Nil John.angan Wik God.antaman Waa'-Waa' Thant Pam Wanchant
31Aak an-aniyangana Tiberius.an pam pi'an paththam iiy-iiy pam wanchant umyompananant. Nil nathpalman moom pi'an iiy-iiy kaapana fifteenang want nunang. Pontius Pilate pam pi'an iiy-iiy aak Judea.aka, a' Herod pam pi'an iiy-iiy aak Galilee.ak, a' puth kuunch-kunch Philip pam pi'an iiy-iiy aak Iturea.ak putha Trachonitis.ak, nil Lysanias.ana pam pi'an iiy-iiy aak Abilene.ak, 2a' Annas a' Caiaphas moom pi'an iiy-iiypul pam priests al-alantaman. Aak an-aniyangan-a, John.iya nhengk Zechariah.antamana aak pintalang iiy-iiy. Aak an-aniyangana God.an thawant wik min nungantaman waa'-waa'ow. 3A' anpalana nil John.an pal-puy iiy-iiy aak angman River Jordan thinth, a' wik thaw thant pam wanchanta, “Way niiyan yumpaniya niiy kan-ngul wantāna! Niiy palaman weentān God.antan! A' ngay anpalana kuchek ngakang kuungk-kuungkāng niiyang, a' nil God.angan ke'-ngul ngaantam-ngeeyow way yot niiyan yump-yumpan.” 4Aak keenkanamana nil pam prophet Isaiah alangan pam John inman waa'-waa' nunang, lat ngench thayanangan ump. Nil wik inangan thaw:
“Nil pam thonam iiy-iiyow aak pintalangana, a' wik inangan pech-pechow,
‘Niiy woyan min-minam kan yumpān nungant Lord.antana,
koochanam yumpān nungant nil yipam iiy-iiyowa!
5Aak um wukar angana, chil thee'ān, achantang yumpān,
a' yoyk many a' puth yoyk pi'-pi'anama manchathāna,
a' woyan kul-kulak anangana koochanathāna,
a' woyan waya thal-thala pintanathān,
6than puth pam wanch aak umyompanaman wuntan yipam thathayn
nil God.angan pam wanch wanttakan kaa'-piichanathow.’ ”
7A' anpalaniy-a, pam wanch thaa'-wantanaman wampin nungant John alantan nil yipam kuchek ngakang kuungkow thanang. Nil thaw thant, “Niiy thuuk inangana pal ngathar ngul wampaniy ey? Niiyang wee'ang kon thayanath appenchān nungantam God.antaman e? Nil puth man kul paththam wamp nungant niiyantakana! Puth aakan kan-ngul wampan nilan um nungantangan thanathow ngampangana puth mepow ngampanga. 8Niiy kan min yumpāna! Niiyaniya meenathān niiyantakamana niiyan kan-ngul wantan way niiyan yump-yumpana. Niiy ngaantam-ngeeyaniy nil Abraham.an wuut mangk ngamparam putha, nil ke'-paal piip God.ana man kulan ke' wampiy nungant ngamparakan ey? An yimanangan ke' ngaantam-ngeeyāmpa! Puth inan ngeeyāna: kaangk nilwey-a, piip God.angan kunttow inangan epankathiy puk Abraham.antakanweya. 9Nil God.angan pam wanch thanathow ngampang-a, nil ke' pam yuk thayan ma'ang kal-kalow yimanangan, ke' yukan ump-umpiy thananga. Yuk anangan may min ke'aman kalin-a, ananganiya, nil thayanang thalokang umpow, a' keekathow thanang, a' amanamaniy-a, piw thee'ow thanang thumang ngula.”
10Than pam wanch anangan thawin nungant, “Ayyang, ngul ngan wanttak yumpān e?” 11Nil thaw thant, “Nil wee'-nathan shirt kucham thampwey-a, nil thonaman thee'ow pam wee'-nath alantan shirt ke'anangan wunan. A' nil wee'-nathan may thamp-a, nil ma'-aath-aathow wiy anangan.”
12A' anpalaniy-a, than pam wiy anangan wampin nungant John alantan nil yipam kootra kuungkow thanang. Pam inangan-a, work thant wukalan taxakan yal-yalmathin Government.akan. Than thawin nungant, “Ayyang, moom-ang, ngan wanttak ngul yumpāna?” 13Nil John.an thaw thant, “Niiy wukal tax amanamana yot-yotam ke' yalmathān pam wanchantamana, wukal wiy yipam pi'ān niiyantakamana. Niiy wukal anman thonakam maayān thanttam nil pam pi'anan thawow niiyant ngeen-ngeenan uw-uwān pam wanchantamana.”
14A' than soldiers wiy anangan wampin nungant, a' thawin nungant, “Ayyang, ngan wanttaka? Ngan wanttak yumpāna?” Nil thaw thant, “Niiy pam wanch ke' thaachān thanang wukal yipam thee'ayn niiyant. A' aak-ya'angan ke' waa'ān thanang wukal yipam thee'ayn niiyant. Niiy wukal niiyantaman uwaniy-a, an kan mina, puthamakan ke' thaw-thawāna.”
15Than pam wanch al-alangan wik inangan ngeeyin-a, than ngaantam-ngeey-ngeeyin thanttakam nil John.an nath pam anman nil God.angan keenkanam kaa'ngak kuchowan nunang. 16Nil puth John.an thaw thant, “Ngayana niiyang kootra ngakangan kuungk-kuungkanga, puth pam thonangan ngul wampowa, mangk ngatharangana, puth nilaniya ep-paththama pam wuut pi'an paththama, ngay ya'a, ngay pam manyweya. Ngayana pekam ke' thuchinga, tha' murrukan thapathing tha' nungantam amanamana ya'a puth ngay pam pi'an ya'a. Ngay ngakang thonakam kuchek kuungk-kuungkang niiyang, puth nilaniya Ngeen-Wiy Min God.antaman ngul kuchow niiyant, nil ke' thum yimanangan niiyant, ngangkangan ngoonchow. 17Nil pam inmana ke' pam gardener yimanangan wampow nil yuk nungantaman ma'ang kal-kalow yipmam wookan yaarkathow may min amanaman, a' nil yipam may min anangan yalmathow aak nungantamakana, wook way anangana, nil thumang kiingkow thanang, thum ke'aman uthaman, angan pench-penchow,” nil John.an wik yimanangan thaw.
18A' nil John.angan ke'-ngoongkam anman wik min God.antam waa'-waa' pam wanch al-alantan a' nil wik thaa'-thayanam thaw-thaw thant woyan way anpalan weentayn. 19A' nil wak-wak nunang moom pi'anan Herod.an, nil puth wanch pont-kunch ma'am piiyana nil wanch nungantakam ngul maayana, a' way wiy-wiy anangan ke'-ngoongkam yump-yump. 20A' ngul-ngulana nil Herod alangan-a, way putham puy-puyam yump, nil puth John.an mam nunang, a' jailang thench nunang.
Nil John.angan Jesus.an Kootra Kuungk Nunang
21Nil ke'an yippak jailangan wun-a, John.angana pam wanch yot anangan kootra ngakang kuungk-kuungk thananga. A' amanam ngulana an nunang ngul kootra ngakangan kuungkan Jesus.ana. Nil Jesus.an mee'-wuthanam ngula. Nil mee'an wuth-wuthanam yippak-a, aak yuw in kenyana ya' ika, 22a' nil Ngeen-Wiy Min God.antaman inpal kenyan uk-uk ke' minh kolat yimanangan wamp nungantana. A' wik inpal kenyan thaw, “Nint nhengk ngatharama! Ngay kaangk paththam wunang nungkar. Ngay ngangk min-minam paththam wunang nungkaramaniya.”
Wuut Mangk Jesus.antamana Inanganiya
23Anpalaniy-a, nil Jesus.an kan-ngul work iiy-iiy. Aak an-aniyangan-a, kaap thirty.ang want nunang. Thanan Jesus ke' nhengk Joseph.antam waa'in nunang. Thanan ngaantam-ngeeyin ke' piipiy nungantam Joseph.ana, nil ya'a, nil piipiy-emathanam. 24Nil Joseph.antaman piip inan Heli; nil Heli.antamana piip inan Matthat; nil Matthat.antaman piipa inan Levi; nil Levi.antaman piipa inan Melchi; nil Melchi.antaman piipa inan Jannai; nil Jannai.antaman piipa inan Joseph; 25nil Joseph.antaman piipa inan Mattathias; nil Mattathias.antaman piipa inan Amos; nil Amos.antaman piipa inan Nahum; nil Nahum.antaman piipa inan Esli; nil Esli.antaman piipa inan Naggai; 26Nil Naggai.antaman piipa inan Maath; nil Maath.antaman piipa inan Mattathias; nil Mattathias.antaman piipa inan Semein; nil Semein.antaman piipa inan Josech; nil Josech.antaman piipa inan Joda; 27Nil Joda.antaman piipa inan Joanan; nil Joanan.antaman piipa inan Rhesa; nil Rhesa.antaman piipa inan Zerubbabel; nil Zerubbabel.antaman piipa inan Shealtiel; nil Shealtiel.antaman piipa inan Neri; 28Nil Neri.antaman piipa inan Melchi; nil Melchi.antaman piipa inan Addi; nil Addi.antaman piipa inan Cosam; nil Cosam.antaman piipa inan Elmadam; nil Elmadam.antaman piipa inan Er; 29nil Er.antaman piipa inan Joshua; nil Joshua.antaman piipa inan Eliezer; nil Eliezer.antaman piipa inan Jorim; nil Jorim.antaman piipa inan Matthat; nil Matthat.antaman piipa inan Levi; 30nil Levi.antaman piipa inan Simeon; nil Simeon.antaman piipa inan Judah; nil Judah.antaman piipa inan Joseph; nil Joseph.antaman piipa inan Jonam; nil Jonam.antaman piipa inan Eliakim; 31nil Eliakim.antaman piipa inan Melea; nil Melea.antaman piipa inan Menna; nil Menna.antaman piipa inan Mattatha; nil Mattatha.antaman piipa inan Nathan; nil Nathan.antaman piipa inan David; 32nil David.antaman piipa inan Jesse; nil Jesse.antaman piipa inan Obed; nil Obed.antaman piipa inan Boaz; nil Boaz.antaman piipa inan Salmon; nil Salmon.antaman piipa inan Nahshon; 33nil Nahshon.antaman piipa inan Amminadab; nil Amminadab.antaman piipa inan Admin; nil Admin.antaman piipa inan Arni; nil Arni.antaman piipa inan Hezron; nil Hezron.antaman piipa inan Perez; nil Perez.antaman piipa inan Judah; 34nil Judah.antaman piipa inan Jacob; nil Jacob.antaman piipa inan Isaac; nil Isaac.antaman piipa inan Abraham; nil Abraham.antaman piipa inan Terah; nil Terah.antaman piipa inan Nahor; 35nil Nahor.antaman piipa inan Serug; nil Serug.antaman piipa inan Reu; nil Reu.antaman piipa inan Peleg; nil Peleg.antaman piipa inan Eber; nil Eber.antaman piipa inan Shelah; 36nil Shelah.antaman piipa inan Cainan; nil Cainan.antaman piipa inan Arphaxad; nil Arphaxad.antaman piipa inan Shem; nil Shem.antaman piipa inan Noah; nil Noah.antaman piipa inan Lamech; 37nil Lamech.antaman piipa inan Methuselah; nil Methuselah.antaman piipa inan Enoch; nil Enoch.antaman piipa inan Jared; nil Jared.antaman piipa inan Mahalaleel; nil Mahalaleel.antaman piipa inan Kenan; 38nil Kenan.antaman piipa inan Enosh; nil Enosh.antaman piipa inan Seth; nil Seth.antaman piipa inan Adam; nil Adam.antaman piipa inan God.