Nil Oony Way Pi'an Alangan Thaach Nunang Jesus.an
41Anpalan-a, nil Jesus.an aak kikkiy Jordan anpalan wamp. Nil Ngeen-Wiy Min God.antaman ngangkang wun-wun nungantang, a' ngangk thay-thayanath nunang. A' nil Ngeen-Wiy Min God.antam alangana kal nunang aak pintalakan. 2Nilana yaam wun-wuna, kinchiya forty.akam, a' nil oony wayan wamp-wampant yipam thaachow nunang wayan yumpow. Nil an-aniyangan may ke'am mungk-mungk, a' nil meech paththam wun.
3Nil oony wayan wamp nungant Jesus.antan a' thawant, “Nint nath kan-kanamwey nhengk God.antaman-a, yaa, nint kunttow inangan epankathān thanang may breadakana.” 4Puth nil Jesus.an thaw nungant, “Ngay ke'a! Kan in ngeeyāna! Puth wik inangan lat ngench thayanangan thawana, ‘Pam wanch al-alangan mak wik ngeeyayn God.antamana. Than mayam thonakamana ke' mungk-mungkiythana, an than minam ke' wuniythan, ya'a. Than wik God.antamana mak ngeey-ngeeyayna!’ ”
5Amanamaniya, nil oony way alangan kal nunang Jesus.an, a' aak nath-nathan yotaman erkam meenath nungant, pam wanch thaa'-wantanaman thaa'-nganth thon-thonan wun-wunin. 6A' nil thawant, “Ngay moom pi'an ngul yumpāng nintang aak ingan aak umyompanamak, a' aak yot-yotam nath-nathan wun-wuntan-a, thee'āng nungkar thamp. Nil God.angan puth ngathar thee', ma' ngatharang ngul, a' puth ngay ngul thee'āng wee'antan ngayan kaangk thee'āng. 7Puth nint ka'athamana thaa'-kuumpān ngayang, a' anpalaniy-a, ngay yotam inangan thee'āng nungk, a' moom pi'an paththam yumpāng nintanga.” 8Nil Jesus.an thawant, “Lat ngench thayanangan waa'ana, ‘Niiy God anman thonakam thaa'-kuump-kuumpān nunanga, a' monkan-wak-wakān nunanga, wiy ya'a!’ ”
9Amanamaniya, nil oony way alangan Jesus.an aak Jerusalem.ak kal nunang, aawuch ngench thayan aakanakan, a' keny kech kal nunang, a' oony way pi'anan thaw nungant Jesus.antan, “Nint nathwey kan-kanam puk nhengk God.antaman-a, yaa, nint inpalan chang peyāna aakanakam pek aakaka! 10Puth wik inangan lat ngench thayanangan thawana, ‘God.angan ngaantiyongk nungantam anangan ngul kuchow thanang yipam minam pi'-pi'ayn nintanga.’ 11Wik inangan thamp thawana, ‘Than ngaantiyongk al-alangan ma'ang mamayn nintang yipmam nint ke' keekān ya'a, tha' nungkaraman ke' thuthin kunttowangan ya'a.’ ” 12Puth Jesus.an thaw nungant, “Ngay ke'a! Puth wik inangan lat ngench thayanangan thawan thampa, ‘Niiy ke' paathān piip God niiyantamana!’ ”
13Nil oony way alangan kanan ya'angaman paath-paath nunang Jesus.an-a, way wiy-wiyam thakan yipam yumpow-a, oony way alangan yaan manyam want nunang.
Nil Jesus.an Kan-Ngul Work Iiy-Iiy Aak Galilee Angman
14Anpalan-a, nil Jesus.an koyam iiy aak Galilee.akan, a' nil Ngeen-Wiy Min God.antam alangan ngangk thay-thayanath nunang, ngangk nungantangan wun-wun. Wik thoo' we'aram nungantam Jesus.antaman aak angman Galilee wakan. 15Nil churches Jews.antamakan iiy-iiy, a' pam wanch thaa'-aath-aath thanang, a' than yotamangana min waa'in nunang.
Nil Jesus.an Koyam Iiy Aak Nungantamakan
16Anpalana, nil Jesus.an aak Nazareth aakanakan iiy, aak nilan em-em puk manyaman. Saturday ngulana, nil church thanttamakan iiy, nil puth Saturday thon-thon aakanakan iiy-iiy. A' nil Jesus.an churchang than nil yipam lat ngench thayan anpalan readimpungow pam wanchantan, 17a' nil pam thonamangana lat thee' nungant Jesus.ant lat pam prophet Isaiah alangan keenkanaman ump. A' nil Jesus.angan wik inangan uw latangan a' kan-ngul readimpung:
18“Ngeen-Wiy Min God.antaman kanam wamp ngathar
a' work thee'ar wik min waa'-waa'āng thant pam wanch ngangk wayan iiy-iiyantan, wukal ke'anang thakan wun-wuntan.
Nil kuch ngayang tham ngay yipam thawāng thant pam wanch al-alantan jailangan wuntan,
‘Nil God.angan ngul pentathow niiyang,’
a' ngay yipam mee' ko'anch al-alantan thamp thawāng thanta,
‘Nil God.angan ngul mee' min yumpow niiyang,’
a' putha pam wanch al-alantan thawāng than moom wayantangan ma' iiy-iiyantana,
‘Nil God.angan ma'am piiyow thanang moom wayanang anangana.’
19A' ngay tham inan thawāng,
‘Aakan kan-kanang wampana nil God.ang kaa'-piichanathowan niiyanga.’ ”
20Nil Jesus.angan wik inangan kanan readimpung-a, nil latana kan-ngul akul-pip a' koyam ngul thee' pam alantan nil ka'athaman thee' nungant a' nil Jesus.ana nyiin ngul. Pam wanch ma'mangkam anangan aak churchang angman-a, oth thath-thathin nunang Jesus.an, 21a' nilan thaw thant, “Kinch inman-a, wik inan kan-kanam wamp, ngay pam inmana lat ngench thayanangan waa'-waa'ina.” 22Ngul amanamaniya than thaa'am ikin a' ngaantam-ngeeyin, “Wik nungantam anangana min-minam paththama,” a' thawin thanttakaman, “Ayyang, nil nhengk Joseph.antam aa! Piip-kunch pam pi'an ya' aa!”
23Nil puth Jesus.an thaw thant, “Niiy ngul nath wik inangan thawān ngathar, ‘Ayyang, nooyan-ang, nint nungkarakam miyalathāna,’ a' niiy ngul thawān ngathar thamp ngay work pi'-pi'anam mak meenathāng niiyant, aak ngatharamang ingana, niiy tham yipam thathān, niiy puth wik thoo' ngatharam ngeeyan ngay work pi'-pi'anaman yump-yumpang aak Capernaum.ang angana. Puth ngay inan thawāng niiyant: 24nil wee'angan nathwey wik min God.antaman waa'-waa'iy thant kampan nungantam al-alantan-a, than aak thonamaman wampin-a, puth thanan kaangk ke' wik nungantaman ngeeyayn. 25Ngay in kan-kanam waa'ang niiyant Elijah.antama, nil pam inman wik min God.antaman waa'-waa'. Aak keenkanama, ngak ke'am wamp kaap ko'alamaka a' putha kep sixakam may thakan ke'am em-emin ya' anman. Pam wanch puk aak thon-thonangan kan-ngul mayaman meechamin. Wanch wukalongk yotwey aak angan wun-wunin. 26Puth nil God.angan Elijah ke'am kuch nunang wukalongk yot al-alantan, aak Jews.an wun-wunin, angan ya'a, nil aak thonak kuch nunang, aak Sidon.ak, nilan yipam ma'-aathow wukalongk thonamanwey aak town Zarephath.angan wun. 27A' putha inan tham ngeeyāna: aak keenkanama pam wanch yot weech-weech thanang leprosy.an uwin. Elisha, pam nilan wik God.antaman waa'-waa', nil ke'am miyalath thanang pam wanch Jews anangan, aak nungantam anpalmana, ya'a. Niliya thonakam Naaman.an miyalath nunang, puth nil pam thaa'nganth thona, aak Syria punchan, nil pam Jew ya'a.”
28Than pam wanchangana wik Jesus.antaman ngeeyin-a, man kul wamp thant 29a' thanan wur ekin, poo-poo tha'in nunang Jesus.an aak church anpalan a' wich-wichin nunang yoon aak achantangaka, aak town thanttam angan. Thanan ke' maayiythan nunang a' pek thee'iythan nunang-a, 30puth nilaniya koyam ngul weent menh-menhang anman pent thanttang a' too want thanang.
Nil Oony Wayana Pent Pam Thonam Alantamana
31Anpalana, nil Jesus.ana aak town Capernaum.ak wamp, aak Galilee angman. Aak Saturday ngulan wun-a, nil Jesus.ana church thanttam Jews al-alantaman angan ngoonch a' kan-ngul wik God.antaman thaa'-aath-aath thanang pam wanch anangan. 32Than pam wanchang wik nungantaman ngeeyin-a, than yotaman thaa'am ikin, puth nil Jesus.ana wik min thaw-thawa ke' pam God.angan kuch nunang, wik min anman waa'-waa' thant. 33Aak church angman-a, nil pam thonamana oony way ngangkang pi'-pi'. Nil othamayan paththam pech, 34“Ayyang, Jesus-ang, aak Nazareth anpalan wampan ey! Nint pal ngeenak wampan ngant e? Nint yipam nganang pam wanch yotaman mulathān ey? Puth ngay nintang mee'miya -- nint in pam ngench thayana, nil God.angan kuch nintanga!”
35Nil puth Jesus.angan oony way anan thaa'-thayanam wak nunang, pam alantangan ngangkangan wun-wun, “Nint appapa! A' pentān nungantam ngula pam nalantamana!” Amanaman-a, nil oony way alangan paman ya' unch nunang mee' yotantang, a' anpalaniya, oony wayan-a, pent ngul pam alantaman, nil paman-a, min ngul wun. 36Than pam wanch churchang angan nyiin-nyiinin-a, an than thaa'am ikina, a' thanan kan-ngul thaw-thawin thanttakamana, “Ayyang, inan wik wanttaka? Nil pam inana wiy-wiyama! thayan paththama! Nil oony way anangan kenthan thanang, thanan puth pentin ngul ngangk pam wanch al-alantamana!” 37A' anpalaniya than pam wanchangan wik thoo' Jesus.antaman puy-puyam we'-we'arathin, aak nath-nathangan.
Nil Jesus.angan Pam Wanch Yot Miyalath Thanang
38Amanamaniya, nil churchaman pent a' nil aawuch Simon.antamak iiy ngul. Piny-kench Simon alantamana ngunthamang uwan, kemp nungantamana karkan peya, nil anman way-wayam paththam wun-wun. Thanana Jesus.ant thawin miyalathow nunang. 39Yaa, nil Jesus.ana wanch alpan alantan iiya a' angman nungantang than a' ngunthaman pentath ngangk nungantam anpalana, an nil min paththam ngul ween. A' nil ek-a, a' may ngul aath-aath thanang.
40Anpalan-a, kinch-way-wayangana-a, pam wanchangan kampan thanttam anangan weech-weechan thanang wamp-wampathin nungant Jesus.antan nil yipam miyalathow thanang, than wiyan mee' ko'anch, wiy kunp, nguntham wiy-wiyam thakan uw-uwina. A' nil Jesus.angan ma'an wunp thanttang thon-thonamantangana, an paththam yot anangana miyal ngul ween-weenin, ke'am ngul weech thanang ya'a. 41Wiyiya oony way anangan kenth thanang ngangk pam wanchantam anpalan. Kanan pentin-a, thanan othamayan pech-pechin, “Nint in pam nhengk God.antam a!” Puth nil Jesus.an thaw thant oony way al-alantan, “Niiy appap iiyāna.” Puth thanan kan mee'miy an nil Christ.ana, pam anan nil God.angan kaa'ngak aak iikanakan kuchowana.
Nil Jesus.angan Wik Min God.antaman Waa'-Waa' Thant
42Ngaa' thonangan-a, aak ngaa'-ngaa'thiyangaman-a, nil Jesus.angan aak town anan want a' aak enyanak iiy aak pam wanch ke'anangan. Puth than pam wanch yot anangan wenk-wenkin nungant. A' thanan uwin nunang a' thawin nungant, “Nint aak nganttam ke' yippak wantāna! Ingman yippak wunāna!” 43Nil puth thaw thant, “Ngay mak iiy-iiyāng villages thon-thonakana, a' pam wanch wiy anangan thamp thaa'-aath-aathāng thanang, waa'-waa'āng thant nil God.angan pam wanch yot anangan ma' nungantangan pi'ow thanang. Nil puth God.angan aakanakan kuch ngayang, ngay wik min yipam waa'āng.”
44Anpalana, nil Jesus.ana village thon-thonakan iiy-iiy aak angmana. Nil church thon-thonangan wik min God.antaman waa'-waa' thant.