Nil Jesus.angana Thaa'-Aath Thanang Wanttakan Mee'-Wuthanamayn God.antan
111Anpalan-a, Jesus-a, putha ngurp nungantam al-alangan kan wantin pulang Mary-a, putha Martha.anganiy a' than aak thonak ngul iiyin. Nil Jesus.ana mee'-wuth-wuthanam. Nil kanan thaw piip God.antan-a, ngurp nungantam thonaman thaw nungant, “Ayyang, moom-ang, nint ma'-aathān nganang ngan want-wanttakan mee'-wuthanamān nungant God.antana, ke' nil John.angan ma'-aath thanang ngurp nungantam anangan than wanttakan mee'-wuthanamayn God.antan.” 2A' nil Jesus.an thaw thant, “Niiy kaangkwey thawān God.antan-a, niiyiya wik yimanangan thawān nungant:
‘Piip nganttam in kenyana, ngan kaangk pam wanch ma'mangkamangana waa'ayn nintang wuut pi'an, a' minam paththaman a!
Ngan kaangk nint moom wuut pi'an iiyān ngant, pam wanch yotamantana,
ngan yipam ma' nungkarang wunāna, ma' wiyantangan ya'a.
Ngan kaangk pam wanch ma'mangkamangan wik nungkaraman ngeeyayn,
a' woyan min koochanam nungkaram anman wak-wakayn.
3Piip-ang, kinch inana nganangan ma'angam pi'ān ngan yipam may minh thakan uwāna.
4Nint nganang ngangk mamān a' putha kon-ngathow nintang way yot anangan nganan yump-yumpan,
puth ngan ngangk maman thanang, kan kon-ngathan nganang way thanan yump-yumpin ngant.
Nint weekān nganang oony way alantaman,
a' kalān nganang woyan way anpalan ngan yipam way ke' yumpān. Yey, piipa, anman kana.’ ”
5A' nil Jesus.angana wik kath inan waa' thant, “Niiy nathwey kampan niiyantamak iiyin aak ngaa'-menhanga a' thawin nungant, ‘Nint may bread ko'alam thee'ān ngatha 6nil puth kampan ngatharam anan wamp aak kechama, ngay puth ngeen thee'inganta, ngaya may ke'ananga.’ 7An nilan nath thawiy niiyant aawuch amanam pekan, ‘Nint puy kan iiyāna, ngayang ke' weepaman ekathāna, ngay thaa'an kanam ngathang. Ngan yot weep ngula. Ngay ke' ekinga a' putha may ke' thee'ing nungk ya'a. Nint koyam kan iiyāna.’ ” 8A' puth nil Jesus.an thaw thant, “Nilan puth kampan nungkaram aa! Nilana ke' thee'iy nungk. Puth nintwey yaamakam thaa'an piik-piikin-a, a' putha yaaman thaw-thawin nungant-a, an nilaniya ekiy nungkar a' mayan thee'iy nungkar. 9-10Yaa, ngay puth inan waa'āng niiyant. Nil wee'-nathan thawiy nungant God.antan ma'-aathow nunang-a, an nil God.angan ma'-aathow nunang. Nil wee'-nathan woyan God.antamakan wenk-wenkiy-a, an nil God.angan ngul meenathow nungant. Nil wee'-nathan mee'-wuthanamiy nungantan-a, nil God.angan ngul ngeeyow nunang. Yaa, niiy woyan min nungantamakan wenk-wenkān, a' puth God.antan thawān nungant ma'-aathanakan. 11Than puk niiyantamwey thawiythan niiyanta minh nga'akan-a, ngul niiy thuuk thee'in thant puk niiyantamakan ey? Ya'a, an minh min thee'in thantweya. 12A' thon ina, than puk niiyantamwey thawiythan niiyant minh nhepanakan-a, ngul niiy thal thee'in thant ey? Ya'a. 13Nungkway niiy way iiy-iiyaniy-a, niiy min-minam pi'-pi'aniy thanang puk niiyantam anangan. Puth niiy kan ngaantam-ngeeyān nunang piip God.ana. Nil ep min-minam paththam iiy-iiyan. Niiy wee'-wee'anangan thawin nungant God.antan-a, nilana Ngeen-Wiy Min nungantaman kuchow niiyant, ngangk niiyantamangan yipam wun-wunow.”
Than Waa'in Nunang Jesus.an Ke' Oony Way Alangan Ma'-Kunch Yump Nunang
14Amanamana nil Jesus.angana paman thath nunang oony way ngangkangan pi'-pi', nanpalan nil pam anmana ke'am wik thaw-thawa, ya'a. Nil Jesus.angan oony way anana ya' kenth nunang pam alantaman a' oony way alangan too paththam want nunang. Anpalaniya, nil pamana kan-ngul wikan thaw-thaw, puth pam wanch yotamana thaa'am ikin. 15Than wiyaniy thawina, “Nil Beelzebul, oony way pi'an alangana, pam Jesus inan ma' nungantang pi'-pi'an nunanga, a' ma'-kunch yump-yumpan nunang ke'-paal nil Jesus.angan oony way anangan kenth-kenthan thanang pam wanch al-alantamana.”
16Puth pam wanch wiyaniya thawin Jesus.ant work pi'an yumpow thant than yipam thathayn nil pam God.antam kan-kanamana. Than yaan thawin nungant nil nath yumpiy, nath ya', ke' yumpiy. 17Nil puth Jesus.angana kanam thiich thanang than want-wanttakan ngaantam-ngeeyin nunangana, a' nilan thaw thant, “Than kampanam nathwey pek-pekwiythan-a, a' thaamp-thaampwiythan thanttakamwey-a, yaa, thanan aak wayathiythan, minam ke' pi'wiythan thanttakamana, ya'a, aak thanttamana thayanam ke' pi'iythan, ya'a. 18Nil oony way alangan nathwey oony way wiy anangan piik-piikiy thanang-a, pek-pekwiythan thanttakaman-a, thanan thampang aak thanttaman wayathiythan, aak thayanaman ke' pi'iythan, ya'a, karangk ke'-ngul iiyayn, ya'a. Niiyan ngayangan waa'aniy ke' nil Beelzebul alangan ma'-kunch yumpan ngayang yipam oony way anangan kenth-kenthāng thanang pam wanch al-alantamana, puth ya'a. 19Nilwey oony way pi'an alangan nath ma'-kunch yumpiyan ngayang-a, puth nil wee'anga ngurp niiyantam anangan ma'-kunch yumpan thanang oony way anangan yipam kenthayn pam wanchantaman e? Nil oony way pi'an alangan ey? An ya'a, puth than ngurp niiyantam thawayn ngul nil oony way alangan ke' ma'-kunch yumpan thanang, ya'a. 20Puth ngay inan thawang niiyant: nil God.angan ngayang ep-paththam ma'-kunch yumpana, ngay yipam oony way anangan kenth-kenthāng thanang pam wanchantamana. Yaa, puth amanamana, niiy mee'miy ngul aakan kan wamp nungant God.antan meenathow nungamangan nil moom pi'an paththamana.”
21-22Amanamaniya nil Jesus.angan wik kath waa' thant, “Nil pam nathwey karangk iiy-iiyiy a' nhengk-peempan-a, putha kek yotwey pi'-pi'iya, aawuch nungantam angman. Nil aawuch nungantamana min-min thath-thathiy a' yuk way min nungantam min-minakam pi'-pi'iya. Nil mee'miy nil nhengk-peempan thampana, kek thampa, nilan ke'-paal ngangk thayanam iiy-iiyan. Puth nil pam thonan karangk paththaman nath wampiy nungant-a, a' ma'ang nath thanpiy nunang-a, tal nath unchiy nunang-a, yaa, nilana nhengk-peempan, kek thakan pam alantaman ma'am piiyiy nunang, a' thee'iy thant pam wiy al-alantan.”
23Anpalana, nil Jesus.an thaw thant, “Than pam wanch wee'-wee'anangan ke'an iiyiythan ngatharangan-a, an than thaampantan ngayang, kaangk ke' ngatharam. A' than wee'-wee'anangan ke'an ma'-aathiythan ngayang pam wanch wiy anangan yipam wampayn nungant piip God.antan-a, an than ke' puy-puyam yaark-yaarkathantan thanang piip God.antaman.”
Jesus.ana Mee'angam Thaw Thant
24A' nil Jesus.angan putham ngul wik kathan waa' thant, “Nil oony way alangan paman wantan ngulan-a, an nilaniya aak pal-puy aak way wakan iiy-iiy, aak min ya'a, nilaniy puth aakak wenk-wenk nil wanttingan wunow. Nil oony way alangan aak ke'an uwiy nungantakaman-a, nil puth nungantakaman thawiya, ‘Ngay kan koyam iiyāng aak ngatharamaka pam alantangan ngangkang koyam ngoonchāng.’ 25Nil oony way koyam ngulan wamp nungant-a, nil aak ya'-ya'am thathana, nil puth pam alangan Ngeen-Wiy Min God.antaman thaampan nunang yippak, ngangkangan ke'am yippak ngoonchant. 26Anpalana, nil oony wayan koyam ngul iiyan a' oony seven way-wayam paththaman wampathan thanang yipam than ngangk nungantangan wunayna. Than oony way yotam ngangkang ngulan ngoonchantan nungantangan-a, nil paman way-wayam paththam ngul iiy-iiyana, ke' nil keenkan iiy-iiy, ya'a.”
27Nil Jesus.angan wik inangan kanan waa'-a, nil wanch thonam thaa'-ay thaw nungant, “Kaath nungkaramana ngangk min iiy-iiyana! Nil puth thipang kal nintang a' putha thuut nungantam aath-aath nintang tham.” 28A' nil Jesus.an thaw nungant, “Than pam wanch wee'-wee'anangan wik piip God.antaman ngeey-ngeeyantana a' ngangkangan pi'-pi'antan-a, thanan ngangk minangam iiy-iiyantan.”
29Amanamana pam wanch yot ngul wamp-wampin nungant Jesus.antan, a' nilan thaw-thaw thant, “Niiy inangan wunaniy-a, way-wayam paththam iiy-iiyaniya, niiy God.an ke' ngaantam-ngeeyaniy nunang, ya'a! Niiy kaangk ngay work pi'an anman meen-meenathāng niiyantan ey? Niiy work pi'an thonam thonakam ngul thathāna. Niiy ngul thathāna ngay ke' Jonah anman. 30Niiy kan ngaantam-ngeeyaniy nunang Jonah.an ey? Minh nga' wuut pi'anangan lokang thu' nunang, thipang ngulan pi'-pi'an, kinch ma'-ko'alamakana. Anpalana, nil ngul oyngk yeechan, a' pam Jonah.ana thaa'aman pol pent man-yetham anmana. Anpalana than pam wanch aak Ninevah.angan thiichin nunang ngul, nil puth pam God.antaman. Niiy thamp ngul mee'miy iiyān nil God.angan kuch ngayang. 31A' niiy wik kath Queen aak Sheba punchan alantaman kan ngeeyan ey? Yaa, nil Queen inana aak kechak mo' aak King Solomon.antamaka, nil yipam wik ngeeyow nunang, puth nil pam pi'an Solomon.ana kuchek waap min-minam paththam iiy-iiy. Wik nungantaman mina, puth wik inangan ngayan thaw-thawang niiyantana an ep-paththam min-minam paththam. Ngul-ngulaniya, nil piip God.angan umang than-thanathow niiyangan-a, nil Queen aak Sheba punchanana ekow, a' way waa'ow niiyang, puth niiyan wik min-minam ngangkangan ke'am pi'-pi'aniya, ya'a. 32A' than pam wanch anangan aak Ninevah.angan wun-wunin, than way waa'-waa'ayn niiyang, aak an-aniyangan nil God.angan um nungantangan than-thanathow ngampang, puth aak keenkanamana than wik min God.antaman ngeeyin nil pam Jonah alangan waa'-waa' thant a' thanana woyan wayan ke'-ngul wakin, ya'a. Nil Jonah.angan wik min waa'-waa' thant, puth niiy inangana ep-paththam wik ngatharaman ngeey-ngeeyāna, wik min paththam anangan, puth niiy yaam anman wayan yump-yumpaniy a' ke'am yippak wayan wantana, ya'a.”
Niiy Ke' Nganth Yimanangan Iiy-Iiyān Thant Pam Wanchantan
33Nil Jesus.an putham thaw thant, “Thon inan waa'āng niiyant. Nil pamangweya nath lantern pathathiywey-a, an nil wuthanangan ke' thenchiy nganthaniya, ya'a, nil yuk paathangan ke' kangiy, ya'a. An nil pam alangan keny achantang waanchow pam wanchangan yipam nganthan thathayn than aawuchangan ngoonchaynana. 34Mee' niiyantam anangan-a, ke' nganth yimanangan kemp niiyantamakan. Niiywey mee' minangaman iiy-iiyinwey-a, an ke' niiy nganth pi'anang yimanangan iiy-iiyaniy. Niiy nath mee' way thampangan-a, an ke' niiy aak ngaa'ang yimanangan iiy-iiyaniy. 35Yaa, niiy kan-kanam woyan min paththam wak-wakāna, niiy ke' yipam ke' aak ngaa'angan iiy-iiyāna. 36Niiy nath ngangk punch-aakam thee'ān piip God alantan-a, a' kan-kanam monkan-wak-wakān nunangan-a, yaa, niiyan ke' nganth pi'an paththam park-parkān, ke' ngaa' ke'anang yimanangana. An ke' nganth pi'anam park-parkow niiyantang.”
Nil Jesus.angan Waa' Thanang Pam Pi'an Anangan Than Ngangk Min Ya'a
37Nil Jesus.angan wik inangan kanan waa'-waa'-a, nil pam thonam Pharisee.ana thaw ngul nungant Jesus.antan, “Nint may mungkān aawuch ngatharamanga.” A' nil Jesus.ana iiy ngul nungantang, a' pul nyiinpul ngul mayakan. 38Nil pam Pharisee alangana Jesus.an oth thath-thath nunang ma' ke' punganaman mayan mungka, a' nilaniya thaa'am ika. 39Nil puth Jesus.angan kanam thiich nunang nil want-wanttakan ngaantam-ngeey a' nil thaw ngul nungant, “Niiyant Pharisees il-ilantana aak niiy-niiyant yimanangan wunana; niiyaniy-a, yuk cups-a, plates anangan ma'-yotam pung-punganiya a' pach-pachathaniya! puth niiy ngangk niiyantaman ke'am pach pi'-pi'aniy ya'a, niiy puth pam yangk mo'-mo'aniy, way-wayam paththam iiy-iiyaniya. 40Niiy way-wayak ngaantam-ngeeyaniy niiyantakamana. Nil puth piip God.angan yump ngampang, kemp inangan kal-kalanamp-a, a' nil ngangk ngamparam yam pekan yump thampa. 41Niiy may a' wukal thakan nath thee'-thee'in thant pam wanch wiy al-alantan-a, than may wukal ke'anangan wun-wuntan-a, yaa, puth niiyana pam wanch min-minam paththam iiy-iiyin ngula.
42“Aak wayan ngul wampow niiyant, Pharisees il-ilantana, puth niiy ngangk minangam ke'am iiy-iiyaniy pam wanch wiyantan, niiy ke'-ngoongkam ngangk-wayangam kal-kalaniy thanang, a' God.an thama, niiy ke'am kaangk wun-wunaniy nungant, ya'a. Niiy ep yuk way min thee'-thee'aniy nungant piip God.antan, wukal wiy niiyantaman churchak kal-kalaniy a' yuk awal min thakan thee'-thee'aniy nunganta. Niiy kanaka wukal thakan kal-kalaniy churchakana, niiy puth wiyantan yimanang thamp ngangk minangam iiy-iiyān a' piip God.ant thampa.
43“Aak wayan ngul wampow niiyant Pharisees il-ilantana, puth niiyan kaangk aak umang anman nyiin-nyiinān aak churchangan ke' pam pi'-pi'anam yimanangan a' niiy kaangk pam wanch anangan thaa'-mich-micham thawayn niiyant aak town wakanana, ke' niiy pam pi'-pi'anam min paththam yimanangan. 44Pam wanch wiy il-ilangana nath ngaantam-ngeeyiythan niiyang ke' pam min-miniy yimanang iiy-iiyaniya, an ya'a, puth than ke'am thiichantan niiyang pam wayanangan iiy-iiyaniya.”
45Amanamana, nil pam thonangan ngul thaw nungant Jesus.antan, nil pam inana teachera, wik thayan Moses.antam anangan thaa'-aath-aath thanang pam wanch anangana. Nilan thaw nungant Jesus.antan, “Ayyang, teacher-ang, nint yimanangan wanttak thaw-thawangan nganta? An nint wak-wakangan nganang thampa!” 46Nil puth Jesus.an thaw nungant, “Aak way ngul wampow niiyant thamp pam teachers il-ilantana. Niiy wik thayan Moses.antaman waa'-waa'aniy pam wanchantan putha wik thayan niiyantam anangan thama. Than puth want-wanttak ngeeyayna wik thayan niiyantam yot anangana, an ya'a, puth an ke' yuk anhan yimanangan kal-kalantan pikpungkangana. A' niiy thamp wik thayan niiyantamana pip-pipaniya, ke'am ngeey-ngeeyaniy ya' anmana. Aak wayan ngul wampow niiyanta. 47-48Aak keenkanamana, wuut mangk niiyantam al-alangan kaangk ke' thanang pam prophets anangana, puth thananiya prophets al-alangan wik min God.antaman waa'-waa'in thanta. Than wuut mangk yotam niiyantam al-alangan prophets anangan mul-mulathin thanang a' kaamp-kaampin thanang ngula. Niiyana puth yaan graves thanttam anangan ach-umpanam yump-yumpaniya kunttow thakan pal kenyuw wunp-wunpaniya. Puth ngangk min wunan niiyant pam prophets anangan kanaman mulathin thanang keenkanamana. 49Nil God kuchek waap min-minam paththamana. Nila wik inangan keenkanaman thawa, ‘Ngay puth pam wanchantan pam prophets anangan kuch-kuchānga a' putha pam wiy thampang kuch-kuchāng wik min ngatharaman waa'-waa'ayn thant. Puth pam wiy anangana, ke'-ngoongkam mul-mulathayn thananga a' puth wiyantan way thakan yump-yumpayn.’ ”
50-51A' Jesus.angan kan-ngul waa' thanta, “Aak keenkanamana, wuut mangk niiyantamang pam anangan mul-mulathin thananga wik min ngatharaman waa'-waa'ina. Ka'athamaniya than pam min Abel anan mulathin nunanga, puk pulantama Adam-a, Eve.angana. Anpalana, than pam God.antam yot mul-mulathin thanang aak-aakanakaman nil Zechariah.an ngul wun. A' than nunang thamp mulathina, aawuch ngench thayanang angman, yuk altar thinth minhan kiingk-kiingkantan, piip God.antana. Puth nil God.angana ngul wayathow niiyang yotam pam wanch inangan man-yethaman iiy-iiyaniya, puth wuut mangk niiyantamangana pam God.antam anangan mul-mulathin thananga.”
52Anpalana, nil Jesus.an kan-ngul thaw thant pam teachers al-alantan than wik thayanan thaa'-aath-aathinan, “Niiy kan wik in ngeeyāna! Aak wayan ngul wampow niiyanta! Puth niiy muuk-muukamathaniy thanang pam wanch wiy anangana! Puth niiyana pam wanch anangana way-wayathaniy thanang than kaangkan mee'miy weenayn wik min God.antamakan, a' niiyaniya wik God.antamana way-way thaa'-aath-aathaniy thananga. Puth niiyaniya woyan min God.antaman ke'am wak-wakaniya, ya'a. An ke' yimanang wunana: niiy thaa' aawuchan key.angan ngath-ngathaniya thanttam wiyantamana, a' niiyaniya key ma'angam pi'-pi'aniya than yipam pam wanch wiy anangana ke' yipam ngoonchayn aawuchangan. A' niiy thamana yoon angman than-thananiya, thaa'an week-weekaniy pam wanchantamana.”
53Nil Jesus.angan aak anan kanan want-a, than pam teachers al-alangana putha Pharisees wiy al-alangan way waa'-waa'in nunang. A' than puth-puthaman mep-mepin nunanga. 54Thanan yaana mep-mepin nunanga, nil yipam want-wanttakan nath thawow thanta, wik way nath thawow thant, than yipam way waa'ayn nunanga.