Than Jesus.an Kalin Nunang Pilate.ant
151Anpalan-a, ngaa' thonan wamp-a, than pam pi'an anangan ngaa'thiyangam yalmathwin, than pam pi'an priests anangan, a' puth than pam wuut manth-thayan anangan, a' puth than pam pi'an anangan wik thayan anangan thaa'-aath-aathin, a' puth than councillors yot anangan. Than wik yumpin thanttakaman. A' than Jesus.an chol many kung-makanang kathin nunang, a' puy kalin nunang, a' ma'am thee'in nunang pam moom pi'an Pilate alantan. 2Nil Pilate.an thaw nungant, “Nint ina moom king Jews al-alantaman ey?” Nil Jesus.an thawant, “Nint wik nanan thawangan-a, an kan-kanama.”
3Than pam pi'an priests al-alangana waa'-waa'in nunang Jesus.an ke' nil way yot-yotaman yump-yump. 4A' nil Pilate.an thawant, “Nint koyaman ke' wik thawin thant ey? Nint kan ngeey-ngeeyangan thanang waa'-waa'antanan nintang aa?” 5Puth nil Jesus.an popam than, koyaman ke' wik thaw thant ya'a. Nil Pilate.aniy-a, mee'am ik.
Than Kuchin Nunang Jesus.an Mul Yipam Wunow
6Kaap thon-thonangan-a, may pi'anan kiingkantan Passover.an-a, nil Pilate.angan pam thon-thonam kuch-kuch thant Jews al-alantan aak jailam anpalan -- than pam wee'antan kaangk nil kuchowan-a, yaa, nil Pilate.angan pam ananim kuch thant. 7Aak an-aniyangan-a, pam namp Barabbas a' pam wiy thampan aak jailang wunin, than puth pam pi'an Government.an thaampin, kul yumpin thant, a' pam wanch wiy anangan mulathin thanang. 8A' than pam wanch Jews thaa'-wantanaman yalmathwin aak Pilate.antamakan. Thanan thawin Pilate.antan pam thonam kuchow thant jail anpalan. 9Nil puth Pilate.an thaw thant, “Ngay pam inana moom wuut pi'an niiyantam Jews al-alantaman kuchāng ey?” 10Nil Pilate.angan mee'miy thanang paththam pam pi'an priests anangan puth than mee'-wunin nungantam Jesus.antam thanan ke'-paal ma'am thee'in nunang.
11Puth than pam pi'an priests al-alangan kul yumpin thant pam wanch yot al-alantan than yipmam thawayn nungant Pilate.ant Barabbas.an kuchow thant. 12Nil Pilate.an thaw thant pam wanchant, “Ngul pam inan wanttake? Niiy puth moom pi'an niiyantaman waa'aniy nunanga!” 13Than pech-pechin nungant, “Yuk wuuyanang waanchān nunanga! A' mulathān nunanga!” 14Nil puth Pilate.an thaw thant, “Nil way ngeen yumpe?” Puth thanan othamayan pechin nungant, “Yuk wuuyanang waanchān nunanga! A' mulathān nunanga!”
15Nil Pilate.angan kaangk pam wanch ngangk min yumpow thanang, ke'-paal nil Barabbas.an kuch thant aak jail anpalan. A' nilan thaw thant soldiers al-alantan puy kalayn nunang Jesus.ana, a' piikayn nunang kuuy alangan, a' nil thaw thant ngul, “Yaa, niiy kalān nunang yuk wuuyanakana, nailang mak pungān nunangweya.”
Than Soldiers Al-Alangan Thaa'-Thengkathin Nunang Jesus.an
16Anpalana, than soldiers al-alangan Jesus.an matathin nunang aak aawuch pam pi'an alantamakana a' pek ngoonchathin nunang. A' than soldiers al-alangan soldiers wiy anangan palam umpin thanang. 17Anpalan-a, than soldiers al-alangan yaan yumpin nunang ke' moom king yimanangan, than yipam thaa'-thengkathayn nunang. Than yuk waakamam yumpin nungant ke' yuk crown yimanangan kuchekangan ngoonchow a' kuchekangan wunpin nungantang. A' than ngook ongk ke' chaapar yimanang ngoonchathin nunang. 18A' thanana man-aath-aathin nunang, a' puth salute.impungin nunang. A' than man-kee'anang thaw-thawin nungant, “Ayyang, nint moom pi'an ey? King Jews al-alantaman ey? Nint king min paththam aa! Nint man-yetham ngul-ngulakam iiy-iiyān ey?” 19A' than kuchekan piik-piikin nunang yukangan a' thaa' theekang makin nunang, a' yaan pungkang thuchin um nungantang. 20Than kanan thaa'-thengk-thengkathin nunang-a, than ngook ke' chaapar yimanangan thapathin nungantam, a' ngook nungantaman koyaman ngoonchathin nunang ngul. A' anpalana, than yoon kan-ngul kalin nunang yipam nailang pungayn nunang yuk wuuyanangan, mulakaman.
Than Jesus.an Waanchin Nunang Yuk Wuuyanangan
21Than kanan iiy-iiyin-a, than pam namp Simon uwin nunang. Nil aak kangkam wamp aak pi'anakan, a' than soldiers al-alangana thaachin nunang yuk wuuyan Jesus.antaman kalow. (Nil Simon.ana aak Cyrene punchan, nilana piip pulantam Alexander a' puth Rufus pulantam.) 22Than Jesus.ana kan-ngul kalin nunang aak Golgotha aakanakan, wik ngamparamangan waa'anampa, “Aak kuchek kaancha.” 23Ang-ngulaniya, thanan wine opar myrrh thamp nenchanathin a' thee'in nungant, puth nil Jesus.angan ke'am mungk ya'a. 24-25Anpalan-a, than nailang pungin nunang yuk wuuyanangan, a' waanchin nunang ngul, mul yipam wunow. Aak an-aniyangan-a, nine o'clock ngaa'thiyangam wun. A' than pam soldiers al-alangan ngook nungantam thakan thon-thonam aath-aathwin thanttakam, than puth yuk dice kee'-kee'in yipmam wee'angan nath uwowa. 26Than lat thampan wunpin yuk wuuyanangana, wik inangan umpin, waa'inan nunang: “Nil pam inan moom King Jews.antama.” 27Than pam soldiers al-alangana pam kucham thamp waanchin pulang Jesus.antang mulathayn pulanga, pulan way-wayam iiy-iiypul. Nil Jesus.aniy-a, menhang pulantang waanchin nunang.
29Pam wanch wiy anangan woyan wakanan iiy-iiyin. Thananiy-a, um keny thath-thathin a' kuchek wuny-wunyathin man-aath-aathin nunang Jesus.ana a' wik way-wayak thawin nungant, “Ayyang! Nint ke' aawuch ngench thayan God.antaman wayathin ey? A' kinch ko'alamang kanan wantow-a, ke' koyam ngulan kaachin ey? Puth ya' ey! 30Nint kan yuk wuuyan nanpalan ukāna, a' nungkarakaman kaa'-piichanathāna!”
31Than pam pi'an priests al-alangana a' puth than pam pi'an anangan wik thayanan thaa'an-aath-aathina, than thampang thaa'-thengkathin nunang Jesus.ana. Than thawin thanttakaman, “Nil thanang wiy ep kaa'-piichanathan ey? nil puth nungamang thamp kaa'-piichanathow ee! 32Nil nath pam inman aak keenkan nil God.angan mi'ana, aak iikanakaniy ukow kaa'-piichanathow ngampanga. Nath nilamwey-a, yaa, puth nila yuk wuuyanam anpalan ukowa! A' anpalan ngamp yipam kan-kanam ngaantam-ngeeyāmp nunanga!”
A' pul pam kucham anangan-a, karpaman waanchin pulang Jesus.antangan-a, pul thampa wik wayanang thak thaw-thawpul Jesus.antana.
Nil Jesus.an Utham Ngul, Ya'-Ngul
33Anpalana, kinch keny ngulana, aak pal-puyam ngaa' paththam wun, ngaa' anman wun three o'clockakam. 34Three o'clockan wamp-a, nil Jesus.an wik othamayan pech, wik thaa'nganth nungantamang thaw, “Eloi, Eloi, lema sabachthani?” Wik ngamparamang yimanangan thawanamp, “God ngatharam-ang! God ngatharam-ang! Nint ngeenak too wantangan ngayanga?”
35Pam wanch wiy anangan angman than-thanin-a, ngeeyin nunang, a' thawin, “Ayyang! Niiy kan ngeeyān nunanga, nil Elijah alantan pech-pechana!” 36Nil pam thonaman mo'a a' nil ngook manyan may wine pochangan punchath, a' ngook manyan-a, yuk ongkang kath, a' yuk ongkan keny maay nungant, a' thaa'ang wunp Jesus.antang. Nil paman thaw, “Kuupāmpa! Nil Elijah.an ngul nath wampow yipam yuk wuuyan anpalan ukathow nunang. Ngamp ngul nath thathāmpa!”
37Anpalan-a, nil Jesus.an wik othamayan pech, a' nil utham ngul, ya'-ngul.
38Aak an-aniyangan-a, ngook kee'an kaachin aawuch ngench thayanangan uk-uk-a, keny anpalan-a, pekakam um-menhang ya' ik. 39Pam moom soldiers al-alantamana angman than-than, um nungant Jesus.ant, a' nil thath nunang nil want-wanttak uthaman. Nilan thaw, “Nil pam inana nhengk God.antama, an kan-kanama!”
40Wanch wiy anangan angman than-thanin thamp, kecham thathin, Mary Magdalene, a' putha Mary thonan, nilan kaath-kunch James.antama (James komp alantaman), a' Joseph.antama, a' puth Salome, a' wiy anangan thamp. 41Nil Jesus.an aak Galilee.angan wun-wun-a, thanan monkan-wak-wakin nunang a' ma'-aath-aathin nunang. Wanch wiy anangan aak Jerusalem.akan wampin nungantangan, than thampang angman than-thanin, thath-thathin nunang.
Than Pam Mul Jesus.an Kaampin Nunang
42Aak ngutang ngulan-a, nil pam namp Joseph.an wamp, pam aak Arimathea anpalana. 43Nilan pam councillor, a' than yotangan min waa'in nunang. Nilana aak min aakanakan kuup-kuup, nil God.angan pam wanch yot anangan ma' nungantang ngulan pi'ow thanang. Aak an-aniyangan-a, Friday.an wun puth aak ngench thayan Jews al-alantamana ngaa' thonang ngulan wampow. (Than Fridays.an ep work iiyin, yipam Saturday.ana work ke'anang nyiinayn.) Nil puth Joseph.ana Pilate.ant wamp nungant, ngangk thayanam, winynyang ke'am mo', a' thawant, “Ngay pam mulan ke' kaling ey?” 44Nil Pilate.angan wik inan ngeey-a, nilana thaa' ik, nil puth Jesus.an kanam utham, erkaman. Nil Pilate.angan pam soldieran ump nunang, a' engk nungant, “Nil Jesus kan-ngul utham ey?” 45Nil pam soldierangan waa'ant nil Jesus kanaman utham, a' anpalana nil Pilate.an thawant Joseph.ang pam mulan kalowana. 46Nil Joseph.angan ngook ongk min piiy, a' pam mulan ukath nunang yuk wuuyan anpalan, a' kath nunang ngul ngook min ongk alangan, a' nil aak awarangan pek ngoonchath nunang -- aak awar inana, than kunttow thayan anpalan yumpin. A' nil kunttow wuut pi'anan poo tha' thaa'ang angman yipam wunow, ananiy-a, thaa' kanam ngath pam mul alantan. 47Pul Mary Magdalene putha, Mary thonana nil kaath nungantam Joseph.antamana, pulan thathpul aak wanttingan wunpin nunang pam mulana.