Nil Jesus.an Koyam Iiy Aak Nungantamakan
61A' nil Jesus.angana aak anana want ngul a' nil iiy ngul koyam aak nungantamakan, ngurp nungantam anangan-a, karpam iiyin nungantangwey. 2Aak Saturday ngulan-a, aak thant ngench thayanan wun-a, nil Jesus.angana kan-ngul thaa'-aath-aath thanang pam wanch anangan aak churchangan. Pam wanch yota angman churchangana, than wikan ngeeyin nunang Jesus.an-a, than yot anangana mee'am ikin, a' thawin ngula, “Nil pam inana nil wik inangan want-wanttak thiich e? Nil inan wanttinpal kuchek waap minaniy uw e? A' puth nil work pi'-pi'anam inangan want-wanttak yumpan e? 3Pam nil aawuchan kaach-kaachan ya' ey? Puk otham Mary.antamaniy ey? Nil puth anman ey! Pam kuunch nungantama inanganante! -- James-a, Joseph-a, Judas-a, a' Simon, a' putha wanch kuunch nungantam inangan wuntan e!” Than wik yimanangan thawin, thanan puth kaangk ke' wik ngeeyayn nunang Jesus.ana. 4A' nil Jesus.an thaw thant, “Nil wee'angan nathweya wik God.antamana waa'-waa'iy kampan nungantamakaniy-a, than anangan ke'-ke'am nungantama, puth ke' wik ngeeyiythan pam alantama, pam wanch wiy nath-nathan wuntan-a, than ep wik nungantaman ngeeyantan.”
5Nil Jesus.angana pam wanch alpan ko'alam al-alantan thonakama ma' wunp thant a' miyalath thanang, nil work pi'-pi'anam yota ke' yumpiy thant aak angana, ya'a. 6Nil puth mee'am ika, than puth pam wanch aak anganan wun-wunin-a, ke'am ngangk thee'in nungant, ya'a.
Jesus.angan Ngurp Nungantam Twelve Anangan Kuch Thanang Nath-Nathangan Iiyayn
Nil Jesus.ana aak angman pal-puyam iiy-iiy, aak village thon-thonan uw, a' kan-ngul pam wanch thaa'-aath-aath thanang. 7A' nil pam ngurp nungantam twelve anangan karpam yalmath thanang a' thaw thant kuch-kucham iiy-iiyayn pam wanchant, wik minan waa'ayn thant. Nil thaw thant a' puth thayanam yump thanang yipam oony way anangan kenth-kenthayn pam wanch al-alantaman ngangkangan pi'-pi'inwey. 8A' nil wik thayan thaw thant, “Niiy ma'lip iiyāna, yuk pil thook thonakama kalāna. Niiy may breadana ke' kalāna, a' niiy bag ke' kalān mayakan. A' niiy wukal ke' kalān. 9Niiy tha' murrukana ngoonchāna, a' putha niiy ke' kalān ngook kuchamana, thonam anman ep kalāna.” 10A' nil wik inangan thaw thant, “Niiy nathwey aak townang kanan ngoonchān-a, a' than wiy anangan umang iiy-iiyiythan niiyantwey, a' ngangk minangam ngoonchathiythan niiyangwey aawuch thanttamakan. Yaa, niiyaniy-a, aak angman wunān aawuch thanttamangan a' anpalman ngul iiyān aak thonak ngulana. 11Niiy nathwey aak town thonak ngulan wampān-a, a' than umang ke'wey iiyiythan niiyantaniy, a' puth than wik kaangk ke' ngeeyiythan niiyantam. Yaa, niiyaniya aak anana too wantāna, a' tha' wook wunyathān, puth anpalan than kaangk ke' wik niiyantaman ngeeyayn. Than thathayn niiyang yimanangan yumpān-a, thanan nath ngul ngaantam-ngeeyayn thanttakaman than way-wayam paththaman iiy-iiyantan.” Nil Jesus.an wik yimanangan thaw thant ngurp nungantam al-alantan.
12Amanaman-a, than kan-ngul iiyin, a' wik minan kan-ngul thaa'-aath-aathin pam wanchana, woyan wayan ke' wakayn, woyan min anana wakayn. 13A' oony yot anangan kenth-kenthin pam wanchantamwey ngangkangan pi'-pi'in, a' putha yuk olive oilan yeech-yeechin thanttang al-alantangan weech-weech thanangan, a' amanamaniya than miyal ngul wunin.
Nil John.an Mul Wun, Pam Nilan Kuchekan Kuungk-Kuungk Thanang
14Anpalana, nil King Herod.angana wik ngeey Jesus.antamana puth wik thoo' kanam we'aram nungantam work pi'-pi'anaman nilan yump-yumpan. Pam wanch wiy anangan thaw-thawin, “Nil pam nanman John.an ey? kuchekan kuungk-kuungk thanang ey? Nil mulaman kan ek ey? Nan nilama, nil ke'-paal work pi'an nanangan yump-yumpana! Ngananiya ke' nunang thath-thathanana.” 15Puth wiy anangan thawin, “Nilana Elijah paththama!” A' wiy anangan thawin, “Nilana pam prophet ey? ke' pam prophets keenkanaman wunin ey?”
16Nil Herod.ang wik inangan ngeey-a, nil thaw, “Nil pam nanman John.ana! kuchekan kuungk-kuungk thanang! Ngay ka'athangaman thawangan thant kuchek nungantaman thalokang umpayn, puth nil mulaman koyam ek ey!” 17Nil puth King Herod.ana ka'athangaman thaw thant pam nungantam al-alantan workan iiy-iiyin nungant, “Ayyang, niiy pam nanan John mamān nunanga!” A' thananiya mamin nunang, a' thap-thapam kathin nunang, a' kalin nunang jailak. Nil Herod.angan puth kaangk ke' ngeeyow nunang John.angan wak-wakow nunang wanch nungantam alantaman, nil puth wanch pont-kunchan ma'am piiyan Philip.anweya, nil ngul wanch nungantakam maayana, wanchaniy nampa Herodiasa. 18Puth nil John.ana nathpalman thaw-thaw nungant, “In min ya'a nint wanch nalantangan wun-wunangana. An wanch nungkar ya'a! An wanch pont nungkaram alantamana! Nint wik thayan God.antam pip-pipangan ey!”
19Nanpalaniy-a, nil wanch Herodias.angana ngangk-wayang kal-kal nunang, John.an, nil kaangk mulathow nunang, puth ya'a, 20nil puth Herod.an winynyang mo' John.antaman, nil mee'miy nunang pam min-minam paththam, nil ke'-paal week nunang wiyangan ke' yipam mulathayn nunang. Nil ngeey-ngeey nunang wikan waa'-waa'-a, kuchek way wun nungant Herod.antan. Puth nungkway kuchek way wunant-a, nil kaangk ngeeyow nunanga!
21Nil wanch Herodias.angana ngaantam-ngeey nungantakam nil John.an wanttakan mulathow nunang, nil puth kuup-kuup yippaka. Ngul anpalaniya, aakana kan wamp King Herod.antamakan birthday wun. Nil Herod.an thaw thant may pi'anan yumpayn thant moom pi'-pi'anant al-alantan, Government anangan-a, a' puth thant moom thanttam soldiers al-alantaman, a' puth pam wanch pi'-pi'anam aak Galilee anpalman wampina. 22A' nil puk otham Herodias alantaman ngoonch-a, nil-nilam kee'-kee' mee' yotantangana. Nil Herod.ana a' pam wanch yotam anangana puth ngangk min wun thanta, nil puth King Herod.an thaw nungant wanch koman alantan, “Ngay inan kan-kanam thawang nungkara. Nint ngeenakan kaangk thawān ngath-a, an ngay thee'āng nungkaran.” 23Nil ma'-yotam thaw nungant nil kan-kanam kaa'ngak nunang, “Ngay inan kan-kanam thawang nungkar. Nint ngeenakan kaangk thawān ngath-a, an ngay erkam thee'āng nungka. Nintwey thawān ngathwey-a, nint aak wiy anangan ngatharamana kaangk pi'ān thanang-a, an ngay puth thee'āng nungk.” 24Nil wanch komanana kaath-kunchant iiy, Herodias alantan, a' thaw nungant, “Ngay puth ngeenak thawāng nunganta?” Nil kaath-kunchan thawant, “Nint thawān nungant kuchek John.antaman thee'ow nungkara.”
25Nil wanch komanan erkam koyam iiyant King Herod alantan a' thawant, “Ayyang, nint ngathar kuchek John.antaman inman thee'ān ngatha! a' plate.ang pal kalāna!” 26King Herod.antan-a, ngangk way wunanta, puth nilan kaangk ke' mulathow nunang pam John.ana. Nil puth ke' wik pipiw wanch koman alantan nilan thaw nungant kon yotantangana kuchek John.antamakana, 27yaa, nil thaw nungant pam soldierantan kuchek John.antaman pal kalow. Nil pam soldieran iiy a' John.ana mulath nunang, kuchek nungantaman thalokang ump, 28a' pal ngul kal-kal yuk plate.ang wanch koman alantan. A' wanch koman alanganiya kaath-kunchant ngul thee', kuchekana. 29Ngurp John.antam al-alangan wik inangan ngeeyin-a, than wampin aak jailakan a' pam mulana maayin nunang, a' awarang kaampin nunang.
Nil Jesus.ang Pam Wanch Thaa'-Wantanam May Aath Thanang
30A' than ngurp nungantam ananganiya palam ngul wampin nungant Jesus.antan, nilaman kuch thanang wik nungantaman we'arathayn. Than waa'in nungant ngul than ngeen thakan yumpina, a' thaa'-aath-aathinan thanang thampa. 31Puth than pam wanch anangana yota woonch-woonchin thanta. Than Jesus-a, puth ngurp nungantam anangana, than ke' may mungkiythan-a, puth ya'a, pam wanch yot an-anman kuyam wamp-wampin nungant Jesus.antan. Nil puth Jesus.ana thaw thant ngurp nungantam al-alantan, “Ayyang, ngamp puy iiyāmpa pokkapanga, aak enyanang puy nyiināmpa, niiy yipmam ngangkang thee'ānweya.”
32Yaa, thananiya kan-ngul mo'in chukkunangan aak thonakan, than yipam aak enyanang nyiinayn than-thanama. 33Than puth pam wanch yotangan kanam thathin thanang, than mee'miy an thanamana Jesus a' ngurp nungantam anangan mo'in chukkunangan, than monkanam kuchin thanang aak wanttinakan mo'in -- yaa, thananiya kan-ngul aak village thon-thonana want-wantin ngula, a' kamp-kamp ngul mo'-mo'in aak e' wakana. A' aakana keenk uwin, pam wanch yot al-alangan a' man umputh ngul kuup-kuupin Jesus wee'anangan thant. 34Nil Jesus.ana kanan chang pey chukkunaman-a, a' nil pam wanch yot anangan thath thananga, a' nil puth ngangk mam thanang, thanan puth ke' minh sheep yimanangan, than-thanaman iiy-iiyin, ke' moom ke'anang yimanangana. Yaa, nil Jesus.angana kan-ngul yot thaa'-aath-aath thanang, wik min God.antaman. 35Kinch-wayang ngulana, ngurp nungantam Jesus.antaman wampin nungant, thawin nunganta, “Ayyang, in kinch-wayang ngula, a' aak inan man-kecha! 36Nint pam wanch anangan kuchān thanang than iiyayn aak farms aakanakan, a' puth villages aakanakan thinth-thinthan than-thantana, a' may piiyayn thanttakaman.” 37Nil Jesus.an thaw thant, “Niiyam may thee'ān thant.” Than thawin nungant, “In wanttak ee? Ngan two hundred dollars mayak thee'ān ey? Ngan may yipmam aathān thanang ey?” 38Nil puth Jesus.an thaw thant, “Niiy may bread ngeen-ngeen pi'-pi'aniya? Niiy iiyān, thathāna.” Than iiyin, a' palam wampin waa'in nungant, “Ngan may bread five pi'-pi'anan, a' putha minh nga' kucham tham.”
39Anpalaniy-a, nil Jesus.an thaw thant ngurp nungantam al-alantan, “Niiy thawān thant pungk-pungkalang nyiinayn, wakang angan, wak nyiingkanamang.” 40A' than pam wanch yot anangan aakang nyiinin ngul, pungk-pungkalangan nyiin-nyiinin, fifty-fifty a' one hundred-one hundred nyiin-nyiinin.
41A' anpalaniya, nil Jesus.angan-a, may bread a' minh nga' anangan ma'ang maay, a' mee' keny thath, a' mee'-wuthanam God.ant, thankyou thaw nungant may minh aakanakan. Nil may bread anangan pip-pip thanang, a' thee' ngurp nungantam al-alantan than yipmam kalayn pam wanch yot al-alantan. A' nil minh nga' kucham thaman pip-pip a' than thee'-thee'in thant. 42Than pam wanch ma'mangkam al-alangan mungk-mungkin ngul, a' thip oth ngul wunin. 43A' than ngurp nungantam al-alangana may nhanth anangan yalmathin a' yuk basketang wunpin. May nhanth a' minh nga' nhanth al-alangan baskets twelve thaa' mul maay.
44Pam anangan than mayan mungkin-a, an yota, thaa'-wantanam, five thousanda!
Nil Jesus.an Ngak Pal Kenyuwan Iiy-Iiy
45Anpalaniy-a, nil Jesus.an thaw thant ngurp nungantam al-alantan chukkunangan chang peyayn a' wo'uwayn keenk mo'ayn aak Bethsaida aakanakan. Than kanan mo'in-a, nil Jesus.an pam wanch thaa'-wantanam al-alantan thaw thant aak thanttamak kan iiyayn. 46Nil kanan kuch thanang-a, nil-nilam aak yoykakan iiy, nil yipam mee'-wuthanamow piip nungantamantan. 47Anpalan-a, ngaa' kanan ench-a, ngurp nungantam anangan angman chukkunang kookam pi'an angman puth nil Jesus.aniy-a, yoykang angman yippak pokkapang nyiin-nyiin. 48Nil thath thanang ench-enchin, wuntan thaamp-thaampin, an puth aak paanthanangan nil Jesus.an umang iiy thant ngul, ngak kenyangkan iiy-iiy. Nil ke' waank iiyiy-a, 49puth thanan thathin nunang ngak kenyangkan iiy-iiy. Than ngaantam-ngeeyin thanttakaman, “An oony ey?” a' than othamayan pech-pechin. 50Than thath-thathin nunangan-a, than yotaman ngangk ikin a' winynyang paththam mo'in.
Nil Jesus.an erkam thaw thant, “Niiy ke' winynyang mo'āna! In ngayam wampang niiyanta! Niiy ngangk thayanam ke' iiyin ey?” 51A' nil chang pey chukkunangan thanttang a' anpalaniya wuntan enyan ngul, kan-ngul wun-wun. Than ngurp nungantam anangan-a, mee'am ikin, 52than puth ke'am minam ngaantam-ngeeyin nil ngeenam mayan aath-aath thanang pam wanch thaa'-wantanam anangan, five thousand anangan, than puth ke' thiichiythana.
Jesus.angan Miyalath Pam Wanch Aak Gennesaret Angan
53Anpalan-a, than wo'uwayn peyin chukkunangana a' aak Gennesaret.akan wampin. Chukkun thanttaman-a, angan muuntin. 54Than chukkun kanan wantin-a, pam wanch anangan wampin, thanana thiichin nunang pam ngurp nilam Jesus.ana. 55A' thananiy pam wanch aak nath-nathpalana kamp mo'-mo'in nungant Jesus.antan; aak want-wanttingan nil-a, wik thoo'an ngeeyin, a' thanana iiyin nungant, pam wanch alpan anangan thaka pengkarangan wampathin nungant. 56Aak want-wanttinakan iiy-a, aak villagesak nath-a, aak townak natha, aak farmak nath iiy-a, than pam wanchangana pam wanch alpan anangan wampathin thanang nungant, a' wunpin thanang aak we'arang angan. Than pam wanch anangan thaa'-mamanang thawin nungant, “Ayyang, than alpan al-alangan kulich thaa'an nungkaram ke' mamiythan ey? miyal yipam wunayna?” A' than alpan al-alangan kulich thaa'an mamin nungant-a, an miyal paththam wun-wunin.