LUKE
Lat Inan Luke.angan Ump
11-2Dear Theophilus,
Ngay lat inan ump-umpang nungk Jesus.an waa'āng nungk nil aak inganan wun-wun aak ngamparamangana. Pam wanch wiyangan kan thathin nunang mee' thanttamang aak anpalman ka'athaman work iiy-iiy, a' than ka'athangaman wik waa'-waa'in nungantaman a' puth wik min God.antaman thamp waa'-waa'in. Puth nanpalana, than yotangan latang ngul ump-umpin nil Jesus.an want-wanttakan iiy-iiy. 3Ngurp min ngatharama, puth ngay thamp latang ump-umpang waa'-waa'ang nunang nil aak inganan wun-wuna. Ngay kaangk minam umpāng nungkar. Ngay min-min ngeey-ngeeyangan wik wiy al-alangan waa'-waa'in nunang Jesus.an. 4Ngay puth wik inan kuchang nungka nint yipam mee'miy iiyān nil want-wanttakan iiy-iiy aak ingan, a' nintan yipam ngaantam-ngeeyān than wiyangan wik kan-kanaman nungkar waa'in.
Nil Ngaantiyongkan Zechariah.antan Wamp
5Aak an-aniyangan-a, nil King Herod.angan aak namp Judea.an pi'-pi'-a, than priests yot iiy-iiyin. Than namp wuut mangk thanttamantang waa'win. Puungk wiyiya Abijah waa'win. Nil pam thonama Abijah.antaman priest thamp iiy-iiy, namp nungantiya Zechariah. Wanch thum nungantam namp Elizabeth, nil piip Elizabeth.antamana priest thamp iiy-iiy. 6Pul minam iiy-iiypul mee' God.antang, a' putha wik God.antamana ngeey-ngeeypul, ke'am wik pip-pippul, ya'a. 7Puth pulana puk ke'anang wun-wunpul. Nil Elizabeth.angana puk ke'am uw, ya' paththam. Puth pulana wuut wanchinth ngul weenpul.
8-9A' aakan kanam wamp thant priests al-alantan Abijah alantaman work ngul iiyayn aawuch ngench thayanangan. Nil Zechariah.ana work iiy-iiy thanttang. A' than nunang mi'in aak ngenchakan ngoonchow yuk awal min yipam altarangan kiingkow nungant God.antan. Aak thanttaman puth ke' yimanangan wun: than yuk dice.ang kee'in yipam mi'ayn nil wee'an nath pek ngoonchow aak altarakan. 10Nil Zechariah.angana yuk awal minan kiingk-kiingk-a, than pam wanch anangan yoon than-thanin, God.antan mee'-wuth-wuthanamin.
11A' ngaantiyongk inpal kenyan uk nungant Zechariah.antan, a' angman than-than ma' malang yuk altar thinth, angan yuk awal minan pench-pench. 12Nil Zechariah.angan thath nunang-a, nilana ngangk ik a' putha winynyang mo' nungantam. 13Puth nil ngaantiyongkan thaw nungant, “Ayyang, Zechariah-ang, nint ke' winynyang mo'āna. In ngeeya: nil piip God.angan prayer nungkaram kanam ngeey. Nil Elizabeth.angana, puk wuut many nungkaram kalowa. A' puth nintiya namp nungant John thee'āna. 14Nil puk many ngulan aak-ngeeyow-a, nip ngangk min ngul wunow a' pam wanch wiy anangan thamp ngangk min wunayn. 15Niliy putha pam pi'an ngul iiyow mee' God.antangana. A' putha ngak way karkan, wine thakana ke' mungkow ya' paththam. Aak amanamana, nil yippak thipangan wun-wunow kaath-kunchantangan-a, puk inana ma' nungantang Ngeen-Wiy Min God.antamang ngul iiyow. 16Anpalana, nil pam ngulan iiyow-a, nil pam wanch Jews yot anangan woyan way anpalan weentathow thanang, than yipam God moom thanttaman monkan-wak-wakayn nunang. 17Nilaniya wik God.antamana waa'-waa'ow thama ke' nil Elijah.angan waa'-waa' a' putha nilana pam pi'an a' thayan paththam iiy-iiyow ke' Elijah anman. A' putha nil waa'ow thant piipiy al-alantan than yipam ke'-ngul kul uwayn thant puk thanttamakan. A' nil woyan minak weentathow thanang pam wanch anangan wik min God.antam kaangk ke'an ngeeyayn. Nil John.ana keenk iiyow, nil Lord.ana koy-koyyuw wampow. Nil John.angan-a, pam wanch ma'-aath-aathow thanang. Nil woyan yumpow nungant, Lord.antan, yipam wik ngeeyayn nunang, pam wanch nungantam al-alangan.”
18A' nil Zechariah.an thaw nungant, “Ngay puth want-wanttak thiiching wik inan kan-kanaman e? Puth ngay in pam wuut ngula, a' putha wanch ngatharamana wanchinth ngul.” 19A' puth nil ngaantiyongkan thaw nungant, “Ngay in Gabriela, ngay work God.antan iiy-iiyanga; nil kuch ngayang wik min inan waa'āng nungk. 20Puth nintiya man-ngeeyan ngayang. Aakan kan-ngulan wampow-a, nil God.angan mi'-a, an-aniyangan nint engkanang ngul thathān wik ngatharam anangan kan-kanam a! Puth nint man-ngeeyan ngayang, yaa, inpalmana nintiya ke'-ngul wik thaw-thawān ya'a, wik ke'anang iiyāna, aak-aakanakaman puk manyan aak-ngeeyow.”
21Pam wanch anangan yoonan than-thanin-a, an yaam kuup-kuupin Zechariah.antan. Thanan ngaantam-ngeeyin thanttakaman, “Nil ngeenam yaam an pek aawuch ngench thayanangan e?” 22A' amanamaniya, nilam paththam pent puth nilana ke'-ngul wik thaw thant ya'a. Yaa, than pam wanch yotamana mee'miy ngul nil ngaantiyongk piip God.antaman angan wamp nungant. Nil Zechariah.angan mal woo' yump thant puth nilan ke'-ngul wik thaw, ya'a.
23Anpal ngulana, nil Zechariah.angan work nungantaman kanan minchath aawuch ngench thayanangan-a, nilaniya koyam ngul iiy aak nungantamak. 24-25Anpalan ngula, nil wanch nungantam Elizabeth.ana iimpanang ngul iiy. A' nil thaw nungantakaman, “Nil Piip God.ana minam iiyanara. Puth imanam ngulana pam wanchangan ke'-ngul thaa'-thengkathayn ngayanga, ngay puth puk tham ngula.” A' nil aawuch pulantamang angman nyiin-nyiin kep five.akama.
Nil Ngaantiyongk Gabriel.ana Mary.ant Wamp
26A' kep thonang ngulan wantan-a, nil God.angana ngaantiyongk Gabriel anana putham ngul kuch nunang. Nil aak thonak ngul kuch nunang aak namp Nazareth.ak, Galilee.angan. 27Nil Gabriel alangana wik wampath wanch komananta, namp nungantiya Mary, nilana pamantang ke'aman wun. Nil Mary.ana than kaa'ngakin nunang pam Joseph.anta ngentow nunangan. Wuut mangk Joseph.antamiya, King David.ana. 28Nil ngaantiyongkan wamp nungant Mary.antan a' thawant, “Ayyang, Mary-ang, nil Lord.ana ngangk min paththam wun nungkara; nil ngangk nungkarangan kan ngoonchow.” 29Nil puth Mary.antan kuchek way wunant a' nil ngaantam-ngeey nungantakamana, “An wik nil wanttak ngul thawar e?” 30A' nil puth ngaantiyongkan thaw, “Marya, nintiya ke' winynyang mo'āna. Nil piip God.ana min paththam iiy-iiyan nungkara. 31Nint iimpanang ngul iiyāna, a' puk many wuut kalān. Puth nintiy namp Jesus thee'ān nungant. 32Nilan puth nhengk God.antam, moom pi'an paththam ngamparamana. Nil tham pi'an paththam iiyowa. Nil piip God.angan-a, pam pi'an King ngul yumpow nunang ke' wuut mangk nungantam David.ana, 33a' nil moom pi'an ngul iiyow thant pam wanch Jews al-alantan, a' puth nil pam wanch anangan ma' nungantamang pi'-pi'ow thanang aak umpuyam.” Nil ngaantiyongkan yimanangan wik thaw nungant, wanch koman Mary.antan.
34Amanamaniya, nil Mary.an thaw nungant ngaantiyongk alantan, “Ngay ngul want-wanttak puk manyan uwāng a? Ngay pamantang ke'am wunangan, ya' yippaka.” 35A' ngaantiyongkan thawant, “Nil Ngeen Wiy God.antaman wampow nungkara, a' ngangkang ngoonchow nungkarang. Nil God pi'an paththamana, ngul wampow nungk, a' puth anpalana nintana puk kalāna, an puth puk many God.antama. Than pam wanchangan ngul waa'ayn nunang, ‘nhengk God.antama.’ 36A' putha inan thampa, nil kampan nungkaram Elizabeth.ana iimpanang thamp iiy-iiyana. Nil puth ka'athaman puk ke'am kal, puth nungkway nil wanchinth ngul iiy-iiyan-a, nil God.angan puk kuch Elizabeth pulant Zechariah.angana. In kep six ngul nungant iimpanangan iiy-iiyan. 37Nil God.an pi'ana, ma'-kuncha, nil ma'mangkamana nilam thonamang yump-yumpan.” 38A' nil Mary.an puth thawant, “Ngay puth ma' God.antang ngul iiy-iiyanga. Yaa, wik anangan nintan thawan ngathar-a, an mak wampow ngatha.” A' amanamaniya, nil ngaantiyongk alangan kan-ngul wantan.
Nil Mary.an Elizabeth.antan Iiy
39Anpalana, nil Mary alangan way min nungantam anangan kan-ngul yalmath thanang a' kan erkam iiy Elizabeth.ant. Nil yiip iiy aak town many thonak Judea.angan aak yoykathiyaniya. 40Nil kanan wamp-a, nil aawuch Zechariah.antamak iiy, a' pek ngoonch a' Elizabeth.ant thaw, “Ayyang, ngay in wampang nungk.” 41Nil Elizabeth.angan man awal Mary.antaman ngeey-a, puk many nungantaman thipangan yuupamant. A' anpalaniya nil Ngeen-Wiy God.antam ngangkang ngoonch nungantang Elizabeth.antang, 42a' nil paththam othamayan thaw, “Nil God.an min paththam iiy-iiyan nungkara, puth wanch wiyantan ya'a. A' nil minam tham iiy-iiyan puk many nungkaramakan nanan thipangan kal-kalangan. 43Nil kaath Lord ngatharamantaman in wamp ngathar. An wanttak a! Nil God.an min ngathara tham iiy ey! 44Ngay man awal nintangan ngeeyangan-a, puk many ngatharaman ngangk min wun a' yuup-yuupam ngul. 45Nintaniya ngangk minangam iiyāna puth nint wik Lord.antaman minam ngaantam-ngeeyan kan-kanam ngulan wampow nungkara.”
Nil Mary.ang God.an Thaa'-Kuump-Kuump Nunang
46A' nil Mary ngul thaw:
“Ngay Lord.an thaa'-kuumpāng nunang.
47Nil God.ang ngangk min yumpan ngayang, nil minam pi'an ngayang.
48Nil kan thath-thathan ngayanga,
ngay ma' nungantangan iiy-iiyang ngul,
ngay wanch pi'an ya'a, ngay wanch many thonakam.
Puth aak imanam ngulana, pam wanch yotang waa'-waa'ayn nil God.an min-minam paththam iiy-iiyan ngathara,
49nil puth work pi'an paththam yump ngatha.
Nil God.aniya min-minam paththama!
50Niliya min iiy-iiyan thant pam wanch al-alantan than wik nungantam minaman ngeey-ngeeyantan
a' thant al-alantan thamp ngul-ngulan aak-ngeeyayn, than wik nungantaman minaman pi'-pi'ayn.
51Puth than wiy anangan ulp-ulpanangan iiy-iiyantana ke' pam pi'an yumpwuntan-a,
nil meenathan thant nilan thayan, a' pal-puy yaarkathan thanang.
52Wiyiya, nil moom pi'an anangan kuchan thanang than yipam pam pi'an ke'-ngul iiyayn
a' work pi'an ngul thee'an pam wanch al-alantan than pam pi'anan ke'aman yumpwuntan.
53Nil may minh min paththamana pam wanch al-alantan thee'-thee'an thant meechan wun-wuntan may ke'anangan,
a' putha nil pam wanch ma'mangkiy anangan ma'lip kuchan thanang.
54-55A' nilan puth ma'-aath-aathan thanang pam wanch nungantam anangan, Jews anangan.
Puth nil keenkanaman thaw thant Abraham.ant a' wuut mangk ngamparam wiy al-alantan,
nil minam pi'ow thanang a' puth kaa'-piichanathow thanang
a' puth puk thanttam anangan ngulan aak-ngeey-ngeeyayn.
Nunangan puth ke'am kon-ngathan wik anangan nilan thaw thant, ya'a.”
Nil wik yimanangan Mary.an thaw.
56Amanamaniy-a, nil Mary.ana angman ngul wun nungantang Elizabeth.antang kep ko'alamakama a' kan-ngul koyam iiy aak nungantamakan.
Nil John.an Aak-Ngeey
57Anpalana, aakan kan-ngul thinth wampant Elizabeth.antan puk manyan kalow a' nil puk wuut many paththam kal. 58Wik thoo'an ya' we'aram nil puk manyan kal. Than kampan nungantam al-alangan, a' puth pam wanch wiy anangan aak thinthan wunin, than thampa wik thoo'an ngeeyin nil God.an minan iiy-iiy Elizabeth.ant. Thanana puth ngangk min-minam paththam iiy-iiyin a' putha aak nungantamakan wamp-wampin thama.
59Kinch eightang kanan want nunang puk manyan-a, than ngeen-wiy nungantam pe'anan umpina. A' pam wanch wiyangana ke' namp Zechariah waa'iythan nunang piip-kunchantanga, 60puth nil Elizabeth kaath-kunchan thaw, “Ya'a, ngamp nunang John waa'āmp.” 61Thanan puth thawin nunganta, “Wanttak a? Ngul kampan nungkaram namp John wuntan ey? Ya'a!” 62A' thanan mal thee'in nungant Zechariah.antan, a' engkin nungant namp wanttakan wunow nungant puk nhengk nungantam alantan. Puth Zechariah.ana wik ke'anang yippak iiy-iiy. 63A' nil mal anman thee' thant latakan a' nil ump, “Namp nungantiya Johna.” Than puth thaa'am ikin. 64A' nil Zechariah.ana kan-ngul paththam wikan thaw a' nil thaa'-kuumpan nunang God.an.
65Puth than yotana winynyang ngul mo'in a' popam anman nyiinin. 66Than pam wanch al-alangamana wik thoo'an puy-puyam ngul we'-we'arathin pam wanch yotantan, aak yoykathiy Judea angan. A' thanan puth thanttakaman ngaantam-ngeeyin, “Puk many inan nil wanttak nath emowa? Nil emowan-a, nil pam pi'an nath iiyowa.” Than puth kan mee'miy nil God.an nungantang angman iiy-iiy, thayanaman pi'-pi'an.
Nil Zechariah Alangan Wik God.antaman Waa'-Waa' Thant
67Amanamaniya nil Ngeen-Wiy God.antamana ngangkang ngoonch piip-kunchantang Zechariah.antang, a' nil wik God.antaman waa'-waa' thant:
68“Ngamp yotamangana thaa'-kuumpāmp nunang God ngamparamana.
Nilaniya ngul wampow yipam pam wanch nungantam anangan kaa'-piichanathow thanang way thanttam anpalan,
a' anpalaniya ngangk min wunow thant.
69Nil pam ngul kuchow ngampangan kaa'-piichanathow, nil pam thayan paththam.
Wuut mangk pam ilantamana, David, nil thamp pam God.antaman.
70-71Than prophets al-alangan keenkanaman wik God.antaman wantin ngampar.
Thanan thawin nil God.angan kan-kanam kaa'-piichanathow ngampang pam wanch al-alantaman thanan kaangk ke' ngampangan, a' putha way thakan yumpantan ngampar.
72Nil God.an kan-kanam thaw wuut mangk ngamparam al-alantan nil minan iiyow thant a' ngampar tham.
Wik anangan ke'am kon-ngath nunang nilan thaw thant.
73-74Nilan kaa'ngak nunang Abraham.an, nil kaa'-piichanathowan ngampang
ngamp yipam ke'-ngul winynyang mo'āmp nungantam God.antaman,
a' putha work ngangk minangam iiy-iiyāmp nungant,
75puth min anman iiy-iiyāmp mee' nungantang ngulakam ngamp man-yetham yippakan iiy-iiyanamp.”
76A' nil Zechariah.an thaw ngul puk many nungantam alantan John.ant, wik God.antaman waa' nungant:
“Nintiya, nhengk ngatharama, nil God wuut pi'an alangan work pi'an thee'ow nungk wik nungantaman yipam waa'ān pam wanchantan.
Nintiy putha keenk ngul iiyān, a' wik waa'ān thant nil Lord.an ngulan wampow,
77a' puth waa'ān thant pam wanch nungantam al-alantan nil ngulan kaa'-piichanathow thanang
a' puth way thanttaman ngul kon-ngathow nunangan.
78-79Puth ngampaniya ke' aak ngaa'ang yimanangan wunanamp, winynyang mo'anamp, mulan kaangk ke' wunāmp.
Puth nil God ngamparaman min iiy-iiyan ngampar, nil ngangk mam-maman ngampang,
nil puth pamana anpal keny ngul kuchow ngampar.
Niliy ke' thum nganth yimanangan iiyow ngampara,
nil woyan God.antaman meenathow ngampar
a' nil ma'-aath-aathow ngampang ngamp yipam woyan nungantaman ngangk minangam wak-wakāmp.”
Nil Zechariah.an yimanangan thaw.
80Puk wuut many John.ana, pi'an ngul em a' ngangk minangam God.an monkan-wak-wak nunang. Nil pam ngulan iiy-a, nil ka'athaman aak pintalang wun-wun. Anpalana, nil wamp thant pam wanch aak Israel punchan al-alantan yipam wikan waa'ow thant.