Way Niiyan Yump-Yumpan-a, Kan-Ngul Too Wantāna
131Aak an-aniyangan-a, than pam wanch wiyangan waa'-waa'in nungant Jesus.antan than pam wiy aak Galilee punchan anangan iiyin aak Jerusalem.akan than yipam minh kiingk-kiingkayn aawuch ngench thayan angana, a' yipam piip God.antan thee'ayn. Than yippak minhan kiingk-kiingkin-a, nil pam pi'an Pilate.ana thaw thant pam soldiers nungantam al-alantan mulathayn thanang, a' than mul-mulathin thanang, a' putha chaapar thanttamana angman nenchanathin chaapar minh alantangana. 2A' amanamana nil Jesus.an kan-ngul thaw thant, “Niiy ngaantam-ngeeyaniy thanang pam Galilee punchan anangan ke' way-wayam paththam iiy-iiyin ey? nanpalan than mul-mulathin thanangan ey? Niiy want-wanttak ngaantam-ngeeyaniya? Pam wanch aak Galilee punchan man-yethaman yippak iiy-iiyantan than way-wayam paththam ke' ya' ey? 3An ya'a. Niiy nath way niiyantaman ke' wantinwey-a, yaa, an niiy thamp uthamāna. 4Puth niiy want-wanttak ngaantam-ngeeyaniy thanang pam wanch aak Siloam punchan anangan aak pi'an Jerusalem angman wuntana? Aak angmana than pam wanch eighteen uth-uthamina. Aawuch achantangan pal kenyuw keek thanttang a' yotam anangan mulakam maak thananga. Niiy ngul ngaantam-ngeey-ngeeyaniy thanang pam wanch eighteen anangan ke' way-wayam paththam iiy-iiyin ey? nanpalan mul wunin ey? Niiy want-wanttak ngaantam-ngeeyaniy thanang pam wanch Jerusalem punchan anangan man-yethaman yippak iiy-iiyantana, than pam wanch way-wayam paththam ke' ya' ey? 5An ya'a. Ngay inan thawang niiyanta: niiy nath way niiyantam ke'an wantinwey-a, yaa, niiy thamana uthamān.”
In Wik Kath Yuk Komangan May Ke'aman Kal
6A' nil Jesus.angana wik kath inan thonangan ngul waa' thanta, “Nil pam thonamanga yuk kom kaamp aak garden nungantam angmana. Yuk koman ongk ngulan em-em-a, nil paman may komak ngul wenk-wenk, a' ya' thath-thatha. 7Anpalana nil thaw pam alantan workan iiy-iiy nunganta, ‘Ayyang, wik kath in kan ngeeyāna, ngay kaap ko'alamakam yuk ilantan ya'angam wamp-wampangana ke' may thampang ngul uwingane, puth ya'a, may ke'am kal-kalana. Nint yuk inana thalokang umpāna, a' puy thee'ān. Aak ngaanh minang ngulan ngeenak than-thaniy yuk inaniy e?’ 8A' nil paman thawant moom alantan, ‘Ayyang, ngay kan aak ngaanhan mich-michathānga, a' manure minh bullockantam anangan ngul wunp-wunpānga, a' weentathānga yuk think wakananga, minam yipam emowa. A' nintan kuupāna, kaap thonamangan mak wantowana. 9Anpalaniy-a, yuk ilangan may yot nath kal-kaliywey-a, an mak wunowa, ke' umpāna. May ke'an nath kaliywey-a, yaa, an ep-paththama nint thawān ngathar ngay yipam yukan umpāngana.’ ”
Nil Jesus.angan Wanch Alpanana Miyalath Nunang Aak Saturday.angan
10Aak Saturday ngulan wun-a, nil Jesus.an aak church thanttam Jews.antamang ngoonch a' kan-ngul thaa'-aath-aath thanang pam wanch anangan wik min God.antaman waa'-waa'a. 11Nil wanch thonam angman churchangan ngoonch oony way ngangkangan pi'-pi'a, oony way ilangan man-mangk eep yump nunang. Nil wanchanweya eep-eep anman iiy-iiy, koochanaman ke'am iiy-iiya, ya'weya. Aak nathpalman weech-weech nunang kaap eighteenangaman want nunanga. 12Nil Jesus.angan thath nunangan-a, nil thaw nungant, “Ayyang, nintang ke'-ngul weech-weechow, ya'a, ke'-ngul eep-eepan iiy-iiyān, ya'-ngula.” 13A' nil Jesus.angan ma' nungantamangan mam nunanga, a' yaam ke'anam paththama miyal ngul ween. Wanchana koochanam ngul paththam thana. Nil wanchana ngangk min paththam ngul ween, a' nilana piip God.an thaa'-kuump-kuumpa nunanga.
14Amanaman-a, pam thonam inan nil moom pi'an aak churchan pi'-pi'an-a, man kul wamp nungant Jesus.antan puth anpalan wanchan miyalath nunang aak Saturday.angan aak ngench thayanangan. A' nil pam mooman thaw pam wanchantan, “Ngamp yotaman-a, kinch sixangan thonakam work iiy-iiyanamp, aak Saturday.angan ya'a, an ngench thayan ngampara. Niiywey kaangk Jesus.angan miyalathow niiyangan-a, yaa, aak Saturday.an ke' wampān nungant, aak kinch wiy al-alangana ep-paththam wampān nunganta.” 15A' nil Lord Jesus.an thaw nungant, “Niiy inangan yaan muuk-muukamaniya, man-kucham iiy-iiyaniya. Niiy kan in ngeeyāna: niiy nath yaraman thampa, nath minh bullock thamiy-a, yukang nath kath-kathin-a, yaa, niiyan thapathin thanang, a' ngak mungkanak kalin thanang. Nungkway aak Saturday.angan-a, niiy kalin thanang than ngak yipam mungkayn. 16Puth nil oony way alangana wanch inaniy kaap eighteenakam way-wayathan nunanga, puth nilwey kampan nungantam Abraham.antama. An ngul min ngath ya' ey? ngayan nunang ma'-aathāngan ey? aak Saturday.angan ey? a' miyal puthan yumpāngan ey?” 17Nil Jesus wik inan thaw thant-a, nil moom churchakana putha pam wiy anangan than puth ngangk-wayangaman kal-kalin nunangan-a, than ngul-nyaa' ngul weemin. Than pam wanch wiy anangana an ep ngangk kuup-kuupamin, nil puth Jesus.angan work pi'an yump-yump, alpan anangan miyal-miyalath thanang.
Nil Jesus.angan Wik Kath Ngul Waa' Thant, May Kaanchantamana A' May Kurkantamana
18Nil Jesus.an thaw ngul thant, “Nil God.angan pam wanch yotam ngul yal-yalmathow thananga, ma' nungantangan yipam pi'-pi'ow thananga. Aak want-wanttak yaaka' wunowa? Aak inan nath ke' ngeen wunowa? 19Yaa, ngay kan in wik kath waa'āng niiyanta aakan want-wanttakan wunowa. Nil pam thonamang may kaanch many pattakam thonam kala a' garden nungantamang angan kaampan. Amanamaniya yiikanan kan-ngul pent a' em-em ngul yuk pi'anakama. Minh panch thaa'-wantanam nath-nathpalan wamp-wampin yuk aakanakamana a' wurp ngul yump-yumpin thanttakaman yuk punth yotamang angana.
20“Thon ngaya kan in waa'āng niiyant aakan want-wanttakan wunow. 21An ke' wanchang yimanangan may kurk may aachichangan nenchanathantan, may palowan yipam ulpow pi'anakama. Ngamp puth ke' thiichimp nil may kurk anana pek-pekam workan iiy-iiyan, puth anpalaniya may palowana ulp-ulpan ngula.”
Nil Jesus.angan Waa' Thant Thaa' Many Ulathan Anpalana
22Anpalana nil Jesus.angana want thanang a' nilana woyan wak-wak aakanak um Jerusalem.ak. Nil Jesus.an woyan omp-ompamang wamp thant villages thon-thonangan, a' towns thon-thonangan a' thaa'-aath-aath thanang. 23A' nil pam thonam inan thaw nungant, “Ayyang, moom-ang, nil ngul piip God.angan pam wanch ko'alam inangaman thonakam kaa'-piichanathow thanang ey? ngamp yotam wiy inangan ya' ey?” 24Nil puth Jesus.an thaw nungant, “Niiy kan paath-paathāna thaa' door many ulathan wakanan ngoonch-ngoonchāna aak nil God.an wun-wunana, niiyan yipam ma' nungantang wun-wunāna. Ngay inan thawang niiyanta: ngul-ngulana than pam wanch yotam ke' ngoonchanakan thaa' door ulathan wakanana, puth ya'angama, thaa' dooraniya ngathanam anman wun-wunow thanta. Niiy wik inangan min-min ngeeyāna: 25nil thonamang thonak aawuch-kunch anan ekow a' thaa'an ngathow. Aak an-aniyangana niiy nath ke'an yippak pek ngoonchina puth nath yoon angman than-thanina, niiy nath thaa'an othamayanan piik-piikin a' thawin ngul, ‘Lord-ang, nint thaa'an ngant ke' tha'in ey? ngan puy ngoonchān nungkara!’ Nilan puth thawow ngul niiyanta, ‘In niiy wee'-wee'anangan e? Ngay ke' mee'miy niiyanga, ya'a.’ 26A' niiyan nath wik inangan thawān nunganta, ‘Ngan puth nungkarang may minh mungk-mungkan a' nint nganang thaa'-aath-aathan aak towns nganttang angana!’ 27A' nil ngulan thawow niiyanta, ‘Ngay inan thawang niiyant: ngay ke' mee'miy niiyang ya'a. Niiy puyam paththam kan iiyān aak ngatharam inpalana, niiy puth way anman yump-yumpaniya.’ Nil Lord.an wik yimanangan thawow niiyanta. 28A' niiy ngul thath-thathān thanang Abraham-a, Isaac-a, puth Jacob-a, a' puth prophets wiy anangan thanan wik min God.antaman waa'-waa'in, than keenk an-ngul wun-wuntan aak piip God.antangana. Puth niiyangan aak yoon angman too wantow niiyang, niiyan kan-kanam wik peey-peeyān ngula, a' puth koonh path-pathwun niiy-niiyantakamana a' man kul paththam wamp-wampow niiyanta. 29Pam wanch piip God.antam anangana, Jews anangan a' putha Jews ya' anangana ngul wamp-wampayn kungk-a, yiip-a, kaaw-a, kuuw anpalan a' than ngangk minangam nyiin-nyiinayn piip God.antang angman, puth niiyangana yoon angman too wantowa. 30Aak inan ngulan wampow-a, than pam wanch wiy al-alangan ngaantam-ngeeywuntan than ke' pam wanch pi'-pi'anam yimanangan iiy-iiyantan-a, an than pam wanch many ngul iiy-iiyayna. Than wiy al-alangan pi'an ke'aman ngaantam-ngeeywuntan thanttakaman-a, nil God.angan moom pi'-pi'anam yumpow thananga.”
31A' amanamaniya Pharisees wiy anangan wampin nungant a' thawin nungant Jesus.antana, “Nint paththam puyam kan iiyān aak thonak ngula. Nil Herod alangan kaangk mulathow nintanga.” 32A' nil Jesus.an thaw thant, “Nil Herod.an kan-kanam paththam pam way-wayama, nil ke' ku'ngekanam yimanangan iiy-iiyana. Yaa, niiy koyam iiyāna a' waa'ān nunganta, ‘Kinch inmana a' ngaa' thon ngulan-a, ngay pam wanch way alpan anangan miyal-miyalathāng thananga, putha oony way anangan kenth-kenthāng thanttam pam wanch al-alantaman. A' kinch ko'alamang ngulan ngayang wantow-a, work ngatharam anangana kan-ngul minchowa.’ 33Puth kinch inman a' puth ngaa'thamana, a' putha ngaa' thon ngulana, ngay woyan anman wak-wakāng um Jerusalem.akan, work ngatharamana minchathāng ngula. Ngay Herod.antangan aaka ke' uthaming, ya'a, puth an min ngathar ya'a, than pam prophets inangan aak thon-thonanganiy ke' mulathiythan thanang, angman ep aak Jerusalem.angana mulathayn thanang.”
Nil Jesus.antan Ngangk Way-Wayam Wun Aak Jerusalem Anpalana
34Amanamana, nil Jesus.ang ngaantam-ngeey thanang pam wanch yotam anangan aak Jerusalem.angan wun-wunina, a' ngangk way-wayam paththam wun nungant thanttam anpalana, a' thaw ngul thant, “Niiy pam yot-yotam anangan kanam mul-mulathan thananga nil God.angan kuch-kuch niiyanta. Niiyiya kunttowang piik-piikan thanang mul-mulakama. Ngay ke' nathpalman ma'-yalmathing niiyang ngatharakama, ke' minh chookie kaath-kunch alangan ma'-yal-yalmathan thanang puk nungantam anangan a' pek-pekam punth-paamang kang-kangan thanang ngula. Niiyaniya kaangk ke' paththam ngatharamana. 35Niiy in ngeeyāna, nil God.angan aawuch ngench thayan niiyantaman ke'-ngul min-minam pi'-pi'ow, an puth too ngul wantowa. A' niiy ke'-ngul thathān ngayanga aak inganiya, ya'a. Ngul-ngulana an epa niiy kaa'wal ngurp thathān ngayanga, amanamana niiy mee'miy ngul weemāna pam ngay inman nil God.angan kuchanya, a' niiy thawān ngula, ‘Yaa, ngamp thaa'-kuump-kuumpāmp nunanga pam inman nil God.angan kuch nunanga.’ ”