Inan Wik Kath Wanch Wukalongkantam Nilan Wukal Ma'mangkaman Thee' God.antan
211Anpalana, nil Jesus.angan aak pal-puy thath-thath aak ngench thayan angan, a' nil thath-thath thanang pam wanch ma'mangkiy anangan wukal God.antan wunp-wunpin, yuk ikang angana. 2A' anpalana, nil wanch wukalongkan thath nunang wamp-wamp, wanch inaniya, nil wukal ke'anangwey, a' nilan wukal manyiy kucham ke' two cents yimanangan ikangan wunp. 3A' nil Jesus.an kan-ngul thaw thant, “Niiy kan thathan thanang ey? Than wiyangan ep-paththam wukal pi'-pi'anam ikangan wunp-wunpin a! Nungkway nil wanch wukalongk ilangan wukal many wunp ikangan-a, an min mee' God.antangana, an nil God.angan ke' wukal pi'an thath-thathan mee' nungantangana. 4Than puth wiy ananganiya min ya'a, puth nungkway than wukal pi'anan wunp-wunpin-a, an min ya' mee' God.antangan, puth thanan ke' wukal many thee'-thee'in, thanan puth wukal tha'iy thanttakaman pi'-pi'antan, ma'mangkiy iiy-iiyantana. Puth nil wanch wukalongk alanganiy-a, wukal nungantam anangan ma'mangkam wunp ikangan, wukal anan nil ke' may piiyanakan pi'-pi'wey-a, anan wunp.”
Nil Jesus.angan Waa' Thant Aak Way-Wayam Paththam Ngulan Wampowa
5Anpalana, than ngurp Jesus.antam anangan thaw-thawin thanttakaman, “An thathāna! Aawuch ngench thayanana min-minam paththama! Puth kunttow pi'an anangana min-minam paththam thampa! A' pam wanchangan yuk way min min-miniy wamp-wampathantan nungant piip God.antan a!” 6Nil Jesus.an thaw thant, “Ee'a, niiy aawuch pi'-pi'anam inangan thath-thathaniy ey? Puth ngay inan thawang niiyanta, aak ngul-ngulana than pamangan aawuch min-minam anangana ngul wayathayn -- a' puth kunttow wuut pi'-pi'anam anangana aakang ngul keek-keekathayn.”
7A' than ngurp nungantam anangan engkin nungant, “Ayyang, moom-ang, nint wik nyiingkan thawan aak ngeen wampowa? Nil puth God.angan ngeen meenathow ngant aakan kan-kanangan wampana? aawuch ngench thayanan keekathayn a?” 8Nil puth Jesus.an thaw thant, “Niiy mee' yanth-yanth ngul iiy-iiyāna! Than pam wanch wiyangan ke' muuk-muukamathayn niiyanga! Than yot anangan thon-thonam ngul wamp-wampayna, thananiya yaan wik uuy-uuyamayn, thaw-thawayn, ‘Ngay in Jesus Christa, God.angan kuchanya,’ puth ya'a. A' wik yimanangan thamp thaw-thawayn, ‘Aak inan kan-ngulan minchowa,’ puth ya'a. Niiyan ke' monkan-wak-wakān thananga!
9“Niiy wik thoo' ngul ngeey-ngeeyān kul karkanan pek-pekwayna, puth niiyana winynyang ke' mo'āna. Than mak ka'athamana kul karkan pek-pekwayna, puth aakan ke' yippak minchowa.” 10Anpalana, nil wik inangan thaw thant, “Than moom pi'an a' pam thanttam aak thon-thonaman anman pek-pekwayna, than pam wiy anangan thaa'nganth thon al-alantan ngul iiy-iiyayn a' than pek-pekwayn. 11A' earthquake al-alangan aak nath-nathan wuny-wunyathowa. A' putha aak umyompanamana may ke'anang thak wun-wunayn, a' aak way paththam wamp-wampow thant yotamantana, weech-weechow thanang thaka aak umyompanamana. A' ngeen yaaka' natha yuk wuut pi'-pi'anam nil-nila uk-ukayn nathpal kenyana, a' winy-winyathow pam wanch ananganiya. 12Puth ya' yippaka. Than ka'athaman mam-mamayn niiyang a' way paththam yump-yumpayn niiyant, piik-piikayn niiyang thaka. Than ma'am thee'-thee'ayn niiyang pam pi'an al-alantan than yipam umang than-thanathayn niiyang churches Jews.antamang angana a' yipam jailangan thench-thenchayn niiyanga. Than wamp-wampathayn niiyang pam pi'an al-alantan puth niiy ngayangan monkan-wak-wakaniya, anpalana. 13Puth niiyan wik min God.antaman waa'-waa'ān thanta. 14Than mam-mamayn niiyang-a, a' umang than-thanathayn niiyang courtangan-a, niiyaniya kuchek ke' way-wayamāna niiy wanttakan thawāna. Ya'a, puth niiyan ke' ngaantam-ngeey-ngeeyān yimanangana, 15puth ngayana kuchek waap min yump-yumpāng niiyang, a' puth wik minan waa'-waa'āng niiyanta niiy yipam wik anangan thant ngul waa'-waa'āna. A' than pam wayanang anangan puthangkan wik ke' thaw-thawiythan niiyant, ya'a. 16Aak an-aniyangan-a, kampan niiyantam al-alangan a' ngurp niiyantam al-alangan ma'am thee'-thee'ayn niiyang pam pi'an al-alantan, nath kaath piip niiyantam al-alangan, nath kuunch niiyantam al-alangan. A' wiy inangana, mul-mulathayn niiyanga. 17Than pam wanch yotangan ngangk-wayangam kal-kalayn niiyang, puth anpalan niiy ngayangan monkan-wak-wakaniya. 18Puth nil piip God.anganiy-a, min-minam pi'-pi'ow niiyanga. 19Niiy ngangk thayanam anman monkan-wak-wakān nunang, a' amanamaniy-a, niiy man-yetham aak umpuyam wun-wunān piip God.antangana.”
Nil Jesus.angan Waa' Aak Jerusalem.an Keekow Ngula
20Nil Jesus.an putham thaw thant, “Niiy pam soldiers yot anangan ngul thath-thathān thanang thintham wampayn aak Jerusalem.akan. Than kuchwayn kaaw kuuw kungk yiip a' menh-menhang wakan a' umang paththam kal-kalayn thanang pam wanch anangan aak Jerusalem.angana. Aak an-aniyangan-a, niiy mee'miy ngul weenān aakan yaam ke'anam paththam keekow.