JOHN
Lat Inan John.angan Ump
Nil Jesus-a, Ke' WIK Anman Ngampar
11Keenkanaman-a, aak ke'an yippakan wun-a, nil WIKan aak nathpalman wun-wun, murkanim anman, nilam Jesus.an. (Than Jesus.an waa'in nunang ke' WIK anman ngampar, puth nil wik God.antaman waa'-waa' ngampar, a' nilan waa'-waa' ngampar nil God.an want-wanttakan nila.) Niliy-a, ke' God anman. 2Nil angman wun-wun God.antangan. Aak nathpalmana, nil God.antang wun-wun, pul karp. 3Nil WIK alangan-a, yuk way min ma'mangkam yump, puth nil God.an thaw nungant yimanangan yumpow. Nilwey ke'an yumpiy-a, aakan-a, ya'-ya'am wuniy. An nil yuk way min ma'mangkam yump. 4Nil WIK alangan ngangk thee' ngampar man-yetham iiyanakan, a' puth-a, nilaman ke' nganth yimanangan iiy-iiyan pam wanchantan ngampar, nil puth ke' woyan engkan yumpan ngampar. 5Nil nganthaniy-a, aak ngaa'angan-a, yaam park-parkan. Nungkway aak ngaa' nyiman wunan-a, nil nganthan yaam anman pench-penchan, ke'aman uthaman, ya' anman.
6Anpalan-a, nil God.anganiy-a, pam kuchan, paman namp-a, John. 7Nil wamp yipam waa'ow thant pam wanchantan Jesus.an wampowa ke' nganth yimanangan thanta, than yotamang yipam wik ngeeyayn nunang a' ngangk punch-aakam thee'ayn nungant Jesus.ant. 8-9Nil puth Jesus.an-a, ke' nganth pi'an paththam ngampara, nilan aak iikanakan uk, woyan minan engkan yump ngampar pam wanch yotamant. Puth nil John.an-a, ke' nganth many anman, nilan wampa yipam Jesus.an ke' nganth pi'an waa'owan thant, pam wanchantan.
10Nilaniy-a, WIKaniy-a, aak ingan wun-wun. Nil yuk way min ma'mangkam yump, puth nil God.an thaw nungant yimanangan yumpow. Puth nungkway nil ma'mangkam yump-a, than pam wanch al-alangan ngoongk-ngoongkam nilan ma'mangkam yump, thanan ke'am ngaantam-ngeeyin nunang nilan wik God.antaman kal-kal, ke'am thiichin nunang, ya'a. 11Nil aak nungantamak uk, puth pam wanch kampan nungantaman thaa'nganth thanaman, than ke'am ngangk min iiyin nungant. 12Puth puungk wiy ep-paththam, ngangk min iiyin nungant, ngangk punch-aakam thee'in nungant. Thantaniy-a, pam wanch al-alantan-a, nil Jesus.an thaw thant than puk nhengk God.antam ngul weenina. 13Nil God.an ke' piip wunpanam ngamparam inangan ya'a. A' puth ke' pam wanch ngamparam inangan ma' pam wanchang puk manyan uwowpul, ya'a! An nil-nil, puth nil God.angan waa' thanang ke' puk nhengk nungantam yimanangan.
14Nil WIK anan-a, ngurp ke' ngamp yimanangan wamp, a' ngamparang aak ingan wun-wun. Ngan thathan nunang pam pi'ana a' min-minam paththam, nil ke' pam wiy yimanangan ya'a; nil puth ngangk minangam iiy-iiy thant pam wanchantan, wik kan-kanam anman thaw-thaw thant. Nil yimanangan iiy-iiy nilan puth nhengk God.antam, nhengk kaa'-thonam anman nungantam.
15Nil John.angan-a, Jesus.an waa'-waa' thant. Nil thaa'-ay thaw-thaw thant, “Pam nil inmana, ngay ka'athaman waa'-waa'angan niiyant, ‘Nil mangk ngatharangan wampow, nil pam pi'ana, ngay ya'a, ngay pam many; nil puth aak nathpalman man-yetham wun-wun, ngay ke'aman yippak aak-ngeeyangan.’ ”
16Nil Jesus.aniy-a, ngangk minangam paththam kaangk wunan ngampar, nil ngangk min-minangam iiy-iiyan ngamparak, nil ma'-yotam ma'-aath-aathan ngampang, a' yuk way min yot thee'-thee'an ngampar. 17Aak keenkanaman-a, nil God.angan wik thayan nungantaman Moses.ant waa', a' Moses.anganiy-a, pam wanchant waa'-waa' thant. Puth nil Jesus.anganiy-a, meenath ngampar nil God.an want-wanttakana, puth nil ngangk minangam iiy-iiy ngampar a' wik God.antaman waa'-waa' ngampar, wik kan-kanam anangan. 18Ngamp puth God.an ke' thathanam. Nil nhengk nungantamangan puk nungantam kaa'-thonamangan ep meenath ngampar nil God.an want-wanttakan, nilan puth God.antang nathpalman wun-wun Jesus.aniya.
Nil John.angan Wik Kuch Pam Pi'an Al-Alantan
19Anpalaniy-a, than pam pi'an Jews.antam al-alangan-a, aak Jerusalem anpalan-a, pam priests-a, puth Levites anangan kuchin thanang pam John alantan, than yipam wikakan engkayn nungant. A' than thawin nungant, “Nint in wee'a?” 20Nil John.an wik engkanangam thaw thant, nil wik ke'am thenchanaman pi'-pi', nil thaw, “Ngay pam anan ya'a God.angan keenkanaman kaa'ngak kuchowan ngampara!” 21A' than putham thawin nungant, “In nint wee' ee? Nint Elijah ey?” Nil John.an thaw thant, “Ya'am a! Ngay pam Elijah anan ya'a!” A' than putham ngul engkin nungant, “Nint in pam prophetan ey? Pam God.antaman nganan kuup-kuupanan nungant ey?” Nil John.an thaw thant, “Ya'am a!” 22Than thawin nungant, “Puth nint waa'ān ngant nint pam in wee' ee? ngan yipam wik koyaman kalān thant, nganangan kuchin. Puth nint ngantan waa'ān nungkamang pam in nint wee'-nathan a?” 23Puth nil John.an thaw, “Ngay pam anman nil pam prophet Isaiah alangan keenkanaman waa' ngayang, wik yimanangan thaw,
‘Nil paman iiy-iiyow, pech-pechow aak pintalangan wik inangan thaw-thawow,
“Niiy aak woyan min-minam paththam yumpān nungant, Lord.antana!
A' puth minam ngaantam-ngeey-ngeeyāna, nil Lord wampow ngulan-a, niiyan yipam wik ngeeyān nunang.” ’ ”
24Pam wiy anangan-a, pam pi'an Pharisees anangan angman than-thanin thanttang. 25A' than thawin nungant, John.antan, “Puth nint pam anan God.angan kaa'ngak kuchowan-a, ya' thawangan, a' nint puth Elijah anan ya' thawangan, a' puth nint pam God.antam prophet anan-a, ya' thawangan. Nint puth wanttak ngakangan kuchek kuungk-kuungkangan thanang a?” 26Nil John.an puth thaw thant, “Ngay ngakang thonakam kuchek kuungk-kuungkang thanang, puth pam thonam aak yamamana, niiyantangan than-thanan, niiy puth ke' mee'miy nunang, ya'a. 27Nil pam anmana, mangk ngatharangan wampan, puth nilaniy ep-paththam pam wuut pi'an, ngay ya'a, ngay pam many. Ngayan tha' murrukan nungantam tha'aman ke' thapathing, ya'a, puth ngay pam pi'an ya'a.” 28Than pam anangan John.antan engk-engkin-a, aak namp Bethany.ang angan. Aak Bethany.aniy-a, wonk pal kaawangk Jordan River.aman, aak angan nil John.angan kuchekan kuungk-kuungk thanang.
Nil John.angan Waa' Nunang Jesus.an Ke' Minh Sheep Manya
29Ngaa' thon ngulan-a, nil John.angan thath nunang Jesus.an anpal um nungant wampant, a' nil thaw pam wanch al-alantan, “Ayyang, niiyalang, paman nanan thathāna! God.angan kuch nunanga. Ngamp minh sheep manyiyan mul-mulathanamp nil God.angan yipam ke'-ngul ngaantam-ngeeyow way ngampan keenkan yump-yumpampa. Nil pam inana ke' sheep many ngul uthamow ngamparaka. 30Pam nil inana, ngay ka'athaman waa'-waa'angan niiyant, ‘Nil mangk ngatharangan wampow, nil pam pi'an, ngay ya'a, ngay pam manya; nil puth aak nathpalman man-yetham wun-wun, ngay ke'aman yippak aak-ngeeyangan.’ 31Ngay ka'athaman ke' mee'miy nunang pam nil wee'-nathana, ya'a, puth ngay wampang niiyant, ngakang kuungk-kuungkang niiyang, niiy pam wanch inangan aak Israel punchan, niiy yipam mee'miy nunang puth nil puk nhengk God.antaman.”
32Anpalaniy-a, nil John.an thaw thant, “Ngay Ngeen-Wiy Min God.antaman thathang uk-uk ke' minh kolat yimanangan, anpal kenyan uk nungant Jesus.ant, a' angman nungantang nyiin-nyiin. 33Ngay ka'athaman mee'miy nunang ya'a, nil Jesus.an wee'-nathana, puth nil God.an-a, nilan kuch ngayang ngakangan kuungk-kuungkāng niiyang-a, thaw ngathar, ‘Nint Ngeen-Wiy Min ngatharaman ngul thathān ukowa, a' pam thonam alantangan nyiin-nyiinow ngul. Pam alangamana, nilan Ngeen-Wiy Min ngatharaman ngul wunpow thant, ngangkangan yipam ngoonchow thanttang.’ 34Wik anangan God.angan waa' ngathar-a, nungantam Jesus.antaman-a, ngay puth kanam mee' ngayam thathang, a' puth-a, ngay inan tham waa'āng niiyant, niliy-a, puk nhengk God.antama.”
Pam Ko'alamang Jesus.an Monkan-Wakin Nunang
35Ngaa' thon ngulan-a, John-a, puth-a, ngurp nungantam kucham, than angman than-thanin, 36a' nil John.angan Jesus.an thath nunang woyanangan iiy-iiy. Nilan thaw pulant, ngurp nungantamakan, “An thathow a! Pam anan kan thathanip nunang ey? Nil God.angan kuch nunang. Nil ke' minh sheep many yimanangan ngul uthamow ngampara.” 37Pam kucham anangan-a, ngurp John.antaman pul-a, wik inangan ngeeypul-a, a' pulan-a, Jesus.an monkan-wakpul nunang. 38Nil Jesus.an weent-a, thath pulang monkan-wak-wakpul nunangan, a' engk pulant, “Nip ngeenak a?” Pul thawpul nungant, “Ayyang, Teacher-ang, nint aak wanttin wunangan a?” (Wik teacher inan-a, wik thanttamangan waa'antan Rabbi.) 39Nil Jesus.an thaw pulant, “Nip pal iiyow a! Thathow a!” Pam pul ananganiy-a, iiypul ngul nungantang, a' aak nungantaman thathpul, nil wanttingan wun-wun. Aak anganiya kinch-way-wayang four o'clockan wampin aak Jesus.antamangan. Pam pul al-alangaman-a, angman kinch ukath pul Jesus.antang nyiin-nyiinpul.
40Nil-nungant pam thonaniy-a, wik ka'athaman John.antaman ngeey-a, a' puth Jesus.antangan iiy-iiy ngul-a, an nil Andrew.anga, Simon Peter alantaman kuuncha. 41Nil erkam paththam iiy, wenk-wenk kuunch nungantamak, Simon Peter alantan, a' uw nunang, a' waa'ant, “Ayyang! Nganan pam Messiah.an kanam uwan nunanga! pam anan nil God.angan kaa'ngak kuchowana.” (Messiah.aniy-a, namp thonangan nungant Christ.) 42A' nil Andrew.angan-a, Simon Peter.an-a, wampath nunang, Jesus.antan. Nil puth Jesus.angan-a, thath nunang, a' thawant, “Nint in Simon, nhengk nungantam John.antaman. Namp nungkar-a, inan ngul wunow, Cephas.” (In ke' namp anman, Peter yimanangan waa'-waa'anamp. Wik ngamparamanganiy-a, kunttow waa'anamp.)
Nil Jesus.angan Pam Kucham Ump Pulang
43Ngaa' thon ngulan-a, nil Jesus.angan ngaantam-ngeey aak Galilee.akan iiyow. Nil iiy-a, a' Philip ngul uwan, a' thawant, “Nint ngayang monkan-wakāna!” 44(Nil Philip.an-a, aak Bethsaida anpalan wamp, aak town anman pul Andrew.ang-a, Peter.angan wun-wunpul.) 45Nil Philip.an-a, iiy, pam namp Nathanael alantan wenk-wenkant. A' nil uw nunang, a' thawant, “Ngan kanam uwan nunang, pam anman Moses.angan keenkanaman waa' ngampar lat ngench thayanangan, a' puth-a, pam prophets al-alangan waa'-waa'in nunang thampan. Nil pam alantan namp-a, Jesusa, nhengk Joseph.antamana aak Nazareth punchanantam.” 46Nil Nathanael.an thawant, “Ngul nil pam min wampiy aak Nazareth anpalan ey? An ya'a!” Nil puth Philip.an thawant, “Yaa, pal iiy a! Nint mee' nungkaramangam thathān nunang a!” A' pul iiypul.
47Nil Jesus.angan thath nunang Nathanael.an um nungantan iiy-iiy-a, a' nil Jesus.an thaw thant wiy al-alantan, “Pam nanan thathiy nunanga! Pam nil Jew min-minam paththama; nil man-thonama, man-uuy ya'a!” 48Nil Nathanael.an engkant, “Nint ngul want-wanttak mee'miy ngayangan a?” A' nil Jesus.an puth thawant, “Ngay ka'atham anman thathangan nintang, yuk kom pek-pekaman nyiin-nyiinan, nil Philip ke'aman yippak thaw nungkar.” 49Nil Nathanael.an thawant, “Ayyang, Teacher-ang, nint in nhengk God.antam a! Nint in pam pi'an a! King pam wanch aak Israel punchan al-alantamana!” 50Nil Jesus.an puth thawant, “Nint kan-ngul ngaantam-ngeeyangan ngayang ey? ngay nhengk God.antaman ey? ngay puth waa'angan nungkara ngay nintang yuk kom pek-pekaman thathangan ey? Inan work many yippak thathan, ngulan-a, an nint work pi'-pi'anam ngul thathāna.” 51A' nil Jesus.angan-a, wik thonangan ngul waa' thant, “Ngay wik kan-kanam thawang niiyant. Niiy aak in kenyan aak God.antaman ngul thathān, puth-a, niiy ngaantiyongk God.antam anangan ngul thathān thanang kenyaman matayn-a, a' puth pekaman ukayn ngatharangana, ngay pam inan nil God.angan kuch ngayang.”