Wik Kath Zaccheus.antama
191Anpalaniya nil Jesus.ana kan-ngul wamp aak Jericho.angan a' anpalana puyamam ngul iiy aak Jericho wakanana. 2Nil pam thonam aak angan wun-wun, namp nungantiya Zaccheus. Nil pam inmana moom thanttam al-alantaman than wukal anangan yal-yalmathin Government.anta. Nil-thant pam inan Zaccheus.ana ma'mangkiya. 3Puth nilan kaangk Jesus.an thathow nunang, puth ya'a, nil puth pam many otanga, puth than pam wanch yotangan ngath-ngathin nunang Jesus.ana. 4Yaa, nilaniy putha kamp umputh mo' a' yukang mat nil yipam Jesus.an thathow nunang, puth nil Jesus.an woyan anpalan iiyow. 5Nil Jesus.an kanan wamp yuk thinthan-a, nil than a' mee' keny thath yukakan, a' thaw nungant Zaccheus.antan, “Ayyang, Zaccheus-ang, nint pal erkam ukān a! Ngay puth aak nungkarang ang paanthāng a!”
6A' anpalana nil pam Zaccheus.ana erkam paththam uk yuk anpalan, a' ngangk minangam kal nunang Jesus.an aak nungantamakan. 7Than pam wanch wiyangan thathin Jesus.an aawuch Zaccheus.antamakan iiy-a, thanan wik many thuuch-thuuchin Jesus.antamana. Thanan thawin, “Nil Jesus.ana pam way alantangan aawuch wunow ey!”
8A' amanamaniya Zaccheus.ana wur ek mee' pam wanch yotantangan a' thaw nungant Jesus.antan, “Moom-ang, nint in ngeeya: way min wiy ngatharam anangana ngay thee'āng thant pam wanch al-alantan than wukal-a, putha way min ke'anangana. A' putha ngay wukal koyam ngul thee'āng thant pam wanch al-alantan ngayan wukal ma'-kuch-kuchathang thanttamana. Ngaywey nath one hundred dollars ma'-kuchathangan thanttam-a, ngay four hundred dollars ngul koyam thee'āng thant.” 9Nil puth Jesus.an thaw nungant, “Nil piip God.angan ke'-ngul ngaantam-ngeeyow nintan way yot yump-yumpan, a' putha kampan nungkaram al-alantaman thamp kan-ngul kon-ngathowan way thanan yump-yumpin. Niiy kan-kanam ngul kampan nungantam Abraham.antaman weemana, niiy puth kan-ngul God.an monkan-wak-wakaniy nunanga. 10Ngay pam inman nil piip God.angan kuchanya, ngay aak iikanakan ukangan ngay yipam wenk-wenkāng thant pam wanch al-alantan, than ngangk ke'aman thee'in nungant piip God.antana, ngay yipam kaa'-piichanathāng thanang way thanttam anpalan.”
Nil Jesus.angan Wik Kath Waa' Thant Wukal Alantamana
11Anpalaniya nil Jesus-a, putha pam wanch anangan nungantangan iiy-iiyin-a, than kan-ngul iiy-iiyin aak um Jerusalem.akan. Than aak thinth ngulan wamp-wampin-a, pam wanch al-alangan kan-ngul ngaantam-ngeey-ngeeyin thanttakaman, “Aak Jerusalem.angan-a, nil piip God.angan yip-yipam mee'-engkanang meenathow nungamang nil moom pi'an paththamana, a' pam wanch yotam anangana yal-yalmathow thanang ma' nungantangan ngul iiy-iiyayna.” A' nil Jesus.angan wik kath inan ngul waa'-waa' thant, 12“Pam wuut pi'ana aak nungantam anpalan kech iiy aak thonaka, than yipam aak anganiya moom wuut pi'an paththam king yumpayn nunang. Amanamaniya, nilana ngaantam-ngeey ngul koyaman kan-ngul iiyow aakakan. 13Aak ka'athamana ke'aman yippak want aak nungantaman-a, than pam ten anangan workan iiy-iiyin nungant-a, nil ump thanang angan wampayn nungant, a' nil wukal twenty dollars thon-thonantan thee'-thee' thant pam al-alantan. A' thaw ngul thant, ‘Ngay wukal inangan thee'ang niiyant niiy yipam way min piiy-piiyāna a' putha amanamaniy niiyaniya way min anangana sellimpungān thanang wukal pi'an yipam yumpān ngathara.’ 14Puth than pam wanch aak-kunch anangana kaangk ke' nungantam pam alantaman, ya'a. Thananiya pam wiy anangan wik thampang kuchin thanang aak-aakanakan nilan wun-wun. Than kan-ngulan wampin-a, thanan thawin thant, ‘Ngan kaangk ke' nunang pam inan moom pi'anan iiyow nganta.’
15“Puth than pam wanch aakan punchanangana ep moom pi'an king yumpin nunanga. Nil koyam ngulan iiy aak nungantamakan-a, a' nil wik kuch thant pam ten al-alantan wampayn nungant nil yipam mee'miy wunowa than wukal ngeen-ngeen nathan yumpin nungant. 16Pam thonam workan iiy-iiy nungantan-a, wamp nungant, a' thaw nungant, ‘Ayyang moom-ang, two hundred dollars in nungkara. Nintan thee'an ngathar, twenty dollarsaman-a, ngay wukal pi'an ngul yumpangana.’ 17Nil puth mooman thaw nungant, ‘Yaa, an mina, nint pam min paththama! Ngay workan thee'angan nungkara, nint work minam iiy-iiyan ngathara. Yaa, ngay work wuut pi'an ep ngul thee'āng nungkar. Aak imanaman ngula nintaniya moom pi'an paththam iiy-iiyāna aak town ten anangan pi'-pi'ān thanang.’ 18A' nil pam thon ngulan wamp nungant a' thawant, ‘Ayyang, wukal nungkar ina one hundred dollarsana. Nintan thee'an ngathar, twenty dollarsaman-a, ngay wukal pi'an ngul yumpangana.’ Nil puth moom nungantaman thawa, 19‘An mina, aak imanam ngulana nintaniya moom pi'an paththam iiy-iiyān aak town five anangan pi'-pi'ān thananga.’
20“A' amanamaniya pam thon ngulan wamp nungant moom-kunchantan a' thaw nungant, ‘Moom-ang, wukal nungkaram in twenty dollarsa, nintan thee'an ngatha. Ngay puth work ke'am iiy-iiyangan, ngay ingman pi'-pi'ang yuk hankyang kathangan nungka. 21Ngayan puth mee'miy nintan kaangk wak-wakān nganang, nanpalan ngay winynyang mo'angan nungkarama, wukalan pi'-pi'angan nungkara. Nintan thampa wukal pi'an maay-maayangan pam wiy al-alantaman workan iiy-iiyantan nungkara, nungkarakaman pi'-pi'angan ngula.’ Nil puth moom nungantaman thaw nunganta, ‘Nint in pam way-wayam paththam a! 22Wik nanangan nintan thawan ngathar-a, an ngay kan mee'miy nint pam way paththaman a' puth work ke'aman iiy-iiyangana. Nint puth kan mee'miy ngay pam ilangan kaangk wak-wakāng niiyang a' puth ngay wukal pi'anan maay-maayāng thanttam pam wiy al-alantaman workan iiy-iiyantana. 23Nint puth wukal ngatharaman ngeenak thenchan e? Nint bankang wunpin wukalaniya! Nintwey wukalan bankang yaaman wantin-a, yaa, nil pam alangan bankan pi'-pi'an-a, wukal twenty dollarsan a' puth wukal wiy thampan ngul thee'iy ngathara.’ 24A' nil pam mooman thant wiy al-alantan thaw angmanan than-thanin, ‘Twenty dollarsan ma'am piiyān nunanga a' niiy pam alantan thee'ān nungant two hundred dollarsan pi'-pi'ana.’ 25Thanan puth thawin nungant, ‘An nil wukal pi'an kan pi'-pi'ana.’ 26A' nil pam mooman wik inangan thaw thant, ‘Ngay inan thawāng niiyanta. Nil pamangweya work many minam anman iiy-iiyiywey-a, yaa, ngayaniya work pi'an ngul thee'ing nunganta. Nil nathwey work minam ke'an iiy-iiyiy-a, yaa, ngayaniya thawing nungant work anpalan pentowa, a' pam thon alantan thee'ing work nungantamana.’ 27A' pam moomana putham ngul thaw thanta, ‘Than pam al-alangan ngayangan ngangk-wayangaman kal-kalin wanttin ngul iiyin e? thanan kaangk ke' pam pi'an kingan yumpayn ngayanga. Niiy pal kalān thanang ngathara a' niiy mulathān thanang ingman mee' ngatharanga.’ ”
Nil Jesus.an Ngangk Thayanam Iiy Jerusalem.akan
28Nil Jesus.an wik kanan thaw-a, nil keenk iiy kuuw aak Jerusalem.ak. 29Nil kanan ongkam-a, nil thinth-thinth ngul wamp aak village kuchamakan, aak namp al-alantaniya Bethphage-a, a' Bethanya. A' Jesus.angan ngurp nungantam kucham anangana keenk kuch pulang. 30Nilan thaw pulanta, “Nip village aakanakan iiyow. Nip angan wampowan-a, nip donkey many thathow kuuyang kathin nunang, than pam wiyangan ke'am yippakan matin nunang. Nip kuuyan thapathow, a' nip pal kalow nunang ngathara. 31Nil wee'-nathan thawow nipar, ‘Nip donkey many nanan ngeenak kalanip nunang e?’ nipan thawow nunganta, ‘Nil moom nganttamangan yaan matowana.’ ”
32Anpalaniya, pul kan-ngul iiypul, a' donkey manyan angman uwpul nunang ke' nil Jesus anman thaw pulant. 33Pul kuuyan yippak thap-thapathpulan-a, than moom donkey many alantamana thathin pulangan, a' thanan thawin pulant, “Nip donkey many nalantaman ngeenak kuuyan thapathanip e?” 34Pulaniy thawpul thant, “Nil moom nganttamangan yaan matowana.” 35Yaa, anpalaniya, pulan koyam iiypul donkey manyan kalpul nunang Jesus.antan. Amanamaniya, ngook pulantaman kenyangk wunppul donkey manyantangan, a' ngula, pul ma'-aathpul nunang Jesus.ana peyow donkey many alantangan. 36Nil iiy-iiy ngulan-a, than pam wanch yotamang ngul ngook thanttaman woyanangan wunp-wunpin, we'-we'arathin nungant Jesus.antan. Aak thant yimanangan wunana, puth nil pam pi'an.
37Than kan-ngulan thinth wamp-wampin Jerusalem.akan-a, than yoyk amanaman namp Olives.an woyan pekam kan-ngul uk-ukin. Woyan anganiya pam wanch yot anangan yal-yalmathwin thanttakaman, a' thaa'-kuump-kuumpin nunang piip God in kenyana. Wik itangam ya'a, wik othamayan thankyou thaw-thawin God.antana, puth nil Jesus.angan work pi'an min-miniy anangan yump-yump mee' thanttangana. 38Than wik inangan pech-pechin, “Pam inan King ngampar! Nil God.angan kuchana, nil mak yumpow nunang pi'ananiya! Ngamp thaa'-kuump-kuumpāmp nunanga! Than ngaantiyongk anangan in kenyan wuntana, ngangk min wun-wunayn nungantam Jesus.antamana. Ngamp yotamang God.an thaa'-kuump-kuumpāmp nunanga, nil min a' pi'an paththama!”
39Anpalaniya, pam pi'an Pharisees anangan, angman than-thanina, a' than thawin nungant Jesus.antan, “Moom-ang, nint thawān thant ngurp nungkaram al-alantan, ‘Appapa! wik ke'anang iiyayna!’ ” 40Nil puth Jesus.an thaw thant, “Ngay kaangk ke' thanan wik ke'anangan iiyayna. Ngay kan-kanam thawāng niiyanta: ngurp ngatharam inangan appapwey iiy-iiyiythan-a, kunttow inangan wik othamayan pech-pechayna!”
Nil Jesus.an Peey-Peey Aak Jerusalem.an Thath
41Nil Jesus.an aak Jerusalem thinth kanan wamp-wamp-a, nilana aak townan thatha a' peey paththam pam wanch puk al-alantaman anganan wun-wunina. 42A' nil thaw ngul, “Ngay kaangk paththam niiy mee'miy wunān niiy want-wanttakan ngangk minangam iiy-iiyān ma' nungantang piip God.antangana, an puth niiy mee'miya ya'a, an ke' niiy woyan minan ke' thathin ya'a. 43-44Aak way paththaman ngul wampow niiyant. Pam way kulliyangan ngul weentathayn aak niiyantamana a' thanan walls yumpayn niiyant niiy yipam yoon ke' pentāna a' ke' appenchān nathaniya. A' than pam wanch puk manyiy tham ma'mangkam mulathayn niiyanga a' puth aawuch niiyantam anangana, puth way min ma'mangkam anangan wayathayn thanang. Aakana way-wayam paththam ngul wunow, than yuk way min pal-puy thee'-thee'ayn, kunttow thakan than aawuchan kaach-kaachin. Niiy puth pam inan ke'am ngaantam-ngeey-ngeeyan ngayang nil piip God.angan kuchanya ngay yipam kaa'-piichanathāng niiyanga way niiyantam anpalana.”
Nil Jesus.an Aawuch Ngench Thayanakan Iiy
45Anpalaniy-a, nil Jesus.an aawuch ngench thayanak iiy, a' nil kenth thanang pam anangan than minh thakan sellimpung-pungin aawuch ngench thayanangana. 46A' nil thaw thant, “Than keenkanamana wik inangan God.antaman lat ngench thayanangan umpin, ‘Than aawuch ngench thayan ngatharaman aak pam wanchantan mee'-wuthanamanakan waa'ayn, puth niiy pam wanch il-ilangan aawuch iikanakan yalmathwuniy yipam wukal way min wiyantaman ma'-kuch-kuchathāna.’ ”
47Ngaa' thon-thonangana nil Jesus.angan pam wanch thaa'-aath-aath thanang aawuch ngench thayanangana. Than moom priests al-alantamana, a' puth than pam pi'an than wik thayan anangan thaa'-aath-aathinan-a, a' pam pi'an wiy anangana, thanana kan-ngul ngaantam-ngeeyin thanttakaman than Jesus.an mulathayn nunanga, 48puth ya'angam, than want-wanttakan mulathayn nunanga, puth than pam wanch yotamangan kaangk wik nungantaman ngeey-ngeeyayna, than kaangk wik ma'mangkam anangan ngeey-ngeeyayn nungantamana.