in Jesus.ant, puth wik anpalan nilan thaa'-aath-aath thanang, wik min God.antam anangan. 42A' than wanch alantan thawin ngul nungant, “Ngan ngangk kan thee'an nungant ngula, wik nungkaram anpalan thonakam ya'a, puth nganam ngulan wik nungantaman ngeeyan. Ngan kan ngaantam-ngeeyanan nunang nilan wamp ngampar yipam kaa'-piichanathowan ngampang yotaman, aak umyompanaman.”
Nil Jesus.ang Puk Wuutan Miyalath Nunang
43Nil Jesus.an ma'-kucham kanan wun thanttang-a, aak Samaria angan-a, nil want thanang ngul, kan-ngul iiy, aak Galilee.ak. 44Puth nilam Jesus.an ka'athaman thaw, “Nil pam prophet aak nungantamangan wuniywey-a, pam wanch al-alangan aakan punchanang ke' ngaantam-ngeeyiythan nunangan ke' pam pi'an yimanangana, ya'a.” 45Nil Jesus.an kanan wamp aak angan Galilee.angan-a, pam wanch yot anangan umang iiyin nungant, ngangk min wunin nungant. Puth than ka'athaman iiyin aak Jerusalem.akan, may pi'anakan, Passover.an waa'antan, a' angan kan thathin nunang work pi'anan yump mee' thanttangan.
46A' nil Jesus.an iiy aak many aakanakan, Cana.akan. Aak Cana.an aak angman Galilee.angan, aak nil angman yump ngakaman wine.akan thant. Nil pam pi'an thonamana, angman wun, aak Cana thinth, aak namp Capernaum angan, nil kingantan work iiy-iiy. Puk wuut many nungantamaniy-a, way-wayam wun. 47Nil pam pi'an alangan wik thoo'an ngeey-a, Jesus.an nyiingk-nyiingkan wamp Galilee.akan aak Judea.aman-a, a' nil umang iiy nungant ngul, Jesus.ant, a' thawant, “Ayyang, nint ke' iiyin ey? Aak Capernaum.ak ey? Puth puk nhengk ngatharam way-wayam wunana, mul yip-yipam wunow. Nint ke' iiyin nungant ey? miyalathin nunang ey?” 48Nil puth Jesus.an thawant, “Niiywey work pi'an min-miniy ke' thathinwey-a, mee' niiyantanganwey-a, niiy puth ke' ngaantam-ngeeyin ngayang God.angan kuch nganyang, ya'a.” 49Nil puth pam pi'anan thawant, Jesus alantan, “Ayyang, nint pal iiy ngatharanga! Puk nhengk ngatharaman ngul uthama, way-wayam puth wunan.” 50Nil Jesus.an thawant, “Yaa, nint kan iiy a! Puk nhengk nungkaram ngul miyalamow a!” A' nil pam alangan kan-kanam wik Jesus.antaman ngaantam-ngeeya, a' iiy ngul.
51Nil iiy-iiy-aa, a' pam workan iiy-iiyin nungant-a, umang wampin nunganta. A' than thawin nungant, pam pi'an alantan, “Puk nhengk nungkaraman-a, kan miyalam ngul a!” 52Nil thaw thant, “Aak ngeenwey miyalam a?” Than puth thawin nungant, “Peetanamana, kinch kenyan-a, kemp karkanan wun-a, an ya'-ngul want nunang, kan miyalam a!” 53Nil piip-kunchangan ngaantam-ngeey nungantakaman, “Yaa! Puth an-aniyangan peetanaman-a, kinch kenyana, nil Jesus.an thawar, ‘Puk nhengk nungkaraman ngul miyalamow a!’ ” A' nanpalan-a, pam pi'an anman-a, nhengk nungantam-a, wanch thum nungantam-a, a' puth kampan nungantam ma'mangkam al-alangan ngangk ngul thee'in God.ant, min-minam ngaantam-ngeeyin nunangan.
54Nil Jesus.an ka'athaman wamp aak Galilee angan-a, nil work pi'an yump thant. Nil putham ngulan wamp aak Judea anpalan-a, nil thonangan ngul yump, work pi'an inana, puk manyan miyalath nunang.