Nil Jesus.angan Wik Inan Waa' Thant Aak Way Paththam Ngulan Wampow
131Anpalaniy-a, nil Jesus.angan aawuch ngench thayan kanan want-a, ngurp nungantam thonam anan thaw nungant, “Ayyang, moom-ang, an thath a! Aawuch ngench thayanan min-minam paththam a! a' wuut pi'an thampa! Puth kunttow anangana achantanga, pi'an thampa!” 2Nil puth Jesus.an thaw nungant, “Ee'a, nint aawuch pi'-pi'anam inangan thath-thathangan ey? Aak ngul-ngulana than pamangan aawuch min-minam anangana ngul wayathayn, a' puth kunttow wuut pi'-pi'anam anangana aakang ngul keek-keekathayn.”
3Ngul-ngulana than Jesus wee'anangana kaawam ngul iiyin aak achantangak aak namp alantaniya yoyk Olives, a' angman nyiinin um aawuch ngench thayan aakanakan. Peter-a, James-a, John-a, putha Andrew than wampin nungant Jesus.antan a' thanama pokkapang thawin nungant, 4“Ayyang, than ngul aawuch ngench thayanan aak ngeen ngul keekathayn a? Nil puth God.angan ngeen meenathow ngant aakan kan-kanangan wampowa?” 5Nil puth Jesus.an thaw thant, “Niiy mee' yanth-yanth ngul iiyān a! Than pam wanch wiyangan ke' muukamathayn niiyang a! 6Than yot thon-thonam ngul wamp-wampayna, thananiya yaan wik uuy-uuyamayn, muukamayn than ke' ngay yimanangana, waa'-waa'ayn thanttakama, yimanangan thawayn, ‘Ngay Jesus Christa, God.angan kuchanya,’ puth ya'a. Pam wanch wiyanganiya ep wik ngeeyayn thanang. Puth wiyanganiya ya'a, wik ke' ngeeyiythan thanang ya'a. 7Niiy wik wolmp ngul ngeeyān kul karkanan pekwayn niiyantang thinth, a' niiyiya wik thoo' ngul ngeeyān aak nath-nathan pekwayn. Puth niiyana ke' winynyang mo'āna. Nungkway than nath kul pi'anan pek-pekwiythan-a, aakan ke' yippak minchowa. 8Than moom pi'an a' pam thanttam aak thon-thonaman anman pek-pekwayn; than pam wiy anangan thaa'nganth thon al-alantan ngul iiyayn a' than pekwayn. A' aakan thamp nath-nathan wunyathow, earthquake.anga. A' putha aak puungk wiyangana may ke'anang wunayn. An puth wayan chil-chil yippaka, puth ngul-ngulana ep way pi'an paththam wampow. Aak inana aak yimanangan wunow ke' wanchang pukan uwow yimanangana. Ka'athamana nila many-many uwana iimpan pek-pekanan nunang, amanamana pi'anang ngul uwan nunang pukan kalow. Aakana yimanangan wunow.”
9Nil puth Jesus.angana wik thayanath thanang, nilan thaw ngurp nungantam al-alantan, “Niiy mee' yanth-yanth iiyān puth thanana mamayn niiyanga a' courtak kalayn niiyang. Thananiya piikayn niiyang churches Jews.antam angana; a' putha than thanathayn niiyang umang pam pi'-pi'anam al-alantangan, puth niiy ngayang monkan-wak-wakaniya anpalana. Than maka puth niiyaniy-a, wik min ngatharaman anman waa'-waa'ān thanta. 10Pam wanch ngatharamangana wik min ngatharamana waa'-waa'ayn pam wanch yotantan aak nath-nathan wuntan, yaa, anpalaniya aak inan kan-ngul minchow. 11Than mamayn niiyang-a, a' umang thanathayn niiyang courtangan-a, niiyaniya ke' kuchek wayamāna, niiy ke' ngaantam-ngeeyāna niiy wanttakan thawāna, ya'a. Nil piip God.angan ngul meenathow niiyant niiy wik ngeenan thawān thant. Niiy ke' wik kuchek waap niiyantam anpalan thawān ya'a; nil Ngeen-Wiy God.antam alangana ngul meenathow niiyant, niiy wik ngeen nathan thawān thant. 12Aak an-aniyangan-a, pam wiy al-alangan-a, pam kuunch thanttam anangan ma'am thee'ayn thananga pam wiyangan mulathayn thanang; putha piipiy wiyanganiya ma'am thee'ayn puk thanttam anangan wiyangan mulathayn thanang; a' puk nhengk wiy al-alangana kaath piip thanttam ngangk-wayangam kalayn thanang a' ma'am thee'ayn thanang wiyangan yipam mulathayn thanang. 13Pam wanch yotangan ngangk-wayangam kal-kalayn niiyang, puth anpalan niiy ngayangan monkan-wak-wakaniya. Nil wee'anganweya murkanam anman monkanan-wak-wakow ngayang anman-a, ke'an eenchow-a, nilaniya ngangk aak umpuyangam wunow piip God.antangan.
Pam Way-Wayam Paththam Wampow
14“In ngeeyiya! Ngulan-a, pam thonamana, way-wayam paththam wampow, aakan wakow. Nil yuk way thanathow aak ngenchangana. Niiy min-minam ngaantam-ngeey-ngeeyān wik anangan ngayan waa'-waa'angan niiyant. Aak way inan wampowan-a, niiy aak Judea punchan nanangan-a, nath mo'ān aak yoykaka. 15Niiywey aawuch yoonan nyiin-nyiininwey-a, niiyan putha koyamana pek ke' ngoonchān aawuch niiyantamangan, way minan ke' maayān thanang -- an niiyana puy-puyam ngeetān paththam yoykakana. 16Niiy nathwey aak kangkangan wuninwey-a, niiy aawuchangana koyam ke' ngoonchān yipam way min niiyantaman maayāna, an ya'a. 17Aak inan ngulan wampow-a, an aak way wun-wunow thant wanch iimpanang al-alantana a' putha wanch pul-many al-alantan ma' puk manyangana. 18Niiy mee'-wuthanamān piip God.anta aak inana aak kaapan ke' yipam wampowa, 19an puth aak way-wayam paththam wampowa. Aak keenkanam nathpalman nil God.angan aak inan yump-a, a' aak in-inman ngula, aak ka'athaman yimanang ke'am wamp way-wayam paththaman. Ngul-ngulaniy-a, aak wayan kan-ngulan minchow-a, aak wayan chil-chil ngul wampow. 20Aak wayan wampow-a, an yaamana ke' wunow an erkama ngul minchow a' amanamana nil piip God.angan ke'-ngul wayaniy kuch-kuchow aakan minam ngul wunow. Puth aak yaamwey wayan than-thaniw-a, an puth pam wanch ma'mangkaman uthamiythan. Nil God.angana ngaantam-ngeey pam wanch nungantam anangan nilan mi' thanang, puth anpalana nilan ngaantam-ngeey aak wayan yaam ke' wuniy.”
21A' nil Jesus.an thaw thant, “Than pam wanch nath thawiythan niiyant, ‘Niiyalang, pam nilan nanana God.angan kaa'ngakan ngamparan kuchowa!’ Nath thawiythana, ‘Ayyang, nil anana!’ -- puth niiyana ke' wik ngeeyān thanttaman. 22Puth pam wiy anangana wampayn a' waa'ayn thanttakaman than ke' pam anan nil God.angan kuchan, wiyangiya ke' pam prophets anangan waa'ayn thanttakam, puth ya'a, than yaan muukamathayn niiyang. Thanan work pi'-pi'anaman ngul yumpayn thanan yipam yaan muukamathayn pam wanch God.antam anangan. 23Niiy mee' yanth-yanth iiyān thanttama. Ngay inan keenk-keenk wik thay-thayanathang niiyang.”
Nil Jesus.angan Wik Inan Waa' Nungamang Nil Palam Ngulan Wampow
24“Ngul-ngulana aak wayan ke'-ngul than-thanow, an ya'-ngul, anpalana, kinchana ngotan ngul wunow, a' putha kepana ke'-ngul park-parkow aak ngutangana, an ya'-ngul, 25thunp anangana keekayn ngul aak anpal keny, a' kinch-a, kep-a, a' putha thunp anangan pal-puyan wunayn. 26A' than pam wanchangana ngul thathayn ngayang pal uk-ukāng yuwangana, ngay pam inman God.angan kuchanya. Ngay pam pi'an a' karangk ukānga, min-minam paththama! 27Ngayana ngaantiyongk ngatharam anangan ngul kuchāng thanang nath-nathan iiyayn, kungkam-a, yiipam-a, kaawam-a, kuuwam iiyayn, a' thananiya pam wanch God.antam anangan yalmathayn thanang nilan mi' thanang, aak thon-thon nath-nathpalan yalmathayn thanang pam wanch anangan.”
Nil Jesus.angan Yuk Komantaman Thaa'-Aath Thanang
28A' nil Jesus.angana wik kath ngul waa' thant. Nilan thaw, “Niiy ngaantam-ngeeyāna yuk kom anangan. Yiikanan pentantan kangk nyiingkanaman-a, yaa, niiy mee'miy aak kayamanana kan-kanang wampan. 29A' niiy kinch ngulan thathān ngaa'an wunow-a, putha thunp anangan keekayn thakan-a, yaa, niiyana mee'miy weenān aakan thinth ngul wampan ngathar ngay palaman wampānga. 30A' niiy inan thamp ngaantam-ngeeyāna: aak anan wampowan-a, puungk wiy inanganiy niiya man-yetham yippak iiy-iiyānweya. 31Ngul-ngulana aak inana putha aak in kenyan minchow ngula. Puth wik ngatharamana ke' minchow ya'a, an anman wunow aak umpuyangam.
32“Pam wanch yotama mee'miy ya'a, aakan ngeen nathan wampow ngay palaman wampāng. Ngaantiyongk aak in kenyan wuntan-a, than thamp mee'miy ya'a, aak ngeen nathana wampow, ngay thama mee'miy ya'a. Nilam anman thonakam epa piip God.an mee'miya. 33Yaa, niiyaniya minam anman woyan God.antaman wak-wakāna, mel ke' enchān woyan min anpalana, ya'a. Puth niiyaniya mee'miy ya'a aak ngeen nathan wampow nilam thonakam piip God.an epa mee'miy. 34-36In ke' yimanangan wunowa. Nil pam pi'anan kan-ngul mo'ow tripaka. A' nil pam nungantam al-alantan thawan thant, ‘Ayyang, niiyalang, niiy aawucha, way min anangana min-minam pi'-pi'āna ngathara. Ngay work thakan ma' niiyantang wantānga.’ A' nil moom alangana pam thon-thonantana work pok-pokkapang thee'an thant, a' nil pam alantan thawan thaa'an pi'-pi'an aawuchakana, ‘Nint aawuch inan min-min thath-thathāna, -- puth ngathara thamp aak thath-thathān ngay palam ngulan wampānga.’ Nil pam moomana kinch-wayang nath palam wampowa, ya'amiya, ngaa'-menhang nath wampowa, ya'amiya, aak paanthanang nath wampow, aak paanthanang ya'wey-a, kinch kanaman penta, an-aniyangan nath wampow. Than pam nungantam anangan than mee'miy ya'a moom thanttaman aak ngeen nathan palaman wampowa, puth nilan thaw, ‘Niiy aak thath-thathān ngathara.’ An puth ke' ngay yimanangan wampāng niiyant. Ngay wampāngan-a, an puth ngay ngul ma'-pil-wayathang niiyang, ngay nath weepang uwāng niiyang. Puth ngay yimanangan ke' uwāng niiyang a! An puth way wuniy niiyanta. Yaa, niiy wik kan ngeeyan ey? Niiy mee'miy ya'a ngay aak ngeen nath palaman wampāng, puth ngay inan thawang niiyant niiyaniya min-minam iiy-iiyāna, a' woyan ngatharam anman wak-wakāna. 37Ngay niiyant thawangan a' puth thant yotamant tham thawangan: niiy aak thath-thathān ngathar.”