Nil Jesus.angan Pam Alpanan Miyalath Nunanga
141Ngul-ngulana, aak Saturday.an wuna, nil Jesus.an aakanak iiy may yipam mungkow moom pi'anantanga moom thanttam Pharisees al-alantamana. Aak Saturday.ana ngench thayan paththam wunan thant Jews.antana, puth work ke'am iiy-iiyantana. Yaa, than pam yotam al-alangana Jesus.an thath-thathin nunang nil want-wanttak nath yumpowa. 2Nil pam thonam aak angman wun-wun yangk-a, a' putha ma' punth puulk-puulkiy weem. Nilaniy-a, Jesus.ant wamp. 3A' nil Jesus.an thaw pam Pharisees al-alantan putha pam wiy al-alantan tham wik thayan Moses.antaman thaa'-aath-aathin, “Ayyang, ngul an min ey? ngamp alpan anangan miyal-miyalathāmp thanang aak Saturday.angan ey? nath ya' yaaka'a. Wik thayan want-wanttak thawan e?” 4Pam yotam anangana puth popam anman nyiin-nyiinin, a' ke'am anman wik thaw-thawin nungant Jesus.antan, ya'a. Amanamana nil iiy ngul pam alpan alantan a' miyalath nunang. A' thaw ngul nungant, “Nint kan iiyānwey aak nungkaramaka.” 5A' nil thaw thant yotam al-alantan, “Niiy kan in ngeeyān a! Puk nhengk niiyantamwey-a, nath minh bullock niiyantam anangana ngak pantamang keekiythan aak Saturday.angan-a, ngul niiy wanttak yumpin e? An niiy erkam iiyina aak anman Saturday.ana a' wich-wichin thananga ngak pantam anpalana.” 6Puth than koyaman ke'am thawin nungant, ya' paththam, than puth wik want-wanttak thawiythan nungantana?
Niiy Pi'an Ke' Yumpwun, Mochan Anman Iiy-Iiyāna
7Amanamana than kan-ngul nyiinin may ngul mungkayna. Nil Jesus.angan kan-ngul thath-thath thanang pam anangan aak umputhan nyiin-nyiinin than yipam may keenk-keenk mungkayna, ke' pam pi'an yimanangan. 8A' anpalana nil Jesus.angan wik kath inan ngul waa'-waa' thant, “Pulweya pam kompa puth wanch komanangan ngentwiypul-a, pulana nath umpiypul niiyanga may pi'an pulantangan mungkāna. Niiy iiyin ngulan-a, niiyana aak thinth pulantangan ke' nyiinin ya'a. Ngul-ngulana, nil pam pi'an paththam nath wampiya may pi'anakan, 9a' anpalana nil moom may pi'anan pi'-pi'ana, nath wampiy niiyant a' thawiy, ‘Ayyang, nint ekāna! Pam nil pi'an nangan mak nyiinowa.’ A' niiyaniya ngul-nyaa' ngul weenin a' kecham ngul nyiin-nyiinin pulantamana. 10Yaa, niiywey may pi'anakan iiyānan-a, niiyana ke' nyiinān aak pulantangan thintha, ya'a, chil kech-kech nyiinān. Anpalana, nil moom may pi'anakana nath wampiy niiyant a' thawiy niiyant, ‘Nint kan thinth-thinth nyiinān pulantanga.’ A' than yotamangan thath-thathayn niiyang niiy thinthaman nyiin-nyiinaniy pulantangan-a, yaa, thanan mee'miy ngul niiy pam pi'an paththama. 11Ngay in kan waa'ang niiyant: nil nath pamangwey ulp-ulpathiy nungantakaman-a, nil piip God.angan ngul meenathow nungant nil pam pi'an paththam ya'a, anpalana nil pamana ngul-nyaa' ngul weenow. Pam wee'angwey ke' nath ulpathiy nungantakaman-a, nil piip God.angan thaa'-kuump-kuumpow nunanga yipam pam pi'an paththama waa'owan nunanga.”
12Anpalana nil Jesus.an kan-ngul thaw pam Pharisee alantan, pam alantakaman nil Jesus.antan ka'athangaman thaw nil may nungantangan mungkowa, “Niiy may pi'anan yumpān-a, niiyan kampan niiyantam a' puth ngurp niiyantam anangan a' puth pam ma'mangkiy anangan kaangk umpān thanang, thanan yipam puthangkan niiyang ngul may pi'an thanttamakan umpayn may thanttangan yipam mungkān. Niiyan puth yimanangan ke' ngaantam-ngeeyāna. 13Niiywey may pi'an yumpān-a, yaa, niiyana thaa'-palathān thanang than wukal ke'anangan iiy-iiyantan, a' putha pam wanch kunp anangana, putha ko'anch anangan a' alpan wiy anangan thama. Niiy ngangk minangam aath-aathān thanangweya. Thanan may minh ke' aathiythan niiyang puthangkana, ya'a, puth kana, niiyaniya ngangk min paththam ngul iiy-iiyāna. 14Ngul-ngulana nil God.angan pam wanch min anangan mulaman ekathow ngulan-a, nil min paththam ngul iiyow niiyant.”
Nil Jesus.angan Wik Kathan Waa' Thant May Pi'anan Mungkayna
15Pam thonam nyiin-nyiin thanttangan-a, nil wik inangan ngeeya, a' thaw nungant Jesus.antan, “Than pam wanch anangan may pi'an God.antangan mungkayn aak ing kenyan-a, an ngangk min-minam paththam wun-wunow thanta.” 16A' nil Jesus.angan wik kath inan waa' thant, “Nil pam thonamang may pi'an kiingkowa. A' nilana thaw pam wanch yotantan puth aakanak iiyayn aawuch nungantamakan may pi'anan yipam mungkayna. 17Ngul-ngulana, may minh yotam kanaman penchin-a, nil pam thonam workan iiy-iiy nungant-a, kuch nunang pam wanch al-alantan yipam thawow thant, ‘Ayyang, niiyalang, may minh menchan ngula. Niiy pal kan iiyāna.’ 18Puth than pam wanch anangan kaangk ke' iiyayna. Nil pam thonam inan thaw nungant, ‘Ayyang, nyiingkana ngay farm piiyangan, ngay puth naakanakan ke' iiying may pi'anakana, ngay yipam koyam iiyānga a' farman thathāng.’ 19Nil pam thonangan ngul thaw nunganta, ‘Nyiingkana ngay minh bullocks ten anangan piiyangan thanang, ngay puth koyam iiyāng a' thathāng thananga nath minam yaaka'a, nath ya'a. Ngay naakanakan ke' iiying may pi'anakana.’ 20A' pam thonangan inan thawant, ‘Nyiingk inana ngay wanch ngentangana, ngay naakanakan puth ke' iiying may pi'anakana.’ 21Amanamaniy-a, nil pamana koyam ngul iiy moom nungantamakan a' waa' nunganta, than kaangk ke' iiyayn may pi'anakana. Nil moom alangana wik inangan ngeeyan-a, an paththam man kul wamp nungant, a' thaw ngul, ‘Puth kan wantān thananga. Nint erkam iiyān aak town wakanana, a' pam wanch wukal ke'an anangan pal wamp-wampathān thanang may pi'anakana, puth pam wanch kunp anangan, a' putha pam wanch ko'anch anangan, puth wiy anangan thamp thaa'-palathān thanang mayakana.’ 22Nil pam alangana wik erkam paththam ngeey nunang moom nungantaman a' pam wanch yotam wampath thanang may pi'anakan. Amanamaniya paman thaw moom nungantam alantana, ‘Ngay kanam wampathang thanang in-ngula puth aak inan yippak pech we'ar wunan pam wanch wiy anangan thamp pal wampayn mayakana!’ 23A' nil moom nungantaman thaw nungant, ‘Nint putham iiyāna, pam wanch wiy al-alantan aak pungk-pungkalang aak thaa' yoonan wuntan a' thawān thant pal erkam paththam wampayn may pi'anakana. Nint pal wampathān thanang aawuch ngatharam iikanakana yipam pam wanchangam aakan ngathowa. 24Ngay in thampan waa'ang nungkar: pam wanch yotam anangan ngay ka'athangaman thaa'-palathang thanang ke'aman wampin ngathara, than al-alangan ke'-ngul may mungkayn ngatharangana, ya'a!’ ”
Niiy Ke'-Ngoongkam Anman Monkan-Wak-Wakān Ngayangana
25Anpalana, than pam wanch thaa'-wantanam angman iiy-iiyin nungantang Jesus.antangan. A' nil koyam ngul weent thant a' thaw thant, 26“Nil pam wee'ang nath monkanan-wak-wakow ngayangan-a, yaa, nilaniya min-minam paththam kaangk wunow ngathara, kampan nungantam al-alantan chil-chil kaangk wunow thant, kaath-a, piip-a, puth kuunch nungantamantan, wanch thum a' putha puk nungantam al-alantan thama. Nil ke'wey min-minaman kaangk wunow ngathar-a, yaa, nilana puth ngurp ngatharam ke'-ngul iiyow ya'a. 27Nil wee'angweya kaangk monkanan-wak-wakow ngayangan-a, yaa, puth nilaniya ke' ngaantam-ngeey-ngeeyow nungantakamana, ya'a, nil kon-ngathow nungantakamana. Pam wanch wiy al-alangan nath mulathayn nunanga, ke' ngayang ngulan mulathayn, yuk wuuyanangan waanchayn ngayanga. Nungkway than wiyangana nath mulathayn nunang-a, nilana ngayang anman monkan-wak-wakowa. 28Niiy nganyang nath monkan-wak-wakān-a, yaa, niiy kan ka'athaman min-min ngaantam-ngeeyāna, niiy nath kan-kanam monkan-wak-wakin ngayanga, nath ya'a. Wik kath inan ke' yimanangan wunana. Nil pamang nath aawuch pi'an kaach-kaachiy-a, nil ka'athamana ngaantam-ngeeyow wukal ngeen-ngeen nath thee'ow aawuchakana a' nil wukal nungantam anangana countimpungow yipam ngeen-ngeen nathan thee'ow aawuch aakanakan. Nil wukal pi'anan pi'owwey-a, an ep-paththam thawow thant aawuchan kaachayn nungant. 29Nil nath wukal manyanwey pi'-pi'iy-a, nath aawuchan ke'-ke' minchathiythan nungant, ya'a, chip-chipam nath wantiythan ngula. 30Anpalana ngurp nungantam al-alangan thaa'-thengk-thengkathiythan nunang.
31“A' inan wik kath thonangan ngul waa'āng niiyanta. Nil pam pi'an alangan nath soldiers yot anangan pi'-pi'iy thanang, ten thousand anangan. A' nil nath kecham thath-thathiy pam pi'an thonan a' puth soldiers nungantam thaa'-wantanam twenty thousand anangan pal iiy-iiyiythan a' kulak wenk-wenkiythan thanta. Puth nil pam pi'anan erkam ke' thawiy soldiers nungantam al-alantana umang kalayn thanang, ya'a. Nil kan ngaantam-ngeeyiy than pam soldiers nungantam al-alangan ngul nath ma' thee'ayn thant, ya' natha. 32Nil nath ngul ngaantam-ngeeyow nungantakaman, ‘An than ngampang piikayn paththama, ngamp thant inangana puth pam ko'alamweya.’ Yaa, anpalana, nilan pam work nungantan iiy-iiyana anan kuchiy nunang wik thaman pam pi'an thon alantan, ‘Ngamp ke'-ngul pekwumpa! Ngan yuk way min ngul thee'ān niiyanta, niiy yipam ngangk min iiy-iiyān nganta!’ ” 33A' nil Jesus.an kan-ngul thaw, “Niiy nath monkanan-wak-wakān ngayangan-a, yaa, niiy ka'athamana kan min-minam ngaantam-ngeey-ngeeyāna, niiy nath kan-kanam paththam monkan-wak-wakān ngayanga, nath ya'a. Niiy nath way min niiyantamakan kaangk wun-wunaniya puth ngangk ench ke' nath want-wantin thanang a' kampan niiyantam anangan-a, yaa, niiy puth pam wanch ngatharam ke'-ngul iiy-iiyin, ya'a.
Nil Wik Waa' Thant Nguntham Anpalana
34“Niiy kan in ngeeyāna. Ngunthamana min minhakana, puth nguntham nath way ngulan wunow-a, niiy ke'-ngul koyaman min yumpin ya'a, niiyan putha kan-ngul thee'ina. 35Nungkway niiy ngunthaman aakangan kaampin thanang-a, anpalaniy-a, nath nenchanathin manure bullockantangana yuk plants thakan yipam minam emayn-a, puth ya'angam kaamp-kaampin, ana nguntham way ilangan ke' ma'-aathiy thanang emanakan ya'a. An ya' way paththama, yaa, niiy puth wik ngatharam kanam ngeeyan aa? Yaa, niiy kan min-minam ngaantam-ngeey-ngeeyān thananga, ke' iiy-iiyān ke' nguntham wayanang yimanangan ya'a.”