Nil Jesus.angan Pam Ma' Makar Wayanang Miyalath Nunang
31Anpalaniya, nil Jesus.an koyam ngul iiy aak church Jews.antamakan. Nil aak angmana nil pam inan ma' makar ya' yalam nungant, nilan angman nyiin-nyiin. 2Than pam wanch wiyangana Jesus.an thath-thathin nunang nil nath paman ma' min yumpowa, nath ya'a, puth aak anan Saturday, aak ngench thayan wun thanta. Thanana mee'angam kalin nunang, than puth kaangk wik aak-ya'angan waa'-waa'ayn nunang wiyantan.
3Nil puth Jesus.an pam alantan thawa, “Nint pal ingan iiyāna yotangan yipam thathayn nintang.” 4Anpalan-a, nil thaw thant pam wanch al-alantan than churchangan nyiin-nyiinin, “Ayyang, niiyalang! Kan niiy in ngeeyāna, nil wik thayan ngamparaman wanttak thawan e? An ngul kan ey? Ngamp ngul min anman kaangk iiyāmp thant pam wanchantan aak Saturday.angan ey? Ya' nathweyiy-a, ngamp nath kaangk way anman iiy-iiyāmp thantwey ey? Puth ngamp kaangk pam wanch anangan kaa'-piichanathāmp thanang ey? Ya' nathwey-a, ngamp kaangk nath wayathimp thananga.” Puth thanan angman ngul nyiin-nyiinin, popam. 5Nil Jesus.an weent a' pal-puy thath-thath thanang, a' nil man kul wamp thant pam wanch al-alantan puth nilan ngangk way wun thant puth thanan kuchek-thayan anman iiy-iiyin, wik min-minam ke'am ngeey-ngeeyin nunang. Anpalana, nil pam alantan thaw ngul, “Ayyang, nint ma'an ongkarathāna!” Nil puth pam alangana ma'an ongkarath, a' ma'an minam ngul wun. 6Than puth Pharisees al-alangan churchan erkam wantin a' yalmathwin thanttakam ngurp Herod.antam al-alantangan. Thanan wik yumpin thanttakaman Jesus.an yipam mulathayn nunang.
Pam Wanch Yot Nath-Nathpalan Wampin Nungant Jesus.antan
7Nil Jesus-a, putha ngurp nungantam anangan than kan-ngul iiyin kookam pi'anak Galilee.aka, a' pam wanch thaa'-wantanamang monkan-wakin nunang -- pam wanch aak nath-nathpalan wampin Jesus.antan -- aak Galilee.ama, putha aak Judea.ama, 8a' aak Jerusalem anpalana, putha aak Idumea.ama, putha aak anpalan Jordan River wonk pal kaawangka; a' puth aak towns Tyre-a, Sidon anpalan. Than pam wanch aak anpalman wampin nungant Jesus.antan puth thanan wik thoo' ngeeyin nungantam nil miyalath thanang pam wanch yotama.
9-10Anpalan-a, nil Jesus.angana pam wanch alpan yot anangan miyalath thanang wayaman, a' anpalana than wiy anangan puy-puyam tha'-tha'win nungantang wakan than yipam ma'ang mamayn nunang Jesus.ana a' miyalamayn yipam. Pam wanch thaa'-wantanam aak anganiy a! Jesus.an thaw pam ngurp nungantam al-alantan chukkun pal thinth-thinth wichayn nungant keenk wunowanta nil yipam angan nyiinow thanan ke' yipam wuthanathayn nunang. 11Puth pam wanch angan thampa oony way anangan ngangkangan pi'-pi'ina. Than Jesus.an thathin nunang-a, thanana umangam aakang keekin nungant a' othamayan pechin nungant, “Nintiya puk nhengk God.antam ey!” 12Puth nil Jesus.an thaa'-thayanam thaw oony al-alantan ke'an wiy al-alantan waa'ayn nilana nhengk God.antaman.
Nil Jesus.ang Ngurp Nungantaman Mi' Thanang
13Amanamaniy-a, nil Jesus.ana yoykang mat, a' nil pam wiy anangan mi' thanang, a' ump thanang wampayn nungant. 14Than kanan wampin nungant-a, nil Jesus.angan pam al-alantamana pam twelve mi' thanang nungantangan iiy-iiyayn, nilan yipmam kuchow thanang work nungantan iiy-iiyayn ngula. Nil thaw thant, “Ngay niiyang kan mi'angan niiy yipam ngatharangan iiy-iiyān. Ngay niiyang ngul kuchāng wik min ngatharaman waa'-waa'ān thant pam wanchantan, 15a' ma'-kunch yumpāng niiyang, a' ma'-aathāng niiyang, puth niiyaniya yipam oony way anangan pam wanchantaman kenthān thanang.”
16Pamiy namp inangan mi' thanang: Simona (ngul-ngulana Jesus.angana namp thon ngul thee' nunganta, Peter); 17a' putha pul kuuncham James a' John, nhengk nungantam Zebedee.antam (ngul-ngulan Jesus.angana namp thon ngul thee' pulanta, Boanerges, wik yimanangan wun: pam ke' ngakan peeyana), 18a' putha Andrew-a, a' Philip; puth Bartholomew, a' putha Matthew, a' puth Thomas, a' puth James-a, nhengk nungantam Alphaeus.antama, a' putha Thaddeus; a' putha Simona thanan waa'-waa'in nunang Patriot, nil puth aak nungantamakana kaangk wun paththama, 19a' puth Judas Iscariot. Nil pam ilangaman ngulan ma'angan thee'ow nunangan Jesus.an pam soldiers al-alantan mulathaynan nunang.
Than Waa'in Nunang Nil Jesus.angan Oony Wayan Ngangkang Pi'-Pi'
20Amanaman-a, nil Jesus.ana aakak iiy. A' pam wanch yotangan putham ngul wuthanathin nunang Jesus.ana, puth than yotweya! Nil Jesus-a, putha ngurp nungantam anangan than ke' may mungkiythan-a, puth ya'a, yot wampin thanta. 21Puth kampan nungantamang wik inan ngeeyinan-a, thananiya iiyin nungant yipam kalayn nunang thanttang, than puth pam wanch anangan thaw-thawina, “An nil weenth-weenthamana!” 22Than pam puungk wiy angman thampa, than anangan teachersa wik thayanan thaa'-aath-aathinana aak Jerusalem anpalan wampina. Thananiy thaw-thawina, “Nil oony way pi'an ngangkang pi'-pi'an nunang a! Beelzebul.ana!” Puth puungk wiy anangan pam wanch thawina, “Nil oony way pi'an alangana pam Jesus inan ma' nungantang pi'-pi'an nunanga a' ma'-kunch yump-yumpan nunang, ke'-paal nil oony way anangan kenthan thanang pam wanch al-alantamana.” 23Yaa, nil Jesus.angana pam wanch anangan yota ump thanang nungant angan wampayn a' nil wik kath ngul waa'-waa' thanta. Nil puth ke'am wik engkanangan waa' thant, ya'a. Nil wik yimanangan thaw, “Ngaywey nath kan-kanaman iiy-iiying ma' oony way alantangan-a, ngayan puth want-wanttaka oony wayan kenthāng nunangane? 24-25Yaa, kan in ngeeyāna: than kampanam nathwey pek-pekwiythan-a, a' thaamp-thaampwiythan thanttakamwey-a, yaa, than minam ke' pi'wiythan thanttakaman ya'a, aak thanttamana thayanam ke' pi'iythan, ya'a. 26Nil oony way alangan nathwey oony way wiy anangan piik-piikiy thanangan-a, pek-pekwiythan thanamana, thanan thampang aak thanttaman wayathiythan, minam ke' pi'iythan, ya'a. Thanan puth karangk ke'-ngul iiyayn, ya'a.
27“A' putha niiy in thampan ngeeyāna: nath wee'weya aawuchang pek wupam ngoonchiy aawuch pam karangk alantamangan-a, a' ma'-kuchathiy way min min-miniy nungantaman-a, yaa, puth nil ka'athaman-a, pam karangkana kuuyang kathow nunang, a' nilana kan-ngul ngoonchow aawuch nungantamangana. Nil ke'wey kuuyangan kathiy nunangan-a, yaa, nil puth pam karangkan kul thawiy nungant aawuchangan ke'an ngoonchow.
28“Inan ngaantam-ngeeyāna! Than pam wanch wiy al-alangan nath way yot yumpiythan-a, a' puth wik way thakan waa'iythan-a, an ep nath kon-ngathiy nunang piip God.an way thanan yump-yumpin, waa'-waa'in thakan. Nungkway than ma'-yotaman way yumpiythan, waa'iythan thakan-a, nath kon-ngathiy nunang, piip God.an. 29Than puth wee'-wee'anangwey wik way thakan waa'-waa'iythan nunang Ngeen-Wiy Min God.antaman-a, nil puth God.aniya ke' kon-ngathiy nunang thanan way waa'-waa'in ya'a, anman konangam pi'-pi'ow aak umpuyam.” 30(Nil Jesus.an wik yimanangan thaw puth anpalan than wiy al-alangan waa'in nunang nil oony wayan ngangkangan pi'-pi' nunang.)
Kaath-Kunch-a, A' Puth Kuunch-Kunch Wampin Nungant
31Anpalaniy-a, kaath Jesus.antama puth kuunch nungantam anangan wampin a' yoon angman than-thanin. Than wik kuchin nungant pentow thantana. 32Pam wanch yot anangan thintham nyiinin nungantangan-a, than thawin nungant, “Ayyang, kaath nungkarama puth kuunch nungkaram nan yoon than-thantan nungkara, than kaangk wik thawayn nungkar.” 33A' nil puth Jesus.an thaw thant, “Kaath ngatharaman puy wee' e? Puth kuunch ngatharam thamp puy wee' e?” 34A' nil thath thanang pam wanch yot anangan nungantangan nyiinin-a, a' thaw, “Ayyang, in ngeeyiy a! Than inangana ke' kaath ngatharama putha than ke' kuunch ngatharam thampa! 35Than wee'-wee'ananganweya natha piip ngatharam in kenyana wik ngeey-ngeeyiythan nunangan-a, an than ke' kampan ngatharam yimanangana, kaath-a, kuunch yimanangan iiy-iiyantan.”