Niiy Ke' Waa'-Waa'ān Thanang Pam Wanch Anangan
71“Niiy ke' waa'-waa'ān thanang pam wanch anangan, a' anpalana nil God.angan ke' yipam niiyangan waa'-waa'ow. 2Niiy nathwey waa'ān wiy anangan-a, yaa, an nil God.angan ep waa'ow niiyang ke' niiyan waa'aniy thanang. 3Niiy pam wanch ngeenak waa'aniy thanang e? puth niiy ke'am ngaantam-ngeeyaniy niiyantakaman way niiyan iiyaniy e? Niiy kampan niiyantaman ngeenak thathaniy nunang ke' mee' wook many pi'-pi'an mee' nungantamangan e? puth niiyaniya epa ke' yuk pi'an paththam pi'-pi'aniy mee' niiyantamangweya, puth niiy ke'am thathana. 4Niiy puth want-wanttakan thawin kampan niiyantamantana, ‘Nint nan mee' wook thamp iiy-iiyangana, kan nint pal iiya! Ngay wookan wichāng mee' nungkaram nanpalana.’ 5In ngeeyāna: an waya! Niiy ka'athamana yuk pi'an wichān mee' niiyantam nanpalana, yaa, niiy minam ngul yipam thathān wookan wichān mee' niiyantam nanpalana.
6“Niiy ke' thee'āna ngeen nathan yuk way min ngench thayan God.antamana ku' al-alantana, puth thananiy-a, weentiythan ngula a' wakiythana, puth-a, pathiythan niiyang. A' putha niiyaniya yuk pearls niiyantamana ke' thee'ān minh nhinthan al-alantan, an than tha'angam maak-maakiythana.
Nil Piip God.angan Ngul Thee'ow Niiyant Niiy Engkān Nungantana
7-8“Nil wee'-nathan engkiy nungant God.antan ma'-aathow nunang-a, an nil God.angan ma'-aathow nunang. Nil wee'-nathan woyan God.antamak wenk-wenkiy-a, an nil God.angan ngul meenathow nungant. Nil wee'-nathan mee'-wuthanamiy nungantan-a, nil God.angan ngul ngeeyow nunang. Yaa, niiy engk-engkān nungant ma'-aath-aathow niiyang, a' woyan nungantamak wenk-wenkān, a' putha mee'-wuth-wuthanamān nungant. 9Than puk niiyantamwey thawiythan niiyanta may palowakan-a, ngul niiy kunttow thee'in thant ey? puk niiyantamakan ey? ya'a, an may min thee'in thantweya. 10A' thon inana, than puk niiyantamwey thawiythan niiyant minh nga'akan-a, ngul niiy thuuk ngotan thee'in thant ey? ya'a. 11Nungkway niiy way iiy-iiyaniy-a, niiy min-minam pi'-pi'aniy thanang puk niiyantam anangan. Puth niiy kan ngaantam-ngeeyān nunang piip God.ana. Nil ep min-minam paththam iiy-iiyan. Niiy wee'-wee'anangan thawin nungant God.antan-a, nilana min-minam paththam pi'-pi'ow niiyang.
12“Nil pam Moses alangan putha pam prophets al-alangan wik min yot wantin ngampar wik min God.antam anangan. Ngay puth wik thanttam koochanathāng niiyant -- in ngeeyāna: ke' niiyan kaangk pam wanch wiyangan min iiyayn niiyantan-a, niiy yimanangan min iiyān thant.
13-14“A' puth ngay inan thamp waa'āng niiyant. Niiy thaa' gate.an uwāna woyan aakanakan wunan aak God.antamakana. Thaa' gate inan a' puth woyan God.antamakan wunana, an pi'an we'ar ya'a, an many ulathana. Puth thaa' gate thonana, woyan thon aakanakan wunana aak wayakana, an ep pi'an we'ar, a' puth woyanan we'ar thamp. Pam wanch yot-yotam al-alangan thaa' gate we'aran uwantan, a' woyan we'aran wakantan. Puth pam wanch ko'alamang thaa' gate manyan uwantan a' woyan manyan ngul wakantan, aak God.antamakan.
May Min-Miniyan Thathanamp-a, An Yuk Minang Kalan
15“Pam wiy anangan thaw-thawantan niiyant ke' wik God.antam waa'antan, an ya' paththam, wik uuy-uuyamantan. Niiy wik thanttamana erkam ke' ngeeyāna. Thanana pam way paththam ke' ku' kulliy yimanangan puth than yaan muuk-muukamathantan niiyanga, than ke' ku' maal yimanangan wampantan niiyant yipam wayathayn niiyang, mee' wichayn niiyang woyan God.antam anpalan woyan way aakanakan. 16An puth niiy want-wanttak thiichin thanang wayanang anangana? Niiy puth ngul thathān thanang wayan yump-yumpantan. A' inan thamp ngeeyāna: ngamp may menchan yukangwey thathimp-a, yaa, ngampaniya puth mee'miy yukan nath mina, nath ya'a. Ngamp may kom ke' thuthimp yuk waakam anpalana; a' puth ngamp may kaangk anangan ke' thuthimp yuk keekachthiy anpalana. 17-18Yuk minwey thanan-a, an may way ke' kaliya, ya'a, an may min anman kal-kalan. Puth yuk thoniya kan-ngul nathwey kathaman-a, may min ke'-ngul emiy yukang angan ya'a, an may way thonakam ep kalana. 19Yukang may min ke'wey kaliy-a, pamangan yukan thalokang umpantan, a' thumang ngul kiingkantan. 20Yaa, niiy puth pam anangan thathān thanang. Ngul an than min yumpantan ey? An ya'a, an way yumpantan. Niiy mee'miy ngul iiyān than wee'-wee'anangan wayan iiy-iiyantan-a, than al-alangan wik God.antam minam ke' waa'antan niiyant, ya'a, an thanama wik uuy-uuyamantan thonakama.”
21A' Jesus inan thaw thant, “Than pam wanch yotan yaan thaw-thawantan ngathara, ‘Nintiya moom ngatharama!’ Puth thananiy-a, ma' God.antang ke' iiyiythan ke' puk nungantam anangan, ya'a. Puth pam wanch al-alangan than wik God.antaman minaman ngeey-ngeeyantan-a, an epa ma' nungantangan iiyayn ngulakam. 22Ngul-ngulaniya, nil piip God.angan pam wanch ma'mangkam ngul thanathow thanang um nungantang, a' pam wanch yotan ngul thawayn ngathar, ‘Ayyang, moom ngatharam-ang, ngay namp nungkaraman wichanganan-a, a' amanama, wik nungkaram minam ngayan waa'-waa'angan thant pam wanchantan, a' puth-a, ngay namp nungkaraman wichanganan-a, a' amanama, ngay oony way anangan pentathangan thanttam pam wanchantaman, a' ngay work pi'an thamp yump-yumpangan.’ 23A' puth-a, ngay inan ngul thawāng thant pam wanchantan, ‘Niiyiya pam wanch ngatharam ya'a, ngay ke' mee'miy niiyang, ya'a. Niiyiya pam wanch waya! puy kech iiyān aak ngatharam inpalan.’
Wik Kath Inan Aawuch Kuchamantama
24“Ngay wik kath inan waa'āng aawuch kuchamantama. Than pam wanch wee'-wee'anangana wik ngatharaman ngeeyayn-a, a' puth-a, ngangkangan pi'-pi'ayn ngul-a, an ke' than pam anan kuchek waap min yimanangana, nil aawuch aak minang thayanangan kaach nungantakamana. 25Ngul-ngulaniya, ngak kaap wuut pi'an ngulan wamp-wamp, a' ngak yee' pi'an uk-uk, aakan ngakangan ya' maay, a' putha wunt wuut pi'an wunp-wunp. Puth aawuchana ke'am keek ya'a. Anman thayanam than-than, nil puth pam alangan aawuch nungantaman aak minang thayanang kaach. 26Puth than pam wanch wee'-wee'anangan wik ngatharaman ngeeyayn-a, puth kaangk ke' ngangkangan pi'-pi'ayn-a, an ke' than pam anan kuchek wayan yimanangan, nil aawuch aak wayangan kaach, chil michanganwey. 27Ngul-ngulaniya, ngak kaap wuut pi'an ngulan wamp-wamp, a' ngak yee' pi'an ngulan uk-uk, aakan ngakangan ya' maay, a' putha wunt wuut pi'an thamp wunp-wunp. An puth aawuch nungantamana yaam ke'am than, ya'a, erkam muutathiy keek, pum!!! -- nhanth thuthanakam keek.”
28Nil Jesus.an kanan wik inangan thaw-a, than pam wanch yot anangan thaa'am ikin, 29nilan puth wik ke' pam wiy al-alangan wik Moses.antaman waa'-waa'in, an yimanangan nil ke'am waa'a, ya'a. Puth nil Jesus.angana wik waa'-waa' ke' pam God.angan kuch nunang, wik min anman waa'-waa' thant.