Nil Jesus.angan Pam Yot Seventy-Two Anangan Kuch Thanang Nath-Nathangan Iiyayn
101Amanamana nil Lord Jesus alangana pam yot mi' thanang seventy-two, than yipam umputh iiyayn aak thon-thonakan. Puth nil Jesus a' ngurp nungantam wiy anangan than koy-koyyuw ngul iiyayn. Nil Jesus.angana pam kuch-kucham kuch thanang. 2Nilan thaw thant, “Pam wanch yotamangana wik min ngatharamaniya kaangk yipam ngeey-ngeeyayna. Niiy pam ko'-ko'alama il-ilangan wikan waa'-waa'aniy thant a! Than pam wanch yotam anangan ke' may menchan yukangan wun-wuntana, niiya pam ko'alam thonakam work iiy-iiyaniy may menchan anangan yipam yal-yalmathān thanang. A' niiy mee'-wuthanamān piip God.antan, thawān nungant pam wanch yot kuch-kuchow thananga than yipam wik min ngatharaman waa'-waa'ayn thant wiyantan. 3Niiy kan-kanangk iiyāna, ngay inan kuchang niiyang pam wanch way-wayanang al-alantana. Puth niiyaniya maal anman iiy-iiyān thanttangana, ke' minh sheep anman, puth kulliy ya'a; than pam wanch ananganiy-a, kulliy weenayn niiyant, ke' ku' kulliy yimanangana. 4Niiy wukal tham karpam ke' kalān, bag thampana ke' kalān may thenchanakana, putha tha' murruk ke' kalān thamp, yimanaman iiy-iiyān. Niiy yaaman ke' than-thanān woyan omp-ompamangan a' ke' wik thawān thant pam wanchantan woyan wakanan ya'a. 5Niiy aak town ang-ngulan wampān-a, a' putha aawuchang ngulan pek ngoonchān-a, niiy ka'athamana wik inangan thawān thanta, ‘Ngan kaangk nil God.ana ngangk minangam iiy-iiyow niiyanta.’ 6Than pam wanchang wik minamwey ngeeyiythan niiyantaman-a, yaa, nil God.ana ngangk minangam anman iiy-iiyow thant ke' niiyaman waa'an thanta. Puth than nath kaangk ke'wey ngeeyayn wik min God.antaman-a, nil piip God.ana ngangk minangam ke' iiy-iiyow thanta, ya'a. 7-8Thanwey nath thawayn niiyant angman paanthanak thanttangan-a, yaa, niiy puth angman thanttang paanthāna, niiy aawuch thon-thonangan ke' iiyān ya'a. May minh ngeen nathan thee'ayn niiyantanwey-a, yaa, niiy may thanttamana mungkāna. An mina than may minhan thee'ayn niiyanta, an niiyaniya puth wik min God.antam anangan waa'-waa'aniy thanta. Niiy may puth-puthamakan ke' thawān thanta. 9Pam wanch aakan punchanan wee'-nathan weech-weechowan-a, niiy miyalathān thanang, a' niiy wik inangan waa'ān thant, ‘Aakan thinth-thinth kan-ngul wampana niiy God.an thathān nunanga nil moom pi'an paththaman, nil pam wanch yotam ma' nungantang ngulan pi'-pi'ow thananga.’
10“Niiy nathwey wampin aak town thon-thonangan-a, puth than kaangk ke' nath niiyangan paanthathayn aak thanttang angman-a, niiyaniya aak town wakan iiy-iiyāna a' niiy wik inangan thaw-thawān thant, 11‘Ngan tha' wookan wunyathān aak inpalana, a' ngan kan-ngul wantān niiyang niiy puth kaangk ke' wik nganttaman ngeey-ngeeyāna. Niiy wik inangan konangam pi'-pi'āna: aakan thinth kan-ngul wamp-wampan niiyant, niiy yipam thathān nunang God.an moom pi'an paththaman.’ ”
12A' nil Jesus.an thaw thant pam seventy-two al-alantan, “Aak keenkanamana pam wanch aak Sodom punchan anangana way-wayam paththam iiy-iiyina. Puth ngay inan kan-kanam waa'-waa'āng niiyant, ngul-ngulana aak anan wampowana nil God.angan umang than-thanathow ngampangan-a, nil pam wanch aak Sodom punchan anangan wayanang ngul waa'ow thananga a' aak wayak kuchow thananga, puth pam wanch al-alangan kaangk ke'an wik ngeeyayn niiyangan-a, nilan ngul waa'ow thanang pam wanch anangan way-wayam paththam a' puth nil kuchow thanang aak way aakanakana.”
Nil Jesus.angan Pam Wanch Way-Wayam Waa' Thanang Than Ke'aman Ngangkangan Pi'-Pi'in Nunangana
13Anpalan-a, nil Jesus.an thaw thant ngul, “Niiyalang, pam wanch aak Chorazin punchan a' putha aak Bethsaida punchanan-a, niiy kan in ngeeyān ngayang! Niiy kaangk ke' ey? wik min God.antaman ngeey-ngeeyān ey? A' aak wayan ngul wampow niiyant. Pam wanch keenkan wun-wunin aak Tyre angana, a' aak Sidon.angan-a, than way anman yump-yumpina. Puth thanan nath work wuut pi'an yimanangan thath-thathiythan ke' niiyan thath-thathaniy-a, an thanan puth ngangk way-wayam wun-wuniythana way thanttam anpalan a' woyan way anpalan weentiythan ngula. 14Ngul-ngulana, nil piip God.angan pam wanch um nungantangan than-thanathow ngampangan-a, nilan pam wanch aak Tyre a' Sidon punchan anangana wayanang ngul waa'ow thanang, aak way aakanakan ngul kuchow thananga. Puth God.angana pam wanch way-wayam paththam waa'ow niiyang a' kuchow niiyang ngul aak way aakanakan. 15A' niiy pam wanch aak Capernaum punchan anangana niiy in ngeeyāna: nil God.angan aak min nungantamakan ngul kalow niiyang ey? thaa'-kuumpow niiyang ey? An ya'a, nil kuch-kuchow niiyang aak way aakanakana, puth niiyan wik God.antamana kaangk ke' ngeey-ngeeyān, ya' anmana.”
16Amanamana nil Jesus.an kan-ngul thaw thant pam seventy-two al-alantan, “Than pam wanch wee'-wee'anangan wik niiyantaman ngeey-ngeeyantan-a, an than ke' ngayang thama wik ngeey-ngeeyantana. Than pam wanch wee'-wee'anangan ke'aman wik ngeey-ngeeyantan niiyangan-a, an than um thaamp-thaampantan ngayanga, kaangk ke' wik min ngatharaman ngeey-ngeeyayna. Than pam wanch wee'-wee'anangan um thaamp-thaampantan ngayangan-a, an than piip God.an um thaamp-thaampantan nunang thampa, pam anman nilan kuch ngayanga.” Nil Jesus.ana wik yimanangan thaw thant. A' than pam seventy-two anangana kan-ngul iiyin aak nath-nathakana.
Ngul-Ngulan-a, Than Pam Seventy-Two Anangan Palam Wampin Nungant
17Ngul-ngulana than pam seventy-two anangan ngangk minangam paththam ngul palaman wampin nungant Jesus.antan a' thawin nungant, “Ayyang, moom-ang, ngan namp nungkaraman wich-wichana a' anpalana nil God.angan ma'-aath-aath nganang work pi'-pi'anam anangan yump-yumpān. A' ngan oony way anangan kenth-kenthan thanttam pam wanchantaman. Ngan namp nungkaraman wich-wichan-a, an paththam oony way anangan erkam pent-pentin thanttamana.” 18Puth nil Jesus.an thaw thant, “Ee', ngay kan thathang oony way pi'an Satan anana karangk ke'am ngul iiy-iiyan ya'a, ngay kan thathang nunang pal kenyuw keek ke' yuk ngaay yimanangan. 19In ngeeyāna: ngay niiyang kan ma'-aath-aathang niiy yipam thayanam paththam iiy-iiyān ngula. Niiy nath thuuk a' thalwey tha'ang maak-maakin thanang-a, an than ke' mulathiythan niiyang ya'a. Nil nath oony way alangan thaachow niiyang way yumpanakan-a, niiyana um thaampān nunang. Nil ke' wayathow niiyanga, niiy ngangk thayanam ngul iiy-iiyān, nil oony wayana, chil-chil. An puth wee'angam wayathiy niiyang a? Ya' anmana! 20Than oony way al-alangana kanam wik ngeey-ngeeyin niiyang puth niiy kenth-kenthan thanangana. Niiy nanpalan ngangk min ke' iiy-iiyāna, ya'a. Niiy wik inangan ep ngaantam-ngeey-ngeeyāna a' ngangk min wun-wunow niiyanta: nil piip God.angan namp niiyantaman kanam ump lat nungantamangana niiy puth pam wanch nungantama.”
Jesus.antan Ngangk Min Paththam Wun Nungant
21Aak an-aniyangana nil Ngeen-Wiy Min God.antam alangan ngangk min paththam yump nunang Jesus.an a' nilan thaw God.antan, “Piip-ang, nintiya moom wuut pi'an paththama, aak naakanak kenyana a' putha aak iikanak pekana. Ngay thankyou thaw-thawang nungkara nintan puth wik engkanang waa'-waa'angan nungkarakaman pam wanch al-alantan than ke'aman kuchek waap minakan waa'-waa'wuntan. Puth nintaniya wik mupam pi'-pi'angan nungkarakaman pam wanch al-alantaman thanan kuchek waap minakan waa'-waa'wuntan. Ee'a, Piipa, puth nint kaangk yimanangan iiy-iiyān pam wanchantan.” 22A' nil Jesus.an thaw ngul thant pam wanch al-alantan, “Piip ngatharam God.angan ma'mangkama ma' ngatharang want thanang. Nil wee'angam paththam thiichiy ngayang puk nhengk God.antamaniy e? Nil thonamang thonak piip God.angama. An wee'angam paththam thiichiy nunang piip God.ana? Ngay nhengk nungantamang ep thiichang nunang a' putha than pam wanch wiy al-alangan ngayan waa'-waa'ang thant nil want-wanttakan wun-wunan than thamp ep thiichin nunang.” 23-24A' nil Jesus.ana koy-koyyuw weent ngula ngurp nungantam al-alantan a' wik itangam thaw thant, “Aak keenkanamana, pam prophets yota puth pam pi'an kings anangan thanan kaangk paththam thathayna ke' niiy il-ilangan wanttakan thath-thathaniy, a' puth thanan kaangk wik ngeeyayn thampanga ke' niiy il-ilangan wik wanttakan ngeey-ngeeyaniya, puth ya'a, an puth than ke'am thathina, putha wik ke'aman ngeeyina, ya' anman. Niiyan puth kan thathana, a' wik kanam ngeeyana, niiyana nanpalan ngangk minangam ngul iiy-iiyaniya.”
Inan Wik Kath Pam Min Alantaman Aak Samaria Punchan Anpalana
25Anpalan-a, nil paman wamp nungant Jesus.ant, nil pam inana, wik thayan God.antaman thaa'-aath-aath thanang pam wanch anangana. Nil ke' Jesus.an paathiy nunang wik want-wanttakan thawow, nil puth thawant Jesus.antan, “Ayyang, Moom-ang, ngay ngeen yumpānga yipam ngay ngulakaman wun-wunāng God.antangan a?” 26Nil puth Jesus.an thawanta, “Nint lat ngench thayanan kan mee'miy ey? want-wanttakan waa'an ey? nint wanttak ngaantam-ngeeyangan e?” 27Nil paman thaw Jesus.antan, “Yaa, lat ngench thayanangan wik inangan waa'ana, ‘Niiy ngangk minangam anman iiy-iiyān God.antana, koochanam iiy-iiyān, man-kuchaman ya'a, a' wik nungantam anangan ngangkangam pi'-pi'ān, wik ma'mangkam anangan ngeey-ngeeyāna.’ A' putha latangan inan thamp waa'ana, ‘Niiy paththam kaangk wunān pam wanch puk wiy al-alantana. Ke' niiyan min-minaman pi'-pi'wuniy niiyantakaman-a, yaa, niiyiya yimanangan pam wanch wiy al-alantan ngangk minangam iiy-iiyān thant.’ ” 28A' Jesus.an thawant, “Ee'a, kan-kanama, nint min yimanangan iiy-iiyinweya aak inganiy-a, an nintaniya kan-kanam God.antang wun-wunān ngulakamana.” 29Nil pam alangan ngaantam-ngeey nungantakaman nil ke' pam min yimanang, nil puth thaw Jesus.antan, “Ngan pam wanch wee'-wee'anta min iiy-iiyān thant e?”
30A' nil Jesus.angan wik kath inan waa', “Pam thonama aak Jerusalem anpalan woyan wak-wak um kungk aak Jerico.aka. A' than pam wayanang al-alangan woyan ompamang uwin nunang, a' yuk way min nungantam anangana ma'am piiy-piiyin nunang a' piik-piikin nunang, war'am mulathin nunang, a' angman puth too wantin nunang, chaapar ukanang wun-wun. 31Amanaman-a, nil pam thonangan woyan anman waka, puth nilaniya pam priest. Nil pam priest alangan thath nunang chaapar thaman wun-wun, puth thintham ke'am iiy nungant, ya'a, woyan thonangan ngul wak. 32Anpalan-a, pam thonangan ngul woyan anman waka, puth nilaniya aawuch ngench thayanangan work iiy-iiyan. Nil iiy nungant, pam alantan, thintham thathan, puth ya', too want nunang, a' puyamam ngul iiy, woyan thonangan ngul waka.
33“Yaam ke'anam-a, pam thonangan ngul woyan anman wak. Nil pam inana thaa'nganth thonangana, aak anpal wamp Samaria.ama. A' angman wamp nungant nil pamana wun-wuna, chaapar thamangana, a' ngangk mamana. 34A' nilana iiyant ngula, wine a' oilan wench thaa' nungantamangan wunp a' bandage ongkang kathan ngula. Anpalana, paman maayan, a' donkey nungantamang wunpan, a' kalanwey aawuchak ke' motel yimanang aakanakan, puth nilam paanthathan angmana, min-minam pi'-pi'ana.
35“Ngaa' thon ngulana, nil wukal thee' aawuch motel-kunch alantan, a' thawant, ‘Nint min-minam pi'-pi'ān nunanga. Nint kaangk wukal puthamakanwey-a, ngay wukal puthaman ngul thee'āng nungkar ngay palaman wampānga.’ ”
36A' Jesus.an puth thaw nungant pam alantan, “Ayyang, nint wanttak ngaantam-ngeeyangana? Nil wee'ang pam inan minam pi'-pi'an e? Nil pam priest alangan ey? nath ya'a, nil pam alangan aawuch ngench thayanan pi'-pi' ey? nath ya'a, pam alangan thaa'nganth thon aak Samaria punchanangan ey?” 37A' paman thaw nungant Jesus.antana, “Pam anmana nilan ngangk mam nunang a' ma'-aath nunang ngulana.” Nil Jesus.an thaw, “Yaa, puth nintaniya yimanangan ngangk mam-mamān thanang a' ma'-aath-aathān thanang pam wanch wiy anangana.”
Nil Jesus.an Wamp Pulant Mary.ang A' Martha.angan
38-40Amanamaniya, Jesus a' ngurp nungantam anangan putham ngul iiyin a' aak town angan wampin. Aak anganiya, pul-kuuncham wun-wunpula namp pulantiy-a, Martha a' Mary. Than aawuch pulantamakan wampin-a, nil Martha.an ngangk minangam thaw thant ang ngoonchayn aawuch pulantamangana. Nil Martha.aniya work pi'anang ke'-ngoongkam ma' ump-umpana. Nil Mary.an ep angman tha' thinth nyiin-nyiin Jesus.antangan wik min anangan yipam ngeey-ngeeyow nungantama. A' Martha.antan-a, kuchek way wun nungant puth work pi'an nungantam anangan ngaantam-ngeey-ngeeya. A' nil iiy ngul Jesus.antan, a' thawant, “Ayyang, Moom-ang, nint want-wanttak ngaantam-ngeeyangan e? Kuunch ngatharamangan work yota ngatharakam wanta! Nint thawān nunganta nil kan ngayang mak ma'-aathow a!” 41Puth nil Jesus.an thaw nunganta, “Ayyang, Martha-ang, work nanan ke' ngaantam-ngeeyāna, kuchek wayan ke' wunow nungkar workamaniya. 42Puth an min nungkara wik ngatharam anman ngeey-ngeeyāna. Puth nil Mary ilangana kaangk paththam wik ngatharaman ngeey-ngeeyowa; ngayan puth ke' kenthing nunanga, ya'a.”