Ngamp Pam Wanch Ke' Thaachāmp Thanang Way Yumpanakana
171A' nil Jesus.an thaw thant ngurp nungantam al-alantan a' wiy al-alantan tham than nunangan monkan-wak-wakin, “Pam wanch wiy al-alangan ngul thaach-thaachayn niiyang way yumpanakana. 2Yaa, niiy wik kath in ngeeyāna: pam wiy al-alangan nathwey kunttow wuut pi'an pam alantan manang kathiythan nungant-a, a' anpalaniya wo'uw um-menhang aakanakan kaliythan nunang-a, a' poo tha'iythan nunang ngak thangk aakanak pekan-a, in puth way nungant. Puth nil pam alangaman nathwey pam wanch ngatharam anangan thaach-thaachiy thanang way yumpanakan-a, an aak way-wayam paththam wampow nungant, pam alantan nilan thaach-thaachan thananga. 3Niiyaniya minam anman iiy-iiyāna, wayan ke' iiy-iiyān, ya'a. Niiy putha kan in ngeeyāna: nil kampan niiyantam alangan nath way yumpiy niiyant-a, niiywey wik waa'ān nungant nilan way yump niiyanta. Nil nathwey wik ngeeyiy niiyang a' wayan wantiy-a, a' sorry thawiy niiyant-a, yaa, puth niiyanganiya kon-ngul ngathiwa. 4Nil way kanan yumpiy niiyant-a, nil nath wampiy niiyant a' thawiy niiyant ngul, ‘Ayyang, ngay in wampang nungk, ngay sorry yipam thawāng, way anpalan ngayan yumpang nungkara.’ Yaa, niiyaniya ke'-ngul ngaantam-ngeey-ngeeyān way nilan yump niiyanta. Nil nathwey engk-engkiy niiyanta ma' sevenakam kinch thonamangan-a, yaa, niiyaniya kan-ngul kon-ngath-ngathow niiyang way nilan yump-yump niiyanta.”
5A' anpalana than ngurp nungantam anangan thawin nungant Jesus.antan, “Nint ma'-aath-aathān ngananga, ngan yipam ke'-ngoongkam anman ngangk nganttamangan pi'-pi'ān nintanga.” 6Nil puth Jesus.an kan-ngul thaw thant, “Niiy minam ke' yippak ngayang ngangkangan pi'-pi'aniy ya'a. Niiy nath ngangkang manyam pi'-pi'in ngayangan-a, ke' kaanch many yimanangana, niiyan yuk ilantan puth thawina, ‘Ayyang, yuk-ang, nint aak imanaman pentāna a' wo'uw um-menhang angan kaampān nungkarakama.’ A' anpalana, yukan erkam pentow a' kaampow nungantakaman wo'uw um-menhang angan.”
Ngamp Wik Ngeey-Ngeeyāmp Nunang God.ana
7A' nil Jesus.an in-ngul thaw thanta, “Niiy nathwey pam thonam pi'-pi'in nunang workan iiy-iiyiy niiyanta puth aak ngaanhan we'-we'iy may kaampanakana, a' minh sheep niiyantam anangan pi'-pi'iy thananga. Yaa, nil paman nath wampiy workam ngulan-a, niiyan puth wik inangan ke' thawin nungant, ‘Ayyang, nint pal erkam wampāna, a' nyiinān, a' puth may mungkān ngatharanga!’ Ya'a, niiy wik yimanangan ke' thawin nunganta. 8Puth niiyana wik inangan ep thawin nungant, ‘Nint kan may kiingkān ngathara, a' amanamana nint ngook min-minam ngul ngoonchāna, a' may ngulan pal paththam kalān ngathara. Ngay may kanan minchathāng-a, amanamaniya nint ngul may mungkāna.’ 9Nil pam alangan wik inangan ngeeyiy niiyangwey-a, niiyan puth thaa'-kuump-kuumpin nunang ey? An ya'a, puth niiyam thawan nungant nil work anman iiy-iiyow niiyanta. 10Puth niiyantan yimanang thamp wunana: niiy nathwey wik yotam God.antaman ngeey-ngeeyinan-a, niiy ulp-ulpanangan ke' iiy-iiyān ya'a. Niiy thawān nungant God.antan, ‘Ngan min paththam ya'a, ngan work anman thonakam iiy-iiyanan nungkar work nintan thee'an nganta.’ ”
Nil Jesus.angan Pam Ten Anangan Miyalath Thanang
11A' anpalaniya, nil Jesus.an kan-ngul iiy-iiy aak Jerusalem.akan, nil woyan anman wak-wak menh-menhangan iiy-iiy aak Samaria-a, putha aak Galilee wakanana. 12Anpalan-a, nil Jesus.an aak village thonamang ngoonch. Than pam ten al-alangan thathin nunang Jesus.an-a, than kecham pech-pechin nungant. Thananiya penchiyang mak thanang, nanpalan weech-weech thanang. 13Than othamayan pechin nungant Jesus.antaniya, “Ayey! Jesus ey! Pam pi'an ey! Nint nganang ke' ngangk mamin ey?” 14Nil Jesus.angan ngeey thanangan-a, nilan thaw thant, “Niiy koyam iiyān thant pam priests al-alantana, meenathwun thanta than yipam thathayn niiyanga.”
Puth thanana kan-ngul iiyin, a' than thath-thathwin thanttakaman woyan ompamangan, than kemp min ngulan iiy-iiyin, wench ke'anang ngul weenin. 15Nil pam thonam ilangan thath nungantakaman-a, koyam ngul epank Jesus alantan. Nil othamayan thaa'-kuump-kuump nunang God.aniya, 16a' pungkang ngul nyiin, kuchek pekam thuch Jesus.antan, a' thaw nungant, “Nint ngayang minam paththam ngul yumpana, ngay puth palam iiyang nungka, thankyou thawāng nungkara!” Nil pamaniy-a, aak Samaria punchana. 17A' nil Jesus.an thaw ngul ngurp nungantam al-alantan, “Ngay pam ten anangan miyalathangan thananga, puth pam wiy anangan wanttin e? 18Nil pam thonam inan aak Samaria punchana ep palam wamp ey? thaa'-kuump-kuumpow nunang God.aniy ey?” 19A' Jesus.an puth thaw nungant pam alantan, “Nint wik ngatharam ngangkangan pi'-pi'angana, nanpalan nil God.angan miyalath nintang, a' ngangk min yump nintang. A' kan ekāna a' nint kan iiyān aak nungkaramaka.”
Nil Jesus.an Palam Ngul Wampowa
20A' than pam Pharisees anangan engkin nungant Jesus.antan, “Nil God.angan aak ngeen nathan meenathow nungamang nil moom pi'an paththaman iiyow a?” Nil puth Jesus.ana thaw thant, “Nil engk-engkanangan ke' meenathiw nungamang nil moom pi'an want-wanttakan iiy-iiyan. 21Niiy wik yimanangan ke' thaw-thawāna, ‘Ee'a, nil inman paththama!’ or ‘Nil nanman wampa!’, an ya'a. Puth niiy kan thathan mee' niiyantamangan ngay want-wanttakan iiy-iiyanga, niiy nanpalan kan-ngul mee'miy weenan nil God.an moom wuut pi'an paththamana.”
22A' amanamaniya nil Jesus.an thaw thant ngurp nungantam al-alantan, “Aakan ngul wampowa, niiyan puth thaw-thawān, ‘Ngan pal ey! ma'-thonaman thathin nunang pam anan nil God.angan kuchana.’ Puth ya'a, niiyan ke'-ngul thathān ngayanga! 23Than pam wanch wiy anangan thaw-thawiythan niiyanta, ‘Ayyang, niiy kan nan thathāna, nil nanmana,’ or ‘Niiy kan an thathāna, nil anmana!’ Puth ya'a. Niiy ke' iiyān thanttang thathanakana. 24Ngay palam erkam ke' ngaay yimanangan palaman wampānga a' yuw in kenyan park-parkathāng. Pam wanch yot yompanamangan mee' thanttamangan thathayn. 25Puth ka'athamaniya, than pam wanch way paththam ngul iiy-iiyayn ngathara. Than pam wanch inangan man-yethaman iiy-iiyantan-a, than man-mangkam ngul thee'ayn ngathara. 26Ngay putham ngulan palaman wampāng-a, pam ngay inman nil God.angan kuch ngayang-a, aniy-a, ke' keenkanamana aak an-aniyangan nil Noah.an wun-wuna, aakan yimanangan wun-wunowa. Than pam wanch anangan ke'-ngoongkam anman iiy-iiyin, ke'am wik ngeey-ngeeyin, ya'a. Aakan-a, yimanangan wunowana. 27Than pam wanchangana may yot-yotam mungk-mungkin, than ngent-ngentwin thakan, nil yimanaman, aak-aakanakaman Noah wee'anangan pek ngulan ngoonchin chukkun wuut pi'anangana. A' kaap wuut pi'an paththam wamp thant, aak umyompanamana luu' pip, ngakanganiy. A' pam-a, wanch-a, puk manyiy ma'mangkaman ngakang thuch-thuchin aak umpuyam. 28Aak anan yimanangan wun nil pam Lot.an iiy-iiy keenkanamana. Pam wanch ma'mangkamangan may-a, minh thakan mungk-mungkin, way min thakan piiy-piiyin, putha way min thakan sellimpung-pungin. A' than may kaanch anangan kaamp-kaampin mayakan a' putha aawuch yot kaach-kaachina, nil yimanaman. 29A' nil pam Lot.angan aak Sodom.an kan-ngulan want-a, nil piip God.angan thum nganth pi'an inpal keny kuch a' yuk ke' kerosine yimanangan kuch thama, erkam pench-penchin, kuchek thanttang thinth angman keek-keekin, a' pam wanch puk yotam anangan uthamin ngula. 30Ngay putham ngulan wampāng-a, aakana yimanangan wunowa. Aak an-aniyangana, ngay ngul meenathāng ngathamang pam wanch puk manyiy ma'mangkamantan ngay pam inman God.angan kuch ngayanga.
31“Aak an-aniyangana, nil nath pam yoon nyiin-nyiiniy angman aawuch nungantamang thinthan-a, yaa, nilan putha koyaman pek ke' ngoonchiy yuk way min anangan yipam maayow thananga, ya'a. Nil pam nathwey work iiy-iiyiy aak garden angan-a, yaa, nilaniya puth koyamana pek ke' ngoonchiy aawuchangan way min nungantam anangan yipam maayow thanang ya'a. 32Niiy puth anan thamp ngaantam-ngeey-ngeeyān wanch Lot.antamana. Nil koyaman weent thathanakan a' nilan utham ngul. 33Nil wee'ang nungantakaman min-minakam pi'-pi'ow-a, nilan puth ngangk minangam ke' iiy-iiyowa. Nil wee'ang pam wanch wiy anangan minaman pi'-pi'iy thanang-a, yaa, puth nilana ngangk min-minangam paththam iiy-iiyowa. 34Aak an-aniyangana ngay palam ngulan wampāng-a, pul pam kucham nath bedang karpam weep thayan wun-wuniypula. Nil piip God.angana pam thonam nath ep kaliya, nil pam thonangananiya angman nath wantiy nunang bedang angman wun-wuniya. 35A' wanch kuchamwey natha work karpam iiy-iiyiypula may kaanch anangan nhanth-nhanthathiypul. Nil piip God.angana wanch thonam ep nath kaliy nunanga, nil wanch thonaniya angman wantiy nunanga workan iiy-iiyiya.”
37A' thanan puth thaw-thawin nunganta, “Ayyang, moom-ang, aak wantting aak yimanangan wampow e?” Nil puth Jesus.an thaw ngul thant, “Niiy waath anangan thathaniy thanang aak thonamangan yal-yalmathwuntan-a, yaa, niiyan puth mee'miy minh mul aakanakan yal-yalmathwuntana. Yaa, niiy yimanangana ngul thiichāna ngay aak ngeen nathan wampānga pam wanch anangan ngulan than-thanathāng thanang um ngatharangana.”